Eperu 4:12—“O Loo Ola le Afioga a le Atua, o Loo Matuā Galue Foi”

“Auā o loo ola le afioga a le Atua ma e matuā malosi foʻi, e sili atu lona maʻai i lo o le pelu e faatau maʻai ona itu, ma e ati e oo lava i le vaevaeina o le tino ma le agaga, o gaugātino ma aano o ivi, e mafai foʻi ona faamasino i manatu ma faanaunauga o le loto.”—Eperu 4:12, Faaliliuga a le Lalolagi Fou.

“Auā o loo ola le afioga a le Atua, o loo matuā galue foi, o loo sili foi lona maai i pelu uma e faatau maai itu, o loo vaevae foi e oo lava i le vavaeeseina o le loto ma le agaga, o gaugātino foi ma aano o ivi, o loo faamasino foi i manatu ma filifiliga o le loto.”—Eperu 4:12, Tusi Paia Samoa—Lomiga 1969.

Uiga o le Eperu 4:12

O le feʻau a le Atua mo tagata o loo faamauina i le Tusi Paia, e iai le malosi e mafai ai ona tatou iloa o tatou manatunatuga ma uunaʻiga moni o o tatou loto. E mafai foʻi e lenā feʻau ona suia olaga o tagata i se tulaga lelei.

“O loo ola le afioga a le Atua.” O le faaupuga “le afioga a le Atua” e faasino atu i upu ua folafola mai e le Atua po o lona finagalo o loo faamauina i le Tusi Paia.a O se tasi o vala tāua o lona finagalo, ia ola e faavavau tagata usiusitaʻi i luga o le lalolagi i se olaga filemu ma autasi.—Kenese 1:28; Salamo 37:29; Faaaliga 21:3, 4.

O le ā le auala o loo “ola” ai le afioga a le Atua po o lona finagalo? E telē le aafiaga o le afioga a le Atua i loto o i latou e taliaina. E latou te maua ai le faamoemoe ma se fuafuaga o le olaga. (Teuteronome 30:14; 32:47) O loo “ola” foʻi le afioga a le Atua auā o loo gaoioi le Atua e faataunuuina atoatoa ana folafolaga. (Ioane 5:17) E lē pei le Atua o tagata, e lē galo iā te ia se folafolaga e na te faia pe iloa mulimuli ane foʻi e lē mafai ona ia faataunuuina. (Numera 23:19) ʻE lē foʻi fua atu iā te ia’ ana afioga.—Isaia 55:10, 11.

“[O] le afioga a le Atua . . . e matuā malosi.” E mafai foʻi ona faaliliuina le faaupuga “e matuā malosi” i le “o loo gaoioi” po o le “faataunuuina o so o se mea o loo fuafua [lenā afioga] e faataunuu.” O lea la, o so o se mea e tulei mai i le fofoga o Ieovab le Atua pe e na te folafolaina mai, e mautinoa lava e taunuu. (Salamo 135:6; Isaia 46:10) O le mea moni e mafai e le Atua ona faataunuuina ana folafolaga i auala e sili atu i mea e mafaufau i ai tagata.—Efeso 3:20.c

E “matuā malosi” foʻi le afioga a le Atua auā e fesoasoani i ē e talisapaia le tāua o le Tusi Paia e faia suiga lelei i o latou olaga ma uiga. E latou te matuā faatāuaina aʻoaʻoga a le Atua lea e taaʻina ai o latou mafaufauga, olaga, ma o latou sini. (Roma 12:2; Efeso 4:24) O le uiga lenā ʻo le galue o le afioga a le Atua iā i latou’ e talitonu o le Tusi Paia e mai i le Atua.—1 Tesalonia 2:13.

“[O] le afioga a le Atua . . . e sili atu lona maʻai i lo o le pelu e faatau maʻai ona itu.” I se tulaga faafaatusa, e sili atu ona maʻai le afioga a le Atua i lo o pelu e faia e tagata ona o lona malosi uigaese. O le feʻau mai le Atua e mafai ona pāʻia ai loto o tagata e sili atu nai lo o aʻoaʻoga a tagata. E faaalia mai lenā manatu i le vaega e sosoo ai o le Eperu 4:12.

“[O] le afioga a le Atua . . . e ati e oo lava i le vaevaeina o le tino ma le agaga, o gaugātino ma aano o ivi.” I se gagana faafaatusa, e mafai e “le afioga a le Atua” ona ati e oo lava i “aano o ivi” lea e faasino atu i o tatou faalogona loloto ma manatunatuga. E mafai e aʻoaʻoga a Ieova ona uunaʻia i tatou e faia suiga lelei, e ala i le faailoa mai o o tatou tagata moni i totonu lea e lē mafai ona iloa e se tagata. O lenā mea o le a tatou maua ai le olioli, ma faafiafiaina ai Lē na foafoaina i tatou.

“[O] le afioga a le Atua . . . e mafai foʻi ona faamasino i manatu ma faanaunauga o le loto.” O le auala e tali atu ai se tasi i le afioga a le Atua e iloa ai ona manatunatuga moni ma le uunaʻiga e na te faia ai mea, lea e aafia ai ona uiga ma lana amio. O se faataʻitaʻiga, pe a talia e se tasi le afioga a le Atua e ala i le faia o suiga i lona olaga, e faaalia ai lona lotomaulalo ma lona faamaoni. E manaʻo lenā tagata e faafiafia Lē na foafoaina o ia. Ae afai e na te saʻilia se mea e sesē ai le afioga a le Atua, e faaalia ai ona uiga lē lelei e pei o le faamaualuga ma le manatu faapito. Atonu o loo taumafai o ia e faia ni faamolemolega mo le faia o mea e inosia e le Atua.—Ieremia 17:9; Roma 1:24-27.

Ua taʻua i se tasi tusi, o le afioga a le Atua “e mafai ona pāʻia ai o tatou tagata lilo i totonu.” E leai se vaega o le tagata i totonu e lilo i le silafaga a le Atua lea e mafai e lana afioga ona faaalia. Ua faapea mai le Eperu 4:13: “E taatitia fua mai mea uma, ma ua matuā faaalia mea uma i luma o le silafaga a lē e ao ona tatou tali atu i ai.”

Siʻomaga o le Eperu 4:12

Na tusia e le aposetolo o Paulo le tusi o Eperu i le pe ā o le 61 T.A. O se tusi na faagaeeina e le agaga o le Atua mo Kerisiano Iutaia i Ierusalema ma Iutaia.

I le mataupu e 3 ma le 4, o loo faamatilatila ai e Paulo le faaaʻoaʻoga a tagata Isaraelu anamua e fai ma lapataʻiga i Kerisiano. (Eperu 3:8-12; 4:11) Na folafola e Ieova le faasaʻolotoina o tagata Isaraelu mai le faapologaina ma foaʻi atu iā i latou se laueleele e ʻnonofo ai ma le saogalemu.’ (Teuteronome 12:9, 10) Peitaʻi, sa faaauau pea e augātupulaga a Isaraelu na tuua Aikupito ona lē faatuatuaina folafolaga a le Atua, ma lē usiusitaʻi i ana faatonuga. O le iʻuga e latou te leʻi ʻulu atu i le mālōlōga a le Atua’ ma olioli i se faiā lelei ma Ia, ae na latou feoti i le toafa. E ui na ulu atu ē na tupuga mai iā i latou i le Nuu Folafolaina, ae na latou lē usiusitaʻi foʻi iā Ieova. O le iʻuga, na matuā mafatia lava le nuu.—Neemia 9:29, 30; Salamo 95:9-11; Luka 13:34, 35.

Na faamatala e Paulo e tatau i Kerisiano ona aʻoaʻoina ni lesona mai i le faaaʻoaʻoga leaga a tagata Isaraelu lē faamaoni. I le lē pei o i latou, e mafai ona tatou ulu atu i le mālōlōga a le Atua e ala i le usiusitaʻi i lana afioga ma faatuatua atoatoa i ana folafolaga.—Eperu 4:1-3, 11.

Ia matamata i lenei vitiō puupuu o loo aumaia ai se aotelega o le tusi o Eperu.