O le Malosi Mai le Atua E Tatou te Lē Tuumuli Ai

Sa iai se māfuaaga lelei na masalosalo ai uso pe o le a faaauau pea ona ou paeonia, ona e lē o aʻu o se tagata faaleagaga. Ou te lē fiafia i le galuega talaʻi, o lea ou te tatalo ai ia timu Aso Sa ina ia ou lē alu ai i le talaʻiga. Pe a ou talaʻi, e na o le ofo o mekasini ae e leai ma se taulimaga faale-Tusi Paia e faia. Na faapele aʻu e loʻu tinā ina ia faia ai aʻu faitauga Tusi Paia i le faapotopotoga. Ou te leʻi fiafia e suʻesuʻe ma e leʻi iai ni oʻu sini faaleagaga.

I le tau māfanafana o lenā tausaga, na faia ai se fonotaga itumalo (lea ua taʻua i le taimi lenei o tauaofiaga itumalo) i Cardiff, i Uelese. O i inā na suia atoa ai loʻu olaga. Na faia e se tasi o failauga ni fesili faatupu manatu i lana lauga. Na fesili mai i le aofia: “Po ua e tuuina atu ma papatiso?” Na ou faapea ifo, ‘Ioe.’ “Pe na e tautō e auauna iā Ieova ma lou lotoatoa, ola atoa, mafaufau ma le malosi atoa?” ‘Ioe.’ “Pe e iai se faalētonu i lou soifua mālōlōina po o ni tiute tauave i le aiga, lea e taofia ai oe mai le paeonia?” ‘Leai.’ “Pe e iai se isi māfuaaga e lē mafai ai ona e paeonia? ‘Leai.’ “Pe afai o lau tali i le fesili mulimuli o le leai, aiseā la ua e lē paeonia ai?”

Na faafuaseʻi ona manino mea uma i loʻu mafaufau, ma ou faapea ifo ai, ‘Maʻimau loʻu malosi le faaalu sesē. Ou te lē o tausia laʻu tautoga o le tuuina atu, ma ou te lē o auauna iā Ieova ma loʻu ola atoa.’ Na ou manatu afai ou te manaʻo e tausia e Ieova ana folafolaga iā te aʻu, e tatau foʻi la ona ou tausia laʻu tautoga iā te ia. O lea iā Oketopa 1956, na amata ai laʻu paeonia lagolago.

Na ou paeonia sauatoa i le tausaga na sosoo ai, ma siitia atu i se faapotopotoga e toʻa 19 le ʻautalaʻi. Talu mai le taimi na ou auai ai i le faapotopotoga, na tofia aʻu i vaiaso uma e faia se lauga. Na fesoasoani ma le onosaʻi uso e faaleleia aʻu lauga ma le auala e aʻoaʻo atu ai. I le lua tausaga mulimuli ane i le 1959, na tofia ai aʻu o se paeonia faapito i Aberdeen, i le itu i mātū o Sikotilani. Ina ua mavae ni nai masina, na valaaulia ai aʻu e auauna i le Peteli i Lonetona. O se matuā faaeaga le galue i le fale lomitusi mo le fitu tausaga na ou iai i inā.

Na ou matuā fiafia i le auaunaga i le Peteli. Ae na iā te aʻu se faanaunauga e auai i se auaunaga faapitoa i le fanua. Sa ou talavou ma malosi i lenā taimi, ma na ou lotomalie foʻi e faaaogā aʻu e Ieova i so o se mea. Iā Aperila 1965, na ou talosaga ai e auai i le Aʻoga i Kiliata ina ia toleni ai o se misionare.

I lenā tausaga, na ma ō ai ma se uso na ma potu faatasi i Perelini i Siamani, e auai i se tauaofiaga ma matamata i le Pā o Perelini lea na fausia i ni nai tausaga muamua atu.

I se tasi aso a o faagasolo le tauaofiaga, na ou maua le avanoa e auai ai i le talaʻiga ma na tofia aʻu e galulue faatasi ma Susanne Bandrock. Na ma faaipoipo i le 1966, ma i le lua tausaga mulimuli ane ai na valaaulia i maʻua e auai i le vasega lona 47 o Kiliata. Maʻeu se faaeaga mo maʻua ma Susanne! Na pei lava ua vave ona uma le lima masina o le aʻoga ona na ma fiafia tele i ai. Na tofia i maʻua i Zaire lea ua taʻua nei o le Malo Faatemokalasi o Congo. Na matuā faateʻia i maʻua! E lē tele ni mea e ma te iloa e faatatau i lenei atunuu. Na ma lagona le lē mautonu, ae na ma talia le faaeaga ma maufaatuatuaina Ieova.

O se malaga umi, ae na mulimuli ane ma taunuu i se tamaʻi taulaga e eli ai le maina e taʻua o Kolwezi. Na ma taumānatu pe aiseā ua leai ai ni uso e faafeiloaʻia i maʻua. O le māfuaaga, ona e lua aso na ma vave taunuu ai nai lo le aso na taʻu i uso. Na sau se tagata o le ofisa o le malae vaalele ma talanoa mai i le gagana Falani, o se gagana e ma te leʻi malamalama ai i lenā taimi. Na faaliliu mai e se fafine na i o ma luma, “Ua taofia nei oulua.”

Na ave i maʻua e lenā tagata i se taavale tuai, e tū i tua le afi ma e lua nofoa. Na matou feomaʻi uma i totonu o le taavale, o aʻu, o Susanne o le tagata o le ofisa o le malae vaalele ma le tagata e ana le taavale. Na tai pei o se vaaiga mai i se ata malie. A o alu le taavale ma osooso i luga o le auala ona o le tele o omo, na matou faalue atu ai. Ae o le keli o le taavale e na o le lelea i luga ma toe tapuni e pei o le gutu o se iʻa o loo lamu ma atopaʻu.

Na matou ō i le fale e nonofo ai misionare. E ui e ma te lē iloa le mea e tū ai ae na iloa e le tagata o le ofisa o le malae vaalele. E leʻi iai se isi i le fale ma na loka uma le pā. Na ō uma misionare i tauaofiaga faavaomalo ma faigāmālōlōga. A o ma tūtū i fafo i le vevela o le lā, na ma taumānatu po o le ā o le a tupu. Mulimuli ane na sau ai se uso e nofo i lenā vaipanoa. Na matuā fiafia le uso ina ua vaai mai iā i maʻua, ma na ma maua ai le toʻa. E masani le uso i le tagata o le ofisa o le malae vaalele, lea na manatu e maua atu sana tupe iā i maʻua. Ina ua uma ona talanoa i ai le uso, na toe foʻi le tagata o le ofisa o le malae vaalele ma na ma lagona le toʻafilemu.

E Lē o se Taimi e Tuumuli Ai

Na vave ona ma iloa na ma aofia i tagata fiafia ma alolofa na onosaia le tele o faigatā. Ae e faanoanoa ona na matuā pagatia le atunuu i faiga sauā i le sefulu tausaga ua mavae, ona o fetauaʻiga ma fouvalega. O lea i le 1971, na faasā aloaʻia ai Molimau a Ieova i lenā atunuu. Na matou taumānatu po o le ā le mea o le a fai.

E lē o se taimi lenā e tuumuli ai ona o le fefe ma e toʻaitiiti uso ma tuafāfine na fefefe. E matuā ogaoga omiga na fesagaʻia e uso ma tuafāfine, ina ia lolo atu e tauave se pepa ma faapipii se pine i le ofu e faailoa atu ai lo latou lagolagoina o se vaega faapolotiki ma lē solitū ai. O le lē faia o le pine o le a latou lē maua ai faamanuiaga mai i le malo, ma o le a sauāina ai i latou e vaegaʻau ma leoleo. Na tutuli uso mai a latou galuega, ma fanau mai i aʻoga. E faitau selau uso na faafalepuipuiina ma o se taimi e sili ona faigatā. Peitaʻi na faaauau pea ona latou talaʻia ma le lototele le tala lelei.

Na Manaʻomia Ona Matou Tumau

I na tausaga, na ma faaaluina ma Susanne le tele o le ma taimi i asiasiga matagaluega ma itumalo, i nuu maotua. A o ma nonofo ai i na nuu, na ma fesagaʻia ni luʻi e lē masani ai, ma i nisi taimi e faigatā. E lē tetelē ni fale atolau na ma nonofo ai, ma e lē telē foʻi se avanoa e taooto ai. Ou te lē o manatua le tele o taimi na tau ai loʻu ulu i le faitotoʻa vāiti o le fale. Na ma tāʻeele i vai e asu mai i le vaitafe. I le pō e ma te faaaogāina se molī gaʻo e faitau ai ma tusi, ma na kuka ma meaʻai i malala. Na ma vaai i na luʻi o le olaga moni lenā e ola ai se misionare. O le mea lea na ma ō mai ai. Na ma lagona le faamalieina ona ua alu aogā lo ma taimi i le galuega a Ieova.

Na ma aʻoaʻoina ni lesona tāua mai i uso ma tuafāfine na matou nonofo faatasi, e faatatau i mea e masani ona tatou manatu māmā i ai e pei o meaʻai, vai, lavalava ma fale. (1 Timoteo 6:8) O isi mea uma e matou te maua, e vaai i ai o se meaalofa. E ma te manatua pea lenā manatu tāua.

E ui e ma te leʻi fesagaʻia luʻi na feagai ma le aposetolo o Paulo, ae e iai le taimi na tofotofoina ai lo ma faatuatua ma le uunaʻiga e faia ai mea. Na matuā leaga auala na ma uia ma na toetoe a leai ni auala. A o ma feoaʻi i auala lauleaga na matuā salutulutu le ma taavale ma e oo lava iā i maʻua. E iai taimi na goto ai le taavale i le oneone. I taimi o timuga e mau ai le taavale i se pala i le auala e pei o se kelū. I se tasi aso, na ma faaaluina le aso atoa e malaga ai ae e na o le 70 kilomita (43 maila) le mamao na ma o ai. E 12 taimi na matou taumafai ai e eli ese paʻu o le taavale mai i le palapala.

Na ma lagona le matuā vavalalata iā Ieova ina ua ma galulue i nuu maotua i tulaga faigatā. Na ma iloa o le fesoasoani a Ieova e mafai ai ona tumau ma le olioli, e ui e lē mafai ona ma suia se tulaga faigatā. O Susanne o se tagata e lē masani i le olaga e ola ai tagata i nuu maotua. Ae talu ona ma fesagaʻia faafitauli ma faigatā e leʻi faitio lava. Na ma manatua na taimi o ni taimi fiafia, faamalieina ma e tele mea na ma aʻoaʻoina mai ai.

E tele taimi na puʻea ai aʻu a o ma iai i Zaire. I se tasi taimi, na tuuaʻia sesē ai aʻu i le faatauina faasolitulafono o taimane. Na ma lagona le atuatuvale ae na ma faapea ifo, pe afai e finagalo Ieova e faataunuu le faiva ua tofia i ai maʻua, o le a ia fesoasoani mai. Na ia faia faapea!

Faaauau Pea le Auaunaga Iā Ieova

I le 1981, na valaaulia ai i maʻua e auauna i le ofisa o le lālā i Kinshasa. I le tausaga muamua atu, na toe faataga aloaʻia ai la tatou galuega. Na faatau e uso se fanua e toe faatelē ai le fausiaina o le lālā. Ae i a Mati 1986, na faafuaseʻi lava ona sainia e le peresitene o lenā atunuu se tulafono e faasā ai le galuega a Molimau a Ieova. Na taofia le fausiaina o le lālā, ma e leʻi umi ae tuua e le toʻatele o misionare le atunuu.

Na mafai ona matou nonofo mo sina taimi. Na matou faia mea uma e mafai ina ia talaʻi ai e ui na matou iloa o loo mātaʻitū i matou e leoleo. E ui na matou faaeteete, ae na puʻea lava aʻu a o oʻu faia se suʻesuʻega faale-Tusi Paia. Na loka faatasi aʻu ma isi pagota i se potu telē toe pogisa. E vevela, manogi leaga, pogisa ma gasu. E na o le pau le mea na susulu mai ai le malamalama ma sau ai le ea, o se tamaʻi pū i le puipui e maualuga le mea e i ai. Na ave aʻu e nisi pagota i le pagota na fai ma o latou taʻitaʻi. Na ia faapea mai, “Usu le vii o le matou atunuu!” Ae na ou fai i ai, “Ou te lē iloa.” Na ia toe faapea mai, “Usu mai la le vii o le tou atunuu!” Na ou toe fai i ai, “Ou te lē iloa foʻi.” Na ia faatonuina loa aʻu ou te tū ma faasaga i le puipui mo le 45 minute. Na talosaga atu uso i leoleo ma na faasaʻoloto ai aʻu.

Na matou iloa e lē toe foʻi i se lelei le tulaga o mea i le atunuu, ma e leʻi umi ae tofia i maʻua i Zambia. Na ma lagona le faanoanoa, ae i le taimi e tasi e pei ua matuu atu se avega. Na ma mafaufau i le 18 tausaga na matou galulue faatasi ai ma misionare faamaoni, ma uso ma tuafāfine i Zaire. E ui sa faigatā le olaga i nisi taimi ae na ma lagona le faamanuia a Ieova. Na ma iloa na faatasi mai Ieova i lenā taimi atoa. Na ma aʻoaʻoina le gagana Swahili, gagana Falani ma ni nai upu i le gagana Lingala. Na ma olioli ina ua ma taulau i le faiva ma fesoasoani i le silia i le 130 tagata ina ia agavaa mo le papatisoga. Na matuā faamalieina i maʻua i le iloaina ua faia so ma sao i le faataatiaina o se faavae, mo le faatupulaʻia o le galuega i le lumanaʻi. Mulimuli ane, na matuā toʻatele tagata na ō mai i le upu moni! I le 1993, na faalēaogāina ai e le Faamasinoga Maualuga le sā lea na faia i le 1986. Ua silia nei ma le 240,000 tagata talaʻi o le Malo i Congo.

A o ma iai i Zambia, na ma molimauina ai le fausiaina o se lālā fou ma le toe faatelēina o le lālā. I le taimi nei, ua faatoluina le aofaʻi o tagata talaʻi nai lo le taimi na ma taunuu ai i le 1987.

O lea, o le ā nei ua tupu i le uso talavou lea na foliga mai e lē atoa se masina e paeonia ai? O le faamanuia a Ieova ma le lagolagosua a si aʻu avā pele o Susanne, ua mafai ai ona ou auauna faataimi atoa mo le 65 tausaga ma ua ou tofo ma iloa ai e lelei Ieova!—Salamo 34:8.

E leai ni o ma tomai faapitoa. Ae na ma taumafai lava e fai le mea sili, e faamaoni ai pea i le tausia o le ma tautoga o le tuuina atu. E ma te maufaatuatuaina Ieova o le a fesoasoani mai pea iā i maʻua, ina ia aua neʻi “tuumuli” ae ia tuputupu aʻe i le faatuatua mo le ʻfaatumauina o le ola.’—Eperu 10:39.

Maimoa i le vitiō Dayrell ma Susanne Sharp: We Promised to Serve Jehovah Whole-Souled.