Le Atigi o le Aviivii o le Diabolical Ironclad

E nofo le aviivii e taʻua o le diabolical ironclad (Phloeodes diabolicus) i le itu i sisifo o Amerika i Mātū. E tusa ai ma faamatalaga a tagata suʻesuʻe, e mafai e lenei aviivii ona tauave se avega e pe ā ma le 39,000 taimi e sili atu ai le mamafa nai lo o le mamafa o lona tino, ma e mafai ona ola pea e tusa pe oso ai i luga se taavale. E faapefea ona ola lenei manu e ui i na tulaga?

E fesootaʻi le vaega pito i luga ma le vaega pito i lalo o le atigi o le aviivii i ni laina patupatu. O le isi ituaiga laina patupatu, e malō tiaʻa ma e na te puipuia le tino o le aviivii pe a omia ina ia aua neʻi faaleagaina, ma puipuia ai foʻi ona totoga. O le isi laina patupatu e lē malō tiaʻa, ma e mafai ona toe foʻi i le mea na iai pe a omia. O le ituaiga lona tolu o laina patupatu, e mafai ai ona fetuunaʻi le minoi o le atigi. O lenā auala, e mafai ai e le aviivii ona faaofi i totonu o paʻu o laau pe lafi i totonu o ni vaipapa vāiti lava.

E lē gata i lenā, o le sooga i le ogatotonu o le atigi o le aviivii, e iai patupatu e taʻua o blades, e pipii faatasi e pei o vaega taʻitasi o se paso, lea e mafai ai ona tauaveina se avega mamafa. O na patupatu e faia aʻe i vaega eseese o loo pipii faatasi ona o polotini. Pe a omia, e faia e polotini ni pūpū ninii lea e mafai ai e patupatu ona amoina le mamafa e aunoa ma le gaui. O na pūpū ninii e mafai ona toe faaleleia.

Ua faapea mai tagata suʻesuʻe o le atigi o lenei aviivii, e ono faataʻitaʻi i ai fausaga o taavale, auala laupapa, po o fale, e saogalemu ona e mafai ona tatalia pe tauaveina le mamafa o se mea.

O le ā sou manatu? Pe na teʻi lava ua iai le atigi o le aviivii o le diabolical ironclad? Pe na foafoaina?