Salamo 46:10—“Inā Soia, ma ia Outou Iloa o Aʻu Lava o le Atua”

“Inā gauaʻi mai ia ma ia iloa o aʻu o le Atua. E faaeaina aʻu i nuu, e faaeaina foʻi aʻu i le lalolagi.”—Salamo 46:10, Faaliliuga a le Lalolagi Fou.

“Inā soia, ma ia outou iloa o aʻu lava o le Atua; e viia aʻu i nuu ese, e viia aʻu i le lalolagi.”—Salamo 46:10, Tusi Paia Samoa—Lomiga 1969.

Uiga o le Salamo 46:10

Ua augani mai le Atua i tagata uma ina ia tapuaʻi atu iā te ia, ma amanaʻia lana aiā e pule ai i le lalolagi atoa. E lē mafesiligia lana pule ma lona mana, ma e tatau ona amanaʻia e tagata uma e fia ola e faavavau.—Faaaliga 4:11.

“Inā gauaʻi mai ia ma ia iloa o aʻu o le Atua.” E faaliliu e nisi faaliliuga o le Tusi Paia le amataga o lenei fuaiupu i le “inā soia.” O lenā faaliliuga ua faauiga sesē ai e le toʻatele lenei mau, o se faatonuga ina ia faaaloalo ma fifilemu i le lotu. Peitaʻi, o le faaupuga Eperu ua faaliliuina “inā gauaʻi mai ia ma ia iloa o aʻu o le Atua,” o se augani mai iā Ieovaa le Atua i tagata o atunuu uma, ina ia aua le tetee atu iā te ia, ae ia amanaʻia e na o ia e tatau ona latou tapuaʻi atu i ai.

E tai faapena foʻi le augani o loo i le Salamo e 2. O loo taʻua i lenā Salamo le folafolaga a le Atua, o le a ia faasagatau i ē e tetee atu iā te ia. I le isi itu, o i latou e amanaʻia le pule a le Atua, e latou te faalagolago atu iā te ia mo le taʻitaʻiga, malosi, ma le atamai. E latou te lagona le fiafia ma le malupuipuia i taimi faigatā, ona o loo “sulufaʻi atu iā te ia.”—Salamo 2:9-12.

“E faaeaina aʻu i nuu, e faaeaina foʻi aʻu i le lalolagi.” I aso ua mavae, na faaeaina Ieova le Atua ina ua ia faaaogā lona malosi tele e puipuia ai ona tagata. (Esoto 15:1-3) I le lumanaʻi, o le a faaeaina o ia i se tulaga e sili atu, pe a gauaʻi uma atu tagata o le lalolagi i lana pule, ma tapuaʻi atu iā te ia.—Salamo 86:9, 10; Isaia 2:11.

Siʻomaga o le Salamo 46:10

Ua faamatalaina e se tasi o tusi le Salamo e 46 “o se pese lotu e viiviia ai le mana o le Atua, o lē e puipuia ona tagata.” Pe a usuina le Salamo e 46, e faaleo atu e tagata o le Atua lo latou maufaatuatuaina, e mafai e Ieova ona puipui ma fesoasoani iā i latou. (Salamo 46:1, 2) Na faamanatu atu i na upu, e faatasi Ieova ma i latou i taimi uma.—Salamo 46:7, 11.

Ina ia faamalosia lo latou maufaatuatuaina o le mana laveaʻi o Ieova le Atua, na uunaʻia ai i latou e le fai Salamo ina ia mafaufau i ana galuega mamana. (Salamo 46:8) O loo uaʻi patino atu lenei Salamo i lona malosiaga e faaiʻuina ai taua. (Salamo 46:9) Na faaiʻuina e Ieova taua i taimi o le Tusi Paia, e ala i le puipuia o ona tagata mai i nuu na fai ma o latou fili. Peitaʻi, ua folafola mai i le Tusi Paia ua lē o toe umi ona faia lea faapea e le Atua i se tulaga e sili atu, pe a ia faaiʻuina taua uma i le lalolagi atoa.—Isaia 2:4.

Po o fesoasoani pea Ieova i ona tagata tapuaʻi i aso nei? Ioe. O le mea moni, na matuā faalaeiauina e le aposetolo o Paulo Kerisiano ina ia faalagolago atu iā te Ia mo le fesoasoani. (Eperu 13:6) O manatu o loo taʻua i le Salamo e 46, e faamalosia ai lo tatou maufaatuatuaina o le mana laveaʻi o le Atua. E fesoasoani na manatu e tatou te vaai ai i le Atua, o ia “o lo tatou malu ma lo tatou malosi.”—Salamo 46:1.

Maimoa i le vitiō puupuu lenei i se aotelega o le tusi o Salamo.