UA FESILI MAI TALAVOU
E Faapefea Ona Ou Teena Vaaiga Sesē?
O le ā lau vaaiga iā te oe?
Le tagata e matuā maualuga lana vaai i mea nai lo o le tulaga moni o loo iai
“Ou te taumafai ia ou fiafia ma faafilemu loʻu mafaufau i le tele e mafai ai. Aiseā ou te lē taumafai ai e fiafia i aso uma?”—Valerie.
Le tagata e matuā sesē lana vaai i mea nai lo o le tulaga moni o loo iai
“O so o se mea lelei lava ou te vaai i ai, o le mea muamua lava ou te mafaufau i ai e iai le mea la e misi, ua matuā lelei tele lenā mea, e lē o se mea moni.”—Rebecca.
Le tagata e vaai i le tulaga moni o mea o loo iai
“O le matuā maualuga o le vaai i mea nai lo o le tulaga moni o loo iai, e iʻu atu i le lē fiafia. Ae o le matuā sesē o le vaaiga i mea nai lo o le tulaga moni o loo iai e matuā lē fiafia ai le olaga. Peitaʻi, o le talia o le tulaga moni o mea ua fesoasoani iā te aʻu e vaai ai i mea e tusa ma le tulaga moni o loo iai.”—Anna.
Aiseā e tāua ai?
Ua faapea mai le Tusi Paia, “o lē ua lelei lona loto, e fai e lē aunoa lana faigaʻai.” (Faataoto 15:15) O lea la, e fiafia le tagata e teena mafaufauga sesē i taimi uma, ae saʻo lana vaai i mea o le olaga. E tele foʻi ana uō e maua. Auā o ai e fia uō i se tasi e sesē lana vaai i mea i taimi uma?
Peitaʻi, e iai faafitauli e tutupu moni i le olaga ma e oo lava i le tagata e matuā sili ona maualuga lana vaaiga i mea, e na te fesagaʻia na tulaga. O se faaaʻoaʻoga:
Atonu o le a e aafia i le tele o lipoti o taua, faiga faatupu faalavelave ma soligatulafono e lipotia e tala fou.
E te ono fesagaʻia faafitauli i le aiga.
Atonu o loo e fesagaʻia ou lava vaivaiga ma mea e te lē o taulau ai.
Atonu na faatigā atu sau uō.
Nai lo o le lē ano i faafitauli po o le faamamafa i o tatou mafaufau, ia taumafai e paleni le auala e tatou te vaai ai i faafitauli. O le saʻo o le vaai i tulaga moni o mea, o le a fesoasoani e ʻalofia ai vaaiga e matuā sesē, ma talia ai le tulaga moni o mea e tutupu i le olaga, nai lo o le avea ma mea e faavaivaia ai.
E mafai ona e fesagaʻia faafitauli e pei o matagi malolosi, ma le mautinoa e iai le taimi e toe susulu ai le lā
Mea e mafai ona e faia
Ia paleni lau vaai i ou sesē.
Ua faapea mai le Tusi Paia: “E leai se tagata i le lalolagi e na te faia le mea saʻo i taimi uma ae e na te lē faia se mea sesē.” (Failauga 7:20, Good News Translation) O ou sesē ma lou faia o mea sesē, ua faaalia ai le mea moni o oe o le tagata lē lelei atoatoa, ae e lē faapea ai ua e lē taulau.
Le auala e talia ai le tulaga moni o mea: Ia taumafai e faaitiitia le faia o mea sesē, ae aua e te faatalitalia se suiga lelei atoatoa. Ua faapea mai Kalepo: “Ou te teena le soona uaʻi i aʻu mea sesē ona e faavaivaia ai aʻu. Nai lo o lea, ou te taumafai e aʻoaʻo mai i aʻu mea sesē se auala ou te ʻalofia ai le toe faia o na mea sesē.”
ʻAlofia le faatusatusa.
Ua faapea mai le Tusi Paia: “Aua neʻi o tatou mimitavale, pe faatautavā i isi, ma matauʻa i mea a isi.” (Kalatia 5:26) O le matamata i ata o faatasitasiga e leʻi valaauliaina ai oe i luga o tuatusi e fesootaʻi ai i le Initaneti, e te lagona ai le matauʻa. O na ata e mafai ai ona avea au uō e sili ona lelei ma ou fili.
Le auala e talia ai le tulaga moni o mea: Ia talia le mea moni e lē o faatasitasiga uma e valaaulia ai oe. E lē gata i lea, o ata e tuu i luga o tuātusi e fesootaʻi ai i le Initaneti e lē o taʻuina mai ai mea uma na tutupu. Ua faapea mai Alexis, “E masani ona tuu e tagata i luga o tuātusi e fesootaʻi ai i le Initaneti na o ata o mea mananaia na tutupu, i na faatasitasiga. Ae e latou te lē faaalia faalētonu na tutupu ai.”
Ia avea ma sē e tausia le filemu, aemaise i lou aiga.
Ua faapea mai le Tusi Paia: “Afai e mafai iā te outou, ia nonofo filemu.” (Roma 12:18) E lē mafai ona tatou pulea atoatoa mea e fai e isi, ae e mafai ona tatou pulea le auala e tatou te tali atu ai. E mafai ona e tausia le filemu.
Le auala e talia ai le tulaga moni o mea: Ia taumafai e faaitiitia faafitauli i le aiga ma ia tausia le filemu e pei lava ona e faia i au uō. Ua faapea mai se talavou e igoa iā Melinda, “E tatou te lē lelei atoatoa, e iai lava le taimi e tatou te faia uma ai mea e lē fiafia ai isi iā i tatou. O i tatou e faia le filifiliga pe e tatou te tali atu i se auala filemu pe e leai.”
Atiaʻe le loto faafetai.
Ua faapea mai le Tusi Paia: “Ia faaalia foʻi lo outou loto faafetai.” (Kolose 3:15) O le loto faafetai e fesoasoani iā te oe e uaʻi atu ai i mea lelei e tutupu i lou olaga, nai lo o le uaʻi atu i mea uma e te lē fiafia i ai.
Le auala e talia ai le tulaga moni o mea: Ia iloa ou faafitauli, ae aua neʻi galo ai iā te oe mea lelei i lou olaga. Ua faapea mai se talavou e igoa iā Rebecca, “I aso taʻitasi, ou te tusia i laʻu diary se mea lelei na tupu. E faamanatu mai ai e tatau ona ou mafaufau i le tele o mea lelei e tutupu iā te aʻu.”
Ia iloilo au uō.
Ua faapea mai le Tusi Paia: “O aumea leaga e faaleagaina ai mea lelei ua masani ai tagata.” (1 Korinito 15:33) Pe afai e tou te faifaimea faatasi ma tagata e faitio, e lē mafaatuatuaina isi, ma e lē lotofaamagalo, o le a taaʻina oe i o latou uiga leaga.
Le auala e talia ai le tulaga moni o mea: Pe a feagai au uō ma faafitauli faigatā, e ono faanoanoa ma mafatia mo sina taimi. Ia fesoasoani iā i latou ae aua le faaaafia ai oe i o latou faafitauli. Ua faapea mai se talavou e igoa iā Michelle, “E lē na o tagata e sesē a latou vaaiga i mea e tatau ona tatou faifaimea faatasi i ai.”
Faitau atili i ai
Ua tatou ola i vaitaimi o loo taʻua i le Tusi Paia “o aso e sili ona faigatā.” (2 Timoteo 3:1) Pe e faigatā iā te oe ona iai pea se vaaiga saʻo i se lalolagi e tumu i vaaiga sesē? Faitau i le “Po o le a Faaiʻuina ea Mafatiaga?”