UA FESILI MAI TALAVOU
E Faapefea Ona Maufaatuatuaina Aʻu e Oʻu Mātua?
Mea e tatau ona e iloa
O le tele e te faamaoni ai o le maufaatuatuaina foʻi lenā o oe. O le usiusitaʻi i ou mātua e pei o le totogiina o se aitalafu. O loo totogi atu le aitalafu e ala i le usiusitaʻi. O le tele e te ‘totogiina’ ai le aitalafu ma maufaatuatuaina ai oe, o le tele foʻi lenā o le saʻolotoga o le a e maua mai iā i laʻua. Ae pe afai o oe o se tagata e lē maufaatuatuaina, aua la nei faateʻia oe pe a faaitiitia le ‘saʻolotoga’ e avatu e ou mātua.
O le maufaatuatuaina o oe e manaʻomia ai le taimi. E tatau ona faataunuu ou tiute tauave, a o leʻi tuu atu e ou mātua le tele o le saʻolotoga iā te oe.
TALA MONI: “I le avea ai o se talavou, ou te iloa lelei mea o loo manaʻomia e oʻu mātua mai iā te aʻu. O lea na ou faafoliga atu o loo oʻu faia na mea, ae i o le mea moni o loo oʻu faia mea na oʻu manaʻo ai i se auala faalilolilo. O lenā mea na faigatā ai ona talitonu oʻu mātua iā te aʻu. Na ou iloa mulimuli ane, e lē mafai ona ou faia lenā mea: O le lē faamaoni, e lē o le auala lenā e maua ai le tele o le saʻolotoga. E tatau ona maufaatuatuaina oe ina ia talitonuina ai.”—Craig.
Mea e mafai ona e faia
Ia tautala saʻo e tusa lava pe tigā. O i tatou uma lava e i ai taimi e sesē ai, ae o le ufiufi o a tatou mea sesē e ala i le pepelo (po o le lē faailoa atu o le mea saʻo ina ia natia ai le mea moni) o le a lē maufaatuatuaina ai oe e ou mātua. I le isi itu, pe a e atiaʻe se talaaga faamaoni ma faailoa au mea sesē, o le a iloa ai e ou mātua ua avea oe ma tagata matua. O le ituaiga tagata lena e mafai ona maufaatuatuaina.
“O le faia o mea sesē e lē faapea ai ua lē maufaatuatuaina oe, ae o le nanā o na mea sesē.”—Anna.
Ua faapea mai le Tusi Paia: “Matou te mananaʻo ina ia faia mea uma ma le faamaoni.”—Eperu 13:18.
Ia mafaufau i ai: Pe e te faailoa atu i ou mātua le mea moni pe a fesili atu po o fea e te alu ai, ma po o ā au mea o le a fai? Pe o le a e taʻu atu na o ni nai faamatalaga lea e tatau ona la iloa?
Ia faataunuu ou tiute. Ia usitaʻi i tulafono uma i le fale. Ia fai maeʻaeʻa au feʻau. Ia tausi taimi i mea e manaʻomia ona e faia. Ia fai au meaaʻoga. Ia tausisi i le taimi e tatau ai ona e taunuu i le fale.
“Pe a faataga atu e ou matua oe tou te tafafao ma au uō ma faailoa atu e tatau ona e toe foʻi mai i le fale i le 9 i le po ae e sau ua afa le 10, aua la nei e faatalitalia o le a toe faataga atu oe e tafafao ma au uō i se isi taimi!”—Ryan.
Ua faapea mai le Tusi Paia: “E tauave e le tagata lava ia lana avega.”—Kalatia 6:5.
Ia mafaufau i ai: O le ā lou talaaga e tusa ai o le tausi taimi, fai maeʻaeʻa o au feʻau, ma le usitaʻia o tulafono e tusa lava pe e te lē fiafia i ai?
Ia onosaʻi. Pe afai ua lē toe maufaatuatuaina oe e ou mātua, e manaʻomia la le tele o le taimi e toe maua ai. Ia faatalitali ma le onosaʻi.
“Sa ou lē fiafia ina ua lē tuuina mai e oʻu mātua le tele o tiute tauave a o faasolosolo ina ou matua. Ou te leʻi iloaina o le matua i tausaga e lē tutusa ma le matua i le mafaufau. Sa ou talosaga i oʻu mātua i ni avanoa e faamaonia atu ai ua ou matua. Na umi se taimi na ou faatali ai, ae na taunuu lava. Na ou iloa ai foʻi e lē maufaatuatuaina se tasi e fua i ona tausaga; ae o gaoioiga.”—Rachel.
Ua faapea mai le Tusi Paia: “ia suʻesuʻe ifo pea iā te outou po o faapeʻī outou.”—2 Korinito 13:5.
Ia mafaufau i ai: Ina ia maufaatuatuaina (toe maufaatuatuaina) oe e ou mātua, o ā nisi o mea e mafai ona e faia e ‘faamaonia atu ai le ituaiga o tagata e i ai oe’?
FESOASOANI: Ia faatū se sini o le tausi taimi, faamāeʻaina o feʻau, tausia o tulafono, po o se isi lava mea. Faailoa i ou mātua lou faanaunauga, ma fesili atu iā i laʻua i mea la te faatalitalia ina ia la toe maufaatuatuaina ai oe. Ia e galue mamafa e mulimuli i le lapataʻiga a le Tusi Paia: “Ia tuu ese le tagata tuai e tusa ai ma a outou amioga sa faia muamua.” (Efeso 4:22) E iai taimi o le a iloa ai e ou matua lou agaʻigaʻi i luma.