Ia Mafuta Atu i le Atua

Ua Tuu Mai e Ieova iā i Tatou se Filifiliga

Teuteronome 30:11-20

“E MASANI ona ou popole e aunoa ma se māfuaaga, ina neʻi oʻu lē faamaoni iā Ieova.” O le faamatalaga lenā a se fafine Kerisiano na manatu o le a lē taulau ona o mea leaga na tutupu iā te ia a o laʻitiiti. Po o le tulaga moni lenā? Po o i tatou o ni tagata ua leai moni se mea tatou te mafai ona o mea na tutupu iā i tatou? E leai. Ua aumaia e le Atua iā i tatou le meaalofa o le filifiliga saʻoloto, e mafai la ona fai e i tatou a tatou lava filifiliga i le auala e tatou te ola ai. E finagalo Ieova ia tatou fai ni filifiliga saʻo, ma ua taʻu mai e lana Afioga, le Tusi Paia, iā i tatou le auala e tatou te faia ai lenā tulaga. Seʻi o tatou iloilo upu a Mose, e pei ona taʻua i le Teuteronome mataupu e 30.

Pe e faigatā ona iloa mea o loo manaʻomia mai e le Atua iā i tatou ma fai?a Ua taʻua e Mose e faapea: “O lenei poloaʻiga ou te fai atu ai iā te oe i le aso nei, e lē faigatā iā te oe, e lē mamao foʻi ia.” (Fuaiupu e 11) E lē o tāpā mai e Ieova ni mea e lē mafai ona fai. O mea e na te faafinagaloina e talafeagai ma e mafai ona faataunuu. Ma e mafai foʻi ona tatou iloa. E lē manaʻomia ona tatou ō atu “i le lagi” pe malaga “i tala atu o le sami,” ina ia iloa po o ā mea e finagalo ai le Atua iā i tatou. (Fuaiupu e 12, 13) O loo taʻua manino i le Tusi Paia le auala e ao ona tatou ola ai.—Mika 6:8.

Ae peitaʻi, e lē faamalosia e Ieova i tatou e usitaʻi atu iā te ia. Ua faapea mai Mose: “Ua ou tuuina atu i ou luma i le aso nei o le ola ma le manuia, o le oti foʻi ma le malaia.” (Fuaiupu e 15) E tatou te saʻoloto e filifili i le ola ma le oti, le manuia ma le malaia. E mafai ona tatou filifili e tapuaʻi ma usitaʻi atu i le Atua ma iʻu ai i faamanuiaga, pe filifili foʻi e lē usitaʻi iā te ia ma tofo ai i āuga faanoanoa. Po o le ā lava le filifiliga, o tatou lava e faia.—Fuaiupu e 16-18; Kalatia 6:7, 8.

Pe e afāina iā Ieova po o lē fea ala e tatou te filifilia? O le mea moni, ioe! Ona na faagaeeina e le Atua, na faapea mai ai Mose: “Filifili i le ola.” (Fuaiupu e 19) E faapefea la ona tatou filifili i le ola? Ua faamatala e Mose: “Ina ia e alofa atu iā Ieova lou Atua, ma e faalogo i lona siʻufofoga, ma ia e pipii atu iā te ia.” (Fuaiupu e 20) Pe afai e tatou te alolofa iā Ieova, o le a tatou mananaʻo e faalogo atu ma le usiusitaʻi iā te ia, ma piiama atu ma le faamaoni iā te ia e tusa lava po o le ā e tupu. O le ola i se ala faapena, ua tatou filifili ai i le ola—o le ala sili i le olaga i le taimi nei, faatasi ai ma le faamoemoe o le ola e faavavau i le lalolagi fou a le Atua o fotuaʻi mai.—2 Peteru 3:11-13; 1 Ioane 5:3.

Ua aʻoaʻo mai i upu a Mose se faamautinoaga moni. Po o le ā lava e tupu iā te oe i lenei lalolagi amioleaga, e lē o oe o sē ua lē mafai ona fai se mea; pe lē taulau foʻi. Ua faamamaluina oe e Ieova i le meaalofa o le filifiliga saʻoloto. Ioe, e mafai ona e filifili e alofa iā Ieova, faalogo atu iā te ia, ma tumau ma le faamaoni iā te ia. Pe afai e te faia lenā filifiliga, o le a faamanuia Ieova i au taumafaiga.

O le mea moni, e tatou te saʻoloto e fai la tatou lava filifiliga e alofa ma auauna iā Ieova, ma o lenei mea na faamāfanafanaina ai le fafine lea na taʻua i le amataga. Ua ia faapea mai: “Ou te alofa iā Ieova. O nisi taimi e galo ai iā te aʻu, o le mea e sili ona tāua o loʻu alofa iā Ieova. E mafai la ona ou faamaoni.” E mafai foʻi ona e faia faapea e ala i le fesoasoani a Ieova.

[Faaopoopoga i lalo]