UA FESILI MAI TALAVOU
Pe ua na o se Uō pe Feoaʻi?—Vaega 1: O le ā o Loo Taʻu Mai i Ana Gaoioiga?
Ua e tosina i se tasi o le isi itupā, ma ua e manatu o loo tosina mai foʻi lenā tagata iā te oe. E tele ina lua faifaimea faatasi i faatasitasiga, e te lua talanoa i feʻau tusitusia i le tele o taimi . . . , ma o nisi o na feʻau tusitusia e iloa ai o loo matuā faatafai mai.
Ua e fesili i ai po o le ā lana vaai iā te oe, ina ia faamautinoa ai o loo tutusa o oulua faalogona. O le tali? “Ou te vaai iā te oe ua na o se uō.”
O ā ni ou faalogona?
“Na matuā ou ita lava iā te ia ma aʻu lava! Na ma talanoa i feʻau tusitusia i aso uma, ma na ia faaalia le naunau moni iā te aʻu. Na ou atiaʻe ni faalogona fetosinaaʻi iā te ia.”—Jasmine.
“Ina ia puipuia le faigāuō a laʻu uō tama, na iai se teine na masani ona matou ō faatasi ina ia ʻalofia ai le ō na o i laʻua. A o faagasolo taimi, na pei ai foʻi o loo ma tuutala ma lenā teine. Na tele ina ma talanoa, ma amata ai loa ona ma talanoa i feʻau tusitusia i le telefoni. Na matuā faigatā lava ona ou talia ina ua ia fai mai e vaai iā te aʻu ua na o se uō, ma ina ua ou iloa o loo la tuutala ma se isi tagata.”—Richard.
“Na ma talanoa ma se tama i feʻau tusitusia i aso uma, ma o le tele o taimi e ʻfaatafai’ ai le tasi i le isi. Ae ina ua ou faailoa i ai oʻu faalogona e faatatau iā te ia, na ʻata ma fai mai, ʻOu te lē o manaʻo e ma te feoaʻi ma se isi i lenei taimi!’ Na ou tagi mo se taimi umi.”—Tamara.
O le manatu autū: Pe a e tosina atu i se isi, ae e iloa mulimuli ane e lē o tosina mai lenā tagata iā te oe, o se mea masani le lagona o le ita, māsiasi, ma faalogona tigā. Na faapea mai se tama talavou e igoa iā Steven: “Na matuā ou mafatia lava ina ua tupu iā te aʻu, ma na matuā tigā ai oʻu faalogona. Na umi lava se taimi faatoʻa ou toe talitonuina se isi.”
E faapefea ona tupu?
O feʻau tusitusia ma le faaaogāina o tuatusi e fesootaʻi ai i le initaneti, e faigofie ona atiaʻe ai faalogona fetosinaaʻi i se tasi e lē o tosina mai iā te oe. Mātau faamatalaga a nisi talavou.
“E ono talatalanoa atu se tasi iā te oe i feʻau tusitusia ina ia faapasi ai lona taimi, ma e te ono manatu ai o loo tosina mai iā te oe. Pe a ia faia faapea i aso uma, e ono faasesēina ai oe e manatu, e tāua oe iā te ia.”—Jennifer.
“Atonu e naunau moni lava se tasi e feoaʻi, a o le isi e manaʻo e tau lava ina ia iai se tasi e talatalanoa i ai.”—James.
“E ono manatu se tasi o le lafo atu o se feʻau tusitusia e ʻfaamanuia ai le pō,’ e faailoa mai ai le naunau o se isi iā te ia. Peitaʻi, atonu e lē o faalogona na o lenā tagata.”—Hailey.
“O le lafo atu o se emoji o ni foliga ʻataʻata, e ono uiga atu i le ʻfaaleuō’ po o le ʻfaatafai.’ O nisi taimi, e ono faauiga e le tagata o loo lafo atu i ai le feʻau tusitusia, i le faatafai.—Alicia.
O le manatu autū: Aua le faasesēina oe i le uaʻi mai o se tasi.
O le mea moni, e faigofie ona fai lenā faamatalaga, ae e faigatā ona faatatau. Ua faapea mai le Tusi Paia: “E sili ona faaʻoleʻole le loto nai lo o mea uma, ma e matuā leaga lava.” (Ieremia 17:9) E ono uunaʻia ai oe e atiaʻe se faiā i ou lava mafaufauga, ae e lē o tosina moni mai lenā tagata iā te oe.
O le ā e mafai ona e faia?
Ia iloilo lelei. Ia faaalu muamua se taimi e iloilo ai la oulua faiā. Ia fesili ifo, ʻPe e iai ni māfuaaga maumaututū ua ou manatu ai, e ese le auala o loo feutagaʻi mai ai lenei tagata iā te aʻu, ma le auala e feutagaʻi ai ma isi?’ Aua neʻi faatagaina ou faalogona e pulea le auala e te “mafaufau lelei” ai.—Roma 12:1.
Ia faautauta. Nai lo le uaʻi atu i faailoga e te manatu ai o loo tosina mai lenā tagata iā te oe, ae ia uaʻi lelei i faailoga e te ono manatu ai e lē o tosina mai. Aua e te vave manatu o loo tosina mai se tasi iā te oe, ona o ou lava faalogona e faatatau i lenā tagata.
Ia onosaʻi. Aua le vave ona atiaʻe ni faalogona fetosinaaʻi, seʻi vaganā ua faailoa manino mai e le tagata, e manaʻo e te lua faamasani ma feoaʻi.
Ia faamaoni. Ua faapea mai le Tusi Paia e iai “le taimi e tautala ai.” (Failauga 3:7) Afai e te fia iloa po o tosina mai le isi tagata iā te oe, talanoa saʻo i ai. Ua faapea mai se talavou e igoa iā Valerie, “Afai e lē o tutusa o oulua faalogona, e sili atu le tigā mo sina taimi pe a vave fesili i ai, nai lo le faaauau mo ni masina, ae e lē o manaʻo lenā tagata iā te oe.”
O le manatu autū: Ua faapea mai le Faataoto 4:23: “Ia leoleoina lou loto.” Afai ua e tosina i se tasi, ia vaai po o tosina mai foʻi lenā tagata iā te oe. O le vave mauaa o ni faalogona fetosinaaʻi a o leʻi iloa lelei faalogona o le isi tagata iā te oe, e tai pei o le totōina o se laau i luga o se papa malō.
Pe afai ua e iloa ua tosina mai lenā tagata iā te oe ma ua e nofosauni mo se tuugātala, ia filifili e oe lava pe ua tatau ona amata le lua faigāuō. Ia manatua, o se faaipoipoga taulau manuia e faia aʻe i se tane ma se avā e tutusa o la sini faaleagaga ma faamaoni le tasi i le isi. (1 Korinito 7:39) O le mea moni, o le a avea i laʻua o ni uō māfana i le amataga seʻia oo i le iʻuga.—Faataoto 5:18.