E Mafai Ona E Ausia Ou Sini Faaleagaga

1. O le ā se luʻi o loo feagai ma le toʻatele o i tatou?

PE NA e faatūina se sini faaleagaga ae e faigatā ona ausia?b Pe afai o lea, e lē na o oe o loo tupu ai lenā mea. O se faataʻitaʻiga, na manaʻo Philip e faaleleia le auala e faia ai ana tatalo ma le tele e tatalo ai, ae na faigatā ona ia maua se taimi e faia ai. O le sini o Erika, ia vave ona taunuu i faatasiga mo le galuega talaʻi. Ae e toetoe o faatasiga uma e tuai ai lava o ia. E tele taimi na taumafai ai Tomáš e faitau le Tusi Paia atoa. Ua ia faapea mai: “Ou te leʻi fiafia e faitau le Tusi Paia. E faatolu ona ou taumafai e fai, ae i na taimi uma e gata laʻu faitau i le tusi o Levitiko.”

2. Aiseā e lē tatau ai ona tatou lotovaivai pe afai na tatou faatū se sini ae e leʻi ausia?

² Pe afai na e faatū se sini ae e te leʻi ausia, aua e te lotovaivai ai. E oo lava i le ausia o se sini faigofie, e manaʻomia ai le taimi ma galuega mamafa. O lou naunau lava ina ia ausia se sini, e faaalia ai e tāua iā te oe la oulua faiā ma Ieova ma e te manaʻo e avatu le mea sili iā te ia. E tāua iā Ieova au taumafaiga. O le mea moni, e na te lē faatalitalia mai iā te oe se mea e sili atu nai lo o le mea e te mafaia. (Sala. 103:14; Mika 6:8) O lea la, pe a faatū sou sini, ia faamautinoa e mafai ona e ausia. Pe afai o lea, o le ā e mafai ona e faia ina ia ausia ai? Seʻi o tatou talanoa i nisi o fautuaga.

E TĀUA LE IAI O SE UUNAʻIGA MALOSI

3. Aiseā e tāua ai le iai o se uunaʻiga malosi?

³ E mātua tāua ona iai se uunaʻiga malosi ina ia ausia ai ou sini faaleagaga. O se tasi e iai lenā uunaʻiga, e iā te ia se faanaunauga malosi e galue ina ia ausia lona sini. E pei lenā uunaʻiga o se savili e unaʻia se vaa ina ia taunuu i le mea o loo agaʻi i ai. Pe a agi pea le savili, o le a taunuu le tagata folau i le mea o loo agaʻi i ai. Pe a malosi foʻi le savili, o le a vave ona ia taunuu. I se tulaga talitutusa, pe a iā i tatou se uunaʻiga malosi, o lo tatou taumafai malosi foʻi lenā e ausia o tatou sini. Ua faapea mai David, o se uso i El Salvador: “Pe a iā te oe se uunaʻiga, e fai au taumafaiga malolosi. E te lē faatagaina so o se mea e taofia ai oe mai i le ausia o lou sini.” O lea, o le ā e mafai ona e faia ina ia iā te oe se uunaʻiga malosi?

4. O le ā e mafai ona tatou tatalo ai? (Filipi 2:13) (Tagaʻi foʻi i le ata.)

⁴ Ia tatalo mo se uunaʻiga malosi. E mafai ona uunaʻia oe e Ieova e ausia lou sini, e ala i lona agaga paia. (Faitau le Filipi 2:13.) O nisi taimi e tatou te faatū se sini ona e tatou te iloa o le mea lenā e tatau ona fai, ma o se mea lelei. Ae atonu e lē o lo tatou faanaunauga moni lenā. O le mea lenā na tupu i se tuafafine e igoa iā Norina i Uganda. Sa ia faatū se sini e faia se suʻesuʻega faale-Tusi Paia, e ui e leʻi iai se uunaʻiga iā te ia ona sa ia lagona le lē agavaa e avea o se faiaʻoga. O le ā na fesoasoani iā te ia? Ua ia faapea mai: “Na amata ona ou tatalo iā Ieova i aso uma, ina ia fesoasoani mai e faamalosia loʻu faanaunauga e faia se suʻesuʻega faale-Tusi Paia. Ina ia ōgatusa ma aʻu tatalo, na ou galue ai e faaleleia oʻu tomai tau aʻoaʻo atu. Ina ua mavae ni nai masina, na ou mātauina ai ua faamalosia loʻu faanaunauga. O le tausaga lava lenā, na amata ai aʻu suʻesuʻega faale-Tusi Paia e lua.”

5. Ina ia iā i tatou se uunaʻiga malosi, o le ā e mafai ona tatou manatunatu loloto i ai?

⁵ Ia manatunatu loloto i mea ua faia e Ieova mo oe. (Sala. 143:5) Na manatunatu loloto le aposetolo o Paulo i le agalelei faifua o Ieova iā te ia, ma na uunaʻia ai o ia e galue mamafa mo Ieova. (1 Kori. 15:9, 10; 1 Timo. 1:12-14) I se tulaga talitutusa, o le tele e te manatunatu loloto ai i mea ua faia e Ieova mo oe, o le atili uunaʻia foʻi lenā o oe ina ia ausia lou sini. (Sala. 116:12) Ia mātau po o le ā na fesoasoani i se tuafafine i Honduras ina ia ausia lona sini e avea o se paeonia sauatoa. Ua ia faapea mai: “Na ou manatunatu i le tele o le alofa o Ieova iā te aʻu. Ua ia taʻitaʻia mai aʻu i ona tagata. E na te tausia ma puipuia aʻu. O le manatunatu loloto i na mea, ua faamalosia ai loʻu alofa mo ia ma atili uunaʻia ai aʻu e ausia loʻu sini.”

6. O le ā se isi mea e fesoasoani iā i tatou ina ia atili ai ona iai se uunaʻiga malosi?

⁶ Ia uaʻi atu i aogā pe a ausia lou sini. Seʻi mātau le mea na fesoasoani iā Erika lea na taʻua i le amataga, ina ia ausia ai lona sini o le tausi taimi. Ua ia faapea mai: “Na ou iloa e tele mea na ou misia ona o loʻu tuai i le talaʻiga. Ae o le vave taunuu, e mafai ai ona ou faafeiloaʻia uso ma tuafāfine ma faaalu se taimi ma i latou. E mafai ai foʻi ona ou faalogo i fautuaga aogā e fesoasoani iā te aʻu, e maua ai le fiafia ma faaleleia laʻu faiva.” Na uaʻi atu Erika i aogā na maua ona o le tausi taimi, ma na ia ausia lona sini. O ā aogā e mafai ona e uaʻi atu i ai? Pe afai o lou sini o le faitauina o le Tusi Paia po o le tatalo, ia manatunatu pe e faapefea ona faamalosia ai la oulua faauōga ma Ieova. (Sala. 145:18, 19) Pe afai o lou sini o le atiaʻe o se uiga faa-Kerisiano, ia uaʻi atu pe e faapefea ona faaleleia ai lau faiā ma isi. (Kolo. 3:14) Aiseā e te lē faia ai se lisi o māfuaaga uma e te manaʻo ai e ausia lou sini? Ia fai ma iloilo lenā lisi. Ua faapea mai Tomáš lea na taʻua i le amataga: “Pe afai e tele ni māfuaaga ou te taumafai ai e ausia se sini, o le tele foʻi lenā ou te galue mamafa ai ina ia ausia.”

7. O le ā na fesoasoani iā Julio ma lana avā ina ia ausia ai lo la sini?

⁷ Ia faaalu se taimi ma i latou e uunaʻia oe e ausia ou sini. (Faata. 13:20) Mātau po o le ā na fesoasoani iā Julio ma lana avā ina ia ausia lo la sini, o le faalautele atu o le la faiva. Ua faapea mai Julio: “E ma te filifilia uō e lagolagoina lo ma sini, ma e ma te talanoa ma i latou e faatatau i lo ma sini. Talu ai o le toʻatele o i latou ua ausia sini e pei o lo ma sini, ua mafai ai la ona latou aumaia fautuaga e aogā iā i maʻua. E fesili mai foʻi a ma uō po o ā mai a ma fuafuaga, ma e latou te faalaeiau i maʻua pe a manaʻomia.”

PE A LEAI SE UUNAʻIGA

8. O le ā e ono tupu pe afai e seʻiloga e iai se uunaʻiga ona faatoʻā galue lea e ausia se sini? (Tagaʻi foʻi i le ata.)

⁸ Peitaʻi, e iai lava aso e tatou te lagona ai ua leai se uunaʻiga iā i tatou e faia ai se mea. Po o lona uiga la ua lē mafai ai ona tatou galulue ina ia ausia o tatou sini? E leai. Seʻi faataʻitaʻi, e mafai ona avea le savili o se malosiaga e unaʻia ai se vaa ina ia taunuu i le mea o loo agaʻi i ai. Peitaʻi, e fesuisuiaʻi le malosi o le savili, ma i nisi aso e matuā leai ai lava se savili. Po o lona uiga la e lē mafai ona toe minoi le vaa? E leai. O se faataʻitaʻiga, o isi vaa e iai afi, ae o isi vaa e fai o latou foe. E mafai ona faaaogā e le tagata folau na mea, ina ia minoi ai pea le vaa ma taunuu ai i le mea o loo agaʻi i ai. E pei lava ona fesuisuiaʻi le malosi o le savili, e faapena foʻi lo tatou uunaʻiga. E iai aso e matuā leai ai se uunaʻiga iā i tatou e galulue ina ia ausia o tatou sini. O lea, pe afai e seʻiloga lava e iai iā i tatou se uunaʻiga e galulue ai, atonu e lē mafai lava ona ausia. Peitaʻi, e pei lava ona saʻili e le tagata folau isi auala ina ia taunuu ai le vaa i le mea o loo agaʻi i ai, e mafai foʻi ona tatou galulue pea e tusa lava pe e leai se uunaʻiga iā i tatou. E ui lava e manaʻomia ai le amio pulea, ae e iai ona iʻuga lelei. A o leʻi talanoaina le mea e mafai ona tatou faia, seʻi iloilo se fesili e ono tulaʻi mai.

9. Pe e sesē le galue pea e ausia se sini e tusa pe e lē o iā i tatou se uunaʻiga e faia ai? Ia faamatala.

⁹ E finagalo Ieova e tatou te auauna iā te ia ma le fiafia ma le lotomalie. (Sala. 100:2; 2 Kori. 9:7) Pe e tatau la ona tatou galulue pea e ausia se sini faaleagaga, e tusa pe e tatou te lē mananaʻo ai? Mātau le faaaʻoaʻoga a le aposetolo o Paulo. Na ia faapea mai: “Ou te matuā pulea loʻu tino e fai ma pologa.” (1 Kori. 9:25-27) Na faamalosia e Paulo o ia lava e faia le mea saʻo, e tusa lava pe e leʻi iai iā te ia se faanaunauga e faia ai. Pe na talia e Ieova le auaunaga a Paulo? Ioe. Na tauia e Ieova ana taumafaiga.​—2 Timo. 4:7, 8.

10. O ā aogā o le galulue e ausia se sini e tusa pe e leai se uunaʻiga iā i tatou?

¹⁰ I se tulaga talitutusa, e fiafia Ieova pe a silasila mai o loo tatou galulue e ausia o tatou sini, e tusa lava pe e lē o iā i tatou se uunaʻiga e faia ai faapea. E fiafia o ia auā e tusa lava pe e iai taimi e tatou te lē fiafia ai e faia lenā mea, ae e na te silafia e tatou te faia ona e tatou te alolofa iā te ia. E pei ona faamanuia Ieova iā Paulo, o le a Ia faamanuia foʻi i a tatou taumafaiga. (Sala. 126:5) E mafai foʻi ona uunaʻia i tatou, pe a tatou tofo i le faamanuia a Ieova. Ua faapea mai se tuafafine e igoa iā Lucyna mai i Polani: “O nisi taimi ou te lē fia talaʻi ai, aemaise lava pe a ou lagona le lē lavā. Ae pe a uma mai le talaʻiga, e lē mafaatusalia le olioli ou te maua mai ai.” O lea, seʻi o tatou vaai po o le ā e mafai ona tatou faia pe a leai se uunaʻiga iā i tatou.

11. E faapefea ona fesoasoani Ieova iā i tatou ia faaalia le amio pulea?

¹¹ Ia tatalo ia faaalia le amio pulea. E masani ona faasino atu le amio pulea, i le taofia o i tatou lava mai i le faia o le mea leaga. Peitaʻi, e manaʻomia foʻi le amio pulea ina ia uunaʻia ai i tatou e faia le mea lelei, aemaise lava pe a faigatā se galuega po ua leai foʻi se uunaʻiga iā i tatou e faia ai. Ia manatua, o le amio pulea o se vala o le fua o le agaga. O lea, ia talosaga atu iā Ieova mo lona agaga paia e fesoasoani iā te oe e faaleleia atili lenā uiga tāua. (Luka 11:13; Kala. 5:22, 23) Ua faamatalaina e David e pei ona taʻua muamua, le auala na fesoasoani ai le tatalo iā te ia. Na ia manaʻo e faia e lē aunoa ana lava suʻesuʻega. Ua ia faapea mai: “Ou te talosaga iā Ieova e fesoasoani mai ia ou atiaʻe le amio pulea. O lana fesoasoani na mafai ai ona ou faia se faasologa lelei faaleagaga ma pipii pea i ai.”

12. O le ā le fesootaʻiga o le mataupu silisili o loo i le Failauga 11:4 ma sini faaleagaga?

¹² Aua le faatalitali seʻia lelei atoatoa mea uma. E leai se mea e lelei atoatoa i lenei lalolagi. Pe afai e tatou te faatalitali seʻia lelei atoatoa mea uma, e ono lē mafai lava ona ausia o tatou sini. (Faitau le Failauga 11:4.) Ua faapea mai se uso e igoa iā Dayniel: “E leai se mea e lelei atoatoa. Nai lo o le faatalitali seʻi tupu lenā mea, ae e tatau ona tatou galulue loa ina ia ausia o tatou sini.” Ua taʻua e se uso e igoa iā Paul mai i Uganda, se isi māfuaaga e lē tatau ai ona tatou faimeatuu: “Pe a amata ona tatou galulue e ui i tulaga faigatā, ua tatou tuu atu iā Ieova se mea e na te faamanuia i ai.”​—Mala. 3:10.

13. O ā aogā o le amata i sini faigofie?

¹³ Amata i ni sini faigofie. Atonu e leai se uunaʻiga iā i tatou, ona e foliga mai e matuā faigatā ona ausia o tatou sini. Pe afai o lou tulaga lea, aiseā e lē amata ai i ni sini faigofie? Pe afai o lou sini o le atiaʻe o se uiga, aiseā e te lē galue ai e faaalia lenā uiga e ala i le faia o ni gaoioiga lāiti? Pe afai o lou sini o le faitauina o le Tusi Paia atoa, aiseā e lē amata ai i le faitauina na o sina vaega o se mataupu o le Tusi Paia? Na faigatā iā Tomáš lea na taʻua i le amataga, ona ausia lona sini o le faitauina lea o le Tusi Paia i totonu o le tausaga e tasi. Ua ia faapea mai: “Na ou iloa e leʻi aogā le auala na ou faia muamua. O lea na ou filifili ai e toe taumafai, ae na ou fuafua e faitau na o ni nai fuaiupu o se mataupu i aso taʻitasi ma manatunatu loloto i ai. O le iʻuga, na amata ona ou fiafia i laʻu faitauga Tusi Paia.” A o faateleina le fiafia o Tomáš, na ia faaalu ai se taimi umi e fai ai lana faitauga Tusi Paia. O le iʻuga, na mafai ona ia faitauina le Tusi Paia atoa.c

AUA LE LOTOVAIVAI ONA O LE LĒ AUSIA O SE SINI

14. O ā mea e ono taofia ai i tatou mai i le ausia o o tatou sini?

¹⁴ Peitaʻi, e tusa lava pe e iā i tatou se uunaʻiga pe e tatou te faaalia foʻi le amio pulea, ae e iai lava luʻi e ono taofia ai i tatou mai i le ausia o se sini. O se faataʻitaʻiga, e ono alu uma lo tatou taimi i mea e “tutupu faafuaseʻi,” ma leai ai se taimi e tatou te galulue ai ina ia ausia o tatou sini. (Fai. 9:11) Atonu e tatou te fesagaʻia se tulaga faigatā lea e tatou te lagona ai le lotovaivai ma leai ai se malosi. (Faata. 24:10) Ona o lo tatou tino lē lelei atoatoa, e tatou te ono gaoioi ai i se auala e faafaigatā ai ona ausia o tatou sini. (Roma 7:23) Pe atonu foʻi e tatou te lagona le lē lavā. (Mata. 26:43) O le ā e mafai ona fesoasoani iā i tatou e foʻia ai se luʻi lea e ono taofia ai i tatou mai i le ausia o o tatou sini?

15. Pe a iai se mea e taofia ai i tatou mai i le ausia o o tatou sini, po o lona uiga ua tatou lē taulau? Ia faamatala. (Salamo 145:14)

¹⁵ Ia manatua, pe a iai se mea e taofia oe mai i le ausia o lou sini, e lē faapea ai ua e lē taulau. Ua faapea mai le Tusi Paia, e tele taimi e tatou te feagai ai ma faafitauli. Peitaʻi ua faamautinoa mai ai foʻi, e mafai ona tatou toe tulaʻi ona o le fesoasoani a Ieova. (Faitau le Salamo 145:14.) Ua faamatala mai e le uso o Philip lea na taʻua i le amataga, le auala na ia taulau ai: “Ou te lē uaʻi i taimi ou te lē taulau ai. Nai lo o lea, ou te uaʻi i taimi ou te toe taumafai ai ina ia ausia loʻu sini.” Ua faapea mai David lea na taʻua i le amataga: “Ou te taumafai e vaai i mea e ono taofia ai aʻu e lē o ni luʻi, ae o ni avanoa e faaali atu ai loʻu alofa tele iā Ieova.” O lea, o lou taumafai pea e ausia lou sini e ui i mea e ono taofia ai oe, e faamaonia atu ai iā Ieova e te manaʻo e faafiafia o ia. Maʻeu le fiafia o Ieova pe a silasila mai, o loo e taumafai malosi pea e ausia lou sini!

16. O le ā e tatou te aʻoaʻoina mai i mea e ono taofia ai i tatou mai i le ausia o se sini?

¹⁶ Ia aʻoaʻoina ni lesona mai i mea e ono taofia ai oe mai i le ausia o lou sini. Ia manatunatu i le māfuaaga na tupu ai ma fesili ifo: ʻPe e iai se mea e mafai ona ou faia ina ia aua neʻi toe tupu lenā mea?’ (Faata. 27:12) O nisi taimi e faailoa mai ai, e faigatā ona e ausia se sini na e faatūina. Pe afai o lou tulaga lenā, ia toe iloilo lou sini ma vaai pe e mafai lava ona e ausia.d E lē silasila Ieova iā te oe o sē e lē taulau, ona ua e lē ausia lenā sini.​—2 Kori. 8:12.

17. Aiseā e tatau ai ona tatou manatua pea mea ua tatou ausia?

¹⁷ Ia manatua pea mea ua e ausia. Ua faapea mai le Tusi Paia: “E amiotonu le Atua e na te lē faagalogalo ai la outou galuega.” (Epe. 6:10) E lē tatau foʻi la ona galo iā te oe mea ua e ausia. Ia manatunatu i mea ua e ausia e pei o le atiaʻe o se faauōga ma Ieova, talanoa i isi e faatatau iā te ia, po o le papatiso. E pei lava ona e agaʻigaʻi i luma ma ausia sini faaleagaga i le taimi ua teʻa, e mafai foʻi ona e agaʻigaʻi pea i luma ina ia ausia se sini ua e faatūina.​—Fili. 3:16.

18. O le ā e tatau ona tatou manatua a o tatou galulue e ausia o tatou sini? (Tagaʻi foʻi i le ata.)

¹⁸ E mafai ona e ausia lou sini e ala i le fesoasoani a Ieova, e pei lava o se tagata folau ua taunuu ma le manuia i le mea o loo agaʻi i ai. Ae ia manatua, o le toʻatele o tagata folau e latou te fiafia foʻi i la latou faigāmalaga. I se tulaga talitutusa, a o e galue pea ina ia ausia lou sini faaleagaga, aua neʻi galo ona mātau le auala o loo fesoasoani ma faamanuia ai Ieova iā te oe. (2 Kori. 4:7) Pe afai e te lē faavaivai, e sili atu faamanuiaga o le a e mauaina.​—Kala. 6:9.