Na maua e se tamāloa e igoa iā Hamanu se tulaga maualuga i le maota o Asueru. Sa tofia e le tupu Hamanu e avea ma palemia, o lana faufautua autū, ma o lē e sosoo atu i le tulaga pule o le emepaea. Sa faia e le tupu se tulafono ina ia ifo atu tagata iā Hamanu pe a vāai iā te ia. (Eseta 3:1-4) Sa avea lea tulafono ma faafitauli iā Moretekai. Na talitonu o ia e tatau ona usiusitaʻi i le tupu, ae e lē faapea o le a lē faaaloalogia ai le Atua. O Hamanu o se “sā Akakō.” E manino mai la, o ia o sē e tupuga mai iā Akako, le tupu o Amaleka lea na faasalaina i le oti e le Atua e ala i le perofeta o Samuelu. (1 Samuelu 15:33) Ona o le leaga o tagata Amaleka, na avea ai i latou ma fili o Ieova ma Isaraelu. Na matuā teena e le Atua ia tagata Amaleka.b (Teuteronome 25:19) E faapefea la i se tagata Iutaia faamaoni ona ifo atu i se Amaleka aloaʻia? Na lē mafai ona faia faapea e Moretekai, ma na tūmausalī pea o ia. E oo mai i aso nei, e toʻatele tane ma fafine faamaoni o loo lotomalilie e lamatia o latou ola ina ia tausisi i lenei taʻiala: “E tatau ona matou usiusitaʻi i le Atua o le pule, nai lo o tagata.”—Galuega 5:29.