O Ai Mikaele le Agelu Sili?

Le tali a le Tusi Paia

O Mikaele, lea e faasino atu e nisi lotu iā “Sagato Mikaele,” e foliga mai o le igoa na tuuina atu iā Iesu a o leʻi afio mai i le lalolagi, ma ina ua ia toe afio aʻe i le lagi.a Na finau Mikaele ma Satani i le tino o Mose, ma na ia fesoasoani i se agelu e faaoo atu le feʻau a le Atua i le perofeta o Tanielu. (Tanielu 10:13, 21; Iuta 9) Na faamaonia mai e Mikaele le uiga o lona igoa—“O Ai e Pei o le Atua?”—e ala i le puipuia o le pulega a le Atua ma faatoʻilaloina fili o le Atua.—Tanielu 12:1; Faaaliga 12:7.

Iloilo le māfuaaga e talafeagai ai ona faapea atu o Mikaele le agelu sili, o Iesu.

• O Mikaele o “le agelu sili.” (Iuta 9) O le faaupuga “agelu sili” lea e uiga atu i le “agelu sili i agelu uma,” e na o le lua mau o le Tusi Paia o loo taʻua ai. I nei mau, o loo faaaogā ai le numera tasi, e faailoa mai ai e na o le toʻatasi le agelu sili. O le isi mau o loo taʻua ai, o le a “afio ifo le Alii lava ia mai i le lagi ma le alaga ma le leo o le agelu sili.”(1 Tesalonia 4:16) O loo iā Iesu le “leo o le agelu sili” auā o ia o le agelu sili o Mikaele.

• Ua faatonuina e Mikaele se ʻautau o agelu. “O Mikaele ma ana agelu ua tau ma le tarako,” o Satani. (Faaaliga 12:7) E iai iā Iesu le pule i le nofoaga o agaga, auā ua taʻua o ia “o se tasi o perenise tāua” ma “le perenise sili.” (Tanielu 10:13, 21; 12:1) O nei taʻu uma ua faasino atu ai Mikaele o se “taʻitaʻiʻau o le ʻautau o agelu,”e pei ona taʻua e David E. Aune i le New Testament.

  O loo taʻua i le Tusi Paia se isi igoa o se tasi e iai le pule i le ʻautau o agelu. Ua faamatalaina o “le faaaliga o le Alii o Iesu mai le lagi faatasi ma ana agelu malolosi i le afi mumū, a o ia faaoo mai le tauimasui.” (2 Tesalonia 1:7, 8; Mataio 16:27) Na afio aʻe Iesu “i le lagi . . . ma ua faia e le Atua ina ia gauaʻi atu agelu, ma pule ma ē malolosi iā te ia.” (1 Peteru 3:21, 22) E lē talafeagai pe a faapea atu na tofia e le Atua Iesu ma Mikaele, o ni taʻitaʻiʻau o agelu. Nai lo lea, e mafai ona tatou talitonu, o igoa o Iesu ma Mikaele, e faasino atu i le tagata e toʻatasi.

• “O le a tulaʻi” Mikaele ao faagasolo se “taimi o puapuaga” e leʻi tupu muamua lava. (Tanielu 12:1) I le tusi o Tanielu, o loo tele ina faaaogā ai le upu “tulaʻi” e faasino atu i se tupu o loo tulaʻi atu e faataunuu se gaoioiga faapitoa. (Tanielu 11:2-4, 21) O Iesu Keriso, lea ua taʻua o “Le Upu a le Atua,” o le a faataunuuina le matafaioi o se “Tupu o tupu” ina ia faaumatia fili uma o le Atua ma puipuia ona tagata. (Faaaliga 19:11-16) O le a ia faia faapea a o faagasolo “le puapuaga tele, e leai sona tusa talu le amataga o le lalolagi.”—Mataio 24:21, 42.