Sauniuni mo le Faasaoina Atu i se Lalolagi Fou

“Ia outou manatua le avā a Lota.”—LUKA 17:32.

1. O le ā le faaaʻoaʻoga faatalafaasolopito o le laveaiina tauatua ua faamatilatila e la tatou lesona i aso nei, ma e mafai faapefea ona aogā mo i tatou?

INA ua uma ona taʻu atu e uiga i le faasaoina ofoofogia na faia e Ieova ona o Noa ma lona aiga, ona faasino atu lea e le aposetolo o Peteru i se isi faaaʻoaʻoga faatalafaasolopito. Na ia tataʻi atu manatu i le faasaoina o le tagata amiotonu o Lota ina ua liu efuefu Sotoma ma Komoro, e pei ona tatou faitau ai i le 2 Peteru 2:6-8. Na faasaoina auiliiliga mo lo tatou lelei. (Roma 15:4) O le teuina i o tatou loto o le mea na tupu i le fesootai atu ma lena faasaoina ua mafai ona fesoasoani e tuuina ai i tatou i le faasologa mo le faasaoina atu i le lalolagi fou a le Atua.

Le Auala Tatou te Tali atu ai i le Auala o le Olaga a le Lalolagi

2. O le ā le amioga i Sotoma ma Komoro na taʻitaʻiina atu ai i lo latou faaumatiaga e le Atua?

² Aiseā na faaumatia ai na aai ma ē na latou ʻaināina? O loo taʻua e le aposetolo o Peteru le matuā naunau i “amioga faamatāitu a e faaletaupulea.” (2 Peteru 2:7) E pei ona faaalia e ala i le faaaogāina o le upu Eleni lea o loo faaliliuina mai ai le faaupuga, o tagata o Sotoma ma Komoro sa matuā naunau i le faia o mea sese i se auala na faaalialia ai lo latou matuā lē faaaloalo, ma oo lava ina amuamu, i le tulafono ma le pule. Ua faapea mai le Iuta 7 na latou ‘faia le faitaaga tele naua ma mulimuli atu i nisi tino ona o le manao i feusuaiga e lē faalenatura.’ O le matagā o a latou amio na faaalia ina ua siosiomia e tane o Sotoma, “o taulelea atoa ma toeaina, o le nuu uma lava mai itu uma,” le fale o Lota ma fai atu ina ia tuuina mai ana malo mo tane o Sotoma e faamalieina ai o latou faanaunauga sese tau i feusuaiga. Ma na latou alalaga atu ma le feita ia Lota ona sa ia teena o latou manaoga leaga.—Kenese 13:13; 19:4, 5, 9.

3. (a) Na faapefea ia Lota ma lona aiga ona ō atu e ola i se siosiomaga iʻuvale e pei o Sotoma? (e) O le ā le uiga faaalia o Lota i le amioga faalemataʻu a tagata Sotoma?

³ Sa muai siitia atu Lota i le oganuu e latalata atu i Sotoma ona o le tele ai o mea lelei faaletino. Sa iai se taimi, sa ia mau ai i le aai lava ia. (Kenese 13:8-12; 14:12; 19:1) Ae sa leʻi fiafia o ia i faiga leaga a tane o le aai, ma o na tane latou te leʻi manatu ia te ia o se tagata o i latou, e manino lava auā o Lota ma lona aiga sa leʻi auai i o latou olaga masani i aso fai soo. E pei ona fai mai ai le 2 Peteru 2:7, 8: “O Lota . . . sa tiga i le amio faamatāitu a e faaletaupulea; (auā o lea tagata amiotonu, sa tiga lona loto faamaoni a o nofo faatasi ma i latou, i lona vaai atu ma faalogo atu i lea aso ma lea aso, i a latou amio faaletaupulea;).” O na tulaga na faia aʻe ai se tofotofoga matuiā mo Lota ona, i le avea o se tagata amiotonu, sa inoino i na amioga.

4. (a) I ā auala ua tutusa ai tulaga i aso nei ma na i Sotoma anamua? (e) Afai e pei i tatou o Lota amiotonu, e faapefea ona tatou tali atu i tulaga iʻuvale i le taimi nei?

⁴ I o tatou foi aso, o le tulaga lava lena tau amio a le sosaiete o le fanau a tagata ua oo ina paʻū maulalo. I le tele o atunuu, e sili ma sili atu latou ua auai i feusuaiga a o leʻi faaipoipoina po o i le mulilua foi ina ua uma ona faaipoipo. E oo lava i le toatele o talavou i aʻoga ua matuā aafia loloto i nei auala o le olaga, ma ua latou faaamuamu ai i ē e lē o aufaatasi ma i latou. O tagata tauatane ma tauafafine ua matuā faaalialia tuusaʻo lava i latou e i latou i lumāmea ma ua fai solo i auala o aai tetele e tāpā le faailoaina aloaia o i latou. Ua auai foi ma le fiafia taʻitaʻi lotu i lenei amio faaletaupulea. I se tulaga aloaia, e lē toatele ni lotu ua latou faauuina tagata o ē ua lauiloa i le tauatane ma le faitaaga. Peitai, i le tulaga maʻoti, e pei ona faaalia pea e lipoti mai tala fou, e lē o se mea matuā faigata ona maua tauatane, o ē faitaaga, ma ē mulilulua i tulaga o taʻitaʻi lotu. O le mea moni, o nisi taʻitaʻi lotu ua siitia atu i nisi aai po ua oo foi ina faamalosia lo latou faamavae ona o tulaga leaga tau feusuaiga. O ē alolofa i le amiotonu e lē tiga alofa ona o na amioga leaga; latou te “ʻinoʻino i le leaga.” (Roma 12:9) E faapitoa lava lo latou faanoanoa pe afai o amioga a tagata o ē o loo faapea mai e auauna i le Atua ua aumaia ai le faalumaina i lona suafa ma faapogaia le liliuese o tagata, e lē lava le malamalama, mai i lotu uma lava ona o amioga leaga.—Roma 2:24.

5. O le ā le fesili ua taliina mo i tatou e le faaumatiaina e Ieova o Sotoma ma Komoro?

⁵ I lea tausaga ma lea tausaga e faagasolo ai ina sili ona leaga le tulaga. Pe o le a iai ea se iʻuga i lenei mea? Ioe e iai! O le mea na faia e Ieova ia Sotoma ma Komoro anamua ua faaalia manino ai faapea i lana taimi atofaina, o le a ia faaooina mai ai lana faamasinoga. O le a ia matuā faaumatia ē amio leaga, ae o le a ia faasaoina ana auauna faamaoni.

O Ai po o le ā e Muamua i le Olaga?

6. (a) O le ā le lesona talafeagai ua iai i inā i le faamatalaga e uiga i tane talavou o ē o le a faaipoipo atu i afafine o Lota? (e) Na faapefea i uiga faaalia o a la paaga o le a la faaipoipo atu i ai ona tofotofoina afafine o Lota?

⁶ E na o i latou o ē faaalia le tuutoina moni i le Atua o le a faasaoina. E tusa ai ma lenei mea, manatu i le mea na fai atu ai agelu a Ieova ia Lota a o leʻi faaumatia Sotoma ma Komoro. “O ai ea nisi o lou aiga o iinei? o se tane a sou afafine, po o sou atalii, po o sou afafine, atoa ma i latou uma e ua ia te oe o i le aai, ina ave ese ia i le mea nei; auā o le a ma faaumatia lenei mea.” O lea na tautala atu ai Lota i tane o ē o le a faaipoipo atu i ai ona afafine. Sa ia uunaia i laua i lona toe fai atu: “Ina tutū ia, ina outou o ese i lenei mea, auā o le a faaumatia e Ieova lenei aai.” O le la faiā i le aiga o Lota o le a mafai ai ona maua se avanoa faapitoa mo le faasaoina, peitai e tatau ona la faia ni gaoioiga totino. E tatau ona latou avatu le faamaoniga manino o le usiusitai ia Ieova. Ae na i lo o lea, i le la vaai, o Lota “ua pei se tagata faianaga.” (Kenese 19:12-14) E mafai ona e iloa faalemafaufau faalogona o afafine o Lota ina ua iloa e i laua le mea ua tupu. O lenei mea na tuuina ai lo la faamaoni i le Atua i se tofotofoga.

7, 8. (a) Ina ua uunaia e agelu Lota ina ia ave lona aiga ma sosola, o le ā lana tali atu, ma aiseā sa lē o se mea poto ai lenei? (e) Ina ia laveaia, o le ā sa matuā tāua mo Lota ma lona aiga?

⁷ I le taeao na sosoo ai i le tafa o ata, sa oo ina faananati atu agelu ia Lota. Na la fai atu: “Ina tulai ia, ave lau avā ma ou afafine e toalua, o loo iinei, ina neʻi malaia oe i le sala a le aai.” Ae “ua faatuatuai o ia.” (Kenese 19:15, 16) Aiseā? O le ā na taofiofia o ia? Pe o le naunau ea i mea faitino sa iai ia te ia i inā i Sotoma—le mea na muaʻi tosina atu ai o ia i lena nuu? Afai ua pipii atu o ia i nei mea, o le a faaumatia o ia faatasi ma Sotoma.

⁸ Ona o le alofa mutimutivale, na fetagofi atu ai agelu i lima o i latou sa i lona aiga ma toso faanatinati atu i latou i fafo i le aai. I tuaoi, na poloai atu ai agelu a Ieova: “Ina sola ia e te ola ai, aua e te tepa i tua aua foi e te tu i se mea o le fanua laugatasi; a ia sola lava i le mauga ina neʻi malaia oe.” Sa faatuatuai pea foi Lota. I le iʻuga lava, ina ua uma ona ioeina faapea e mafai ona alu atu o ia i se aai e lē mamao tele, o lea na sosola ai o ia ma lona aiga. (Kenese 19:17-22) Sa lē faatagaina lava se faatuatuai atili; o le usiusitai sa matuā tāua.

9, 10. (a) Aiseā sa lē lava ai le aufaatasi atu ma lana tane e faamautinoa ai le faasaoina mo le avā a Lota? (e) Ina ua fasiotia le avā a Lota, o le ā le isi tofotofoga atili na aumaia ai ia Lota ma ona afafine?

⁹ Ae peitai, sa leʻi uma le faasaoina ina ua latou ō ese atu mai Sotoma. Ua taʻu mai ia i tatou e le Kenese 19:23-25 e faapea: “Ua alu ae le la i luga o le lalolagi ina ua oo Lota i Soara. Ona faatotō faaua ifo lea e Ieova i Sotoma ma Komoro o le teio ma le afi mai ia Ieova mai le lagi; na ia faaumatia o ia lava aai, ma le fanua laugatasi uma, ma i latou uma sa mau i ia aai, atoa ma mea na tutupu i le eleele.” Ae o fea sa iai le avā a Lota?

¹⁰ Sa sola o ia faatasi ma lana tane. Ae peitai pe sa ioe atoatoa o ia i le mea sa faia e lana tane? E leai lava se mea o faaalia mai ai faapea sa fiafia o ia i amioga lē mamā a Sotoma. Ae pe sa malosi lona alofa i le Atua na i lo o lona pipii atu i lona aiga ma mea faitino sa ia maua i inā? (Faatusatusa Luka 17:31, 32.) I lalo o omiga, o le mea sa i lona loto na oo ina faaalia. E foliga mai ua uma ona latou latalata i Soara, atonu i le tulaga e ulu atu ai i le aai, ae ua ia lē usiusitai ma toe liliu ma tepa i tua. Ma e pei ona fai mai le faamaumauga a le Tusi Paia, “ona liua lea o ia ma tupua masima.” (Kenese 19:26) O lea foi ua toe fesagai le faamaoni o Lota ma ona afafine ma se isi tofotofoga atili. Pe sa sili ona malosi le pipii atu o Lota i lana avā ua maliu po o faalogona o teine i lo la tinā ua maliu na i lo lo latou alofa mo Ieova, o lē na aumaia lenei mala? Pe o le a faaauau ona latou usiusitai i le Atua e ui lava o se tasi sa sili ona pele ia i latou ua faamaonia lona lē faamaoni ia te ia? Ma le faatuatua atoatoa ia Ieova, latou te leʻi toe tepa i tua.

11. O le ā ua tatou aʻoaʻoina ai i inei e uiga i le laveaiina na saunia e Ieova?

¹¹ Ioe, ua silafia e Ieova le auala e laveaiina ai tagata ua tuutoina i le Atua ai tofotofoga. Ua silafia e ia le auala e laveaiina ai le aiga atoa e autasi i le tapuaiga moni; ua ia silafia foi le auala e laveaiina ai tagata taitoatasi. Pe afai latou te alolofa moni ia te ia, e faaalia e ia lona finagalo mamafa i ana feutagaiga ma i latou. “Auā ua silafia lava e ia le mea na fai aʻi i tatou; ua manatu ia o le efuefu lava i tatou.” (Salamo 103:13, 14) Ae o lana laveaiina e mo na o i latou o ē ua avea o tagata o le tuutoina i le Atua, i latou o ē ua tuutoina moni, i latou o ē o le usiusitai ua faaalia ai lo latou faamaoni.

Sauniuniga Alofa mo le Faasaoina Sili

12. O ā sauniuniga alofa o le a faia e Ieova a o leʻi aumaia le laveaiina lena o loo tatou aloalo atu i ai ma le naunautai?

¹² E ala i mea na ia faia i aso o Noa ma Lota, sa leʻi aveesea atoatoa ai e Ieova tagata amio leaga uma e faavavau. E pei ona fai mai le mau, ua fai ia ma faaaʻoaʻo o mea o loo ō mai. A o leʻi oo mai na mea, sa i le finagalo o Ieova le tele o mea, o lea sa ia fuafuaina ai e faia ina ia aogā mo tagata o ē alolofa ia te ia. Sa ia fuafua e auina mai lona Alo pele e toatasi, o Iesu Keriso, i le lalolagi. I inei, o le a faamamāina ai e Iesu le suafa o le Atua mai faifaiga e ala i le faatinoina o le ituaiga o tuutoina sa tatau ona faia e Atamu i le avea o se tagata lelei atoatoa ma mafai foi ona tuuina atu i le Atua; ae o lea o le a faia e Iesu lea mea i lalo o tulaga e sili mamao atu ona faigata. O le a tuuina i lalo e Iesu lona soifuaga lelei atoatoa faaletagata e fai ma togiola ina ia maua ai e le fanau a Atamu o ē faaalia le faatuatua le mea na leiloa ia Atamu. I le ma lea, o se “lafu mamoe itiiti” o tagata faamaoni o le a filifilia e le Atua ina ia auai ma Iesu i lona Malo faalelagi, ma o se “motu o tagata e toatele” o le a aoaoina mai atunuu uma e faia aʻe ai le faavae mo se sosaiete fou faaletagata. (Luka 12:32; Faaaliga 7:9) I le faataunuuina o lena mea, o le a faia ai e le Atua se laveaiina sili lea na faaatagia e ala i mea na tutupu i le fesootai atu ma le Lolo ma le faaumatiaga o Sotoma ma Komoro.

Le Pogai ua Faanatinati ai se Gaoioiga Maumauai Nei

13, 14. O le ā e mafai ona tatou aʻoaʻoina mai i le mea moni faapea sa faaaogā e Peteru le faaumatiaga o tagata faalemataʻu i aso o Lota ma Noa e fai ma faaaʻoaʻoga?

¹³ O tagata aʻoga o le Afioga a le Atua ua latou iloa faapea i le tele o tulaga na faia ai e Ieova gaoioiga o le laveaiina mo ana auauna. Ae peitai, i le tele o tulaga e lē o fai mai ai faapena le Tusi Paia, ‘e pei ona sa faia i na taimi, e faapena foi pe a sau le Atalii o le tagata.’ Aiseā na faatulaga ese mai ai e le aposetolo o Peteru, e ala i le faagaeeina e le agaga paia, le na o le lua ni faaaʻoaʻoga? O le ā le mea ese e uiga i mea na tutupu i aso o Lota ma Noa?

¹⁴ O se faailoaga maʻoti o loo maua i le Iuta 7, ua tatou faitau ai faapea “E pei o Sotoma ma Komoro, ma aai sa vagavagaai ai, . . . ua tuu mai ai i latou e fai ma faailoga, ua faasalaina i latou i le afi e faavavau.” Ioe, o le faaumatiaga o ē sa faia agasala matagā i na aai sa faavavau, e pei ona o le a iai le faaumatiaga o ē amio leaga i le faaiʻuga o lenei faiga o mea. (Mataio 25:46) O le Lolo i aso o Noa sa faapena foi ona faasino atu i ai i mau e faamaonia ai sa talanoaina faamasinoga e faavavau. (2 Peteru 2:4, 5, 9-12; 3:5-7) O lea e ala i le faaumatiaina o tagata faalemataʻu i aso o Lota ma Noa, ua faaalia foi e Ieova faapea o le a ia faasaoina ana auauna e ala i le faaumatiaina e faavavau o i latou o ē faia le amioletonu.—2 Tesalonia 1:6-10.

15. (a) O le ā le lapataiga faanatinati ua tuuina atu ia i latou o ē o auai i faiga leaga? (e) Aiseā o le a faaoo atu ai le faamasinoga ia i latou uma o ē e tausisi i amioga lē tonu?

¹⁵ O le faaumatiaga o ē amio leaga o le a lē faafiafiaina ai Ieova, o le a lē aumaia ai foi se fiafiaga i ana auauna. E ala i ana Molimau, ua uunaia ai e Ieova tagata: “Liliu ia outou, ina outou liliu ese ia i o outou ala leaga; auā pe se a ea le mea tou te fia oti ai?” (Esekielu 33:11) Ae peitai, ina ua faaalia e tagata le leai o se naunau e utagia lenei aioi ma le alofa ae ua tausisi pea i o latou auala manatu faapito o le olaga, o le faaaloalo la o Ieova mo lona lava suafa paia ma lona alofa mo ana auauna faamaoni o ē o puapuagatia i faiga leaga i lima o tagata faaletaupulea, ua manaomia ai ona ia faaooina atu le faamasinoga.

16. (a) Aiseā e mafai ai ona tatou mautinoa faapea o le laveaiina na valoia ua lata tele mai? (e) Mai le ā ma i le ā o le a laveaiina atu i ai?

¹⁶ Ua matuā lata tele mai le taimi a le Atua e aumaia ai le laveaiina! O uiga faaalia ma mea tutupu na valoia e Iesu e fai ma faailoga o lona faatasi mai ma le faaiʻuga o le faiga o mea ua matuā manino lava le oo mai. O vala po o vaega o lena faailoga na amata muamua lava ona aliai mai ua sili atu i le 75 tausaga ua mavae, ma na fetalai Iesu faapea o “lenei tupulaga” o le a lē mavae atu seia aumaia e le Atua lana faaoosala o le faamasinoga i luga o lenei lalolagi faaletaupulea. Pe a filifilia e Ieova faapea o le feau o le Malo o le a folafolaina atu i se mamao ua lava i le lalolagi atoa e fai ma molimau i nuu uma, ona oo mai ai lea o le iʻuga o lenei lalolagi amio leaga, ma faatasi ai ma lena o le a sau ai foi ma le laveaiina mo tagata ua tuutoina i le Atua. (Mataio 24:3-34; Luka 21:28-33) E laveaiina mai le ā? Mai i tofotofoga sa latou uia i lima o ē amio leaga, ma mai tulaga sa avea o se pogai o puapuaga i aso fai soo ia i latou o ē alolofa i le amiotonu. O le a avea foi o se faasaoina atu i se lalolagi fou o le a avea ai maʻi ma le oti ma mea o le taimi ua tuanai.

Le Fesoasoani Tauatua Faatasi ma le Vaaiga i le Laveaiina

17. (a) O le ā le fesili uigā e ao ona tatou fesili ai ia i tatou lava? (e) E mafai faapefea ona tatou avatu faamaoniga faapea i le pei o Noa, ua uunaia i tatou e ala i le ‘mataʻu faaleatua’?

¹⁷ O le fesili e manaomia ona tatou manatunatu taitoatasi i ai e faapea, ‘Pe o ou nofo sauni mo lena gaoioiga a le Atua?’ Afai o tatou faalagolago ia i tatou lava po o tatou lava manatu o le amiotonu, tatou te lē o nofo sauni la. Ae afai, e pei o Noa, ua uunaia i tatou e le ‘mataʻu faaleatua,’ ona tatou tali atu lea i le faatuatua i le taʻitaʻiga ua aumaia e Ieova ia i tatou, o lenei mea o le a taʻitaʻiina atu ai i tatou i lo tatou laveaiina.—Eperu 11:7.

18. Aiseā ua avea ai le aʻoaʻoina o le faaaloalo moni mo le pule faatiokarate o se vaega tāua o la tatou sauniuniga mo le laveaiina atu i le lalolagi fou?

¹⁸ I le faamatalaina i se tulaga matagofie o i latou o ē ua olioli i le puipuiga ua aumaia e Ieova i le taimi nei, ua faapea mai ai le Salamo 91:1, 2: “O le nofo i le mea lilo o i ai lē Silisili ese, e mau o ia i le paolo o Le e ona le malosi uma lava. Ou te faapea atu ia Ieova, O loʻu malu o ia ma loʻu ʻolo; o loʻu Atua ou te faatuatua ia te ia.” O se vaega lenei o ni tagata o ē o loo leoleomaluina e le Atua e pei o ni tamaiti i lalo o apaau malolosi o se manulele matua. O lo latou faatuatua atoatoa ua ia Ieova lea. Ua latou iloa faapea o ia o le Atua Silisili ona maualuga, o Lē Ona le Malosi uma lava. O le iʻuga, ua latou faaaloalo i le pule faatiokarate ma gauai atu i latou lava i ai, e tusa lava pe faia e mātua pe auala i “le auauna faamaoni ma le mafaufau.” (Mataio 24:45-47) Pe moni lena e uiga ia i tatou taitoatasi? I le pei o Noa pe o tatou aʻoaʻoina e faia ‘mea uma lava ua poloai ai Ieova’ ia i tatou e faia i lana auala? (Kenese 6:22) Afai o lea, ua tatou tali atu la i le sauniuniga ua aumaia e Ieova ia i tatou mo le laveaiina atu i lana lalolagi fou amiotonu.

19. (a) O le ā lo tatou fatu faafaatusa, ma aiseā e matuā tāua ai faapea e tatau ona tatou uaʻi atu i ai? (Faataoto 4:23) (e) E mafai faapefea ona tatou maua aogā mai le faaaʻoaʻoga a Lota faatatau i a tatou gaoioiga i mea tau faasese o le lalolagi?

¹⁹ O lena sauniuniga o loo aafia ai foi le uaʻi atu i lo tatou loto po o fatu faafaatusa. “O Ieova, na te tofotofoina loto.” (Faataoto 17:3) E fesoasoani o ia ia i tatou e iloa faapea e lē o foliga vaaia i fafo e taulia ae, na i lo o lea, o le tagata i totonu, o le loto. A o tatou lē faanaunau e auai i faiga sauā po o amioga lē mamā pei o le lalolagi o loo siomia ai i tatou, e manaomia ai ona tatou leoleo faasaga i le faaseseina o i tatou pe faafiafiaina e ala i nei mea. I le pei o Lota, e ao ona tatou lagona le tiga ona o le iai o nei galuega lē taupulea. O i latou o ē lē ʻinoʻino i le mea ua leaga o le a lē sailia auala e faanaunau i ai o ia; peitai o tagata o ē inoino atonu e mafai ona faamamao ese ai mai i nei mea, ae i o latou mafaufau o loo mananao ina ia latou auai. “Outou e ua alolofa atu ia Ieova, ia outou ʻinoʻino i mea leaga.”—Salamo 97:10.

20. (a) I ā auala ua lapataia ai i tatou e le Tusi Paia faasaga i auala manao i mea faitino o le olaga? (e) E mafai faapefea ona tatou iloa pe ua mauaa lesona matuā tāua a le Tusi Paia e faatatau i mea faitino i lo tatou loto?

²⁰ O loo aʻoaʻo ma le alofa e Ieova i tatou ina ia teena e lē gata i amioga lē mamā ae faapea foi ma auala manao i mea faitino o le olaga. ‘Ia gata ai o outou manao i mea ua outou maua,’ ua fautua mai ai lana Afioga. (1 Timoteo 6:8) Sa tatau ia Noa ma ona atalii ona tuua o latou fale i fafo ina ua latou ulu atu i le vaa. O Lota ma lona aiga foi, sa tatau ona tuua lo latou fale ma mea faitino ina ia faasaoina o latou ola. O fea la ua tuu i ai o tatou faanaunauga? “Manatua le avā a Lota.” (Luka 17:32) Ua uunai mai ai Iesu: “A ia outou muai saili le malo o le Atua ma lana amiotonu.” (Mataio 6:33) Pe o tatou faia lena mea? Afai e taʻitaʻiina i tatou e tapulaa amiotonu a Ieova ma afai o faamuamua i o tatou olaga le folafolaina o le tala lelei o lona Malo, o le mea moni ua tatou tali atu i lana sauniuniga mo le laveaiina atu i lana lalolagi fou.

21. Aiseā e mafai ai ona tatou aloalo atu ma le tonu faapea o le folafolaga a Ieova i le laveaiina o le a lē pine ae faataunuuina?

²¹ I tagata o le tuutoina i le Atua o ē o le a vaai i le faataunuuina o le faailoga o lona faatasi mai i le mana o le Malo, na fetalai Iesu: “Ia tepa ae outou, ma ia ea i luga o outou ulu; auā e latalata ina faaolaina outou.” (Luka 21:28) Pe ua e vaai i lena faailoga a o tuputupu aʻe i auiliiliga uma? Ia ona iai lea o le mautinoa o le faataunuuga o le folafolaga a Ieova i le laveaiina ua lata mai lava! Ia mautinoa atoatoa faapea “ua silafia e Ieova se mea e laveai ai tagata o le tuutoina i le Atua ai le tofotofoga.”—2 Peteru 2:9, NW.

O le ā ua E Aʻoaʻoina?

◻ I le pei o Lota, e ao faapefea ona tatou tali atu i auala o le olaga a le lalolagi?

◻ O ā tofotofoga na fesagaʻi ma Lota ma lona aiga e oo lava i le taimi na sosola ese ai mai Sotoma?

◻ Ua faapefea i faaaʻoaʻoga na faaaogāina e Peteru ona faamamafaina ai le faanatinati o le faia o se tulaga mautu i le itu a Ieova i le taimi nei?

◻ I le sauniunia o ona tagata mo le laveaiina, o ā lesona matuā tāua ua aʻoaʻoina mai ai e Ieova?

[Ata i le itulau 18]

O tagata o le Atua e puipuimaluina e ia e pei o manulele iti i lalo o apaau malolosi o o latou mātua