O le ā le Fuafuaga o le Olaga?

Le tali a le Tusi Paia

E mafai ona fesiligia le fuafuaga o le olaga i auala eseese, e pei o le, Aiseā ua tatou iai i inei? Pe iai se fuafuaga o loʻu olaga? Ua faailoa mai i le Tusi Paia le fuafuaga o o tatou olaga, o le atiaʻe lea o se faauōga ma le Atua. Iloilo nisi nei o faamatalaga moni ua faailoa mai i le Tusi Paia.

O le Atua o Lē na foafoaina i tatou. Ua faapea mai le Tusi Paia: “O [le Atua] na faia i tatou, ae e lē o i tatou lava.”—Salamo 100:3; Faaaliga 4:11.
E iai le fuafuaga a le Atua mo mea uma na ia foafoaina, e aofia ai ma tatou.—Isaia 45:18.
Na foafoaina i tatou e le Atua ma se “manaʻoga faaleagaga,” e aofia ai le faanaunauga ina ia iloa le fuafuaga o le olaga. (Mataio 5:3) E finagalo o ia ina ia tatou faamalie lena faanaunauga.—Salamo 145:16.
E faamalieina o tatou manaʻoga faaleagaga e ala i le atiaʻe o se faauōga ma le Atua. E ui e manatu nisi e le mafai ona avea tatou ma uō a le Atua, ae ua faalaeiauina i tatou e le Tusi Paia: “Ia outou mafuta vavalalata atu i le Atua, ona mafuta vavalalata mai lea o ia iā te outou.”—Iakopo 4:8; 2:23.
Ina ia avea ma uō a le Atua, e tatau ona tatou ola e ōgatusa ma lona finagalo mo i tatou. Ua taʻua i le Failauga 12:13 lona finagalo e faapea, “Ia mataʻu i le Atua moni ma tausi i ana poloaʻiga. Auā o le matafaioi lea a tagata.”
I le lumanaʻi, o le a tatou maua ai le uluaʻi fuafuaga a le Atua na iai mo i tatou. O le a ia aveesea mafatiaga ma aumaia le ola e faavavau i ana uō, po o i latou e tapuaʻi iā te ia.—Salamo 37:10, 11.