O le ā le Agasala?
Tali a le Tusi Paia
O le agasala, o so o se gaoioiga, se faalogona po o se mafaufauga e tetee i tapulaa a le Atua. E aofia ai le solia o tulafono a le Atua e ala i le faia o se mea sesē, po o le amiolētonu i le silafaga a le Atua. (1 Ioane 3:4; 5:17) Ua faamatalaina foʻi i le Tusi Paia le agasala o le faafitia o le faia o le mea tonu, po o le lē taulau lea i le faia o le mea saʻo.—Iakopo 4:17.
I uluaʻi gagana na tusia ai le Tusi Paia, o upu mo le agasala o lona uiga “ua misi le faailoga” po o se taulaʻiga na sini atu ai. O se faaaʻoaʻoga, sa matuā atamamai fitafita Isaraelu anamua i le sasauina o maatā ae e “lē misi.” A faaliliu le faaupuga lea i lona uiga moni, e mafai ona faitau faapea “e lē agasala.” (Faamasino 20:16) O lea, o le faia o le agasala e tai pei ai ua tatou misia le faailoga o tapulaa lelei atoatoa a le Atua.
Talu ai o le Atua na foafoaina mea uma lava, ua iā te ia le aiā e faatulaga ai tapulaa mo tagata. (Faaaliga 4:11) E tatou te tali atu iā te ia mo a tatou gaoioiga.—Roma 14:12.
Pe e mafai ona ʻalofia atoatoa le agasala?
E leai. Ua taʻua i le Tusi Paia “ua agasala tagata uma lava, ma ua lē ausia le mamalu o le Atua.” (Roma 3:23; 1 Tupu 8:46; Failauga 7:20; 1 Ioane 1:8) Aiseā?
E leʻi agasala le uluaʻi tagata o Atamu ma Eva i le amataga. O le māfuaaga, ona sa foafoaina i laʻua ia lelei atoatoa i le faatusa o le Atua. (Kenese 1:27) Peitaʻi, na la melea lo la tulaga lelei atoatoa ona o le lē usiusitaʻi i le Atua. (Kenese 3:5, 6, 17-19) Ina ua maua a la fanau, na la tuufaasolo atu le agasala ma le lē lelei atoatoa iā i latou. (Roma 5:12) Ua faapea mai Tavita le tupu o Isaraelu: “Na fanaua aʻu i le amioleaga ma le tigā.”—Salamo 51:5.
Pe e sili atu le matuiā o isi agasala nai lo isi?
Ioe. O se faataʻitaʻiga, ua faapea mai le Tusi Paia, na faia e tagata Sotoma anamua ni “agasala matuiā” ma na “matuā mamafa a latou agasala.” (Kenese 13:13; 18:20) Seʻi iloilo vala e tolu e faaalia ai le matuiā o se agasala.
Ogaoga. Ua lapataʻia i tatou e le Tusi Paia ina ia ʻalofia agasala matuiā e pei o le faitaaga, ifo i tupua, gaoi, onā, taufaavalea, fasioti tagata, ma faiga faaagaga. (1 Korinito 6:9-11; Faaaliga 21:8) Ua faaeseese mai i le Tusi Paia na agasala mai i agasala e leʻi fuafuaina pe mafaufauina, e pei o upu po o ni gaoioiga e faatigā ai i isi. (Faataoto 12:18; Efeso 4:31, 32) Peitaʻi, ua faalaeiauina i tatou e le Tusi Paia e aua le manatu māmā i so o se agasala, auā e mafai ona taʻitaʻiina atu ai i se agasala matuiā e solia ai tulafono a le Atua.—Mataio 5:27, 28.
Uunaʻiga. O nisi agasala e faia e aunoa ma le iloa o le mea o loo faafinagaloina e le Atua. (Galuega 17:30; 1 Timoteo 1:13) E ui lava e leai se faamolemolega o le faia o na agasala, ae ua faaeseese mai i le Tusi Paia mai i agasala e solia ai tulafono a le Atua ma le loto i ai. (Numera15:30, 31) O le agasala ma le loto i ai e māfua mai i se ‘loto e leaga.’—Ieremia 16:12.
Tele e faia ai. Ua faaeseese mai foʻi i le Tusi Paia se agasala e tasi le taimi na faia ai, ma se agasala e faaauau pea mo se taimi. (1 Ioane 3:4-8) O i latou o ē “faia pea le agasala ma le loto i ai”e ui lava ua uma ona aʻoaʻoina le auala e faia ai le mea saʻo, e faasalaina i latou i le faamasinoga a le Atua.—Eperu 10:26, 27.
O i latou e nofosala i le faia o agasala matuiā, e lagona le lofitūina ona o le mamafa o a latou mea sesē. O se faaaʻoaʻoga, na tusi le tupu o Tavita e faapea: “Auā ua oo i luga aʻe o loʻu ulu oʻu sesē; Ua mamafa tele mo aʻu e pei o se avega mamafa.” (Salamo 38:4) Peitaʻi ua ofo mai e le Tusi Paia lenei faamoemoe: “Ia lafoaʻi e le tagata amioleaga lona ala, ia lafoaʻi foʻi e le tagata faufau leaga ona manatu; ma ia foʻi mai o ia iā Ieova, o lē e alofa mutimutivale iā te ia, ma lo tatou Atua, auā e na te matuā faamagaloina lava.”—Isaia 55:7.