O le ā le Vaaiga a Molimau a Ieova e Faatatau i le Tatalaina o Faaipoipoga?
E matou te mulimulituʻi i le manatu o le Tusi Paia e faatatau i faaipoipoga ma le tatalaina o faaipoipoga. Na faavaeina e le Atua le faaipoipoga o se faatasiga e tumau i le vā o le tane ma le avā. E na o le pau le faavae faale-Tusi Paia e tatala ai faaipoipoga, pe afai e faia e se tasi o le paaga amioga lē mamā taufeusuaʻiga.—Mataio 19:5, 6, 9.
Pe e fesoasoani Molimau a Ieova i ulugalii ua amata ona fesagaʻia luʻi i le faaipoipoga?
Ioe, e tele auala e fesoasoani ai:
Lomiga. E fesoasoani mataupu o loo i nei lomiga ina ia toe faamalosia le faaipoipoga, e oo lava i faaipoipoga ua foliga mai e lē mafai ona toe faaleleia. Mo se faataʻitaʻiga, tagaʻi i le mataupu “Faatumau le Faanaunauga ia Mautū Lau Faaipoipoga,” “Auala e Faatoese Atu Ai,” ma le “Ia Toe Atiaʻe le Maufaatuatuaina.”
Sauniga. E matou te talanoaina fautuaga aogā o loo i le Tusi Paia mo faaipoipoga i a matou sauniga, fonotaga, ma tauaofiaga.
Toeaina. E avatu e toeaina o le faapotopotoga le fesoasoani patino i ulugalii faaipoipo, ma talanoa ma i latou i mau e pei o le Efeso 5:22-25.
Pe e mafai ona faamaonia e toeaina o le faapotopotoga le tatalaina o se faaipoipoga a se Molimau a Ieova?
E leai. E tusa lava pe e talosagaina le fesoasoani a toeaina e se ulugalii o loo feagai ma faafitauli i le faaipoipoga, e latou te lē faia le faaiʻuga mo le ulugalii. (Kalatia 6:5) Peitaʻi, pe a filifili se tasi e tatala le faaipoipoga e aunoa ma se faavae faale-Tusi Paia, e lē saʻoloto ai o ia e toe faaipoipo e tusa ai ma mataupu silisili o le Tusi Paia.—1 Timoteo 3:1, 5, 12.
O le ā le vaaiga a Molimau a Ieova i le nonofo eseese?
Ua faalaeiauina i le Tusi Paia paaga faaipoipo ina ia nonofo faatasi pea e tusa lava pe o loo iai faafitauli i le faaipoipoga. (1 Korinito 7:10-16) E mafai ona foʻia le tele o na faafitauli e ala i le tatalo faatauanau, faatatau mataupu silisili o le Tusi Paia, ma faaalia le alofa.—1 Korinito 13:4-8; Kalatia 5:22.
Peitaʻi, e iai tulaga matuiā e ono filifili ai se Kerisiano e nonofo eseese ma lana paaga faaipoipo. O se faataʻitaʻiga:
Matuā lē manaʻo e tausia le aiga.—1 Timoteo 5:8.
Sauāga ogaoga.—Salamo 11:5.
Ua matuā lamatia le itu faaleagaga. Mo se faataʻitaʻiga, e ono taumafai le paaga a se Molimau a Ieova e faamalosia o ia e solia se tulafono a le Atua. I lenā tulaga, e ono filifili ai le Molimau a Ieova e nonofo eseese ma lana paaga, ina ia faaalia ai lona “usiusitaʻi i le Atua o le pule, nai lo o tagata.”—Galuega 5:29.