Le Faiva a Iesu i Perea

Sa aʻoaʻo atu ma faamālōlōina e Iesu tagata i Iutaia ma Ierusalema. Mulimuli ane, ua ia uia le vaitafe o Ioritana ina ia aʻoaʻo atu ai i lea aai ma lea aai i le itumalo o Perea. E lē o toe umi ona toe foʻi lea o ia i Ierusalema.

A o iai Iesu i Perea, ua fesili atu se tamāloa iā te ia: “Le Alii e, pe e toʻaitiiti ni tagata e faaolaina?” Atonu e iloa e le tamāloa le tele o finauga i le va o taʻitaʻi lotu e faatatau i le aofaʻi o i latou o le a faasaoina. Peitaʻi ua suia e Iesu le mataupu, ma talanoa atu e faatatau i le gaoioiga e tatau ona fai ina ia faasaoina ai. Ua ia faapea atu: “Ia outou faamalolosi ma finafinau e ulu atu i le faitotoʻa vaitiiti.” Ioe, e manaʻomia ni taumafaiga fitā. Aiseā? Ua fetalai atu Iesu: “Ou te fai atu iā te outou, e toʻatele e saʻili ina ia ulu atu i ai ae e lē mafai.”—Luka 13:23, 24.

Ina ia faamamafa lenei manatu o le manaʻomia o ni taumafaiga fitā, ua fetalai atu Iesu: “Auā pe a tulaʻi le tagata o le aiga ma loka le faitotoʻa, a ua outou tutū i fafo ma tuʻituʻi ma faapea atu, ʻLau susuga e, ia e tatala mai le faitotoʻa iā i matou.’ . . . Peitaʻi, o le a fai atu o ia, ʻOu te lē iloa outou. O outou uma o ē e fai amioleaga, inā ō ese ia iā te aʻu!’”—Luka 13:25-27.

Ua faataʻitaʻia mai i lenei mea le faigatā o le tulaga e oo iai se tagata ae faifaiaga. Atonu e taunuu atu o ia i le taimi e manatu e talafeagai mo ia lava, ma iloa ai ua tapuni ma ua loka le faitotoʻa. Sa tatau ona faia ni ana taumafaiga ina ia vave taunuu, e tusa pe e lē talafeagai ma lona tulaga. E talitutusa lenā ma le toʻatele o ē na semanū e maua le tele o aogā mai i le iai faatasi ma Iesu, a o ia aʻoaʻo atu iā i latou. E latou te leʻi faaaogā lea avanoa e avea ai le tapuaʻiga moni ma fuafuaga autū o o latou olaga. E toetoe lava o i latou uma na auina atu i ai Iesu, e leʻi taliaina le sauniuniga a le Atua mo le faaolataga. Ua fetalai Iesu o le a latou ʻtagiauē ma lilivau o latou nifo,’ pe a lafoina i latou i fafo. Peitaʻi o i latou “mai i le itu i sasaʻe ma le itu i sisifo, mai i mātū ma saute,” o le a “taooto e aai i le laoai i le malo o le Atua.”—Luka 13:28, 29.

Ua fetalai atu Iesu: “O i latou o ē e mulimuli [e pei o tagata e lē o ni Iutaia ma tagata Iutaia ua faileagaina] o le a muamua, a o ē e muamua [o taʻitaʻi lotu o ē mitamita ona e tupuga mai iā Aperaamo] o le a mulimuli.” (Luka 13:30) O le avea ma ē e “mulimuli,” o lona uiga o le a lē iai i le Malo o le Atua i latou nei e leai se lotofaafetai mo mea faaleagaga.

Peitaʻi ua ō atu nisi o le ʻau Faresaio iā Iesu ma faapea atu iā te ia: “Inā alu ese ia mai i inei, auā ua saʻili Herota [Anetipa] e fasioti iā te oe.” Atonu na amataina e le tupu o Herota lenei tala faatupu ina ia sola ese ai Iesu mai i lona nuu. E foliga mai sa popole Herota ina neʻi toe aafia o ia i le fasiotiga o se isi perofeta, e pei ona ia aafia ai i le fasiotiga o Ioane le Papatiso. Peitaʻi ua fetalai atu Iesu i le ʻau Faresaio: “Ia ō atu ma fai atu i lenā alope, ʻFaauta! ua ou tulia temoni ma faamālōlōina maʻi i le asō ma taeao, ma o le a ou faamāeʻaina i le aso lona tolu.’” (Luka 13:31, 32) O le faaigoaina e Iesu o Herota o le “alope,” atonu o loo faasino atu o ia i le auala e fai togafiti ai nei meaola. Peitaʻi, e lē faatagaina e Iesu Herota po o se isi lava tagata e faaaogā pe faamalosia o ia. E na te faataunuuina le finagalo o lona Tamā mo ia, e tusa ai ma Lana taimi atofaina, ae e lē fua i manatu o tagata.

Ua faaauau atu nei le malaga a Iesu agaʻi i Ierusalema, auā ua ia faapea atu: “E lē tatau ona fasiotia se perofeta i fafo atu o Ierusalema.” (Luka 13:33) E leai ma se valoaga i le Tusi Paia na taʻua ai e tatau ona fasiotia le Mesia i Ierusalema. Ae aiseā la ua fetalai ai Iesu i le fasiotia o ia i inā? Talu ai o Ierusalema le laumua, ma o loo iai i inā le faamasinoga maualuga a le Saniterini e toʻa 71 ona sui, lea e faamasinoina ai i latou e molia o ni perofeta pepelo. E osia ai foʻi i Ierusalema taulaga i manu. O lea, ua silafia lelei e Iesu e lē talafeagai pe a fasiotia o ia i se isi aai.

Ua faapea atu ma le faanoanoa Iesu: “Ierusalema e, Ierusalema e, o lē na fasiotia le ʻauperofeta ma fetogia o ē na aauina atu iā te ia. E tele loʻu manaʻo e faapotopoto faatasi lau fanau, e pei ona ofaofataʻi e le moa o lana toloaʻi i lalo o ona apaʻau. Ae peitaʻi e tou te lē mananaʻo i ai! Faauta! Ua tuulafoaʻia lo outou fale iā te outou.” (Luka 13:34, 35) Talu ai ua filifili le nuu o Isaraelu e teena le Alo o le Atua, o lea la ua tatau ai ona latou fesagaʻia āuga o la latou filifiliga.

A o leʻi taunuu Iesu i Ierusalema, ua valaaulia o ia e se alii pule o le ʻau Faresaio i lona fale mo se taumafataga i le aso Sapati. Ua mataʻi e i latou o loo iai i lenā taumafataga, le gaoioiga o le a faia e Iesu i le tamāloa lea e maua i le maʻi fulafula (matuā tele le vai i le tino, ma e masani ona fulafula ai vae po o isi vaega o le tino). Ua fesili atu Iesu i le ʻau Faresaio faapea i latou e atamamai i le Tulafono: “Pe e taga i le tulafono ona faamālōlō i le sapati pe leai?”—Luka 14:3.

E leai se tasi ua tali mai. Ua faamālōlō e Iesu le tamāloa, ona fesili atu lea iā i latou: “O ai se tasi o outou, pe afai e paʻū sona atalii po o sana povi poʻa i se vaieli i le aso sapati, pe e lē vave ea ona ia tago atu ma ave aʻe i luga?” (Luka 14:5) E leai foʻi se tasi ua tali ane i le auala atamai ua ia aʻoaʻo atu ai.