O ai le Anetikeriso?
Tali a le Tusi Paia
O le anetikeriso e lē faasino atu i se tagata se toʻatasi po o se faalapotopotoga , auā ua taʻua i le Tusi Paia e “toʻatele anetikeriso.” (1 Ioane 2:18) O lea, o le upu “anetikeriso” lea e sau mai le upu Eleni o lona uiga o sē “e tetee iā Keriso,” e mafai ona faasino atu i soo se tasi e na te faia mea o lo o mulimuli mai:
Tetee o Iesu o le Keriso (Mesia) po o le faafitia o ia o le Alo o le Atua.—1 Ioane 2:22.
Tetee i le Keriso, o Lē na Faauuina e le Atua.—Salamo 2:1, 2; Luka 11:23.
Faafoliga e pei o le Keriso.—Mataio 24:24.
Sauāina soo o Keriso, talu ai e silasila i ai Iesu o le faia o na mea, o le faia foʻi lea iā te ia.—Galuega 9:5
Taʻutino mai ma le pepelo o ia o se Kerisiano, peitaʻi o loo faia le solitulafono pe taufaaʻoleʻole.—Mataio 7:22, 23; 2 Korinito 11:13.
E lē gata i le talanoa e faatatau i tagata taʻitoatasi e faia lea gaoioiga o le anetikeriso, ae ua faasino atu foʻi e le Tusi Paia i a i latou o se vaega o “anetikeriso.” (2 Ioane 7) Na uluaʻi aliaʻe mai le anetikeriso i taimi o le ʻauaposetolo ma sa olaola ai lava talu mai lenā taimi. Na valoia e le Tusi Paia lenā tulaga.—1 Ioane 4:3.
Auala e iloa ai anetikeriso
E latou te faaauilumaina manatu sesē e uiga iā Iesu. (Mataio 24:9, 11) O se faaaʻoaʻoga, o i latou e aʻoaʻoina le Tolutasi po o Iesu o le Atua o Lē ona le malosi uma, e tetee i aʻoaʻoga a Iesu, o lē na fetalai: “Auā e sili le Tamā iā te aʻu.”—Ioane 14:28.
E tetee anetikeriso i le fetalaiga a Iesu e faatatau i le auala e faagaoioi ai le Malo o le Atua. O se faaaʻoaʻoga, ua faapea mai nisi taʻitaʻi lotu na galue Iesu i malo faaletagata. E feteenaʻi lenei aʻoaʻoga ma le fetalaiga a Iesu e faapea: “O loʻu malo e lē mai le lalolagi lenei.”—Ioane 18:36.
Ua latou faapea mai o Iesu lo latou Alii, peitaʻi latou te lē o usiusitaʻi i ana poloaʻiga lea e aofia ai le talaʻia o le tala lelei o le malo.—Mataio 28:19, 20; Luka 6:46; Galuega 10:42