O le ā le Faailoga o “Aso e Gata ai,” po o le Taimi o “le Iʻuga”?
Tali a le Tusi Paia
O loo faamatalaina e le Tusi Paia mea e tutupu ma le tulaga o mea o le a iai, o le faailoga lea e iloa ai le “taufaaiʻuiʻuga o [lenei] faiga o mea” po o le “gataaga o le lalolagi.” (Mataio 24:3; Tusi Paia Samoa—Lomiga 1969) Ua taʻua i le Tusi Paia lenā taimi o “aso e gata ai” po o le taimi o “le iʻuga.”—2 Timoteo 3:1; Tanielu 8:19; Tusi Paia Samoa—Lomiga 1969.
O ā nisi o valoaga o le Tusi Paia e faatatau i “aso e gata ai”?
O loo valoia i le Tusi Paia e tele mea o le a tutupu faatasi e fai ma “faailoga” e iloa ai aso e gata ai. (Luka 21:7) Seʻi iloilo nisi o faaaʻoaʻoga:
Taua e aafia ai le lalolagi atoa. Na valoia e Iesu: “O le a siitaua atu isi atunuu i isi atunuu, ma isi malo i isi malo.” (Mataio 24:7) Na valoia foʻi i le Faaaliga 6:4 se tagata tiʻetiʻe solofanua, lea e faaata mai ai taua ma o le a “aveesea ai le filemu mai i le lalolagi.”
Oge. Na valoia e Iesu: “O le a iai foʻi oge.” (Mataio 24:7) Na valoia foʻi i le tusi o Faaaliga se isi tagata tiʻetiʻe solofanua faafaatusa, ma o lana tiʻetiʻega o le a aafia ai le lalolagi atoa i le oge.—Faaaliga 6:5, 6.
Mafuiʻe tetele. Na fetalai Iesu o le a iai “mafuiʻe i lea mea ma lea mea.” (Mataio 24:7; Luka 21:11) O le a tutupu na mafuiʻe tetele i le lalolagi atoa i le taimi o le iʻuga, lea o le a sili atu ona mafatia ma maliliu ai tagata nai lo o se isi lava taimi.
Faamaʻi. Na valoia e Iesu o le a iai “faamaʻi” o le a aafia ai le lalolagi atoa.—Luka 21:11.
Soligatulafono. E ui ua leva ona tutupu soligatulafono i le tele o senituri ua mavae, ae na valoia e Iesu o le a “faatuputeleina le amioleaga” i aso e gata ai.—Mataio 24:12.
Faaleagaina le laueleele. Ua valoia i le Faaaliga 11:18 o le a “faaleagaina le laueleele” e tagata. E tele auala o le a latou faia ai faapea, e ala i a latou faiga faapiʻopiʻo ma sauā ma o le a latou faaleagaina foʻi le siʻosiʻomaga.
Faateteleina o uiga leaga. Ua valoia i le 2 Timoteo 3:1-4, i le taimi o le iʻuga, o le a avea ai tagata ma ‘ē e lē lotofaafetai, e lē faamaoni, . . . e mumusu i maliega, e faia tala taufaaleaga, e lē amio pulea, e sauā, e lē fiafia i mea lelei, e faalata, e faaulumalō, ma faafefeteina i le faamaualuga.’ O le a matuā faateteleina le leaga o na uiga, ma o le a avea ai le taimi o le iʻuga ma “aso e sili ona faigatā.”
Fevaevaeaʻi aiga. Na valoia i le Tusi Paia i le 2 Timoteo 3:2, 3, e toʻatele tagata o le a fevaevaeaʻi ona o le leai o se “lotoaiga,” ma o le iʻuga o le a ‘lē usiusitaʻi ai fanau i mātua.’
Leai se alofa i le Atua. Na valoia e Iesu: “O le a maalili le alofa o le toʻatele.” (Mataio 24:12) Na uiga atu Iesu o le a maalili le alofa o le toʻatele o tagata mo le Atua. Na valoia mai foʻi i le 2 Timoteo 3:4, o na tagata o le a “pupū i mea faafiafia nai lo o le alolofa i le Atua.”
Faiga piʻopiʻo a taʻitaʻi lotu. Na valoia i le 2 Timoteo 3:5, o le a faafoliga tagata e pei o loo tapuaʻi i le Atua, ae e latou te lē o ola e tusa ma ana tapulaa.
Faatuputeleina le malamalama i valoaga o le Tusi Paia. Ua valoia mai i le tusi o Tanielu, i “taimi o le iʻuga” o le a faatuputeleina ai le poto saʻo i upu moni o le Tusi Paia, e aofia ai ma le iai o le malamalamaga saʻo i na valoaga.—Tanielu 12:4.
Le talaʻia o le tala lelei i le lalolagi aoao. Na valoia e Iesu: “O le a talaʻiina atu lenei tala lelei o le malo i le lalolagi atoa.”—Mataio 24:14.
Faatupulaʻia o le tauemu ma le lē ano o tagata. Na valoia e Iesu o le toʻatele o tagata o le a lē ano i faamaoniga mataʻina e iloa ai ua latalata mai le iʻuga. (Mataio 24:37-39) E lē gata i lea, na valoia foʻi i le 2 Peteru 3:3, 4, o le a iai tagata e tauemu i na faamaoniga ma matuā lē amanaʻia lava.
Le faataunuuina o valoaga uma. Na fetalai Iesu, o le a iloa aso e gata ai ona o le a faataunuuina faatasi ai valoaga uma. Ae e lē na o ni nai valoaga po o le tele o valoaga o le a faataunuuina ai.
Po o tatou ola i “aso e gata ai”?
Ioe. O le tulaga o mea o le lalolagi ma le faagasologa o mea e tutupu o loo taʻua i le Tusi Paia, ua iloa ai na amata aso e gata ai i le 1914 ma o le tausaga lenā na amata ai le Taua Muamua a le Lalolagi. Ina ia iloa pe faapefea i le leaga o tulaga o mea i le lalolagi ona faailoa mai ai ua tatou ola i aso e gata ai, maimoa i le vitiō lenei:
I lenā taimi, na pule ai le Malo o le Atua i le lagi, ma o se tasi o gaoioiga na muamua faataunuuina e le Malo, o le tuliesea lea o Satani ma ana temoni mai le lagi, ma faatapulaa a latou gaoioiga i le lalolagi. (Faaaliga 12:7-12) Ua vaaia taaʻiga a Satani i tagata ona o le tele o o latou uiga ma gaoioiga leaga, lea ua avea ai aso e gata ai ma “aso e sili ona faigatā.”—2 Timoteo 3:1.
O le toʻatele o tagata ua lagona le mafatia i nei aso e sili ona faigatā. Ua latou popole ona o le faateteleina o le fevaevaeaʻi. Ua latou fefefe foʻi ina neʻi faaumatia atoatoa tagata i le lalolagi.
Ae e iai foʻi isi o loo mafatia ona o tulaga leaga o le lalolagi, ae e iai lo latou faamoemoe. Ua latou mautinoa e lē o toe umi ona gaoioi lea o le Malo o le Atua e aveesea faafitauli o le lalolagi. (Tanielu 2:44; Faaaliga 21:3, 4) O loo latou faatalitali ma le onosaʻi i le taimi e faataunuu ai e le Atua lana folafolaga, ma ua faamāfanafanaina i latou i le fetalaiga lenei a Iesu: “O lē e tumau seʻia oo i le iʻuga, o le a faaolaina o ia.”—Mataio 24:13; Mika 7:7.