O Ai le Āva a Kaino?

Tali a le Tusi Paia

O Kaino o le ulumatua a Atamu ma Eva le uluaʻi ulugalii. Na faaipoipo o ia i se tasi o ona tuafafine po o sona tauaiga vavalalata. E tatou te malamalama i lenei manatu pe a iloiloina le tala a le Tusi Paia e faatatau iā Kaino ma lona aiga.

Mea moni e faatatau iā Kaino ma lona aiga

• O tagata uma e tupuga mai iā Atamu ma Eva. Na faia e le Atua “nuu uma mai i le tagata e toʻatasi, ina ia nonofo i le fogāeleele uma.” (Galuega 17:26) Na avea Eva le āva a Atamu ma “tinā o tagata ola uma.” (Kenese 3:​20) O lea la, na ono faaipoipo Kaino i sona tauaiga na tupuga mai iā Atamu ma Eva.

• O Kaino ma lona uso o Apelu o nisi ia o tagata muamua na fananau mai iā Eva. (Kenese 4:​1, 2) Ina ua faasalaina Kaino i lona fasiotia o lona uso, na ia faapea mai: “O so o se tasi e mauaina aʻu e na te fasiotia aʻu.” (Kenese 4:​14) O ai na fefe ai Kaino? O loo faapea mai le Tusi Paia na fanaua foʻi e Atamu o “atalii ma afafine.” (Kenese 5:4) E manino mai na ono fefe Kaino i isi atalii ma afafine o Atamu ma Eva.

• I le amataga o le talafaasolopito o le tagata, o se mea masani le faaipoipo atu i se tauaiga. O se faataʻitaʻiga, na faaipoipo Aperaamo le tagata faamaoni i lona ʻafa tuafafine. (Kenese 20:12) I le Tulafono a Mose na muaʻi faasāina ai lenā ituaiga faaipoipoga i le tele o senituri mulimuli ane ai, ina ua mavae aso o Kaino. (Levitiko 18:​9, 12, 13) E foliga mai o fanau a tauaiga vavalalata i na taimi, e leʻi iai ni aafiaga leaga i o latou tino e lē pei o aso nei.

• O loo faamatalaina i le Tusi Paia le tala iā Atamu, Eva ma o la aiga o se tala moni i le talafaasolopito. O faamatalaga auʻiliʻili o ē na tupuga mai iā Atamu e mafai ona maua i le Tusi o Kenese na tusia e Mose, ma tusitusiga a tusitala o le talafaasolopito o Esera ma Luka. (Kenese 5:​3-5; 1 Nofoaiga a Tupu 1:​1-4; Luka 3:​38) O loo taʻua e tusitala o le Tusi Paia le tala iā Kaino, o se tala moni o le talafaasolopito.​—Eperu 11:4; 1 Ioane 3:​12; Iuta 11.