Fesili Mai le Aufaitau
◼ O loo ia te aʻu le malamalamaga faapea talu le paū o le tagata i le agasala sa faapea ona liuliualo mai le Atua i le fanau a tagata e ala i na o lona Alo. Sa faapefea la ona feagai tuusaʻo Ieova ma Satani, e pei ona faaalia e le tusi o Iopu?
Sa feagai le Atua ma le fanau a tagata e ala i lona Alo i le taimi a o leʻi agasala Atamu ma le taimi foʻi ina ua agasala o ia ma tupuga mai ai tagata e lē lelei atoatoa.—Roma 5:12.
Ua faapea mai le Kolose 1:16, 17, faatatau i le Alo ulumatua o le Atua: “Na faia e ia o mea uma lava, o mea i le lagi ma mea i le lalolagi, o mea o vaaia ma mea e le o vaaia, . . . na faia e ia mea uma lava, na faia foʻi mo ia; o ia foi o le uluai o mea uma lava, o loo faatumauina foi mea uma lava ia te ia.” Ua faapea foʻi le manatu tali tutusa o le Ioane 1:1-3, peitaʻi ua tatou aʻoaʻoina foʻi o lenei Alo sa avea o le Upu, po o le Lokou. E oo lava i le taimi a o lelei atoatoa le fanau uma a tagata, a e leʻi agasala Atamu ma Eva, sa feagai le Atua ma i latou ma fesoʻotaʻi ma i latou e ala i Lana fofoga fetalai, o le Upu. O lea e lē tatau ai ona tatou manatu faapea o le feagai ai o le Atua ma le fanau a tagata e ala i lona Alo o se auga o le paū o le tagata i le agasala ma le lē lelei atoatoa.
Ua le o saunia e le Tusi Paia mo i tatou ni auiliiliga se tele i le pe na faapefea ona fesoʻotai Ieova le Atua ma meafaiola agaga. Ua taʻu mai e le mataupu 1 ma le 2 o le Iopu faapea sa faatasi atu Satani i se taimi “i luma o Ieova” i se faatasiga o agelu i le lagi.” Ua fetalai atu Ieova ia Satani: ‘Ua e sau ea mai fea?” (Iopu 1:6, 7) I lea feiloaiga, ua lē o folasia mai e le tusi o Iopu Satani ua fesoʻotaʻi ma Ieova e ala i se soʻoupu. Sa i ai foʻi se faaaliga, e le perofeta o Mekaio faapea sa afio Ieova i luga o Lona nofoalii. Na vaaia e le perofeta se agelu o fesoʻotaʻi ma Ieova, a e lē o taʻua ai se soʻoupu. (1 Tupu 22:19-23) E lē o taʻua i nei mea na tutupu e lua le Lokou. Pe na ia aafia ai ua lē taʻua mai faapitoa.
E ui ina sa lē manaomia ona tau suia le auala a Ieova le Atua e fesoʻotaʻi ma Atamu ina ua uluaʻi agasala le tagata, peitaʻi sa mautinoa lava le suia o le tulaga o Atamu. A o leʻi agasala sa avea Atamu o se “atalii” faaletagata “o le Atua”. (Luka 3:38) I le iʻuga sa lē toe avea o ia faapea. E faapena foʻi ona lē lelei atoatoa ē tupuga mai ia Atamu, ua faaeleeleaina e le agasala. O le mea lea, sa lē toe i ai se tulaga e silasila ai Ieova o ni ona “atalii” po o fanau faaletagata e oo lava i tane ma fafine faatuatua ma le faamaoni. Peitaʻi ane, sa ia fuafuaina se suiga. Na afio mai Iesu ma saunia se taulaga togiola, faataʻatia se faavae mo Ieova e faamagaloina ai agasala ai latou o e tuuina atu le faatuatuaga i lea tulaga. Sa faamatala atu e le aposetolo o Paulo i Kerisiano: “Ua lelei i latou ma le Atua i le maliu o lona Alo, ina o fai i tatou mona fili.”—Roma 5:10; Efeso 1:7.
Ioe, ona ua avea o ia o lē e aunoa ma se amioletonu pe e mamā ua mafai ai e Ieova mai lea taimi ona faamagalo agasala a tagata faatuatua ma manatu i ai i latou o ni atalii faaletagata, e mamā e aunoa ma se agasala, agavaa e filifilia ai o ni ona atalii faalegaga. (Roma 3:25, 26; 8:15-17) Peitaʻi, e ui i lenei mea, sa faaaogā lava e le Atua lona Alo, e pei ona faaalia mai e faamaumauga o le liligiina ifo e Iesu o le agaga paia i le Penetekoso.—Galuega 2:33.
O lea, o le feagai ai la o le Atua ma le fanau a tagata e ala i le Upu sa muaʻi tupu ona o le agasala a le tagata, e lē manaomia foʻi ona manatu i ai e pei ona tatou faitau ai i le faaeseesega i le tusi a Iopu.