UA FESILI MAI TALAVOU
Pe Ou te Faatalitalia e Lelei Atoatoa Mea Uma?
Pe afai e te
faatalitalia e te sili i suʻega uma
ʻalofia ni luʻi fou neʻi e lē taulau
vaai i faitioga o se mea lē lelei
. . . , o le tali la o le fesili o loo i luga o le ioe. Ae faamata e i ai se leaga?
Aiseā e lē lelei ai le faatalitalia e lelei atoatoa mea uma?
E lē sesē lou taumafai e fai le mea e gata ai lou mafai. Peitaʻi, ua faapea mai le tusi Perfectionism—What’s Bad About Being Too Good?. “E telē le eseesega o lou taumafai e fai le mea e gata ai lou mafai ma lou taumafai e fai se mea e lē au i ai lou mafai. O se avega mamafa le taumafai e lelei atoatoa mea uma e te faia, ona e leai se tagata e lelei atoatoa.”
E lagolagoina e le Tusi Paia lenā manatu e faapea: “E leai se tagata e amiotonu i le lalolagi e na te faia pea le mea lelei.” (Failauga 7:20) Ona e te lē lelei atoatoa, o le a iai taimi e lē lelei ai au mea e fai.
Pe faigatā ona e talia na manatu? Pe afai o lea, iloilo auala e fa e mafai ona aafia ai oe i se auala lē lelei, pe a e faatalitalia e atoatoa ona lelei mea mo oe.
Lau vaaiga iā te oe. E maualuluga tapulaa e faataatia e ē faatalitalia e atoatoa ona lelei mea uma ae e iʻu ai i le lē fiafia. Na faapea mai se tamaʻitaʻi talavou o Alicia: “O le mea moni, o le a iai taimi e lē sologa lelei ai tulaga o mea. Ae afai ma tatou fasia lava i tatou ona o le lē lelei atoatoa o mea e tatou te faia, o le a mou atu ai lo tatou mautinoa. E matuā faanoanoa ai.”
Lau vaaiga i fautuaga aogā. O i latou e faatalitalia e lelei mea uma, e latou te vāai i faitioga aogā e pei o loo taumafai e faaleaga o latou talaaga. Na faapea mai le talavou o Jeremy: “Pe a ou maua se faasaʻoga, e matuā lē lelei oʻu faalogona. O le avea ma sē e faatalitalia e lelei mea uma o le a lē mafai ai ona e amanaʻia le mea e gata ai lou malosi, pe talia foʻi se fesoasoani.”
Lau vaaiga i isi. O tagata e faatalitalia e lelei mea uma e tele ina faitio i isi ma e faigofie ona iloa le māfuaaga e latou te faia ai faapea. Na faapea mai Anna e 18 ona tausaga: “Pe a e faatalitalia e lelei atoatoa mea uma e te faia, e te faatalitalia foʻi isi e ausia na tapulaa. Afai e lē ausia e na tagata na tapulaa e te matuā lē fiafia ai lava iā i latou.”
Le vaaiga a isi iā te oe. Aua neʻi faateʻia oe pe a ʻalofia oe e isi ona ua maualuluga tele au tapulaa! Ua faapea mai le talavou o Beth: “E tigāina tagata pe a fai e taumafai e ausia tapulaa maualuluga a se tasi e manaʻo e lelei atoatoa mea uma. Ma e te lē fia faauō i se tagata faapena!”
Pe e iai se auala e sili atu?
Ua faapea mai le Tusi Paia: ʻIa iloa lou magafagafa.’ (Filipi 4:5) O le tagata e magafagafa e paleni la latou vaaiga iā i latou lava ma mea e faatalitalia mai i isi.
“Ua tele aafiaga lē lelei mai i le lalolagi. Aiseā la e faaopoopo atu ai le avega mamafa o le taumafai ia lelei atoatoa mea uma? O se avega e lē mafai ona tatou amoina!”—Nyla
Ua faapea mai le Tusi Paia: “Ia savavali ma lou Atua ma le faamaulalo!” (Mika 6:8) O tagata lotomaulalo e amanaʻia le mea e gata ai lo latou mafai. E latou te lē talia se mea e lē mafai ona latou faia, pe faaalu foʻi le taimi i se mea e latou te lē mafaia.
“Pe a ou fia iloa o loo oʻu taulimaina lelei oʻu tiute, ou te talia na o mea ou te mafaia. E iai le mea e gata ai loʻu mafai.”—Hailey
Ua faapea mai le Tusi Paia: “O mea uma ua e iloa e faia e ou lima, inā faia ia ma lou malosi atoa.” (Failauga 9:10) O le fofō la mo le taumafai ia lelei atoatoa mea uma, e lē o le paiē ae o le toʻaga, ae ia ōgatusa ma uiga o loo taʻua i luga o le magafagafa ma le lotomaulalo.
“Ou te taumafai e fai aʻu galuega i le auala sili e mafai ai, ma e tuu atoa i ai loʻu fai mea mafai. Ou te iloa e lē mafai ona lelei atoatoa, ae ou te fiafia lava ona na tuu atoa i ai loʻu loto.”—Joshua