Auala na Maua ai e o Tatou Uso le Fesoasoani ma Puipuia ai le Siʻosiʻomaga

I le avea ai o i tatou o ni Molimau a Ieova, ua tatou iloa ua toeitiiti ona gaoioi lea o Ieova e toe faaleleia le lalolagi ua faaleagaina e tagata. (Faaaliga 11:18) Peitaʻi, e tatau foʻi ona faia le mea e tatou te mafaia ina ia puipuia ai le lalolagi paneta. O se faataʻitaʻiga, ua fausia le tele o maota mo le tapuaʻiga i ni auala e lē faaleagaina ai le siʻosiʻomaga.

O le sini o le faaaogāina o na auala, ina ia faaitiitia ai aafiaga leaga i le siʻosiʻomaga. O ā nisi o auala ua tatou faaaogāina, ma ua faapefea ona fesoasoani e faaaogā tatau ai a tatou foaʻi?

Auala e Faaitiitia ai le Vevela i se Maota Fono

O le Maota Fono i Matola i Mozambique, e taalaelae ma e ato i ʻapa ato fale taugofie, lea e faigofie ona apo ai le aasa o le lā ma e matuā vevela ai le fale. Ua faapea mai se tasi o uso i lenā vaipanoa: “E matuā vevela lava, ma o le taimi a e uma ai le polokalame, e vave ona ō i fafo le ʻauuso ona o le fia maua o se ʻea mālū.” O ā galuega na faia i le Maota Fono ina ia fesoasoani i le ʻauuso e uaʻi atoatoa atu ai i le polokalame?

Na matou foʻia lenei faafitauli i se auala e lē faaleagaina ai le siʻosiʻomaga. Na faapipii ili i luga o ʻapa o le fale ina ia faigofie ona maua le malosiaga o le savili e ola ai, ma maua ai pea le ea mālū i totonu o le maota. O nei ili e lē manaʻomia ai le eletise, ma e $50 Amerika le tau o le ili e tasi. Na faapipii foʻi pepa mafiafia i le pito i totonu e fai ma faʻalo. O na pepa na fesoasoani e faaitiitia ai le aasa o le lā lea e apo mai i ʻapa o le fale.

Na aogā tele lenei auala i le soifua mālōlōina o uso ma tuafāfine. E lē gata ua faaitiitia ai le ʻea susū e toʻa i totonu o le maota ona o le vevela, ae ua tele ai foʻi le okesene lelei e maua. Ua mafai ai foʻi ona uaʻi lelei atu le aofia i le polokalame. Ua toe faapea mai le uso lea na taʻua muamua: “E matou te lē o toe vave tuua le maota pe a uma le polokalame, ae ua talatalanoa ai lava i totonu i taimi o mālōlōga. Ua pei lava le mālū o le matou maota i le taimi lenei, o le mālū pe a nofonofo i lalo o se laau telē.”

Faaaogāina o le Malosiaga e Maua Mai i le Lā

Ua matou faaaogāina lenei auala i le tele o o tatou maota mo le tapuaʻiga i le lalolagi aoao. E faaaogā ai solar panels po o pusa e puʻe ai le malosiaga mai i le lā e gaosi ai le eletise. O lenā faiga ua faaitiitia ai le faalagolago i le eletise lea e gaosia mai i le suāuu. O le faaaogāina foʻi o le malosiaga mai i le lā e faaitiitia ai le faaleagaina o le ʻea ma le siʻosiʻomaga, ma tupe faaalu.

Na amata ona faaaogā lenā auala i le ofisa o le lālā i Slovenia i le 2023. Ua gaosia ai le 30 pasene o le eletise e manaʻomia mo le fale atoa. Pe a tele atu le eletise e gaosia nai lo o le eletise e manaʻomia e le lālā, ona faasafua atu lea e faaaogā e tagata lautele i lenā vaipanoa. O le tau atoa na faaaluina i lea galuega e $360,000 Amerika. Peitaʻi, o le tupe lea ua faasaoina mai i lenei auala, e uma ane le fā tausaga ua toe maua ai le tau atoa o le galuega.

I le 2024, na faapipii ai foʻi solar panels ma se maa uila telē i le ofisa o le lālā i Sri Lanka. Ua gaosia ai le 70 pasene o le eletise e manaʻomia e le lālā. E pe ā ma le tolu miliona tālā Amerika na faaaluina ai. Ae o le tupe ua faasaoina mai ai, e toe maua ai lenā tau aofaʻi i totonu o le tolu tausaga. O le tausaga lava lenā na amata ai ona faaaogā lenā auala i le ofisa o le lālā i Netherlands. E $1.1 miliona Amerika na faaaluina ai, ma ua gaosia ai le 35 pasene o le eletise e manaʻomia e le lālā. E toe maua lenā tau aofaʻi mai i tupe e faasaoina i le pe ā ma le iva tausaga.

Ua faapipii foʻi solar panels i le tele o ofisa faaliliu i Mexico. O se faataʻitaʻiga o le ofisa faaliliu i Tarahumara (Tutotonu) i Chihuahua. I le tau mālūlū, e oo atu le mālūlū i le 0 tikerī Celsius, ae pe a oo i le tau māfanafana e oo atu le vevela i nisi taimi i le 40 tikerī Celsius. Ae ona o le taugatā o le eletise, e lē faaaogāina ai e uso ʻea māfanafana ma ʻea mālūlū. Ua faapea mai Jonathan o se uso e galue i le ofisa faaliliu: “Na masani ona matou faaaogāina palanikeke ma ofu māfanafana i le taimi o le tau mālūlū, ae tatala faamalama pe a oo i le taimi o le tau māfanafana.”

I le 2024, na faapipii ai solar panels i le ofisa faaliliu. Na faaaluina ai le $21,480 Amerika, ae o le tupe e faasaoina mai ai o le a toe maua ai lenā tau aofaʻi i totonu o le lima tausaga. Ua mafai nei ona faaaogā e o tatou uso le ʻea mālūlū ma le ʻea māfanafana pe a latou manaʻomia. Ua faapea mai Jonathan: “Ua sili atu ona matou fiafia i le galuega i le taimi lenei, ma ua tele mea ua mafai ona matou faia. Ua matou fiafia foʻi i le iloaina, o loo faaaogā tatau foaʻi tauofo a le faalapotopotoga i se auala e lē faaleagaina ai le siʻosiʻomaga.”

Faaaogāina o le Vai Timu

I Aferika, e iai nisi o Maota mo Sauniga e lē oo atu i ai le vai mamā. E masani la ona savavali uso i le Maota mo Sauniga mo le tele o kilomita ma amo a latou pakete vai. O nisi faapotopotoga e faatau e uso vai ia e tiliva atu i se loli, ae e taugatā ma e ono iai ni aafiaga lē lelei i le siʻosiʻomaga.

Ina ia maua e o tatou uso le vai mamā, ua matou faapipiiina ai talivai ma tane vai tetele i le tele o Maota mo Sauniga i na vaega o Aferika. A o leʻi faapipiiina, e suʻesuʻe lelei e uso le tulaga o le tau i na vaipanoa ina ia iloa ai le ituaiga talivai ma tane vai e sili ona talafeagai mo lenā maota. E i le vā o le $600 ma le $3,000 Amerika le tau e faatinoina ai na galuega. Ae o le faaaogāina o talivai ma tane vai, ua faaitiitia ai tupe faaalu a le faapotopotoga, ona ua lē toe manaʻomia ona faatau mai ni vai.

Ua mafai ona maua e o tatou uso aogā ona o le faaaogāina o le suāvai mai i le timu. Ua faapea mai Noemia o se tuafafine mai i Mozambique: “I le taimi muamua, e mamao le vaipanoa e matou te savavali ai ina ia maua mai ai se vai, ma e matou te taunuu mai i le maota ua matou matuā lē lavavā lava. Talu ai ona o le utiuti o le suāvai, e matuā faigatā ai foʻi la ona matou tausia le mamā. Ae o le taimi la lenei, ua mafai ona fufulu mamā o matou lima. E matou te lē o toe lē lavavā foʻi pe a taunuu i le Maota mo Sauniga, ae ua mafai ona matou olioli faatasi i a matou sauniga. Faafetai tele lava!”

Ua faapefea ona faatupeina e le faalapotopotoga nei galuega? E ala i foaʻi tauofo mo le galuega i le lalolagi aoao, lea e faia i auala eseese o loo i le donate.jw.org. Faafetai tele mo ā outou foaʻi tauofo!