Fesoasoani Laveaʻi mo se Faamaʻi ua Aafia ai le Lalolagi Atoa

Ina ua faasilasila mai e le Faalapotopotoga o le Soifua Mālōlōina i le Lalolagi iā Mati 2020, o le KOVITI-19 o se faamaʻi pipisi, e toʻatele e leʻi talitonu o le a aafia le lalolagi atoa i lenei faamaʻi e oo mai i lenei taimi. O le faitau miliona o tagata e aofia ai ma nisi o Molimau a Ieova, na mafatia i le itu faaletino, tau faalogona ma le tulaga tau tamaoaiga. Na faapefea ona faamaopoopo ma tuuina atu e Molimau a Ieova le fesoasoani laveaʻi, a o faagasolo lenei faamaʻi?

Fesoasoani Laveaʻi na Manaʻomia

I le taʻitaʻiga a le Komiti o Sooupu o le Vaega Pule a Molimau a Ieova, na faavaeina ai le silia ma le 950 Komiti mo Fesoasoani Laveaʻi i le lalolagi aoao, e tali atu ai i le manaʻoga ua tulaʻi mai ona o le KOVITI-19. Na latou faamaopoopo le fesoasoani mo uso i o latou lava vaipanoa, ma na maua foʻi e uso le fesoasoani mai i le malo. Na faamaopoopo foʻi e nei Komiti se galuega tele o fesoasoani.

O se faataʻitaʻiga, seʻi iloilo le tulaga na iai i Paraguay. Na taʻua i se nusipepa, o aafiaga i le tamaoaiga ona o le faamaʻi, ua “toʻatele ai tagata ua leai ni meaʻai i lenei atunuu.” Ae na saunia ma tufatufaina atu e le Komiti o Fesoasoani Laveaʻi i Paraguay ni pusa o loo iai ni mea manaʻomia mo le lua vaiaso, e pei o meaʻai, mea e faaaogā e faamamā ai fale, ma vailaau mo le tausia o le tulaga tumamā mo se aiga e toʻafā. O pusa taʻitasi e tusa lona tau ma le 30 tālā Amerika.

E faapefea i tagata o loo galulue mo fesoasoani laveaʻi ona puipuia i latou ma isi, mai i le aafia i le KOVITI-19? E fai o latou tali fofoga ma tausia le vā faatulagaina. E latou te faamautinoa o loo mamā nofoaga o loo teu ai e Kamupani meaʻai ma o loo faamalosia foʻi tulaga mo le puipuiga. E tatau foʻi iā i latou uma o loo tufaina atu pusa, ona fai o latou ofu ma mea uma mo le puipuiga, faamamā a latou taavale, ma teu lelei nei pusa i nofoaga mamā.

Faaaogāina Lelei o Foaʻi

Iā Ianuari 2021, na faamaonia ai e le Komiti o Sooupu le faaaogāina o le silia ma le 25 miliona tālā Amerika mo fesoasoani laveaʻi o le KOVITI-19. Na faaaogā lelei e lālā ma Komiti mo Fesoasoani Laveaʻi nei foaʻi, ma galulue mamafa ina ia maua se tau taugofie mo mea o loo manaʻomia. O se faataʻitaʻiga o le mea na tupu i Chile. Na mananaʻo uso na faamaopoopoina le fesoasoani laveaʻi ina ia faatau le 750 kilo (1,653 lb) o lentils. Peitaʻi, ua tasi le masina talu ona sii le tau o lenā oloa. E tusa ma le lua itula talu ona malilie uso e faatau lentils i le tau fou, ae faailoa atu e le faatauoloa e iai le isi tagata lea ua toe faafoʻi atu ana lentils na faatau. Nai lo o le faatau e uso o lenei oloa i le tau fou na malilie ai, ae na toe faatau atu e le faatauoloa i o tatou uso i le tau masani.

Peitaʻi, ina ua ō uso e piki mai lentils, na taumafai le faatauoloa e faalēaogā le latou maliega, ma finau atu e lē o tutusa le tau lea e latou te faatauina ai lentils e pei lava o isi faalapotopotoga. Ina ua māeʻa se tatalo lē leoa a se tasi o uso, na ia faamatala atu loa i le faatauoloa ua uma ona fai faatalanoaga ma faapotopotoga taʻitasi ma iloa ai i latou o loo iai se manaʻoga. Na faamatala atu foʻi e uso ona e eseese tulaga o i latou o le a mauaina nei fesoasoani, o le a tuufaatasi i nei pusa mea e manaʻomia moni e aiga taʻitasi. Na latou faamatala atu foʻi, o foaʻi tau tupe ma galuega uma e faia e Molimau a Ieova, e faatauofo. Na matuā ofo a o ia. O le iʻuga, e lē gata na malie o ia e faapaʻū le tau o lentils, ae na ia faameaalofa atu foʻi le isi 400 kilo o lentils.

“Faamaoniga o le Alofa Moni”

O Lusu o se tinā matua ua oti lana tane, o loo nonofo faatasi ma lana tama teine ma lona toʻalua ma le la fanau e toʻatolu. A o inu le latou tī ma fai le latou mau i se tasi taeao, na iloa e lona grandson laʻitiiti e fitu tausaga, ua leai ni a latou meaʻai. Na ia fesili atu: “O fea ni tatou meaʻai?” Na fai atu i ai Lusu, ua uma ona fai lana tatalo iā Ieova mo se fesoasoani ma e mautinoa o le a Ia faia faapea. I le aoauli o le aso lava lenā, na vili atu ai toeaina iā Lusu e alu atu e aumai ni a latou meaʻai. Na taʻua e Lusu: “Na fai mai loʻu grandson, ua ia iloa nei e tali mai Ieova i a tatou tatalo, ona o lea ua ia tali mai i aʻu tatalo.”

E iai se fafine e nofo i Congo, e tuaoi ma se aiga Molimau a Ieova. Ina ua ia vaai i meaʻai na maua e lenā aiga mai i le ʻauuso, na ia faapea mai: “Pe a uma le faamaʻi, o le a avea i matou ma Molimau a Ieova, ona o loo latou tausia o latou uso ma tuafāfine i lenei taimi faigatā.” Na fesili i ai lana tane: “O lenā lava taga araisa, ae o le a avea ai a oe ma Molimau a Ieova?” Na tali atu le fafine: “E lē o le taga araisa, ae o le faamaoniga lenā o le alofa moni.”

Ua mafai ona vave tali atu Molimau a Ieova i manaʻoga o o tatou uso ma tuafāfine a o faagasolo lenei faamaʻi, e ala i a outou foaʻi tauofo. Faafetai tele lava mo a outou foaʻi na faia i le donate.jw.org.