O le ā e Uiga i ai le Avea ma Kerisiano?​—O le ā le Manatu o le Tusi Paia?

O le toʻatele i aso nei e mitamita i le taʻua o i latou o ni Kerisiano, ae e latou te feutagaʻi ma isi i ni auala lē lelei. O se faataʻitaʻiga, o nisi e faaalia le manatu faapito, lē faamaoni, ma le lē alofa. O nisi atonu e lē faamaoni i a latou paaga faaipoipo. O na amioga ua taumānatu ai nisi tagata po o le ā moni e uiga i ai le avea ma Kerisiano.

Le uiga moni o le avea ma Kerisiano

E faigofie ona faapea mai se tasi o ia o se Kerisiano, ae e tele atu mea e aofia ai. Pe a fua i le Tusi Paia, o se Kerisiano o se tasi ua avea ma soo o Iesu Keriso. (Galuega 11:26) Na fetalai Iesu: “O outou o oʻu soo moni pe a outou tumau i aʻu upu.” (Ioane 8:31) O le mea moni, e leai se tasi e mafai ona usiusitaʻi atoatoa iā Iesu. Ae o se Kerisiano, e taumafai malosi e mulimuli i aʻoaʻoga a Iesu ma e atagia atu i le auala e ola ai. Seʻi o tatou iloiloina nisi o faataʻitaʻiga.

E faaalia e Kerisiano le alofa lē manatu faapito

Fetalaiga a Iesu: “Ua ou tuuina atu iā te outou se poloaʻiga fou, ina ia outou alolofa o le tasi i le isi. E pei ona ou alofa atu iā te outou, ia outou alolofa foʻi o le tasi i le isi. O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.”—Ioane 13:34, 35.

Mea na faia e Iesu: Na faaalia e Iesu le alofa lē manatu faapito i tagata uma, e tusa lava po o ā o latou tulaga ma talaaga. Na ia faamālōlōina ē mamaʻi, fafaga i ē na fia aai, ma ofo atu lona ola mo isi.—Mataio 14:14-21; 20:28.

Auala e gaoioi ai Kerisiano: E faaalia e Kerisiano le alofa e ala i le limafoaʻi, lē faailoga tagata ma loto faamagalo. E latou te avatu le fesoasoani iā i latou o loo manaʻomia, ma e lotomalilie e faia faataulaga mo isi.—1 Ioane 3:16.

E faaalia e Kerisiano le faamaoni

Fetalaiga a Iesu: “O aʻu . . . o le upu moni.”—Ioane 14:6.

Mea na faia e Iesu: Na faamaoni Iesu i ana fetalaiga ma mea na ia faia. E na te leʻi faia ni gaoioiga po o ni faamatalaga e faasesēina ai isi, ae na iloa o ia o se tagata faamaoni e tusa lava pe na ia feagai ai ma teteega.—Mataio 22:16; 26:63-67.

Auala e gaoioi ai Kerisiano: E lē faia e Kerisiano ni tala pepelo. E latou te totogi a latou lafoga, e lē gāoi, ma e faamaoni i ā latou taimi faigaluega. (Roma 13:5-7; Efeso 4:28) E latou te lē faia ni faiga faapiʻopiʻo, e lē kopi i taimi o suʻega, pe avatu foʻi ni faamatalaga sesē i tusi talosaga mo se galuega totogi po o isi faamaumauga.—Eperu 13:18.

E faaalia e Kerisiano le agalelei

Fetalaiga a Iesu: “Ia ō mai iā te aʻu o outou uma ua tigāina ma mafatia i avega, ona ou faafouina lea o outou. Ia outou amoina laʻu amo ma faaaʻoaʻo mai iā te aʻu, auā o aʻu o lē e agamalu ma lotomaulalo, ona faafouina ai lea o outou. Auā e avegofie laʻu amo, ma e māmā foʻi laʻu avega.”—Mataio 11:28-30.

Mea na faia e Iesu: Na faaalia e Iesu le agalelei, ma na faigofie ai ona talanoa atu tagata iā te ia. Na ia faaalia le alofa i tamaiti, faamāfanafana i ē lotomafatia, ma na ia feutagaʻi ma isi i se auala faaaloalo.—Mareko 10:13-15; Luka 9:11.

Auala e gaoioi ai Kerisiano: E talanoa ma le agalelei Kerisiano i isi ae e latou te lē ʻinaʻinā pe faia ni faamatalaga lē logolelei. (Efeso 4:29, 31, 32) E latou te faaalia le naunau i isi ma saʻili auala e fesoasoani atu ai.—Kalatia 6:10.

E faaalia e Kerisiano le faamaoni i ā latou paaga faaipoipo

Fetalaiga a Iesu: “O ē ua faatasia e le Atua, aua neʻi tuueseeseina e se tagata.”—Mareko 10:9.

Mea na faia e Iesu: E ui e leʻi faaipoipo Iesu, ae na ia faalaeiauina paaga faaipoipo ina ia faamaoni le tasi i le isi. (Mataio 19:9) Na ia lapataʻia i latou i gaoioiga e ono faaleagaina ai le faaipoipoga.—Mataio 5:28.

Auala e gaoioi ai Kerisiano: E ʻalofia e Kerisiano amioga e lē faamamaluina ai le faaipoipoga. (Eperu 13:4) E feutagaʻi paaga faaipoipo i se auala alofa ma faaaloalo.—Efeso 5:28, 33.