Lomiga mo le Polokalame mo le Sauniga o le Faiva ma le Olaga Faa-Kerisiano
MATI 7-13
ʻOA TAUTELE MAI I LE AFIOGA A LE ATUA | 1 SAMUELU 12-13
“O le Faamaualuga e Iʻu ai i le Faalumaina”
O le Faamaualuga e Iʻu ai i le Faalumaina
17 Na foliga mai e saʻo le gaoioiga a Saulo. Aemaise lava, sa iai tagata o le Atua i se tulaga “pagatia,” “puapuagatia,” ma gatete ona o le lē mautonu. (1 Samuelu 13:6, 7) E moni e lē sesē le fai o se gaoioiga pe a tulaʻi mai se manaʻoga. Peitaʻi, e ao lava ona manatua, e mafai e Ieova ona silasila i o tatou loto ma silafia o tatou uunaʻiga. (1 Samuelu 16:7) O lea, atonu na ia silafia nisi mea e faatatau iā Saulo ae e lē o taʻua i le Tusi Paia. Mo se faaaʻoaʻoga, atonu na silafia e Ieova le lē onosaʻi o Saulo lea na māfua ai ona faamaualuga. Atonu na matuā tigā faalogona o Saulo ina ua mafaufau o ia o le tupu o Isaraelu uma, ae o lea o le a faatali i se perofeta na ia manatu i ai ua matua ma faimeatuu! Po o le ā lava le tulaga, sa manatu Saulo o le tuai mai o Samuelu na ia maua ai le aiā e faia ai mea, ma lē usitaʻia ai faatonuga maʻoti na avatu iā te ia. O le ā le iʻuga? E leʻi viia e Samuelu le gaoioiga na faia e Saulo. Nai lo o lea, na ia otegia Saulo ma faapea atu: “E lē tumau lou malo . . . auā ua e lē tausi i le mea na poloaʻi atu ai Ieova iā te oe.” (1 Samuelu 13:13, 14) O lea, o le faamaualuga e iʻu ai i le faalumaina.
E Tāua Iā Ieova Lou Usiusitaʻi
8 O le tala a le Tusi Paia i le tupu o Saulo ua faamatilatila mai ai le tāua tele o le usiusitaʻi. Na amata le pulega a Saulo o se tupu e loto maulalo ma agamalu, sa ʻfaatauvaa o ia i lona lava manatu.’ Ae mulimuli ane, na amata ona pulea ana faaiʻuga e le faamaualuga ma mafaufauga sesē. (1 Samuelu 10:21, 22; 15:17) I se tasi taimi, sa tatau ai ona tau Saulo ma ʻautau a Filisitia. Na fai mai Samuelu i le tupu e faatali atu iā te ia e sau e ofo le taulaga iā Ieova, ma aumai nisi faatonuga. Ae e leʻi sau Samuelu i le taimi na faatalitalia, ma na amata loa ona taapeape le nuu. O lea, na ofo atu ai loa e Saulo le taulaga mū. Sa lē fiafia ai le finagalo o Ieova. Ina ua taunuu Samuelu, na fai e le tupu se faamolemolega o lona lē usitaʻi i le fai atu ua tuai Samuelu, o lea na ia ofo atu ai le taulaga mū ina ia maua ai le finagalo malie o Ieova. Na sili atu ona tāua iā Saulo le ofoina atu o le taulaga, nai lo o le usitaʻi i le faatonuga e faatali iā Samuelu e ofo atu le taulaga. Na faapea atu Samuelu iā te ia: “Ua e valea ina ua e faia o lenei mea. Ua e lē tausia le poloaʻiga a Ieova lou Atua na ia poloaʻi atu ai iā te oe.” O le lē usiusitaʻi o Saulo iā Ieova na aveesea ai lona tulaga o se tupu.—1 Samuelu 10:8; 13:5-13.
Saʻiliʻiliga mo ʻOa Faaleagaga
Po o le a E Mulimuli i le Taʻitaʻiga Alofa a Ieova?
15 Pe na manatu na tagata, e sili atu ona moni ma maufaatuatuaina se tupu faaletagata nai lo o Ieova? Afai o le tulaga lenā, o lona uiga ua latou tuliloaina se mea e lē moni pe faatauvaa! Ma ua latou iai i se tulaga lamatia i le tuliloaina o le tele o faatosinaga a Satani. O le a faigofie ona taʻitaʻia i latou e tupu faaletagata i le ifo i tupua. O tagata e ifo i tupua ua faasesēina i le manatu e faapea, o nei mea e iai o latou tino e pei o atua e fai i laau po o maa, e sili atu ona moni ma maufaatuatuaina nai lo o le Atua e lē vaaia o Ieova, lea na faia mea uma. Peitaʻi na tusi le aposetolo o Paulo, o tupua o ni “meanoa.” (1 Kori. 8:4) E latou te lē vāai, faalogo, tautatala, pe gaoioi. E te ono vaai ma paʻi i ai, ae afai e te tapuaʻi i ai, o lona uiga ua e tuliloaina se mea e lē moni pe faatauvaa, o se mea taufaasesē e na o puapuaga e aumaia ai.—Sala. 115:4-8.
MATI 14-20
ʻOA TAUTELE MAI I LE AFIOGA A LE ATUA | 1 SAMUELU 14-15
“E Sili Atu le Usiusitaʻi i lo o le Taulaga”
E Tāua Iā Ieova Lou Usiusitaʻi
4 Talu ai o Ieova o Lē na foafoaina mea, o ia foʻi la e ana mea uma ua tatou maua i le itu faaletino. Pe e iai la se mea e tatou te avatu iā te ia? Ioe, e mafai ona tatou avatu iā te ia se mea e sili ona tautele. O le ā lenā mea? E tatou te maua le tali mai le timaʻiga lenei: “Loʻu atalii e, ia atamai oe ma faafiafia ai loʻu loto, ona ou mautali ai lea i lē o loo taufaifai mai.” (Faataoto 27:11) E mafai ona tatou usiusitaʻi i le Atua. E ui e eseese o tatou tulaga ma talaaga, ae o lo tatou usiusitaʻi e mafai ona tali atu ai i le tuuaʻiga leaga a Satani e faapea, o le a lē tumau faamaoni tagata i le Atua i taimi o tofotofoga. O se matuā faaeaga lenā mea.
it-2 521 ¶2
Usiusitaʻi
E leai se mea e tutusa ma le usiusitaʻi, e lē mafai foʻi ona maua le finagalo malie o le Atua e aunoa ma le usiusitaʻi. Na fai atu Samuelu i le tupu o Saulo: “Pe e sili ea le fiafia o Ieova i taulaga mū ma isi taulaga, i le fiafia i le usiusitaʻi [lea e maua mai i le upu sha·maʽʹ] i le siʻufofoga o Ieova? Faauta! E sili atu le usiusitaʻi [upu Eperu, o lona uiga ia faalogo] i lo o le taulaga, e sili atu foʻi le faalogo i lo o le gaʻo o mamoe poʻa.” (1Sa 15:22) O le lē usiusitaʻi e uiga atu i le teena o le afioga a Ieova, ma e faamaonia ai e se tasi lona lē talitonuina, maufaatuatuaina ma lē faatuatua i le afioga a le Atua ma le Puna o lenā afioga. O lea, e leai se eseesega o le tagata e lē usiusitaʻi ma se tasi e faia valovaloga faataulāitu po o le ifo i tupua. (1Sa 15:23; faatusatusa i le Ro 6:16.) E lē lava le tau ina ioe i se mea ae e leai ni gaoioiga; o le leai o ni gaoioiga e faamaonia ai le itiiti o le talitonuina po o le faaaloalo i le puna o faatonuga. (Mat 21:28-32) O i latou e faamalieina i le tau ina faalogo ma ioe i upu moni a le Atua ae lē faia, ua faasesēina i latou lava i manatu sesē ma e latou te lē maua se faamanuiaga. (Ia 1:22-25) Na faailoa manino mai e le Alo o le Atua o i latou e faia mea e taitutusa ma mea ua ia faatonuina, ae e faia i se auala sesē pe sesē foʻi le uunaʻiga e faia ai, e lē ulu atu i le Malo ae e matuā teena i latou.—Mat 7:15-23.
Saʻiliʻiliga mo ʻOa Faaleagaga
it-1 493
Tigā Alofa
O le lolo atu i omiga e faaalia le tigā alofa ae e lē tusa ai ma le finagalo o le Atua, e matuiā āuga e oo i ai. E faamaonia lenei manatu i le mea na tupu i le tupu o Saulo. Na iai le taimi na tatau ai ona faaoo le sala faafaamasinoga a le Atua i tagata Amaleka, o ē na muamua osofaʻia Isaraelu ina ua tuua Aikupito. Na faatonuina Saulo e aua le tigā alofa iā i latou. O lona lolo atu i omiga mai i tagata na ia pulea, na ia lē mulimuli atoatoa ai i le faatonuga a Ieova. O lea, na teena ai loa e Ieova Saulo i le avea ma tupu. (1Sa 15:2-24) O le atiaʻe e se tasi o le matuā talisapaia o le saʻo o auala a Ieova ma le faamuamua o le faamaoni iā te Ia, o le a ʻalofia ai le faia o se mea sesē e pei ona faia e Saulo, ma lē maua ai le finagalo malie o le Atua.
MATI 21-27
ʻOA TAUTELE MAI I LE AFIOGA A LE ATUA | 1 SAMUELU 16-17
“E Iā Ieova le Taua”
“E Iā Ieova le Taua”
Na faatalitonu e Tavita Saulo, e ala i le faamatala atu o le mea na tupu i le leona ma le pea. Pe na gugutu Tavita? E leai, na iloa e Tavita le pogai na mafai ona ia fasimate ai na manufeʻai. Ua faapea atu o ia: “O Ieova na laveaʻia aʻu mai i lima o le leona ma lima o le pea, o ia foʻi e na te laveaʻia aʻu mai i lima o lenei Filisitia.” Ua talitonu Saulo ma faapea atu: “Inā alu ia, tau ina ia faatasi Ieova iā te oe.”—1 Samuelu 17:37.
Pe e te manaʻo e pei lou faatuatua o le faatuatua o Tavita? Mātau, sa moni le faatuatua o Tavita. Na faatuatua o ia i lona Atua ona o mea na ia iloa ma mea na tutupu iā te ia. Na ia iloa o Ieova o Lē e alofa e puipuia ma tausia ana folafolaga. Afai e tatou te fia maua lea ituaiga o faatuatua, e manaʻomia ona faaauau ona tatou aʻoaʻo e faatatau i le Atua o le Tusi Paia. A o tatou ola e tusa ai ma mea ua tatou aʻoaʻoina, o le a tatou maua ai iʻuga lelei e faamalosia ai lo tatou faatuatua.—Eperu 11:1.
“E Iā Ieova le Taua”
E oo mai lava i aso nei, o loo avea pea le tali a Tavita o se faamaoniga mataʻina o le faatuatua. Seʻi faaata le valaau atu a lenei tama talavou iā Koliata: “E te sau iā te aʻu ma le pelu, ma tao e lua, ae ou te alu atu iā te oe i le suafa o Ieova o ʻau, o le Atua o itu taua a Isaraelu, o lē ua e faifai i ai.” Na iloa e Tavita e faatauvaa le malosi o le tagata ma ana auupega. Na faaalia e Koliata le lē faaaloalo iā Ieova le Atua, ma o le a tali mai i ai Ieova. E pei ona taʻua e Tavita, “e iā Ieova le taua.”—1 Samuelu 17:45-47.
Na iloa lelei e Tavita le telē o le tino o Koliata ma ana auupega. Peitaʻi e leʻi faataga e Tavita na mea e faalotovaivaia ai o ia. E na te leʻi faia le mea sesē na faia e Saulo ma lana ʻautau. E leʻi faatusatusa e Tavita o ia iā Koliata. Nai lo o lea, na ia faatusatusa Koliata ma Ieova. O le umī o Koliata e iva ma le ʻafa futu (2.9 mita), e umī mamao atu i isi tagata. Ae o le ā lona maualuga pe a faatusatusa atu i le Pule Silisili Ese o le aoao o mea? I le silafaga a le Atua, e pei lava Koliata o isi tagata e tai pei o ni iniseti. Ae ua sauni nei Ieova e faaumatia Koliata.
“E Iā Ieova le Taua”
I aso nei, e lē o toe auai auauna a le Atua i ni taua. (Mataio 26:52) Peitaʻi, e ao ona tatou faaaʻoaʻo i le faatuatua o Tavita. I le pei o ia, e manaʻomia ona moni Ieova iā i tatou, ua na o ia le Atua e auauna ma matataʻu i ai. E iai taimi atonu ua matuā faigatā o tatou faafitauli, ae pe a fua atu i le mana e lē gata mai o Ieova, o se mea noa o tatou faafitauli. Pe afai e tatou te filifilia Ieova e avea ma o tatou Atua, ma faatuatua iā te ia e pei ona faia e Tavita, e leai la se luʻi po o se faafitauli e faavaivaia i tatou. E mafai e le mana o Ieova ona faatoʻilaloina so o se mea.
Saʻiliʻiliga mo ʻOa Faaleagaga
it-2 871-872
Saulo
Ina ua mavae lenā mea ma le faauuina o Tavita e avea ma tupu o Isaraelu, na alu ese ai le agaga o Ieova mai iā Saulo. Na amata mai i lenā taimi ona “oo iā te ia le mataʻu ona o le agaga leaga mai iā Ieova.” O le aveesea e Ieova o lona agaga mai iā Saulo, na mafai ai ona pulea Saulo e se agaga leaga lea na aveesea ai le filemu o lona mafaufau, ma faatupu ai faalogona ma mafaufauga sesē. O le lē usiusitaʻi iā Ieova na faailoa mai ai faanaunauga leaga sa i lona mafaufau ma lona loto, lea e leʻi puipuia mai ai o ia e le agaga o le Atua. Talu ai na faataga e Ieova lenei “agaga leaga” e faamataʻu iā Saulo, na talafeagai ai ona taʻua o le “agaga leaga mai iā Ieova.” Ona o le fautuaga a se tasi o ana auauna, na talosaga atu ai Saulo e aumai Tavita e fai ma ana tā kitara, e faatoʻafilemu ai o ia pe a oo mai le “agaga leaga.”—1Sa 16:14-23; 17:15.
MATI 28–APERILA 3
ʻOA TAUTELE MAI I LE AFIOGA A LE ATUA | 1 SAMUELU 18-19
“Ia Faatumauina le Lotomaulalo pe a Faamanuiaina”
Faalagolago i le Agaga o le Atua i le Feagai ai ma Suiga o le Olaga
4 E leʻi umi ae avea loa lenei tama leoleo mamoe o se tasi e taʻutaʻua i lona atunuu. Na valaaulia o ia e auauna i le tupu ma tāina musika mo ia. Na ia fasiotia le toa o Koliata, o se tagata tinoese ma le mataʻutia e oo lava i fitafita tomai o Isaraelu na matataʻu e tau ma ia. Na filifilia e avea ma taʻitaʻiʻau o le taua, ma na manumalo Tavita i le taua ma Filisitia. Na alofagia o ia e tagata. Na latou fatuina pese e viiviia ai o ia. Muamua atu, na faamatala ai e se faufautua a le tupu o Saulo le talavou o Tavita e faapea, e lē gata “o lē e tomai e tā kitara, o ia o le toa, o le tagata malosi, o le tagata foʻi o le taua, e mauupu o ia toe aulelei.”—1 Samuelu 16:18; 17:23, 24, 45-51; 18:5-7.
Ia Iloa le Eseesega o Tagata
6 O nisi tagata e faamaualuluga ona o lo latou aulelei, taʻutaʻua, atamai i mea tau musika, malosi faaletino, po o se tulaga taualoa. O mea uma na sa maua e Tavita, peitaʻi na lotomaulalo pea o ia i lona olaga atoa. Ina ua uma ona fasiotia e Tavita Koliata ma avatu iā te ia le afafine o le tupu o Saulo ina ia fai ma ana avā, na faapea mai Tavita: “O ai ea aʻu, o ai foʻi loʻu aiga ma le aiga o loʻu tamā i Isaraelu, e fai ai aʻu ma tane a le afafine o le tupu?” (1 Samu. 18:18) O le ā na fesoasoani iā Tavita ina ia tumau ai pea ona lotomaulalo? Na maua e Tavita nei uiga, tomai, ma faaeaga ona sa ʻfaamaulaloina e le Atua o ia lava’ ina ia uaʻi mai iā Tavita. (Sala. 113:5-8) Na iloa e Tavita o mea lelei uma na ia maua o mea na foaʻi mai e Ieova iā te ia.—Faatusatusa i le 1 Korinito 4:7.
7 I le pei o Tavita, e taumafai tagata o Ieova i aso nei e faaalia le lotomaulalo. E tatou te maofa i lo tatou iloa e faaalia e Ieova le uiga matagofie o le lotomaulalo, e ui o ia o Lē e silisili ese i le aoao o mea. (Sala. 18:35) E tatou te manatunatu loloto i le fautuaga tāua lenei: “Ia oofu outou i le alofa mutimutivale, le agalelei, lotomaulalo, agamalu ma le faapalepale.” (Kolo. 3:12) E tatou te iloa foʻi o le alofa “e lē gugutu, [ma] e lē faafefeteina.” (1 Kori. 13:4) Pe a tatou faaalia le lotomaulalo, atonu o le a tosina mai ai tagata iā Ieova. E pei lava ona mafai ona maua tane i le amiolelei a a latou avā e aunoa ma se upu, e mafai foʻi ona tosina mai isi i le Atua pe a latou mātauina le lotomaulalo o loo faaalia e ona tagata.—1 Pete. 3:1.
Saʻiliʻiliga mo ʻOa Faaleagaga
it-2 695-696
Perofeta
E ui na faauuina perofeta e le agaga o Ieova, ae e lē o latou faamatalaga uma e faagaeeina e le Atua. Nai lo lea, na iai taimi patino na oo mai ai le agaga o le Atua iā i latou ma faailoa mai ai le feʻau e ao ona faasilasila atu. (Esk 11:4, 5; Mi 3:8) O le iʻuga, na uunaʻia ai i latou e tautatala atu. (1Sa 10:10; Ie 20:9; Amo 3:8) Sa matuā uigaese le auala na latou gaoioi ma amioaʻi ai. Atonu o se tasi lea o mea e uiga i ai le faamatalaga, ʻamioaʻi e pei o se perofeta.’ (1Sa 10:6-11; 19:20-24; Ie 29:24-32; faatusatusa i le Ga 2:4, 12-17; 6:15; 7:55.) O lo latou uaʻi atoatoa ma le maelega i lo latou tofiga, na manatu ai nisi e ese o latou gaoioiga ma e lē mafaufau lelei, e pei o le vaaiga a taʻitaʻiʻau i le perofeta na faauuina Ieu. Peitaʻi, ina ua latou iloa o ia o se perofeta, ona latou talia lea o lana feʻau. (2Tu 9:1-13; faatusatusa i le Ga 26:24, 25.) Ina ua osofia Saulo e le agaga o Ieova ma gaoioi e pei o se perofeta a o ia tuliloa Tavita, na ia tatala ese ai ona ofu ma taoto ʻlē lavalavā i le aso atoa ma le pō atoa,’ ma maua ai le avanoa e sola ai Tavita. (1Sa 19:18–20:1) Peitaʻi, e lē uiga ai na fai ma masani a perofeta uma le ō lē lavalavā, ma e faamaonia lenā manatu i le Tusi Paia. I isi tala e lua na faamauina i le Tusi Paia, na taʻua ai e iai se māfuaaga na lē lavalavā ai se perofeta ina ia faamalamalama ai se vaega o lana valoaga. (Isa 20:2-4; Mi 1:8-11) E lē o taʻua le māfuaaga na lē lavalavā ai Saulo. Atonu ina ia faaalia ai lona faatauvaa o se tagata pe a faatusatusa iā Ieova, pe faaalia ai le malosi ma le pule a Ieova, po o se isi māfuaaga.
APERILA 4-10
ʻOA TAUTELE MAI I LE AFIOGA A LE ATUA | 1 SAMUELU 20-22
“Le Auala e Avea ai Oe o se Uō Lelei”
Ia Atiaʻe Faauōga Māfana a o Leʻi oo Mai le Iʻuga
18 I aso nei, o loo fesagaʻia foʻi e o tatou uso ma tuafāfine le tele o faafitauli eseese. O se faataʻitaʻiga, e toʻatele o loo mafatia i mala faalenatura, ma faafitauli e faapogaia e tagata. Pe a tutupu na mea, e ono mafai e nisi o i tatou ona valaaulia uso ma tuafāfine e tatou te nonofo faatasi. O nisi atonu e latou te avatu se fesoasoani tau tupe. Ae e mafai e i tatou uma ona tatalo iā Ieova e fesoasoani i uso mafatia. Pe a tatou iloa ua lotovaivai se uso po o se tuafafine, atonu e tatou te lē iloa le tala e fai atu ae e mafai lava ona tatou avatu se fesoasoani. O se faaaʻoaʻoga, e mafai ona faaalu se taimi mo la tatou uō. E mafai ona tatou faalogologo lelei a o talanoa mai. E mafai foʻi ona faasoa atu i ai se mau faalaeiau e tatou te fiafia i ai. (Isa. 50:4) O le mea e sili ona tāua, o lou iai faatasi ma au uō i le taimi e latou te manaʻomia ai oe.—Faitau le Faataoto 17:17.
Ia Savavali i Ala o Ieova
7 E finagalo le Atua ia avea i tatou ma uō faamoemoeina. (Faata. 17:17) Sa avea Ionatana, le atalii o le tupu o Saulo, ma uō a Tavita. Ina ua faalogo Ionatana ua fasioti e Tavita Koliata, “ona pipiimau lea o le loto o Ionatana i le loto o Tavita, ua alofa foʻi Ionatana iā te ia e pei o ia lava.” (1 Samu. 18:1, 3) Sa oo lava foʻi ina lapataʻia e Ionatana Tavita ina ua manaʻo Saulo e fasioti Tavita. Ina ua sola Tavita, sa la feiloaʻi ma Ionatana ma osia se feagaiga ma ia. Sa toetoe lava a fasioti e Saulo Ionatana ona o lona talanoa atu iā Tavita, peitaʻi na la toe feiloaʻi ma toe faamalosia atili le la faigāuō. (1 Samu. 20:24-41) I le taimi mulimuli na la feiloaʻi ai, na faalaeiau e Ionatana Tavita ia “faatuatua i le Atua.”—1 Samu. 23:16-18.
Ia Faatumau ni Uō Lelei i se Lalolagi e Lē Alofa
11 Ia faamaoni. Na tusi Solomona e faapea: “O le uō moni e alofa i taimi uma, ma o ia o se uso ua fanau mo taimi o puapuaga.” (Faata. 17:17) Ina ua tusia na upu, atonu sa mafaufau Solomona i le faauōga a lona tamā o Tavita ma Ionatana. (1 Samu. 18:1) Sa manaʻo le tupu o Saulo e soloaʻi ane lona atalii o Ionatana i le nofoālii o Isaraelu. Ae na talia e Ionatana le mea moni e faapea, ua filifilia e Ieova Tavita e avea ma tupu. E leʻi lotovale Ionatana iā Tavita e pei o Saulo. E leʻi lotoleaga o ia i le viiviia o Tavita, pe na talitonu i tala taufaaleaga na faasalalau e Saulo e uiga iā Tavita. (1 Samu. 20:24-34) Pe e pei i tatou o Ionatana? Pe a maua e a tatou uō ni faaeaga i le faapotopotoga, pe e tatou te fiafia? Pe a pagatia i latou i ni faigatā, pe e tatou te faamāfanafana ma fesoasoani iā i latou? Pe a tatou faalogo i ni taumuimui e uiga i se uō, pe e vave ona tatou talitonu i ai? Pe e pei i tatou o Ionatana, e puipui ma le faamaoni i la tatou uō?
Saʻiliʻiliga mo ʻOa Faaleagaga
Manatu Tāua Mai le Tusi Muamua a Samuelu
21:12, 13. E faatalitalia e Ieova i tatou e faaaogā o tatou tomai ma mafaufau e taulima ai tulaga faigatā i le olaga. Ua ia tuuina mai iā i tatou lana Afioga, lea ua aumaia le faautauta, poto, ma le mafaufau. (Faataoto 1:4) Ua tatou maua foʻi le fesoasoani a toeaina Kerisiano.
APERILA 18-24
ʻOA TAUTELE MAI I LE AFIOGA A LE ATUA | 1 SAMUELU 23-24
“Ia Faatalitali ma le Onosaʻi Iā Ieova”
Faalagolago i le Agaga o le Atua i le Feagai ai ma Suiga o le Olaga
8 Na musu Tavita e fasioti Saulo. O le iā te ia o le faatuatua ma le onosaʻi, na lotomalie ai e tuu atu le mataupu i aao o Ieova. Ina ua tuua e le tupu le ana, na valaau atu Tavita iā te ia ma faapea atu: “Ia faamasino Ieova i lo taʻua va; ma ia taui atu e Ieova iā te oe ona o aʻu, ae e lē oo atu lava loʻu lima iā te oe.” (1 Samuelu 24:12) E ui ina iloa e Tavita e sesē Saulo, ae e leʻi tauimasui atu iā te ia pe tautala lē mafaufau iā Saulo pe faatatau foʻi iā te ia. E iai isi mea na tutupu, na taofia ai e Tavita o ia mai le avea o se tasi e tauimasui. Na i lo lea, sa ia faalagolago iā Ieova na te faasaʻoina mea.—1 Samuelu 25:32-34; 26:10, 11.
Po o Pulea Lou Soifuaga e Tulaga o Loo Iai?
O le lesona lona tolu, na i lo o le faaaogā o auala e lē faale-Tusi Paia e suia ai o tatou tulaga, e ao ona tatou faatalitali iā Ieova. Na tusi le soo o Iakopo e faapea: “Ia atoatoa galuega o lo outou tumau, ina ia atoatoa ma lelei ai outou i mea uma, ma ia leai se mea e mativa ai.” (Iakopo 1:4) E mafai ona “atoatoa galuega” o le tumau, pe a tatou onosaia tulaga faigatā e aunoa ma le saʻilia o se auala e lē faale-Tusi Paia, e faamuta vave ai tulaga faigatā. O lea la, o le a tofotofoina ma faamalosia lo tatou faatuatua, ma o le a iloa ai le malosi o lona mana. O le ituaiga onosaʻi lea na iā Iosefa ma Tavita. E la te leʻi saʻilia se vaifofō e ono lē fiafia ai le finagalo o Ieova. Na i lo o lea, na la faia mea sili la te mafaia. Sa la faatalitali iā Ieova ma maʻeu faamanuiaga na la maua ona o le faia faapea! Na faaaogā e Ieova i laʻua e laveaʻiina ma taʻitaʻia ona tagata.—Kenese 41:39-41; 45:5; 2 Samuelu 5:4, 5.
Atonu tatou te fesagaʻi ma tulaga tatou te ono manatu ai e sili pe a saʻili ni vaifofō e lē faale-Tusi Paia. O se faaaʻoaʻoga, pe ua e faavaivai ona ua lē maua se paaga faaipoipo talafeagai? Afai o lea, aua lava neʻi faia ni filifiliga e solia ai le faatonuga a Ieova e faaipoipo “tau lava o lē ua i le Alii.” (1 Korinito 7:39) Po o e feagai ea ma ni faafitauli i lau faaipoipoga? Na i lo le aafia i le agaga o le lalolagi lea e uunaʻia ai le nofo valavala ma le tatalaina o faaipoipoga, ia galulue soosootauʻau ma lau paaga e foʻia faatasi ia faafitauli. (Malaki 2:16; Efeso 5:21-33) Po o iai ni faafitauli i le tausia o lou aiga ona o tulaga tautupe? O le faatalitali iā Ieova e aofia ai le ʻalofia o gaoioiga e lē talafeagai pe lē faaletulafono ina ia maua ai le tupe. (Salamo 37:25; Eperu 13:18) O le mea moni, e ao iā i tatou uma lava ona galulue mamafa i le faia o le mea sili tatou te mafai, ma faia taumafaiga ina ia faamanuia mai ai Ieova iā i tatou. A o tatou faia faapea, seʻi o tatou maumauaʻi e faatalitali iā Ieova mo le vaifofō silisili ona lelei.—Mika 7:7.
Saʻiliʻiliga mo ʻOa Faaleagaga
Aua Neʻi Aveesea e se Mea lo Outou Taui
11 Pe a atiaʻe i o tatou loto le alofa ma le agalelei, o le a faigofie la ona tatou ʻalofia le lotoleaga. Ua faapea mai le 1 Korinito 13:4: “E faapalepale ma e agalelei le alofa. E lē lotoleaga le alofa.” Ina ia aua neʻi mauaa le lotoleaga i o tatou loto, e ao ona tatou taumafai ia vaai i mea e pei ona silasila i ai le Atua. E ao ona tatou manatu i o tatou uso ma tuafāfine o sui o le tino e tasi, o le faapotopotoga Kerisiano lea. O le faia faapea o le a fesoasoani e tatou te faaalia ai le tigā alofa, ina ia ōgatusa ai ma le fautuaga lenei: “Afai e faamamaluina se itutino e tasi, e olioli ai foʻi itutino uma.” (1 Kori. 12:16-18, 26) O lea la, nai lo o le lotoleaga, o le a tatou fiafia pe a maua e isi ni faamanuiaga. Seʻi manatu i le faaaʻoaʻoga a Ionatana le atalii o le tupu o Saulo. E leʻi lotoleaga Ionatana ina ua tofia Tavita e avea ma tupu, ae sa ia faalaeiau iā Tavita. (1 Samu. 23:16-18) Pe e mafai ona tatou agalelei ma alolofa e pei o Ionatana?
APERILA 25–ME 1
ʻOA TAUTELE MAI I LE AFIOGA A LE ATUA | 1 SAMUELU 25-26
“Pe E te Gaoioi e Aunoa ma le Mafaufau Muamua?”
Sa Ia Gaoioi ma le Faautauta
10 O le ā le auala na feagai ai na fitafita galulue mamafa, ma leoleo mamoe? E mautinoa e faigofie ona latou aveina se mamoe i so o se taimi, ae e latou te leʻi faia faapea. Nai lo lea, sa avea i latou e pei o se pā e puipuia lafu ma auauna a Napalu. (Faitau le 1 Samuelu 25:15, 16.) E tele mea sa lamatia ai leoleo mamoe ma a latou lafu. Sa tele manu feʻai, ma na lata i latou i le tuaoi i saute o Isaraelu, lea e masani ona osofaʻia e tagata faomea mai isi nuu.
11 E mautinoa sa lē faigofie ona maua ni taumafa i le vao mo na tagata e toʻatele. O lea na auina atu ai e Tavita ni avefeʻau se toʻasefulu iā Napalu mo se fesoasoani. Sa talafeagai lelei le taimi na auina atu ai e Tavita avefeʻau. O se vaitaimi fiafia lea sa sele ai fulufulu o mamoe, ma o le taimi o le limafoaʻi ma taumafataga tetele. Na filifili lelei foʻi e Tavita upu faaaloalo e fai atu, ma le auala e faafeiloaʻi atu ai. E lē gata i lea, sa ia faaaogā le faaupuga “lou atalii o Tavita,” atonu e faailoa atu ai lona āva i le tulaga matua o Napalu. O le ā le tali mai a Napalu?—1 Samu. 25:5-8.
12 Sa ita tele o ia! Na faamatala e le tauleʻaleʻa lea na taʻua i le amataga iā Apikaila le mea na tupu e faapea: “Na ia soona avaavau atu iā i latou.” O le ʻaiʻū o Napalu na faitio ai ma le leotele e lē manaʻo e ave ana meaʻai, vai, ma aano o manu fasi. Sa ia faifai iā Tavita o sē e lē tāua, ma faatusa o ia i se auauna ua sola ese. Atonu e tutusa le vaaiga a Napalu ma Saulo, o lē sa ʻinoʻino iā Tavita. E leʻi iai i lenā tane le silafaga a Ieova. Sa alofa Ieova iā Tavita, ma e leʻi silasila iā te ia o se auauna fouvale, ae o le tupu o Isaraelu i le lumanaʻi.—1 Samu. 25:10, 11, 14.
Sa Ia Gaoioi ma le Faautauta
18 Sa ia talosaga atu ia paʻū i ona luga le faafitauli ma faamagalo mai o ia. Sa ia taʻu saʻo atu e valea lana tane ma ua fetaui lelei ma le uiga o lona igoa. Atonu sa taumafai e faailoa atu iā Tavita e aua le maʻimauina lona tulaga mamalu i lea ituaiga tagata valea. Sa ia faailoa atu lona faatuatuaina o Tavita o le sui o Ieova, o lē o loo tauina “taua a Ieova.” Sa ia faaalia foʻi lona iloa o le folafolaga a Ieova e uiga iā Tavita ma le tulaga tautupu, auā na ia faapea atu: ʻE tofia foʻi oe e Ieova e avea ma taʻitaʻi o Isaraelu.’ E lē gata i lea, sa ia uunaʻia Tavita e aua neʻi faia se mea e nofosala ai i le toto, ma faaleagaina ai lona lotofuatiaifo lelei, o se ʻmea e toe salamō’ mulimuli ane ai. (Faitau le 1 Samuelu 25:24-31.) Maʻeu ni upu agalelei ma faagaeetia!
Saʻiliʻiliga mo ʻOa Faaleagaga
Sa Ia Gaoioi ma le Faautauta
16 Po o lona uiga sa tetee Apikaila i le tulaga ulu o lana tane? E leai. Na faia e Napalu se mea leaga i le auauna faauuina a Ieova, o se mea e ono fasiotia ai le tele o tagata e lē sala o lona aiga. Afai ae lē gaoioi Apikaila, ua ia lagolagoina la le sesē o lana tane. O lea la, sa tatau ona ia faamuamua lona gauaʻi i le Atua nai lo o lana tane.