“Aua tou te faatuatua i alii, po o le fanau a tagata, e le o i ai se olataga.”—SALAMO 146:3

Ua Faaitiitia le Faatuatuaina

3. O le ā le faamaoniga o i ai e faapea o le faatuatuaina ua agaʻi ina leiloa i o tatou aso?

³ I nei aso tumu i le mataʻu, ua tatou matuā manaomia ai nisi o ē e mafai ona tatou faatuatuaina, i latou o ē o le a faamaoni, o se fesoasoani i taimi e manaomia ai. A e o le toatele ua lagona le lotovaivai ona o tagata na latou faatuatuaina. Na faalauiloa mai e se nusipepa a se tasi atunuu e faapea: “Ua Lē Faatuatuaina e Tagata le Tele o Faalapotopotoga Lautele.” O tagata e aupito lē faatuatuaina o taʻitaʻi o malo ma pisinisi. Ua faateleina foi le lē faatuatuaina i totonu o aiga, e pei ona faamaonia i le maualuga o tatalagā faaipoipoga. I nisi atunuu, e tasi le faaipoipoga tatala mai faaipoipoga uma taitolu, pe e oo lava ina tasi mai faaipoipoga tailua. I se tasi atunuu, e 70 pasene o faaipoipoga fou uma ua iʻu i le tatalaina i totonu o le sefulu tausaga! O lea, o le faatuatuaina ua agaʻi atu ina leiloa. Ua suia i le lē faatuatuaina. Ua lē toe umi a e avea o se masani le faaupuga a se tagata e faapea mai: “Ua ou lē toe faatuatuaina lava se tasi.”

4. Ua faapefea ona aafia le toatele o tagata talavou i le mataʻu?

⁴ Ua tele naʻuā le lē faatuatuaina auā o le taimi aupito sili lenei ona mataʻu ai i le tala faasolopito uma o le fanau a tagata. Na vaaia i lenei senituri ni taua e lua a le lalolagi ma isi foi taua e tele ua aveesea ai ola e sili atu i le selau miliona. Ua faamataʻuina nei e mea tau faaniukelea le faaumatia o ola uma i luga o le lalolagi. Ma ua aafia ai i lenei le faatuatuaina e oo lava i tamaiti laiti. Na lipotia mai e se mekasini faafomaʻi e faapea: “Ua tele ma tele tamaiti, e oo lava i pepe faatoʻā laalaa, ua amata ona fefefe i le faamataʻu mai o se faaumatiaga tele i mea tau faaniukelea.” Sa fai mai se nusipepa Kanata ua i ai nei le “lē maufaatuatuaina, le faanoanoa, le tigā ma le lagona o le lē ma fesoasoania” i le tele o tagata talavou. Sa fai mai le tasi talavou: “E leai so matou faalogona o malu puipuia mai le tupulaga matutua. E lē taumatea o le a matou tutupu aʻe e avea o se tupulaga aupito sili ona lē maufaatuatuaina, e leʻi faapea ona i ai.”

5. Ana mafai ona latou tautatala mai, atonu o le ā le lagona o le vaega o tagata talavou aupito sili ona taʻumamāina ma lē mafesoasoania?

⁵ A e o le ā o le a fai mai ai le isi vaega o talavou—pe ana mafai ona latou tautatala—e faatatau i le leai o se lagona o le puipui maluina o i latou e tagata matutua? O le uiga o la matou tala, o i latou ia ua fasiotia e ala i le faapaʻū tama a o leʻi oo ina fananau mai. Na faaalia e se tasi faatatauga le aofai o faapaʻū tama e faia i le lalolagi aoao e tusa ma le 55 miliona i tausaga taitasi. Pagā se faalataina o le vaega o le fanau a tagata e aupito sili ona taʻumamāina ma le lē ma fesoasoania!

6. Ua faapefea ona faaopoopo atu le solitulafono i le lē faatuatuaina i o tatou taimi?

⁶ Ua faateleina le lē faatuatuaina ona o le isi mataʻu ua tupu tele mai i o tatou aso: o le mataʻu i le avea ma se tasi e lavea fua i solitulafono. E toatele i aso nei ua latou faia e pei ona fai e le fafine o lē na faapea mai e moe ma lana tamaʻi fana i lalo o lona aluga. Na faapea mai foi le isi fafine ua tumu i le mataʻu: “Sa ou ita. . . .E lē lokaina lava e le tinā o lou tinā ona faitotoa.” O lea ua faalauiloa ai e le faatonu o se nusipepa i Puerto Rico e faapea: “O i tatou o tagata o loo faafalepuipuiina,” ioe, i totonu o ō tatou lava fale ua puipuia ma lokaina. Ua matuā mauaa nei mataʻu. Mo se faaaʻoaʻoga, i le Iunaite Setete, e toatasi mai le toatolu fafine ua sauāina i se taimi o lona olaga. O le fomaʻi sili tipitipi i inā na ia maitauina e faapea “o se fa miliona o tagata Amerika e lavevea fua i faiga sauā matuiā i tausaga taitasi—le fasioti tagata, toso teine, fasi avā, faasauā i tamaiti, ma osofaiga faagaoi.” E taatele i le tele o atunuu solitulafono faapena, ua atili ai ona faaleagaina le faatuatuaina o isi tagata e isi.

7. Ai se ā ua saosaolaumea ai le leaga o le tulaga tau tamaoaiga i le lē faatuatuaina?

⁷ I malo tau atiaʻe, e ola matitiva ai le toatele o tagata. E toaitiiti e faatuatuaina so o se tasi na te aveesea i latou mai lea tulaga. Sa fai mai le peresitene o se tasi atunuu faapena e faapea, i le pitonuu e tasi, e 270 pepe mai le 1,000 pepe e fananau mai, e feoti a o leʻi atoa le taʻitasi tausaga le matutua. E na o le tasi mai le 100 fale taitasi uma e maua ni vai. Ua fai mai le faigamalo a le tasi atunuu e faapea, e 60 pasene o ana tamaiti o loo i ai le manaomia, ma e fitu miliona tamaiti ua lafoaia “o loo ua tuputupu aʻe o ni tagata e lē iloa faitau ma tusitusi, ua tagata esea ma ua teena e leai ni galuega.” I le Iunaite Setete, ua faatatauina le aofai o talavou ua leai ni aiga e tusa ma le 500,000, a e ua fai mai nisi e matuā maualuga lava le fuainumera saʻo. O le ā le tele o le faatuatua o nei talavou i o latou mātua, i le sosaiete faaletagata, i tulafono ma poloaiga, pe i folafolaga a taʻitaʻi?

8. (a) Ua faapefea ona faamataʻuina le tulaga mautu o atunuu mauoa ma le tamaoaiga faalekelope? (e) O le ā le tele e mafai ona faatuatuaina ai tagata popoto i le foiaina o faafitauli tau tamaoaiga?

⁸ O faafitauli tau i le tamaoaiga ua malaia ai e oo lava i atunuu mauoa. Talu ai nei lava, na matuā sili ai ona tele le lē taulau i faletupe o le Iunaite Setete talu mai le Paʻū Tele o Fefaatauaiga i le 1930 ma agaʻi mai ai i luma. Na tusi se tagata suʻesuʻe tau i le tamaoaiga: “O le iʻuga mulimuli ua mautinoa lava o le maʻaleʻale o le faiga o teugatupe i aso nei e pei ona sa i ai i le 1920 ma agaʻi mai ai i luma,” a o leʻi paʻū. Na tautala e tagata na matauina ia mea, faatatau i le “lalata mai o se afā matautia e faatamaʻia” ai le tamaoaiga o le lalolagi. Sa fai mai foi le isi: “O le oo mai o le lagona faanatinati ona o nei mea faigata i faiga faavaomalo, ua lē o toe faamalumalu mai; a e ua oo mai.” E mafai ea ona faatuatuaina tagata suʻesuʻe tau i tamaoaiga e taʻitaʻieseina atu atunuu mai lenei faalavelave? Na faapea mai se tasi o i latou, o ā latou valoaga “ua matuā faateia ai e leai se masalosalo ua sili atu ai ona faasalalauina le fenuminumiai.”

Ua Tuu Sese le Talitonuga mo se Lelei e Sili

9. (a) O le ā le mea ua tupu i le talitonuga mo se lelei e sili atu, lea na i ai ina ua suia le senituri? (e) Ai se ā na lē mananao ai Molimau a Ieova e sainia se pepa o feagaiga o Malo Aufaatasi i le 1945?

⁹ Pagā le ese o nei mea uma lava mai le talitonuga mo se lelei e sili atu, lea na i ai ina ua ulu atu le lalolagi i lona 20 senituri. Ua faitau sefulu tausaga o faatusatusaga o le filemu, ma sa i ai se lagona faapea o le a oo i ni tulaga fou maualuluga le filemu ma le tamaoaiga. A e peitai, i le 1914 na faaleagaina ai e le Taua I a le Lalolagi lena vaaiga. I le 1945, ina ua mavae le taua sili ona matautia e lua a le lalolagi, na sainia ai le Feagaiga a Malo Aufaatasi. Na tusitusia ai i lalo e malo a latou vaaiga i se lalolagi filemu, tele le tamaoaiga, ma le faamasinoga tonu ina ua mavae le taua. Na faapea mai se lipoti talu ai nei: “Na sainia le pepa o le feagaiga mulimuli lava e atunuu e 51, na fai ma sui o konetineta taitasi, lanu ma lotu.” Peitai e i ai le lotu e tasi e leʻi i ai sona sui, ma sa lē manao foi ia i ai, o Molimau a Ieova. Na latou iloa lava o na folafolaga o le filemu, le tamaoaiga, ma le faamasinoga tonu o le a lē iloa e se malo o lenei lalolagi, po o so o sa latou faalapotopotoga, e pei o Malo Aufaatasi.

10. O le ā le mea moni i aso nei pe a faatusatusa atu i miti a Malo Aufaatasi i tuā i le 1945?

¹⁰ Ua faapea mai le lipoti lava lea: ‘E foliga mai i le fasefulu tausaga mulimuli ane ai, sa alagatatau ona toe autalu mea moni e faasaga i ia mafaufauga. E manino lava le faamaoniga. O se lalolagi ua faaitiitia le faamasino tonu, faaitiitia le saogalemu, ma ua tupu tele le sauā, o mea moni na. O le aofaiga tele o tagata ua leai ni mea taumafa, leai ni vai, leai ni fale, lē lelei le tausiga o le soifua maloloina ma aʻoga ua tumau lona faatuputeleina. O le mea lenei sa leʻi mafaufauina i le 1945.’ Ua faaopoopo mai: ‘I le fasefulu tausaga ua mavae talu ona aufaatasia malo ina ia faamautinoa o le a mafai e tagata uma ona ola saoloto mai le mataʻu ma le manao, o le lalolagi moni o le 1980 ma agaʻi mai ai i luma, o se tasi lea o lalolagi ua sili ona omia i le mativa a itiiti mai o le kuata o le fanau a tagata. O oti ona o le fia aai ua faatatauina pe tusa ma le 50,000 i le aso.’ A e o loo faamaimau e malo le sili atu i le selau miliona tala i itula uma i taua!

11. O le ā le tele o le maufaatuatuaina o folafolaga a tagata e uiga i se lalolagi e sili ona lelei?

¹¹ I le vaai atu i lenei faamaumauga e faanoanoa ai ina ua mavae ni senituri o le avanoa na maua, pe e mafai ona tatou faatuatuaina folafolaga faapena ua toeitiiti lava maufaatuatuaina e pei o upu a le kapeteni o se vaa laʻu pasese tele o lē na faapea mai: “Ou te lē iloa po o le ā se faiga o le a mafai ai ona goto se vaa [tele] faapenei. . . .O fausaga faaonaponei o vaa ua matuā mamao lava ma se fuafuaga faapena.” Na faapea atu se tasi o le auvaa o lena vaa i se pasese: “E oo lava i le Atua na te lē mafai ona faagoto lenei vaa.” A e peitai, i le 1912, na goto ai lena vaa le Titanic ma na lē iloa ai le 1,500 ola. I le 1931 na faapea mai ai le Asosi Faavaomalo o Aʻoga i le Iunaite Setete, e auala i aʻoaʻoga, “o le a matuā faaumaina ai lava solitulafono a o leʻi oo i le 1950.” I le 1936 na tusi ai se tusitala Peretania e faapea a o leʻi oo atu i le 1960 “ua matuā taugofie lava e pei o leʻea meaʻai, lavalava, ma fale.” E te lē ioe ea faapea o mea moni i aso nei ua faamaonia ai le sese o na folafolaga?