LESONA 33

Mea o le a Faataunuuina e le Malo

Maua le Lomiga Lolomi

Ua pule nei le Malo o le Atua, ma ua toeitiiti ona ia suia atoatoa lea o le lalolagi. Seʻi tatou iloiloina nisi o mea mananaia e mafai ona e tulimataʻia i le pulega a le Malo.

1. O le a faapefea ona aumaia e le Malo o le Atua le filemu ma le faamasinotonu i le lalolagi?

O le a faaumatia e le Tupu o le Malo o le Atua, o Iesu, tagata leaga ma faigāmalo i le taua o Amaketo. (Faaaliga 16:14, 16) I lenā taimi, o le a faataunuuina atoatoa ai le folafolaga lenei a le Tusi Paia: “Ua toeitiiti lava ona lē toe iai lea o le tagata amioleaga.” (Salamo 37:10) E ala i le Malo, o le a faamautinoa e Iesu o le a iai le filemu ma le faamasinotonu i le lalolagi atoa.—Faitau le Isaia 11:4.

2. O le a faapeʻī le olaga pe a faataunuuina le finagalo o le Atua i le lalolagi?

Pe a pule le Malo o le Atua, ona fai loa lea o “le lalolagi mo ē e amiotonu, e nonofo ai pea i latou e oo i le faavavau.” (Salamo 37:29) Seʻi faaata le ola i se lalolagi e tumu i tagata amiotonu ma alolofa iā Ieova ma isi. O le a lē toe iai se tagata e maʻi ma o le a ola e faavavau tagata uma.

3. O le ā o le a faataunuuina e le Malo o le Atua pe a uma ona faaumatia ē amioleaga?

Pe a uma ona faaumatia ē amioleaga, ona pule loa lea o Iesu o se Tupu mo le 1,000 tausaga. A o faagasolo lenā taimi, o le a ia fesoasoani mai ma le 144,000 lea latou te pule faatasi, ina ia lelei atoatoa tagata i le lalolagi ma saʻoloto mai le agasala. E oo atu i le iʻuga o le 1,000 tausaga, ua avea le lalolagi ma parataiso matagofie, ma maua e tagata le fiafia ona o le usitaʻia o tulafono a Ieova. O le a toe tuuina atu i lenā taimi e Iesu le pule i lona Tamā, ma “faapaiaina [le] suafa” o Ieova e sili atu i lo se isi lava taimi. (Mataio 6:9, 10) O le a faamaonia ai o Ieova o se Pule lelei ma manatu mamafa i ona tagatānuu. Pe a māeʻa lenā, ona ia faaumatia loa lea o Satani ma ana temoni, ma so o se tasi e fouvale i lana pule. (Faaaliga 20:7-10) O le a tumau e faavavau le tulaga lelei atoatoa lea o le a aumaia e le Malo o le Atua.

SAʻILIʻILI ATILI

Iloilo pe aiseā e tatau ai ona tatou talitonu, o le a faaaogā e le Atua le Malo e faataunuu ai folafolaga uma a le Tusi Paia mo le lumanaʻi.

4. O le a faaumatia e le Malo o le Atua faigāmalo a tagata

ʻUa pule le tagata i le isi tagata ma ua matuā afāina ai o ia.’ (Failauga 8:9) O le a faaiʻuina e Ieova na faiga lē tonu e ala i lona Malo.

Faitau le Tanielu 2:44 ma le 2 Tesalonia 1:6-8, ona talanoa lea i fesili nei:

O le ā o le a faia e Ieova ma lona Alo o Iesu i faigāmalo a tagata, ma i latou o loo lagolagoina?
E faapefea i mea ua e aʻoaʻoina e faatatau iā Ieova ma Iesu, ona e mautinoa ai o le a la faaalia le amiotonu ma le faamasinotonu?

Pule mai Iesu o se tupu i le lalolagi parataiso.

5. O Iesu o se Tupu e sili ona lelei

I le avea ai o Iesu ma Tupu o le Malo o le Atua, o le a ia faia le tele o mea lelei ina ia maua ai e tagata uma aogā. Faaali le VITIŌ ma mātau pe na faapefea ona faailoa mai e Iesu, o loo iā te ia le faanaunauga ma le mana ua tuuina atu e le Atua, ina ia fesoasoani ai i tagata.

VITIŌ: Faailoa Mai e Iesu Mea o le a Faataunuuina e le Malo (1:13)

O mea na faia e Iesu a o iai i le lalolagi, ua faaata mai ai mea o le a faataunuuina e le Malo. O lē fea faamanuiaga e sili ona e tulimataʻia i le lumanaʻi? Faitau mau o loo faamatala atili mai ai nei faamanuiaga.

A O IAI IESU I LE LALOLAGI, NA IA . . .	PE A PULE MAI IESU I LE LAGI, O LE A IA . . .
pulea malosiaga faalenatura.—Mareko 4:36-41.	toe faaleleia mea na faaleagaina i le lalolagi.—Isaia 35:1, 2.
fafagaina faavavega le faitau afe.—Mataio 14:17-21.	aveesea le fia aai i le lalolagi.—Salamo 72:16.
faamālōlōina maʻi eseese uma.—Luka 18:35-43.	toe faaleleia le soifua mālōlōina o tagata uma.—Isaia 33:24.
toe faatutū mai ē ua feoti.—Luka 8:49-55.	aveesea le oti.—Faaaliga 21:3, 4.

6. O le a aumaia e le Malo o le Atua se faamoemoe matagofie

O le a faataunuuina atoatoa e le Malo le finagalo o Ieova sa iai i le amataga mo tagata. O le a latou ola e faavavau i se lalolagi parataiso. Faaali le VITIŌ ma mātau le auala o loo faaaogā ai e Ieova lona Alo o Iesu, e faataunuu Lona finagalo.

VITIŌ: Se Faaataga o se Lumanaʻi Matagofie (4:38)

Faitau le Salamo 145:16, ona talanoa lea i le fesili lenei:

O ā ou lagona i le iloaina, o le a “faamalie [e Ieova] le manaʻo o meafaiola uma lava”?

UA FAAPEA MAI NISI: “E mafai ona tatou foʻia faafitauli o le lalolagi pe a tatou galulue faatasi.”

O ā faafitauli o le a foʻia e le Malo o le Atua, lea e lē mafai ona foʻia e faigāmalo a tagata?

AOTELEGA

O le a faataunuu e le Malo o le Atua lona finagalo. O le a suia le lalolagi e avea ma parataiso, e tumu i tagata lelei e auauna iā Ieova e faavavau.

Fesili Autalu

O le a faapefea ona faapaiaina e le Malo o le Atua le suafa o Ieova?
Aiseā e tatou te talitonu ai o le a faataunuu e le Malo o le Atua folafolaga a le Tusi Paia?
O le ā se mea o le a faataunuuina e le Malo e sili ona e tulimataʻia?

Le aso na uma ai le vaega:

Sini

Faaaogā le sāvali O le ā le Malo o le Atua? e amata ai se talanoaga.

Isi sini:

Your other goal

MANATU FAAOPOOPO

Iloilo po o le ā e uiga i ai Amaketo.

“O le ā le Taua o Amaketo?” (Mataupu i le jw.org)

Iloilo mea o le a tutupu a o faagasolo le vaitaimi lea na taʻua e Iesu o “le puapuaga tele.”—Mataio 24:21.

“O le ā le Puapuaga Tele?” (Mataupu i le jw.org)

Mātau le auala e mafai ai e aiga ona manatunatu i faamanuiaga o le Malo i le lumanaʻi.

Vaai iā Oe i le Parataiso (1:50)

Faitau i le tala “E Tele Fesili na Oo Mai i Loʻu Mafaufau,” ma mātau pe na faapefea ona maua e se tagata na fouvale i le faigāmalo, tali o fesili na ia saʻilia.

“E Mafai e le Tusi Paia Ona Suia Olaga” (Le Olomatamata, Ianuari 1, 2012)