Aiseā e Teena ai ma le Faaaloalo e Molimau a Ieova le Auai i Sauniga e Faaalia ai le Lotonuu?

E faaaloalo Molimau a Ieova i atunuu ma a latou tagāvai. E matou te amanaʻia le mea moni e filifili isi e tautō e auauna ma le faamaoni i o latou atunuu, faʻalo i le fuʻa, pe usu le vii o le fuʻa.

Peitaʻi e filifili Molimau a Ieova e lē auai i na sauniga ona e matou te talitonu e feteenaʻi ma aʻoaʻoga a le Tusi Paia. E matou te talisapaia pe a faaalia e isi le faaaloalo i o matou talitonuga, e pei foʻi ona matou faaaloalo iā i latou e ese o latou talitonuga.

I lenei mataupu

• O ā aʻoaʻoga a le Tusi Paia o loo aafia ai?

• Ae faapefea pe afai e faamalosia e le tulafono le auai i na sauniga?

• Po o taumafai Molimau a Ieova e tetee i le vā ma tagata po o mataupu faapolotiki?

O ā aʻoaʻoga a le Tusi Paia o loo aafia ai?

O aʻoaʻoga tāua nei e lua a le Tusi Paia e aafia ai la tatou filifiliga:

• E na o le Atua e tatau ona tatou tapuaʻi i ai. Ua taʻua i le Tusi Paia, “E tatau ona e tapuaʻi iā Ieova lou Atua, ma e na o ia foʻi e tatau ona e avatu i ai le auaunaga paia.” (Luka 4:8) O tautoga e faamaoni i se atunuu ma vii o fuʻa, e masani ona iai faaupuga e folafola atu ai le tuutoina o se tasi i lona atunuu nai lo o se isi lava mea. O lea, e manatu Molimau a Ieova e sesē le faia o sa latou vaega i na sauniga.

  E manatu foʻi Molimau a Ieova o le faʻalo i le fuʻa e tutusa lea ma le faia o se gaoioiga tau tapuaʻiga, po o le ifo i tupua lea e faasā e le Tusi Paia. (1 Korinito 10:14) Ua faailoa mai e nisi o tusitala o talafaasolopito, o fuʻa o atunuu e tutusa lea ma tagāvai faalelotu. Na tusi Carlton J. H. Hayes,a o se tusitala o le talafaasolopito e faapea, “o le tagāvai e sili ona maufaatuatuaina e tagata lotonuu ma o se faailoga e sili ona tāua e tapuaʻi i ai, o le fuʻa.” Na faapea mai Daniel P. Mannix e faatatau i uluaʻi Kerisiano: “Na teena e Kerisiano le faia o . . . taulaga i le emeperoa o [Roma], ma i aso nei e tutusa lenā ma le teena o le faʻalo i le fuʻa.”b

  E ui e lē faʻalo Molimau a Ieova i le fuʻa, ae e latou te lē faaleagaina, susunu, pe lē faaaloalo i ai po o se isi lava foʻi tagāvai a se atunuu.

• E tutusa tagata uma i le Atua. (Galuega 10:34, 35) O loo taʻua i le Tusi Paia na ʻfaia e le Atua nuu uma mai i le tagata e toʻatasi.’ (Galuega 17: 26) O le māfuaaga lea e talitonu ai Molimau a Ieova e sesē le viiviia o so o se vaega o tagata, po o se atunuu nai lo o isi. E tatou te āva i tagata uma, po o fea lava le atunuu e ō mai ai ma po o fea foʻi e nonofo ai.—1 Peteru 2:17.

Ae faapefea pe afai e faamalosia e le tulafono le auai i na sauniga?

E lē tetee Molimau a Ieova i faigāmalo. E matou te talitonu o malo o se vaega o le “faatulagaga a le Atua” ua ia faatagaina. (Roma 13:1-7) E matou te talitonu foʻi e tatau i Kerisiano ona usiusitaʻi i pule o malo.—Luka 20:25.

Ae e faapefea pe a feteenaʻi tulafono a le malo ma tulafono a le Atua? I nisi tulaga, e mafai ona avatu se talosaga aloaʻia faaletulafono i le malo ina ia fetuunaʻi se tulafono.c Pe a lē mafai ona faia ni fetuunaʻiga i le tulafono, e filifili ma le faaaloalo Molimau a Ieova e “usiusitaʻi i le Atua o le pule, nai lo o tagata.”—Galuega 5:29.

Po o taumafai Molimau a Ieova e tetee i le vā ma tagata po o mataupu faapolotiki?

E leai. E lē faaituʻau Molimau a Ieova i le vā ma tagata po o mataupu faapolotiki. Pe a matou lē faia ni tautoga e faamaoni i se atunuu, faʻalo i le fuʻa, pe usu le vii o le fuʻa, e lē faapea ai e matou te mananaʻo e sui faigāmalo. Peitaʻi, ona e matou te usiusitaʻi i o matou talitonuga e faavae i le Tusi Paia e faatatau i na sauniga.