Pe e Iai se Afāina o Musika Ou te Filifilia?

“Ou te faalogologo i musika pe a amata loʻu aso, ma pe a ou alu i le taavale e ki foʻi aʻu pese. Pe a ou i le fale pe mālōlō, kiligi pe faitau foʻi, e ola ā laʻu musika. O le tele ā o taimi ou te faalogologo ai i musika.”​—Carla.

Pe e tutusa lou tulaga ma Carla? Pe afai o lea, o le a fesoasoani lenei mataupu iā te oe e olioli ai i aogā, ʻalofia lamatiaga, ma filifili ma le atamai au musika.

• Le aogā

• Le lamatiaga

• Tala a isi talavou

Le aogā

O le faalogologo i musika e mafai ona faatusa atu i le taumafaina o se meaʻai. I nei tulaga, e mafai ona aogā mo oe pe afai e saʻo le ituaiga ma le tele e te faaaogāina ai. Ia mātau:

• O musika e mafai ona faaleleia ai ou faalogona.

  “Pe a leaga le aso, ou te faalogologo i pese ou te fiafia ai ma e toetoe a o le mea lenā ou te maua ai le mapusaga.”​—Mark.

• O musika e mafai ona e toe manatua ai taimi ua teʻa.

  “E masani ā o se pese patino ou te manatua ai se mea na tupu, ma o taimi uma ou te faalogo i ai, ou te maua ai le fiafia.”​—Sheila.

• O musika e mafai ona atiaʻe ai le autasi.

  “Na maligi oʻu loimata ina ua usu le pese mulimuli i le tauaofiaga faavaomalo a Molimau a Ieova na ou auai ai. Na eseese gagana na matou tautatala ai, ae na autasia i matou e le musika.”​—Tammy.

• O musika e mafai ona fesoasoani iā te oe e atiaʻe ai uiga tāua.

  “O le aʻoaʻoina o le auala e tā ai se meafaifaaili, e fesoasoani iā te oe e atiaʻe ai le amio pulea ma le onosaʻi. E lē vave ona e iloa tā se meafaifaaili. E pau le auala e iloa ai o le faataʻitaʻi.”​—Anna.

E te silafia? O le tusi o Salamo e pito sili ona telē i le Tusi Paia, lea e faia aʻe i pese e 150.

Le lamatiaga

O nisi musika e tai pei o ni meaʻai ua leaga, lea e ono faaleagaina ai oe. Ia mātau pe aiseā.

• O le tele o pese e aofia ai faaupuga e faatatau i feusuaʻiga.

  “E foliga mai o pese lauiloa uma e faatatau i feusuaʻiga, ma ua latou manatu māmā i ai.”​—Hannah.

  Manatu o le Tusi Paia: “O le faitaaga, ma amioga lē mamā uma, po o le matapeʻapeʻa, aua lava neʻi taʻua iā te outou.” (Efeso 5:3) Ia fesili ifo, ‘Po ua avea aʻu musika ma mea e taofia ai aʻu mai i le mulimuli i lenei lapataʻiga?’

• O nisi musika e mafai ona lofitūina ai oe i le faanoanoa.

  “O nisi taimi ou te ala i pō e faalogologo i musika, lea ou te mafaufau ai i mea ou te popole ma lofitūina ai. O musika faanoanoa e mafai ona aumaia ai mafaufauga e lotovaivai ai.”​—Tammy.

  Manatu o le Tusi Paia: “O le mea e sili ona leoleoina o mea uma, ia leoleoina lou loto.” (Faataoto 4:​23) Ia fesili ifo, ‘Po o oʻu taulaʻi i mafaufauga lē saʻo ona o musika ou te filifilia?’

• O nisi musika e mafai ona faatupu ai le ita.

  “O se lamatiaga iloagatā mo aʻu le ita, lagona le lē aogā, ma musika e faatupu ai le ita. Na ou mātauina le eseese o oʻu faalogona, pe a uma ona ou faalogologo i na ituaiga o musika. Na mātauina foʻi e loʻu aiga.”​—John.

  Manatu o le Tusi Paia: “Ia outou tuu ese mai iā te outou le lotoa, o le ita, o le leaga, o upuleaga, ma e lē tatau ona sau se upu masoā mai i o outou gutu.” (Kolose 3:8) Ia fesili ifo, ‘Po ua avea aʻu o se tagata sauā, ma oo ai lava ina ou lē manatu mamafa i faalogona o isi, ona o musika ou te filifilia?’

O le ā le manatu autū? Ia filifili lelei au musika. O le mea lenā na taumafai le talavou o Julie e fai. Na ia faapea mai: “E masani ona ou iloilo aʻu pese, ma tapē so o se pese ou te iloa e lē talafeagai. E lē o se mea e faigofie, ae na ou iloa o le mea saʻo lea e tatau ona fai.”

E tai faapena le mea na aʻoaʻoina foʻi e Tara. Na ia faapea mai: “O nisi taimi e oso mai ai se pese manaia i le leitiō, ae ina ua ou faalogo i upu na ou iloa ai e tatau ona sui le alāleo. O le faia faapea, e tai pei ua aveese atu se keke manaia, ae faatoʻā tasi laʻu ū! Peitaʻi, pe afai e iā te aʻu le malosi e tetee atu ai i pese e faatatau i feusuaʻiga, o le a ou maua foʻi le malosi e tetee atu ai i le faia o feusuaʻiga a o leʻi faaipoipo. Ou te lē manaʻo e manatu māmā i aafiaga o musika iā te aʻu.”