4. Pe na Foafoaina i Tatou ia Mafatia?
Le Māfuaaga e Tāua ai
O le tali o lenā fesili e aafia ai lau vaaiga i le olaga.
Ia Mafaufau i ai
Pe e talafeagai i le Atua o lē na foafoaina se lalolagi matagofie, ona tuuina mai iā i tatou se olaga e tumu i mafatiaga?
E vaai tagata e lē ō i ni lotu i mafatiaga o se avanoa e tuuaʻia ai le Atua e faapea e lē o manatu mamafa mai. E latou te talitonu o mafatiaga ua faailoa mai ai e (1) leai se mana o le Atua e taofia ai, (2) lē manatu mamafa mai le Atua e taofi mafatiaga po o le (3) e leai se Atua.
Pe e na o le pau ia o māfuaaga ua mafatia ai tagata?
IA AʻOAʻO ATILI
Maimoa i le vitiō E Faapefea Ona Tatou Mautinoa e Saʻo Aʻiaʻi le Tusi Paia? i le jw.org.
Manatu o le Tusi Paia
E leʻi foafoaina e le Atua i tatou ia mafatia.
O lona finagalo ia tatou olioli i le olaga.
“E leai se mea e sili atu mo [tagata], nai lo o le olioli ma faia le mea lelei i le olaga o se tasi; i le ma lea, ia taʻitasi le tagata ma ʻai ma inu ma fiafia i mea lelei ona o ana galuega mamafa uma. O le meaalofa lea mai i le Atua.”—FAILAUGA 3:12, 13.
Na avatu e le Atua i uluaʻi tagata se olaga e lelei atoatoa.
E na te leʻi foafoaina i laʻua po o ē na tupuga mai iā i laʻua ia mafatia.
“Ua fetalai atu le Atua iā i laʻua: ʻIa fanafanau ma ia matuā faatoʻateleina, ia tumu ai le lalolagi ma ia galueaʻiina.’”—KENESE 1:28.
Na filifili le uluaʻi tagata e lē usiusitaʻi i le Atua.
O le iʻuga, ua la aumaia ai le tele o mafatiaga iā i laʻua ma i latou uma na tupuga mai ai.
“E pei ona oo mai o le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma auā ua agasala uma lava.”—ROMA 5:12.a
E leʻi foafoaina e le Atua i tatou ia ola tutoʻatasi e aunoa ma lana taʻitaʻiga.
E pei ona lē mafai ona ola o le tagata i totonu o le vai, e faapena foʻi ona lē mafai ona pulea e tagata i latou lava.
“E lē o i le tagata foʻi e savali, ona faatonuina le mea e ui ai o ia.”—IEREMIA 10:23.
E leʻi finagalo le Atua ia tatou mafatia.
O lona finagalo ia tatou ʻalofia faafitauli i le tele e mafai ai.
“E lelei pe a e faalogo mai i aʻu poloaʻiga! Ona pei ai lea o se vaitafe lou filemu.”—ISAIA 48:18.
a I le Tusi Paia, o le upu “agasala” e lē gata e faasino atu i gaoioiga sesē, ae e uiga atu foʻi i se tulaga ua tuufaasolo mai i tagata uma.