Aafia i se Maʻi Faaumiumi—Pe e Mafai Ona Fesoasoani le Tusi Paia Iā te Oe?
Tali a le Tusi Paia
Ioe. E manatu mamafa le Atua i ana auauna o loo aafia i maʻi. O loo taʻua i le Tusi Paia le faamatalaga e faatatau i se tasi o ana auauna faamaoni: “E tausia o ia e Ieova i luga o le moega i lona maʻi.” (Salamo 41:3) Pe afai o e aafia i se maʻi faaumiumi, o le a fesoasoani auala nei e tolu iā te oe e feagai ai ma lenā tulaga:
Tatalo mo le malosi e tumau ai. E mafai ona e maua “le filemu mai i le Atua e silisili i mea uma lava e manatu i ai,” lea e mafai ona faaitiitia ai lou popole ma tumau ai e ui i faigatā.—Filipi 4:6, 7.
Ia iai se vaaiga saʻo. Ua faapea mai le Tusi Paia: “O le loto e fiafia e aogā auā e mālōlō ai, a o le loto e momomo e mamago ai ivi.” (Faataoto 17:22) Ia atiaʻe ou uiga agamālie, auā e lē gata e fesoasoani iā te oe i taimi faanoanoa, ae e aogā foʻi mo lou soifua mālōlōina.
Ia atiaʻe lou faamoemoe mo le lumanaʻi. O le iai o se faamoemoe e fesoasoani iā te oe e olioli ai e ui i se maʻi tugā. (Roma 12:12) Ua valoia mai i le Tusi Paia le taimi o le a “lē fai mai foʻi se tasi ua nofo ai: ʻOu te maʻi.’ ” (Isaia 33:24) O le a aumaia e le Atua le vaifofō mo maʻi faaumiumi, lea e lē mafai e le atamai faasaienisi i aso nei ona foʻia. Mo se faataʻitaʻiga, o loo faamatala i le Tusi Paia le auala o le a toe talavou ai ē ua matutua e faapea: “Ia faafouina lona tino e sili nai lo o le talavou; Ia toe foʻi o ia i aso o le malaulau o lona talavou.”—Iopu 33:25.
Ia mātau: E ui e amanaʻia e Molimau a Ieova le fesoasoani a le Atua, ae latou te saʻilia foʻi vaifofō faafomaʻi mo maʻi faaumiumi. (Mareko 2:17) Peitaʻi, e matou te lē fautuaina se vaifofō faafomaʻi patino, ona e matou te iloa e ao ona filifili e le tagata lava ia nei vaifofō faafomaʻi, e fua i lona soifua mālōlōina.