Po ua Suia e Molimau a Ieova Aʻoaʻoga a le Tusi Paia Ina ia Fetaui ma o Latou Talitonuga?
E leai. Ina ua matou iloa ane e lē o ōgatusa atoatoa o matou talitonuga ma le Tusi Paia, ona toe fetuunaʻi lea o o matou talitonuga.
A o leʻi taitai faia le O le Tusi Paia—O le Faaliliuga a le Lalolagi Fou i le 1950, sa matou iloiloina totoʻa le Tusi Paia. Na matou faaaogāina so o se faaliliuga na iai i lenā taimi, ma faavae aʻe ai o matou talitonuga. Seʻi iloilo nisi o talitonuga ua leva ona iai a Molimau a Ieova, ona e filifili lea e oe lava pe ōgatusa na talitonuga ma aʻoaʻoga a le Tusi Paia.
O matou talitonuga: O le Atua e lē o se Tolutasi. Na taʻua i le lomiga o Iulai 1882 o le Zionʻs Watch Tower: “Ua uma ona iloa e la matou ʻaufaitau e faapea, e ui e matou te talitonu iā Ieova ma Iesu, ma le Agaga paia, ae e matou te teena o se aʻoaʻoga e lē faavae mai i le Tusi Paia, le aʻoaʻoga faapea o i latou nei o Atua e toʻatolu i le peresona e toʻatasi, e pei foʻi ona faaupuina e nisi, e toʻatasi le Atua i peresona e toʻatolu.”
Manatu o le Tusi Paia: “O Ieova lo tatou Atua o Ieova e toʻatasi.” (Teuteronome 6:4, The Holy Bible, tusia e Robert Young) “Ae e toʻatasi le Atua, le Tamā, e fua mai iā te ia mea uma, o i tatou foʻi ua fai mo ia; ma le Alii e toʻatasi o Iesu Keriso, ua faia e ia mea uma, o i tatou foʻi ua faia e ia.” (1 Korinito 8:6, American Bible Union Version) Na fetalai foʻi Iesu: “E sili le Tamā iā te aʻu.”—Ioane 14:28, Douay-Rheims Version.
O matou talitonuga: E leai se afi i seoli e faapuapuagatia ai e faavavau tagata. Na faavae mai le ulutala o le lomiga o Iuni 1882 o le Zion’s Watch Tower “O le Totogi o le Agasala o le Oti” mai i le faaliliuga o le King James Version o le Roma 6:23. Na taʻua i lenā lomiga: “Maʻeu le manino ma le faigofie o lea faaupuga. Peitaʻi ua taʻutino mai e le toʻatele o ē e talia le Tusi Paia o le Afioga a le Atua, e feteenaʻi lenei faaupuga manino, ma e latou te maumauaʻi foʻi ma talitonu, o loo aʻoaʻoina i le Tusi Paia, o le totogi o le agasala o le faapuapuagatia lea e faavavau.”
Manatu o le Tusi Paia: “O le tagata e agasala e oti lava ia.” (Esekielu 18:4, 20, Tusi Paia Samoa-Lomiga 1969) O le faasalaga e oo iā i latou e tetee i le Atua o le “fanoga faavavau lava” ae e lē o le faapuapuagatia e faavavau.”—2 Tesalonia 1:9, Tusi Paia Samoa-Lomiga 1969.
O matou talitonuga: O le Malo o le Atua o se faigāmalo moni, ae e lē o se mea i totonu o le loto. Na faapea mai le lomiga o Tesema 1881 o le Zion’s Watch Tower e faatatau i le Malo o le Atua: “O le mea moni, o le faavaeina o lenei malo, e aofia ai le faaumatia o malo uma o le lalolagi.”
Manatu o le Tusi Paia: “O ona po o ia tupu e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.”—Tanielu 2:44, Tusi Paia Samoa-Lomiga 1969.
Pe e faalagolago Molimau a Ieova i le Faaliliuga a le Lalolagi Fou e lagolagoina ai o latou talitonuga?
E leai. O loo faaauau pea ona matou faaaogāina le tele o faaliliuga o le Tusi Paia i la matou galuega talaʻi. O le mea moni, e ui e matou te tufa fua atu se kopi o le Faaliliuga a le Lalolagi Fou lea e faaaogā i a matou talanoaga faale-Tusi Paia e aunoa ma se totogi, ae e matou te fiafia foʻi e suʻesuʻe ma i latou o ē e filifili e faaaogā isi faaliliuga o le Tusi Paia.