‘O Ai ea na Tuuina Atu le Poto i Ao’?

“PE A outou iloa le ao o loo alu ae i sisifo, ona outou fai ane loa lea, Anei e ua; ona taunuu foi lea. A agi mai foi le toga, ua outou fai ane, Anei e la; ona taunuu foi lea.” O nei fetalaiga a Iesu, sa tusia e le tusitala o le Evagelia o Luka, o ni faaaoaoga o vaaiga i le tau e pei ona sa faia ai i Palesitina anamuā. (Luka 12:54, 55) E iai taimi patino, e mafai ai e tagata i aso anamua ona vaaia faailoga ma valoiaina ma le saʻo valoaga mo ni vaitaimi pupuu.

I aso nei, ua faaaogaina ai e le au vāai tau meafaigaluega lavelave, e pei o satelite e faataamilo i le lalolagi, o le fua e fua ai ave o leo ma le malamalama (Doppler radar), ma komepiuta malolosi, ina ia fuaina ai le faagasologa o le tau mo ni vaitaimi e sili atu le uumi. Peitai e masani lava ona sese a latou valoaga. Aisea?

E tele itu e faafaigata ai ona valoiaina ma le saʻo le tau. Mo se faaaoaoga, o suiga e lē mailoa o le vevela, o le susū o le ea, le mamafa o le ea, le saoasaoa o le agi a le matagi ma le itulagi e agi mai ai e mafai ona faigata ai. E faaopoopo atu i lena, o aafiaga lavelave i le va o le la, o ao, ma le vasa e lē o matuā atoatoa i ai le malamalama o saienitisi. Ona o lena le mafuaaga, ua tumau ai pea ona lē saʻo atoatoa le tomai i le valoiaina o le tau e le faasaienisi.

O le tapulaa o le malamalama o le tagata i le tau ua faamanatu mai ai ia i tatou fesili ia sa fesiligia ai Iopu: “O ai ua fanaua le suāsau? E sau ea le vaitoʻa mai le manava o ai? . . . E te mafaia ea ona faaooina atu lou leo i ao, ia lofia ai oe i vai e tele? . . . O ai ea ua tuuina atu le poto [“i ao,” NW]? Po ai foi ua na avatu le mafaufau i le loto? O ai na te mafaia ona faitau o ao i lona poto? Po ai foi na te mafaia ona liligi ifo o fagu o le lagi?”—Iopu 38:28-37.

O le tali i nei fesili uma, E lē o le tagata a o Ieova le Atua. Ioe, tusa lava po o le ā le foliga mai o le atamai o le tagata, ae o le atamai o Lē na Foafoaina i tatou, e matuā silisili ese lava. E alofa moni lava o ia ona o lona faailoaina mai o lona atamai ia i tatou i le Tusi Paia, ina ia mafai ai ona taulau manuia o tatou ala.—Faataoto 5:1, 2.