Le Māfuaaga na Tuua ai e se Patele Lana Lotu

Faamolemole faamatala mai lou olaga a o e laʻititi.

Na ou fanau i Italia i le 1943. Na matou ola faatasi aʻe ma oʻu uso ma oʻu tuafafine i se nuu laʻititi. O lo matou tamā o se faifaato‘aga ma o se kamuta foʻi. Na tausia aʻe i matou e o matou mātua i le lotu Katoliko.

Aiseā na e manaʻo ai e avea ma patele?

A o oʻu laʻititi, ou te fiafia e faalogologo i faife‘au i le lotu pe a fai a latou lauga. Na ou manaʻo ai loa e avea aʻu ma faife‘au. Ina ua 13 oʻu tausaga, na ave aʻu e loʻu tinā i se aʻoga nofotumau a tama, lea e sauniunia ai i latou mo le lumana‘i ma aʻoaʻo ai ina ia avea ma faife‘au.

Pe na faaaogā le Tusi Paia i lau aʻoga?

E seāseā. Ina ua 15 oʻu tausaga, na aumaia ai e se faia‘oga iā te au se kopi o tusi a Evagelia, po o tusi e faatatau i le olaga ma le faiva a Iesu. Na ou faitauina lenā tusi i le tele o taimi. Ina ua 18 oʻu tausaga, na ou alu ai i Roma ma ou a‘oga i le iunivesite a patele lea e vaavaaia e le pope. Na ou suʻesuʻeina ai le faa-Latina, faa-Eleni, talafaasolopito, filosofia, suʻesuʻega i mataupu tau i le mafaufau, ma talitonuga faalotu. E ui na matou taulotoina mau o le Tusi Paia ma faalogo a o faitauina i le lotu i Aso Sa, ae e matou te leʻi suʻesuʻeina lelei le Tusi Paia.

A o avea oe ma pule o le a‘oga faafaife‘au, na e aʻoaʻoina ni vasega?

O laʻu galuega e tele a i le avatu o faatonuga i le aʻoga. Ae na ou aʻoaʻoina le vasega o le Fono Lona Lua a le Vatikana.

Aiseā na amata ai ona e fesiligia le lotu?

E iai ni mea se tolu na ou lē mautonu ai. E iai vaega fai a le lotu i faiga faapolotiki. Na talia e le lotu amioga lē lelei a taʻitaʻi lotu ma tagata lotu. Na iai foʻi aʻoaʻoga a le lotu Katoliko na ou lē mautinoa pe saʻo. Mo se faataʻitaʻiga, e faapefea i se Atua alofa ona faasalaina tagata e faavavau pe a maliliu? Pe e finagalo moni le Atua e fai faatauloto i taimi uma tatalo, faatasi ma se losalio?a

O le ā la na e faia?

Na ou tagi ma tatalo atu i le Atua mo le taʻitaʻiga. Na ou faatauina mai fo‘i le kopi o le Tusi Paia Katoliko o le Jerusalem Bible, lea e leʻi leva ona lomia i Italia, ma amata ona faitau. I se tasi Aso Sa i le taeao, faato‘a uma lava le Misasā ae asiasi mai loa ni tamāloloa se toʻalua. Na la faailoa mai o i laʻua o ni Molimau a Ieova. E silia ma le itula o matou talanoa e faatatau i le Tusi Paia, ma faailoga e iloa ai le tapua‘iga moni lea o loo taʻua i le Tusi Paia.

O le ā sou manatu i tagata na asiasi atu?

Na ou maofa i lo la mautinoa, ma le vave o le suʻeina o mau mai i le Tusi Paia Katoliko. Na mulimuli ane asiasi mai se isi Molimau e igoa iā Mario. Na ia faaalia le onosaʻi ma le faatuatua. E asiasi mai i taeao uma o Aso Toonaʻi i le tā o le iva, e tusa lava po o le ā le tulaga o le tau.

O ā manatu o isi patele i na asiasiga?

Na ou valaaulia i latou e auai mai i le matou talanoaga, ae leai se tasi na manaʻo e faia se suʻesuʻega faale-Tusi Paia. Peita‘i na ou fiafia i le talanoaga, ma mea mananaia na ou aʻoaʻoina. Na ou aʻoaʻoina le māfuaaga na faataga ai e le Atua mea leaga ma mafatiaga, o se mataupu ua leva ona ou fia malamalama ai.

Pe na taumafai isi taʻitaʻi maualuluga o le lotu e taofia oe mai le suʻesuʻeina o le Tusi Paia?

I le 1975, e tele taimi na ou asiasi ai i Roma e faamatala i ai oʻu manatu. Na taumafai taʻitaʻi e suia loʻu mafaufau, ae leai ma se tasi na faaaogāina le Tusi Paia. Iā Ianuari 9, 1976, na ou tusi atu ai i Roma o le a lē toe avea aʻu ma Katoliko. Na ou tuua le a‘oga i le lua aso mulimuli ane, ma ou malaga loa i se nofoaafi e auai i se sauniga a Molimau a Ieova mo le taimi muamua. Na ou iloa ane o se fonotaga na auai ai le tele o faapotopotoga. Na matuā eseese lava ma mea na ou ola aʻe ai! Na tofu le tagata ma lana Tusi Paia ma uaʻi atoatoa i mataupu eseese a failauga.

O le ā se manatu o lou aiga e faatatau i lau filifiliga?

O le toʻatele o i latou na matuā tetee lava. Ae na ou iloa mulimuli ane o loo suʻesuʻe se tasi o oʻu uso ma Molimau a Ieova i Lombardy, i le itu i mātū o Italia. Na ou alu ai loa e vaai o ia, ma na fesoasoani mai Molimau a Ieova i inā e suʻe saʻu galuega ma se mea ou te nofo ai. Na ou papatiso i le tausaga lava lenā, ma avea o se Molimau a Ieova.

Pe na e salamō la i lau filifiliga?

E leai! Ua ou lagona le vavalalata moni atu i le Atua, ona o mea ua ou aʻoaʻoina e faatatau iā te ia, e faavae mai i le Tusi Paia ae lē o filosofia ma tū faalotu. Ua mafai nei ona ou aʻoaʻoina isi i upu moni ma se uiga mautinoa.