Le Tama o le Folafolaga

Ua nonofo pea Iosefa ma Maria i Peteleema nai lo o le toe foʻi i Nasareta. Ua valu nei aso le matua o Iesu, ma ua peritomeina o ia e tusa ai ma le Tulafono a le Atua. (Levitiko 12:2, 3) O se tū masani foʻi le faaigoa o se pepe tama i le aso lava e peritomeina ai. O lea, ua faaigoa ai e Iosefa ma Maria le la tama iā Iesu, e pei ona faailoa atu e Kaperielu.

Ua silia nei ma le masina, ma ua 40 aso le matua o Iesu. Ua ave nei o ia e ona mātua i le malumalu i Ierusalema, lea e lē mamao ese mai i le nofoaga o loo latou nonofo ai. E tusa ai ma le Tulafono, pe a mavae aso e 40 talu ona fanau se fafine, e tatau ona ia ofoina atu se taulaga mo le faamamāina i le malumalu.—Levitiko 12:4-8.

O le mea lenā ua fai e Maria. Ua ia aumaia ni tamaʻi manulele se lua e fai ma ana taulaga, ma ua iloa ai i inei le tulaga tau tamaoaiga o Iosefa ma Maria. E tusa ai ma le Tulafono, e tatau ona ofoina atu se tamaʻi mamoe poʻa ma se manulele. Ae pe afai e lē gafatia e le tinā se tamaʻi mamoe poʻa, ona ia avatu lea o ni manutagi po o ni tamaʻi lupe se lua. O le taulaga lenā ua ofoina atu e Maria.

Ua taʻitaʻiina atu nei Simeona, o se toeaina matua, e le agaga paia i le malumalu lea o loo iai Iosefa, Maria ma le la tama. Ua faailoa atu e le Atua iā Simeona, o le a ia vaai i le Keriso po o le Mesia na folafolaina mai a o leʻi oti o ia. Ua tago atu Simeona ma sapai mai le tamaitiiti i ona lima.

Ua ia faamanū atu i le Atua e faapea: “O lenei, le Alii Pule Silisili Ese e, ua e tuu atu lau pologa e alu ma le filemu e tusa ma lau folafolaga; auā ua vaai oʻu mata i lē e aumaia le faaolataga lea ua e saunia ina ia iloa atu e tagata uma, o le malamalama e aveesea ai le ufiufi mai i atunuu, ma o le mamalu foʻi lea o lou nuu o Isaraelu.”—Luka 2:29-32.

Ua matuā ofo Iosefa ma Maria i lenei mea. Ua faamanuia Simeona iā i latou ma faapea atu iā Maria, ua ʻtofia lana tama e paʻuʻū ma toe tutū ai le toʻatele i Isaraelu,’ ma o le a tuia foʻi lona loto i le faanoanoa e pei o se pelu maʻai.—Luka 2:34.

O loo iai foʻi i le malumalu se perofeta fafine e 84 tausaga, e igoa iā Ana. O aso uma lava e alu ai o ia i le malumalu. Ua faalatalata atu o ia iā Iosefa, Maria ma le pepe o Iesu. Ua amata ona ia faafetai i le Atua, ma talatalanoa e faatatau iā Iesu iā i latou uma e fia faalogologo.

Maʻeu le fiafia o Iosefa ma Maria i nei mea ua tutupu i le malumalu. O nei mea uma, ua faamautinoa atu ai o le la tama o ia lea o Lē na folafolaina mai e le Atua.