Le Māfuaaga na Toe Iloilo ai e se Fafine Iutaia Ona Talitonuga

Faamatala mai lou talaaga.

Na ou fanau i le 1979 i le Iunaite Setete. Na teteʻa oʻu mātua ina ua tolu oʻu tausaga. Na tausia aʻe aʻu e loʻu tinā e tusa ma aganuu faa-Iutaia ma auina atu aʻu i yeshivas, po o aʻoga Iutaia. Ina ua fitu oʻu tausaga, na matou ō i Isaraelu ma nonofo ai mo le tausaga, ma na ou auai i le aʻoga i se nofoaga e iai ni faatoʻaga e taʻua o kibbutz. Mulimuli ane, na ma siitia ma loʻu tinā i Mexico.

E ui e leʻi iai se sunako i lenā nofoaga, ae na ou tausia pea oʻu talitonuga faa-Iutaia. Ou te tutuina molīgaʻo i le Sapati, faitau le tusi Tulafono, ma tatalo e ala i le faaaogā o le tusi tatalo. I le aʻoga, e masani ona ou taʻu atu i tamaiti o laʻu vasega, o laʻu lotu o le lotu moni. Ou te leʻi faitau lava i le Feagaiga Fou, lea e uaʻi atu i le faiva ma aʻoaʻoga a Iesu Keriso. Na fai mai loʻu tinā e aua ou te faitau ai, ina neʻi faasesēina ai aʻu i na aʻoaʻoga.

Aiseā na e filifili ai e faitau i le Feagaiga Fou?

Ina ua 17 oʻu tausaga, na ou toe foʻi i le Iunaite Setete e faauma ai aʻu aʻoga. O i inā, na taʻu mai ai e se tasi o aʻu uō Kerisiano, e iai se mea o loo misi i loʻu olaga pe a ou lē aʻoaʻo e faatatau iā Iesu.

Na ou tali atu: “O i latou e talitonu iā Iesu, e pogisa faaleagaga.”

Na fesili mai: “Na e faitau i le Feagaiga Fou?”

Na ou tali atu: “E leai.”

Na ia fai mai: “O lona uiga la ua e faia le faaiʻuga i se mea e te lē malamalama ai?”

Na matuā uigā ana upu, auā na masani ona ou manatu o se gaoioiga valea le faia o se faaiʻuga i se mea e te lē malamalama ai. Na ou lagona le māsiasi, ma na ou alu ma lana Tusi Paia i le fale ma amata ona faitau le Feagaiga Fou.

Na faapefea ona aafia oe i mea na e faitau ai?

Na ou maofa ina ua ou iloa, o tusitala o le Feagaiga Fou o ni tagata Iutaia. E lē gata i lea, o le tele na ou faitau ai, o le tele foʻi lenā o loʻu iloa, o Iesu o se tagata agalelei ma o se Iutaia lotomaulalo na manaʻo e fesoasoani i tagata, ae lē o le aumaia o mafatiaga iā i latou. Na ou alu foʻi i le faletusi ma aumai ai tusi e faatatau iā te ia. Peitaʻi, e leai ma se tusi o nei tusi na faatalitonuina ai aʻu o ia o le Mesia. O nisi tusi na taʻua ai o ia o le Atua, o se manatu ou te leʻi talitonu i ai. E lē gata foʻi i lea, o ai na tatalo atu i ai Iesu? Ae sili atu i lenā, na maliu Iesu. Ae o loo taʻua i le Tusi Paia e faatatau i le Atua: “E te lē maliu lava.”a

Na faapefea ona e maua tali i na fesili?

E lē feteenaʻi le upu moni, ma na ou manaʻo loa e saʻili le upu moni. Na ou tagi ma tatalo atu ma le lotoatoa i le Atua, ma o le taimi muamua lea ua ou tatalo ai e aunoa ma le tusi tatalo. E leʻi umi talu ona ou tatalo, ae tuʻituʻi mai loa le faitotoʻa. O ni fafine Molimau a Ieova se toʻalua. Na la ofo mai se lomiga mo suʻesuʻega faale-Tusi Paia mo aʻu. O lenā lomiga na matou faia ai se talanoaga uigā ma Molimau a Ieova, ma na ou mautinoa ai e faavae o latou talitonuga mai i le Tusi Paia. Mo se faataʻitaʻiga, na talitonu Molimau a Ieova o Iesu e lē o se vaega o le Tolutasi, ae “o le Alo o le Atua”b ma “o le uluaʻi foafoaga a le Atua.”c

Ina ua mavae sina taimi, na ou toe foʻi ai loa i Mexico ma faaauau ai ona ou suʻesuʻeina valoaga e faatatau i le Mesia ma Molimau a Ieova. Na ou maofa i le tele o valoaga o loo iai. Ae e leʻi faatalitonuina ai lava aʻu. Na ou taumānatu, ‘⁠Pe na o Iesu na taunuu ai nei valoaga? Ae ā pe afai o se tagata atamai lea na ia faataunuuina?’

O le ā na faatalitonuina ai oe?

Na faailoa mai e Molimau a Ieova iā te aʻu valoaga lea e lē mafai e se tagata ona ia faataunuuina. O se faataʻitaʻiga, na valoia e le perofeta o Mika i le silia ma le 700 tausaga muamua atu, o le a fanau mai le Mesia i Peteleema i Iutaia.d O ai e mafai ona faatonutonuina le nofoaga e fanau mai ai a o iai i le manava o le tinā? Na valoia e Isaia o le a fasiotia le Mesia e pei o se tagata solitulafono, ae o le a tanuina e pei o se tagata mauʻoa.e Na faataunuuina uma nei valoaga iā Iesu.

O le faamaoniga mulimuli o le tupuaga o Iesu. O loo taʻua i le Tusi Paia o le a tupuga mai le Mesia i le gafa o le tupu o Tavita.f Na teu e tagata Iutaia faamaumauga o o latou gafa. O lea, pe ana faapea e leʻi tupuga mai Iesu i le gafa o Tavita, semanū e faaaogā e ona fili lenā mea e tetee atu ai iā te ia. Ae e latou te leʻi faia faapea ona na manino lava na tupuga mai Iesu i le aiga o Tavita. E oo lava i le motu o tagata na latou taʻua o ia o “le Alo o Tavita.”g

I le 70 T.A, ina ua 37 tausaga talu ona maliu Iesu, na faaumatia ai e ʻautau a Roma Ierusalema, ma na leiloloa ai ma faamaumauga o gafa. O lea, ina ia faamaonia le gafa na tupuga mai ai, na tatau ona soifua le Mesia a o leʻi oo i le 70 T.A.

Na faapefea ona aafia ai oe i le iloaina o lenei mea?

I le Teuteronome 18:18, 19, na valoia ai o le a aumaia e le Atua i Isaraelu se perofeta e pei o Mose. Na fetalai le Atua: O so o se tasi “e lē faalogo i aʻu upu a ua ia tautala i loʻu igoa, ou te tāpā se tali mai iā te ia e tusa ma lea mea.” O aʻu suʻesuʻega loloto o le Tusi Paia atoa na faatalitonuina ai aʻu, o lenā perofeta, o Iesu le Nasareta.