Ioane 16:33—“Ua Ou Manumalo i le Lalolagi”

“Ua ou fai atu nei mea iā te outou, ina ia outou maua le filemu iā te aʻu. Ua puapuagatia outou i le lalolagi, ae ia lototetele! Ua ou manumalo i le lalolagi.”—Ioane 16:33, Faaliliuga a le Lalolagi Fou.

“Ua ou fai atu nei mea ia te outou, ina ia outou maua le manuia ia te au. E maua outou e le puapuaga i le lalolagi, a ia outou loto tetele, ua ou manumalo i le lalolagi.”—Ioane 16:33, Tusi Paia Samoa Lomiga—1969.

Uiga o le Ioane 16:33

E ala i nei upu, na faamautinoa atu e Iesu i ona soo e mafai foʻi ona latou faafiafiaina le Atua, e ui i luʻi ma omiga.

“Ua ou fai atu nei mea iā te outou, ina ia outou maua le filemu iā te aʻu.a” E iloa mai i lenei fuaiupu, e lē uiga atu lenei filemu i le leai o ni faafitauli. Ae e faasino atu i le filemu o le loto ma le mafaufau. E mafai ona maua lenei filemu e ala iā Iesu, o lē na folafolaina mai o le a ia foaʻi mai le agaga paia. O lenei “fesoasoani” malosi e mafai ai e soo o Iesu ona taulau pe a feagai ma faigatā.—Ioane 14:16, 26, 27.

“Ua puapuagatia outou i le lalolagi, ae ia lototetele!” Na taʻua manino e Iesu o le a feagai ona soo ma faafitauli e pei o faiga lē tonu ma sauāga. (Mataio 24:9; 2 Timoteo 3:12) E ui i lea, e iai le māfuaaga e latou te “lototetele” ai.

“Ua ou manumalo i le lalolagi.” E faasino atu le upu “lalolagi” i inei i tagata e leai se faiā ma le Atua.b Ua faapea mai le 1 Ioane 5:19: “O le lalolagi atoa o loo nofo toʻilalo i le pule a lē o loo leaga,” po o Satani. O le māfuaaga lea e lē ōgatusa ai mafaufauga ma gaoioiga a tagata o le “lalolagi” ma le finagalo o le Atua.—1 Ioane 2:15-17.

Na taumafai Satani ma lana lalolagi e taofia Iesu mai i le faataunuuina o le finagalo o le Atua, e aofia ai le aʻoaʻoina e Iesu o isi e faatatau i le Atua ma foaʻi mai lona ola lelei atoatoa o se taulaga. (Mataio 20:28; Luka 4:13; Ioane 18:37) Peitaʻi, e leʻi faatagaina e Iesu le lalolagi e aafia ai ona mafaufauga ma ia teena ai le Atua. Na ia tumau faamaoni seʻia oo i le oti. Na talafeagai ai la ona fetalai Iesu ua ia manumalo i le lalolagi, ma e leai se pule a Satani iā te ia.—Ioane 14:30.

Na faaaogā e Iesu lana lava faaaʻoaʻoga e faailoa mai ai i ona soo, e mafai foʻi ona latou faamaoni pea i le Atua pe a tofotofoina lo latou tumau. I nisi faaupuga, na fetalai Iesu: “Afai na ou manumalo i le lalolagi, e mafai foʻi ona outou faia faapea.”

Siʻomaga o le Ioane 16:33

Na fetalai Iesu i nei upu i le pō a o leʻi maliu. Na silafia e Iesu ua lata ina maliu o ia, o lea na ia faaaogā ai lenei avanoa e avatu ai ni fautuaga i ona aposetolo faamaoni. Na aofia ai ni faamatalaga moni na manaʻomia ona latou mafaufau lelei i ai: O le a latou lē toe vāai iā te ia, o le a sauāina i latou ma atonu o le a fasiotia i latou. (Ioane 15:20; 16:2, 10) Atonu na fefefe aposetolo o Iesu i nei faamatalaga, o lea na ia taʻua ai upu o loo i le Ioane 16:33 e faalaeiau ai i latou.

E mafai foʻi ona faalaeiauina soo o Iesu i aso nei i ana fetalaiga ma lana faaaʻoaʻoga. E mafai e Kerisiano uma ona faamaoni pea i le Atua e ui i puapuaga.