E lē Faagaloina Tagata Logonoa

E finagalo Ieova ina ia aʻoaʻoina tagata uma e faatatau iā te ia ma lona Malo faalelagi, po o le ā lava lo latou tulaga. (1 Timoteo 2:3, 4) O le māfuaaga lenā ua saunia ai e Molimau a Ieova Tusi Paia ma lomiga mo talanoaga faale-Tusi Paia mo so o se tagata, e aofia ai ma tagata logonoa. Ua saunia e Molimau a Ieova le faitau afe o vitiōa i le silia ma le selau gagana faataga! Ua faapefea ona saunia ma tufatufaina atu nei vitiō, ma o ā auala ua faaleleia ai le saunia o nei vitiō?

Ua Faapefea Ona Saunia Vitiō i Gagana Faataga?

Ua saunia e le ʻaufaaliliu i le lalolagi aoao vitiō i gagana faataga. E latou te iloilo lelei se lomiga o loo manaʻomia ona faaliliu. Ona latou filifili lea o le auala sili e faaliliu ai lenā lomiga i gagana faataga. Pe a uma, ona latou puʻeina lea o faaliliuga i se vitiō. I le taimi lenei, e 60 vaega faaliliu o loo galulue e lē aunoa i le faaliliuina o lomiga mo talanoaga faale-Tusi Paia i gagana faataga, ae 40 isi vaega faaliliu e galulue mai lea taimi i lea taimi.

I le taimi ua mavae, e taugatā le sauniaina o vitiō mo gagana faataga. Na matuā taugatā meapuʻeata vitiō ma isi meafaigaluega nai lo o le tau i aso nei. E lē gata i lea e puʻe vitiō i potu puʻe leo faapitoa lea na matou fausia, ma o nisi taimi e matou te toe faaleleia ai se fale e fai ma fale puʻe leo. E silia ma le $30,000b le tau aofaʻi e faatulaga ai se vaega faaliliu mo se gagana faataga.

Ina ia faaaogā lelei foaʻi tauofo, ua saʻili ai e la matou faalapotopotoga auala e faaleleia ma faafaigofie ai faaliliuga. Ua matou faaaogāina nei meafaigaluega aogā faaonapōnei ma taugofie. Nai lo o le faaaogāina o se potu puʻe leo faapitoa, ae ua faaaogā e vaega faaliliu se ʻie po o se puipui lanu meamata e puʻe ai vitiō. Pe a manaʻomia ni uso ma tuafāfine mo gagana faataga, e mafai ona puʻe a latou vaega i le ofisa po o latou fale; e lē o toe manaʻomia ona latou o i se potu puʻe leo faapitoa.

Ua matou saunia foʻi polokalame faakomepiuta e fesoasoani i le ʻaufaaliliu i gagana faataga. O na faaleleiga ua matuā faaitiitia ai le taimi e faaalu e se ʻaufaaliliu e saunia ai se vitiō i gagana faataga. E talisapaia e o matou uso nei faaleleiga. Ua faapea mai se uso e igoa iā Alexander: “Ua matuā faateteleina vitiō i gagana faataga i le taimi lenei, nai lo o le taimi muamua. Ua matuā ou fiafia ai lava. Ou te matamata i na vitiō i aso uma.”

I aso nei e itiiti ifo ma le $5,000 le tau o meafaigaluega e faaaogā e se vaega faaliliu. O le māfuaaga lenā ua mafai ai ona matou saunia le tele o vitiō i le tele o isi gagana faataga.

O ā Auala ua Tufatufaina Atu ai Vitiō i le Gagana Faataga?

O le taimi lava e uma ai ona puʻe se vitiō i se gagana faataga, ua tatau loa ona auina atu na vitiō i ē e manaʻomia. I le taimi ua teʻa na matou saunia ai kaseti o vitiō ma DVDs, ae e taugatā na mea, alu ai le taimi ma tele ai galuega. E auina atu le vitiō ua uma ona puʻe i se tagata e na te faia ni kopi, ona lafo atu lea i faapotopotoga kaseti o vitiō ma DVDs. I le 2013, e silia ma le $2,000,000 na matou faaaluina e saunia ai DVDs mo gagana faataga.

E matuā talisapaia e tagata logonoa na sauniuniga. Peitaʻi, e leʻi faigofie ona faaaogāina vitiō, aemaise lava ona ua tele kaseti vitiō ma DVDs ua uma ona puʻe. O nisi taimi e tele DVDs na manaʻomia e puʻe ai se tusi se tasi o le Tusi Paia. Na faapea mai se uso mai Pasili e igoa iā Gilnei: “Pe a matou mananaʻo e faitau se mau, e manaʻomia ona matou suʻeina se kaseti vitiō o loo iai le tusi o le Tusi Paia, ona suʻe lea o le mau. Na matuā faigatā lava.” Ua faapea mai se tuafafine e igoa iā Rafayane na ia faaaogāina DVDs i le gagana faataga: “E leʻi faigofie ona ou faia ni suʻesuʻega totino. Na tele le taimi na ou faaaluina e suʻe ai mau ma lomiga.” Pe a ō uso ma tuafāfine i le talaʻiga, e latou te aveina DVDs po o kaseti vitiō ona latou faaaogā lea o TV a tagata fiafia e faaali ai. O nisi uso e ō ma ave a latou masini DVD. Ae ina ua maua mai tamaʻi masini DVD lea e pipii faatasi ma tamaʻi TV, e toʻatele uso na latou faaaogāina na masini. Na faapea mai Bobby mai Amerika: “Pe afai e uma ona faaali atu i le tagata e ona le fale se mau, ma e te manaʻo e faaali se isi mau, e masani lava e sui le DVD e faaaogā. E alu ai le taimi ma faigatā ona faaaogā le Tusi Paia mo talanoaga.”

I le 2013, na tatala aloaʻia ai e Molimau a Ieova le faaaogāina o le JW Library Sign Language app, lea na mafai ai e uso ma tuafāfine ona kopi ma faaali vitiō o gagana faataga i a latou telefoni feaveaʻi ma tablets. O le JW Library Sign Language app, na muamua tatala i le gagana faataga a Amerika. Ae i le 2017, na faaopoopo ai isi gagana faataga. Na matuā faafiafiaina ai uso ma tuafāfine i le lalolagi aoao. Na faapea mai Juscelino o se uso mai Pasili: “Na matuā ou lē talitonu lava e tupu se mea faapea! Na ou mafaufau pea i le alofa o le Vaega Pule iā i matou o tagata logonoa, ma lo latou naunau ina ia matou agaʻigaʻi i luma i le iloa o le upu moni e pei lava o tagata tautatala. Na ou matuā fiafia lava ma na uunaʻia aʻu e lenei app ina ia suʻesuʻe atili le Tusi Paia.”

I aso nei ua matou saunia vitiō i gagana faataga uma, ma tuu i luga o la matou upega tafaʻilagi ma luga o le JW Library Sign Language app. O lea la, ua mafai ona faaliliuina lomiga i gagana faataga, puʻe ma tufatufaina atu i se taimi puupuu nai lo o le taimi umi na iai muamua. O le mea moni, e tele gagana faataga e tatala faatasi a latou vitiō ma lomiga i gagana tautala.

Mātau faamatalaga mai nisi o tatou uso ma tuafāfine logonoa. Na faapea mai se tuafāfine e igoa iā Klízia: “Pe e iai se isi faalapotopotoga e manatu mamafa i manaʻoga o tagata logonoa, ua latou lotomalilie e saunia meaʻai faaleagaga i se auala e faigofie ona matou maua? E leai se mea i lenei lalolagi e mafai ona faatusatusa i ai mea ua faia e le faalapotopotoga a Ieova mo i matou.” Ua faapea mai Vladimir: “Ua faailoa mai e nei vitiō e manatu mamafa mai Ieova i tagata logonoa e pei lava ona ia manatu mamafa i tagata e lagona mea.”

E masani lava ona taʻua i a tatou vitiō i gagana faataga faaupuga nei: “O lenei DVD e lē faatauina. Ua saunia ina ia aʻoaʻoina ai le Tusi Paia i le lalolagi aoao, ma ua lagolagoina e ala i foaʻi tauofo.” E matou te matuā talisapaia a outou foaʻi tauofo, ma o le tele o na foaʻi ua faia e ala i le donate.jw.org. O nei foaʻi ua matou saunia ai Tusi Paia ma lomiga e faaaogā mo talanoaga faale-Tusi Paia mo tagata uma, e aofia ai ma ē e faaaogāina gagana faataga.