Le Faamautinoaga a Ieova e Faatatau i le Parataiso

1. O le ā le feʻau na taʻu atu e le perofeta o Isaia i tagata Isaraelu?

NA FAAMATALAINA e le perofeta o Isaia Ieova o “le Atua o le upu moni.” O le faaupuga “upu moni,” o lona uiga i le gagana Eperu o le “amene.” (Isa. 65:​16, fpl.) E uiga atu le upu “amene” i le “o lea lava.” E masani ona faaaogā i le Tusi Paia le upu “amene” e faamautinoa mai ai, e moni so o se fetalaiga po o se gaoioiga e faia e Ieova ma Iesu. O lea, na matuā manino i tagata Isaraelu le feʻau a Isaia: O so o se mea e valoia e Ieova, e mautinoa e taunuu. Ua faamaonia e Ieova lenā mea, e ala i le faataunuuina o ana folafolaga uma.

2. Aiseā e tatou te maufaatuatuaina ai folafolaga a Ieova mo le lumanaʻi, ma o ā fesili o le a iloiloina?

² Pe e mafai foʻi ona tatou maufaatuatuaina folafolaga a Ieova mo le lumanaʻi? I le toetoe 800 tausaga talu ona mavae taimi o Isaia, na faamatalaina ai e le aposetolo o Paulo le māfuaaga e tatou te maufaatuatuaina ai pea folafolaga a le Atua, e ala i le faapea mai: ʻE lē mafai ona pepelo le Atua.’ (Epe. 6:18) E pei lava ona lē mafai ona sau mai i se vaipuna e tasi le vai magalo ma le vai oona, e faapena foʻi ona lē mafai ona pepelo Ieova, auā o ia o le Puna o le upu moni. O lea la, e tatou te maufaatuatuaina fetalaiga uma a Ieova, e aofia ai ma ana folafolaga mo le lumanaʻi. O le a talanoaina i lenei suʻesuʻega fesili nei: O le ā ua folafola mai e Ieova o le a ia saunia mo i tatou i le lumanaʻi? E faapefea ona faamautinoa mai e Ieova o le a taunuu moni lana folafolaga?

O LE Ā UA FOLAFOLA MAI E IEOVA?

3. (a) O le ā le folafolaga e matuā tautele i auauna a Ieova? (Faaaliga 21:​3, 4) (e) O le ā le auala e tali mai ai nisi pe a tatou faailoa atu i ai lenā folafolaga?

³ O le folafolaga o le a tatou talanoaina, e matuā tautele i auauna a Ieova i le lalolagi aoao. (Faitau le Faaaliga 21:​3, 4.) Ua folafola mai e Ieova le taimi o le a “lē toe iai se oti, po o se faanoanoa, po o se tagiauē, e lē toe iai foʻi se tigā.” O le toʻatele o i tatou e faaaogā lenei feʻau faamāfanafanaloto mai i le Tusi Paia, pe a talanoa i isi e faatatau i le Parataiso. O le ā le auala e tali mai ai isi pe a faailoa atu i ai lenā folafolaga? Atonu e latou te faapea mai: “O le mataʻina o na mea e faigatā ai ona ou talitonu pe e taunuu moni.”

4. (a) O le ā na silafia e Ieova, ma o le ā na ia valoia mai? (e) E ese mai i le folafolaga a Ieova e faatatau i le Parataiso, o le ā le isi mea na ia faia?

⁴ Ina ua faagaeeina e Ieova le aposetolo o Ioane e tusia lana folafolaga e faatatau i le Parataiso, na Ia silafia o le a tatou faailoa atu i isi lenā faamoemoe pe a talaʻi atu le feʻau o le Malo i aso nei. Na ia valoia foʻi o le a toʻatele i latou e faigatā ona talitonu i lenā folafolaga e faatatau i “mea fou.” (Isa. 42:9; 60:2; 2 Kori. 4:​3, 4) O lea, e faapefea ona tatou faamautinoa atu i isi ma i tatou lava, e taunuu moni lava faamanuiaga o loo i le Faaaliga 21:​3, 4? E lē gata ua aumaia e Ieova lenā folafolaga faamāfanafanaloto, ae ua ia faailoa mai foʻi māfuaaga maumaututū e mafai ai ona tatou maufaatuatuaina lenā folafolaga. O ā na māfuaaga?

UA FAAMAUTINOA MAI E IEOVA LANA FOLAFOLAGA

5. O le ā le mau o loo taʻua ai māfuaaga e tatou te maufaatuatuaina ai le folafolaga a le Atua, ma o le ā o loo taʻua ai?

⁵ I le mau o loo mulimuli mai, o loo taʻua ai māfuaaga e tatou te maufaatuatuaina ai le folafolaga a Ieova e faatatau i le Parataiso: “Ona fetalai mai lea o Lē o loo afio i le nofoālii: ʻFaauta! Ou te faia ia fou mea uma lava.’ Ua ia toe fetalai mai foʻi: ʻIa tusi, auā o upu nei e faamaoni ma moni.’ Ua fetalai mai foʻi o ia iā te aʻu: ʻUa taunuu! O aʻu o le Alefa ma le Omeka, o le amataga ma le gataaga.’”—Faaa. 21:​5, 6a.

6. E faapefea i faamautinoaga o loo i le Faaaliga 21:​5, 6 ona faamalosia ai lo tatou maufaatuatuaina o le folafolaga a Ieova?

⁶ E faapefea i lenei mau ona faamalosia ai lo tatou maufaatuatuaina o le folafolaga a le Atua? Ua faapea mai le tusi Faaaliga—Ua Latalata Lona Tumutumuga Matagofie!: ʻUa peiseaʻī o loo sainia e Ieova mo tagata faamaoni se faamautinoaga, po o se pepa e faamaonia ai le taunuu moni o nei faamanuiaga i le lumanaʻi.’b O loo taʻua i le Faaaliga 21:​3, 4 le folafolaga a le Atua. Ae i le fuaiupu e 5 ma le 6, e peiseaʻī o lea ua saini Ieova e faamautinoa ai e moni lana folafolaga. Seʻi o tatou iloiloina totoʻa upu o loo Ia faaaogā i lenā faamautinoaga.

7. O le ā se vala e mataʻina ai le faatomuaga o le faamautinoaga a le Atua, ma aiseā e tāua ai?

⁷ O loo faatomua mai e le Atua lana faamautinoaga e faapea: “Ona fetalai mai lea o Lē o loo afio i le nofoālii.” (Faaa. 21:5a) E tāua lenā faamautinoaga, ona o se tasi lenā o taimi mai i taimi e tolu i le tusi o Faaaliga o loo fetalai ai Ieova lava ia. O lea, o lenei faamautinoaga e lē mai i se agelu malosi, e lē mai iā Iesu ua faatūina, ae e mai iā Ieova lava ia. O lenā mea moni, ua faamatilatila ai le maufaatuatuaina o isi upu o loo sosoo ai o le faamautinoaga. Aiseā? Talu ai “e lē mafai ona tala pepelo” Ieova. (Tito 1:2) O lenā faamatalaga, ua faamaonia ai o le a taunuu moni upu o loo i le Faaaliga 21:​5, 6.

“FAAUTA! OU TE FAIA IA FOU MEA UMA LAVA”

8. Ua faapefea ona faamatilatila mai e Ieova e taunuu moni lava lana folafolaga? (Isaia 46:10)

⁸ Seʻi o tatou iloiloina le upu: “Faauta!” (Faaa. 21:5) O le upu Eleni o loo faaliliu mai ai le upu “faauta!,” e tele taimi o loo faaaogā ai i le tusi o Faaaliga. Ua faapea mai se tusitusiga, o le faailoga upu ofo o loo faaaogā i le upu “faauta!” o se auala e faauaʻi atu ai le tagata faitau i le mea o loo sosoo mai. O le ā le fetalaiga a le Atua o loo sosoo mai? “Ou te faia ia fou mea uma lava.” E moni o loo fetalai Ieova e faatatau i suiga i le lumanaʻi, ae ua ia mautinoa o le a ia faataunuuina moni lava lenei folafolaga. O lea, ua ia fetalai ai e faatatau i nei suiga e pei lava ua uma ona faataunuu.—Faitau le Isaia 46:10.

9. (a) O ā gaoioiga e lua a Ieova e uiga atu i ai le faaupuga “faia ia fou mea uma lava”? (e) O le ā o le a tupu i le “lagi” ma le “lalolagi” o loo iai nei?

⁹ Seʻi o tatou iloiloina le faaupuga o loo sosoo ai i le Faaaliga 21:5: “Faia ia fou mea uma lava.” I le Faaaliga e 21, o loo uiga atu lenā faaupuga i ni gaoioiga se lua e faia e Ieova: o le suia ma le toe faafoʻisia. Muamua, o le ā o le a suia e Ieova? Ua faapea mai le Faaaliga 21:1: “Ua mavae atu le uluaʻi lagi ma le uluaʻi lalolagi.” E faasino atu le “uluaʻi lagi” i malo faapolotiki o loo taaʻina e Satani ma ana temoni. (Mata. 4:​8, 9; 1 Ioa. 5:19) I le Tusi Paia, e faasino atu le upu “lalolagi” i tagata o loo nonofo ai. (Kene. 11:1; Sala. 96:1) O lea la, o le “uluaʻi lalolagi” e faasino atu i tagata amioleaga. E lē toe faaleleia e Ieova le “lagi” ma le “lalolagi” o loo iai nei, ae o le a ia tafiesea atoatoa. O le a suia e Ieova le lagi ma le lalolagi o loo iai nei, i le “lagi fou ma le lalolagi fou,” po o se pulega fou o le a pulea tagata amiotonu.

10. O ā mea o le a faafouina e Ieova?

¹⁰ I le Faaaliga 21:​5, e tatou te faitau ai i mea o le a faafouina e Ieova. Mātau e leʻi fetalai Ieova: “Ou te faia mea fou uma lava.” Nai lo o lea, na ia fetalai: “Ou te faia ia fou mea uma lava.” O lea, o le a toe faafou e Ieova le lalolagi ma tagata e ala i le toe faafoʻisia i le tulaga lelei atoatoa. E pei ona valoia e Isaia, o le a suia le lalolagi atoa ia avea e pei o le faatoʻaga matagofie o Etena. O le a toe faafoʻisia foʻi e Ieova tagata i le tulaga lelei atoatoa. O le a faamālōlōina pipili, tauaso, ma ē e tutuli, ma o le a faatutūina mai foʻi ē ua maliliu.—Isa. 25:8; 35:​1-7.

“O UPU NEI E FAAMAONI MA MONI. . . . UA TAUNUU!”

11. O le ā le faatonuga na taʻu atu e Ieova iā Ioane, ma o le ā le māfuaaga?

¹¹ O ā isi mea ua faamautinoa mai e le Atua? Na fetalai atu Ieova iā Ioane: “Ia tusi, auā o upu nei e faamaoni ma moni.” (Faaa. 21:5) E lē gata na faatonuina e Ieova Ioane “ia tusi,” ae na ia taʻu atu foʻi ma le māfuaaga e ala i le fetalai atu: “Auā o upu nei e faamaoni ma moni.” O lona uiga, e maufaatuatuaina ma saʻo aʻiaʻi fetalaiga a le Atua. E tatou te lotofaafetai ona o le usitaʻi o Ioane i le faatonuga “ia tusi,” ua mafai ai ona tatou faitau i le folafolaga a le Atua e faatatau i le Parataiso, ma manatunatu loloto i faamanuiaga matagofie o le a tatou maua.

12. Aiseā e talafeagai ai le fetalai o Ieova: “Ua taunuu!”?

¹² O le ā le isi fetalaiga a le Atua na sosoo ai? “Ua taunuu!” (Faaa. 21:6) O loo fetalai Ieova e pei lava ua uma ona taunuu mea uma na ia folafola mai e faatatau i le Parataiso. Ua talafeagai le faia e Ieova o lenā fetalaiga, auā e leai se mea e mafai ona taofia o ia mai i le faataunuuina o lona finagalo. Ua aumaia foʻi e Ieova se isi vala mataʻina o lana faamautinoaga e faatatau i lana folafolaga. O le ā lenā vala?

“O AʻU O LE ALEFA MA LE OMEKA”

13. Aiseā na fetalai ai Ieova: “O aʻu o le Alefa ma le Omeka”?

¹³ E pei ona taʻua muamua, e tolu taimi na fetalai ai Ieova iā Ioane e ala i ni faaaliga. (Faaa. 1:8; 21:​5, 6; 22:13) I na taimi taʻitasi, na fetalai ai Ieova: “O aʻu o le Alefa ma le Omeka.” O le mataʻitusi alefa e amata ai le alafapeta Eleni, ae o le mataʻitusi omeka e faaiʻu ai. O le faaaogāina la e Ieova o le faaupuga “o le Alefa ma le Omeka,” ua ia faailoa mai ai, pe a ia amataina se mea o le a ia faaiʻuina foʻi.

14. (a) Aumai se faataʻitaʻiga o le taimi na pei ua fetalai ai Ieova “Alefa,” ma le taimi e pei o le a ia fetalai ai “Omeka.” (e) O le ā le faamautinoaga o loo taʻua i le Kenese 2:​1-3?

¹⁴ Ina ua uma ona foafoaina e Ieova Atamu ma Eva, ona ia faailoa mai lea o lona finagalo mo tagata ma le lalolagi. Ua taʻua i le Tusi Paia: “Ona faamanuia lea o le Atua iā i laʻua ma ua fetalai atu le Atua iā i laʻua: ʻIa fanafanau ma ia faatoʻateleina, ia tumu ai le lalolagi ma ia galueaʻiina.’” (Kene. 1:28) I lenā taimi, e pei ua fetalai atu Ieova “Alefa.” E iai le taimi o le a tumu ai le lalolagi i tagata lelei atoatoa ma usiusitaʻi e tupuga mai iā Atamu ma Eva, ma o le a latou galueaʻiina ia avea o se Parataiso. I lenā taimi, e pei o le a fetalai atu Ieova “Omeka.” Ina ua māeʻa ona foafoaina e Ieova “le lagi ma le lalolagi ma mea uma o loo iai,” na ia avatu se faamautinoaga o loo taʻua i le Kenese 2:​1-3. (Faitau.) Na faatulaga e Ieova le aso lona fitu o se aso e paia iā te ia. O le ā lona uiga? Na faamautinoa mai e Ieova o le a ia faataunuu lona finagalo mo tagata ma le lalolagi, ma o le a faataunuuina atoatoa i le iʻuga o le aso lona fitu.

15. Aiseā na foliga mai ai ua faalēaogāina e Satani le finagalo o le Atua mo tagata?

¹⁵ Ina ua fouvale Atamu ma Eva, na la agasala ma tuufaasolo mai ai le agasala ma le oti i a la fanau. (Roma 5:12) O lea, na foliga mai ai ua faalēaogā e Satani le faataunuuga o le finagalo o le Atua, ina ia tumu le lalolagi i tagata lelei atoatoa ma usiusitaʻi. E peiseaʻī ua taofia e Satani Ieova mai i le faapea mai “Omeka.” Atonu na manatu Satani, e leai se isi auala e mafai ai e Ieova ona faataunuu lana folafolaga. Atonu foʻi na manatu Satani, o le a faaumatia e Ieova Atamu ma Eva ae foafoaina se isi ulugalii lelei atoatoa e faataunuu Lona finagalo mo tagata. Peitaʻi, pe ana faapea e faia e le Atua lenā mea, o le a tuuaʻia o ia e le Tiapolo e pepelo. Aiseā? O loo taʻua i le Kenese 1:​28, na fetalai Ieova iā Atamu ma Eva o le a faatumulia le lalolagi i a la fanau.

16. Aiseā na ono manatu ai Satani e mafai ona ia tuuaʻia Ieova e lē mafai ona Ia faataunuuina lana folafolaga?

¹⁶ O le ā se isi auala na ono manatu Satani o le a faia e le Atua? Na ono manatu Satani o le a faataga e Ieova Atamu ma Eva e fanauina ni fanau e lē lelei atoatoa, ae e lē mafai lava ona latou toe maua le tulaga lelei atoatoa. (Fai. 7:20; Roma 3:23) Pe ana faia e Ieova lenā mea, o le a tuuaʻia o ia e Satani e lē mafai ona ia faataunuuina ana folafolaga. Aiseā? Talu ai o lenā auala e lē mafai ona faataunuuina ai le finagalo o le Atua, ina ia tumu le lalolagi Parataiso i fanau lelei atoatoa ma usiusitaʻi a Atamu ma Eva.

17. Na faapefea ona taulima e Ieova le fouvalega a Satani ma le uluaʻi ulugalii, ma o le ā o le a iʻu i ai? (Tagaʻi foʻi i le ata.)

¹⁷ Na taulima e Ieova le fouvalega a Satani ma le uluaʻi ulugalii, i se auala atonu na matuā faateʻia ai lava Satani. (Sala. 92:5) E lē pepelo Ieova. Na ia faamaonia le moni o lana folafolaga, e ala i le faataga o Atamu ma Eva e fanauina ni fanau. E mafai e Ieova ona faataunuu ana folafolaga, ma e leai se mea e mafai ona taofia o ia. Na ia gaoioi pea e faataunuu lona finagalo, e ala i le saunia o se “fanau” o le a faasaoina ē e usiusitaʻi e tupuga mai iā Atamu ma Eva. (Kene. 3:15; 22:18) Atonu na matuā lē magagana Satani i le auala na saunia ai e Ieova le togiola. Aiseā? Talu ai e faavae lenā faatulagaga i le alofa e lē manatu faapito. (Mata. 20:28; Ioa. 3:16) Peitaʻi, e lē iai iā Satani lenā uiga, auā e manatu faapito o ia. O lea la, o ā mea o le a faataunuuina ona o le togiola? I le faaiʻuga o le 1,000 tausaga, o le a ola ai i le lalolagi parataiso fanau lelei atoatoa ma usiusitaʻi a Atamu ma Eva, e pei lava o le finagalo o Ieova mai i le amataga. I lenā taimi, e pei o le a fetalai mai Ieova, “Omeka.”

IA FAAMALOSIA LO TATOU MAUFAATUATUAINA O LE FOLAFOLAGA A IEOVA

18. O ā faamautinoaga e tolu ua faailoa mai e le Atua iā i tatou? (Tagaʻi foʻi i le pusa “Māfuaaga e Tolu e Maufaatuatuaina ai le Folafolaga a Ieova.”)

¹⁸ Pe a fua i manatu ua talanoaina, o ā faamautinoaga e mafai ona tatou faailoa atu i ē e faigatā ona talitonu, o le a taunuu moni lava le folafolaga a le Atua e faatatau i le Parataiso? Muamua, o Ieova lava ia na faia le folafolaga. Ua faapea mai le tusi o Faaaliga: “Ona fetalai mai lea o Lē o loo afio i le nofoālii: ʻFaauta! Ou te faia ia fou mea uma lava.’” E iā Ieova le atamai, malosi, ma le faanaunauga e faataunuu ai lana folafolaga. Lua, e matuā mautinoa le faataunuuina o le folafolaga a Ieova. O lea, i lana silafaga, ua uma ona faataunuuina. Ua talafeagai ai ona ia fetalai mai: “O upu nei e faamaoni ma moni. . . . Ua taunuu!” Tolu, pe a amata e Ieova se mea e na te faaiʻuina lava, e pei ona faamautinoa mai i lana fetalaiga, “O aʻu o le Alefa ma le Omeka.” O le a faamaonia e Ieova e pepelo Satani, ma e lē mafai ona ia taofia le faataunuuina o le finagalo o Ieova.

19. Pe a faigatā ona talitonu tagata i le folafolaga a le Atua e faatatau i le Parataiso, o le ā e te faia?

¹⁹ Ia manatua, o taimi uma e te faailoa atu ai le faamautinoaga a le Atua i ē e te talaʻi i ai, ua e faamalosia la lou maufaatuatuaina o folafolaga a Ieova. O lea la, pe a e faitauina le folafolaga faamāfanafanaloto e faatatau i le Parataiso o loo taʻua i le Faaaliga 21:​4, ae faapea mai se isi, “E faigatā ona ou talitonu i lenā mea,” o le ā e te faia? Faitau ma faamatala i ai le fuaiupu e 5 ma le 6. Ia faailoa i ai auala ua faamautinoa mai ai e Ieova lana folafolaga, e pei lava ua ia sainia.—Isa. 65:16.