Aiseā na Tupu ai le Fasiotiga Tagata na Faia e le ʻAu Nasi? Aiseā e Leʻi Taofia ai e le Atua?

O le toʻatele e fesili i na fesili na matuā aafia totino i ni mafatiaga, ma o loo latou saʻilia e lē gata o tali mo na fesili ae o faamāfanafanaga foʻi. O isi e manatu i lenā Fasiotiga Tagata o se tulaga pito sili lea ona leaga, ma ua faigatā ai ona latou talitonu i le Atua.

Manatu sesē taatele e faatatau i le Atua ma le Fasiotiga Tagata na Faia e le ʻAu Nasi

Talafatu: E lē tatau ona fesiligia pe aiseā e leʻi taofia ai e le Atua lenā Fasiotiga Tagata.

Tala moni: E tuufesili tagata e malolosi o latou faatuatua i le māfuaaga e lē taofia ai e le Atua le tutupu o mea leaga. O se faataʻitaʻiga, na fesili le perofeta o Sapakuka i le Atua: “Aiseā ua e faataga ai le tutupu o sauāga, solitulafono, amioleaga, ma le lē alofa?” (Sapakuka 1:3, Contemporary English Version) Nai lo o le aʻoaʻia o Sapakuka, ae na faamautinoa e le Atua e faamauina i le Tusi Paia fesili na faia e Sapakuka ina ia faitau i ai tagata uma.

Talafatu: E lē o silasila alofa mai le Atua i mafatiaga o tagata.

Tala moni: E ʻinoʻino le Atua i le amioleaga ma mafatiaga e māfua mai ai. (Faataoto 6:16-19) I aso o Noa, ‘na tigā le finagalo’ o le Atua ona o le amioleaga sa iai i le lalolagi. (Kenese 6:5, 6) E mautinoa, na tigā foʻi le finagalo o le Atua ona o le Fasiotiga Tagata na Faia e le ʻAu Nasi.—Malaki 3:6.

Talafatu: O le Fasiotiga Tagata na Faia e le ʻAu Nasi o le faasalaga a le Atua mo tagata Iutaia.

Tala moni: E leʻi taofia e le Atua le faaumatiaga o Ierusalema e le ʻautau a Roma i le uluaʻi senituri. (Mataio 23:37–24:2) Peitaʻi, talu mai lenā taimi, e lē o faailogaina e le Atua se ituaiga se tasi mo le mauaina o lona finagalo malie pe faasalaina foʻi. I le silafaga a le Atua, “e leai se eseesega o tagata Iutaia ma tagata o Nuu Ese.”—Roma 10:12, Good News Translation.

Talafatu: Pe afai e iai se Atua alofa ma e ona le malosi uma lava, semanū e na te taofia le Fasiotiga Tagata na Faia e le ʻAu Nasi.

Tala moni: E ui lava e lē faapogaia e le Atua mafatiaga, ae e iai taimi e na te faatagaina ai mo se taimi lē tumau.—Iakopo 1:13; 5:11.

Aiseā e leʻi taofia ai e le Atua le Fasiotiga Tagata na Faia e le ʻAu Nasi?

E tutusa lava le māfuaaga e leʻi taofia ai e le Atua lenā Fasiotiga Tagata ma le māfuaaga ua ia faatagaina ai pea mafatiaga o tagata: ina ia foʻia finauga na lāgā i le taimi ua teʻa. Ua faailoa manino mai i le Tusi Paia, o le Tiapolo o loo pulea le lalolagi ae e lē o le Atua. (Luka 4:1, 2, 6; Ioane 12:31) E ui lava o loo aumaia i le mataupu e fesootaʻi ma lenei mataupu se faamalamalamaga atoa o le māfuaaga ua lē taofia ai e le Atua mafatiaga, ae e lua ni faamatalaga moni mai i le Tusi Paia e mafai ona fesoasoani, e faamatala ai māfuaaga e leʻi taofia ai e le Atua le Fasiotiga Tagata na Faia e le ʻAu Nasi.

1. O le faaaogāsesēina o le filifiliga saʻoloto, na māfua ai le Fasiotiga Tagata na Faia e le ʻAu Nasi. Na faailoa atu e le Atua i le uluaʻi tagata o Atamu ma Eva mea sa ia faafinagaloina mai iā i laʻua, ae e na te leʻi faamalosia i laʻua e usiusitaʻi iā te ia. Na filifili e i laʻua lava le mea e lelei ma le mea e leaga, ma o le la filifiliga leaga ma filifiliga leaga a isi tagata na faia a o faagasolo taimi, ua aumaia ai ni iʻuga leaga i tagata. (Kenese 2:17; 3:6; Roma 5:12) Ua moni ai le tusi Statement of Principles of Conservative Judaism: “Ua māfua le tele o mafatiaga i le lalolagi ona o le faaaogāsesēina o le filifiliga saʻoloto ua tuuina mai iā i tatou.” Nai lo o le aveesea o la tatou filifiliga saʻoloto, ua tuuina mai e le Atua i tagata se taimi e latou te taumafai ai e pulea i latou lava e aunoa ma lana taʻitaʻiga.

2. E mafai e le Atua ma o le a ia aveesea tigā ma mea leaga uma ua māfua mai i le Fasiotiga Tagata na Faia e le ʻAu Nasi. Ua folafola mai e le Atua o le a ia toe faatutūina le faitau miliona ua maliliu, e aofia ai ma ola na maumau i le Fasiotiga Tagata na Faia e le ʻAu Nasi. O le a ia aveesea foʻi le tigā o loo lagonaina e tagata na sao mai i lenā Fasiotiga Tagata, ona o vaaiga ma mea mataʻutia na tutupu ai. (Isaia 65:17; Galuega 24:15) O le alofa o le Atua mo tagata, ua faamautinoa ai o le a ia faataunuuina nei folafolaga.—Ioane 3:16.

O le toʻatele o tagata na maumau ola faapea ma i latou na sao mai i lenā Fasiotiga Tagata, na mafai ona faatumauina o latou faatuatua ma iloa le fuafuaga o le olaga, e ala i le malamalama i le māfuaaga ua faatagaina ai e le Atua mea leaga e tutupu ma le auala o le a ia aveesea ai āuga o na mea leaga.