“O Ieova, o Loʻu Leoleo Mamoe o Ia”
“O Ieova, o loʻu leoleo mamoe o ia; e leai se mea ou te mativa ai.”—SALAMO 23:1.
1, 2. O ā nisi o mea na faataunuuina e Tavita, ma e fia ni salamo na ia fatuina?
SEʻI MANATU i lenei vaaiga: O loo fesagai nei ʻau tau a Filisitia ma le vaegaau a Isaraelu. O loo luitau mai pea Koliata, le toa tinoese Filisitia i le vaegaau a Isaraelu. O se tama talavou, e na o le maatā lava o loo ia te ia ma ni maa, ua tamoe atu e faafetaiai ia te ia. O se maa sa faatonutonu lelei atu lava lona liaiina na goto i le muaulu o le tagata tinoese ma fasiotia ai o ia. O ai le tama talavou? O Tavita, le leoleo mamoe, o lē na malo i lenei manumalo e meia ai ona o le fesoasoani a Ieova le Atua.—1 Samuelu, mataupu e 17.
2 I le gasolo mai o le taimi, na oo ai ina avea lenei tama talavou ma tupu o Isaraelu, na pule mo tausaga e 40. Sa o ia o se tagata e tomai tele i le taina o le kitara ma fatuina le tele o salamo sa tusia faasolo i lalo o faagaeega tauatua. Sa tusia foi e Tavita e sili atu i le 70 salamo matagofie, ia ua avea ma puna o faalaeiauga ma taʻiala mo tagata o Ieova i aso nei. O le aupito sili ona lauiloa o nei salamo, o le Salamo 23. Ai se ā e lē tatala ai lau Tusi Paia ma mulimuli ai a o tatou talanoaina fuaiupu taitasi i le suesueina o lenei salamo?
O Ieova, o se Leoloe Mamoe Alofa
3. (a) O ā ni mea na tutupu na lē faapelepeleina ai e Tavita lona ola ina ia puipuia ana mamoe? (e)I le ā le uiga ua avea ai Ieova ma o tatou Leoleo Mamoe?
3 “O Ieova, o loʻu leoleo mamoe o ia.” (Salamo 23:1) I le avea o se leoleo mamoe ua lava le tomai ma ua i ai le poto masani, sa iloa lelei e Tavita le auala e taʻitaʻiina ai, fafaga, ma puipuia ai mamoe. Mo se faataʻitaʻiga, i se tasi o taimi, sa ia puipuia ma le loto tele ana mamoe mai se leona ma mai se urosa i le tasi taimi. (1 Samuelu 17:34-36) Sa matuā faatuatuaina e mamoe a Tavita lo latou leoleo mamoe. A e i le feagai ai ma Ieova, sa o ia foi o se mamoe. Talu ai ona sa lagona e Tavita le saogalemu i le tausiga alofa a le Atua, ua mafai ona faapea mai o ia: “O Ieova, o loʻu leoleo mamoe o ia.” Pe e te olioli i lenei faalogona saogalemu i lalo o le Leoleo Mamoe Silisili o Ieova le Atua? E mautinoa lava lona taʻitaʻiina, fafaga, ma puipuia ona tagata tapuai pei ni mamoe i aso nei. A e lē gata i lea, i le avea o ni toeaina tofia i faapotopotoga a Molimau a Ieova, ua latou tausia ai ma le maelega, faamaoni ma le alofa mamoe i le avea o i latou o ni leoleo mamoe lagolago.—1 Peteru 5:1-4.
4. Ua faapefea ona tali tutusa lo tatou tulaga i aso nei ma le tulaga o Isaraelu i le vao?
4 “E leai se mea ou te mativa ai.” Mafaufau ma le faaeteete i lenei faaupuga. Ona o le tausiga alofa a Ieova, pe lē o ia te oe ea se faalogona malū o le toafilemu ma le mautinoa? O e manatua ea le mea na tupu i tagata Isaraelu ina o latou taamilo i le vao mo le 40 tausaga? Ioe, sa saunia e le Atua mea uma sa latou manaomia! E faapena foi i aso nei. E leai se mea o matitiva ai auauna faamaoni a Ieova. E toatele ua mafai ona latou faaleoina atu nei upu faagaeeina a Tavita: “Ua ou toeaina aʻu nei, sa aʻu taulealea; a ou te lei iloa se tagata amiotonu na lafoaiina, po o ana fanau ua ʻaisi i latou.” (Salamo 37:25) Ua tele ma anoanoai meaʻai faaleagaga ua saunia i aso nei e ala i le “auauna faamaoni ma le mafaufau.” (Mataio 4:4; 24:45-47) E faaopoopo atu i ni nai sauniga i le vaiaso, ua ia i tatou le Tusi Paia, mekasini o le Olomatamata ma le Awake!, ma le tele lava o isi lomiga. E oo lava i atunuu o loo faasaina ai le galuega a Molimau a Ieova, o loo maua pea e lē aunoa le avatua i ai o meaʻai faaleagaga. E leai se mea o matitiva ai mamoe a Ieova!
5. Ai se ā ua toʻafilemu ai ma malōlō mamoe a Ieova i aso nei, ma faatasi ai ma le ā le iuga?
5 “Na te ave aʻu i le mea e i ai le vao muʻa ou te taoto ai.” (Salamo 23:2) Sa i ai ni vao muʻa tetele sa siomia ai le tele o aai i Isaraelu anamua. O lea la, e pei o le leoleo mamoe alofa sa ia taʻitaʻiina ana mamoe i le laufanua lelei ma le saogalemu e tele ai le vao i lea taimi, o lea ua faapena ona tausia e Ieova ana mamoe i aso nei. Ua faapea mai le faisalamo: “O i tatou foi o le nuu ua fafagaina e ia.” (Salamo 79:13; 95:7) E sili ona toʻafilemu mamoe faaletino pe afai e loto malilie ma mafai ona malolo mai le vevela o le aso. E toʻafilemu foi mamoe a Ieova i aso nei ma e malolo foi ona e ia te i latou le mautinoa i leoleo mamoe taʻumatuaina—o ovasia ua uma ona toleniina i faapotopotoga ma matagaluega. O le iuga, ua faateleina lafu mamoe faaleagaga. O le toatele o tagata na faaleagaina muamua e leoleo mamoe a Papelonia le Aai Tele ua matuā fiafia nei ma ua loto malilie e avea ma mamoe a Ieova.
6. Ua faapefea e Ieova ona ‘taʻitaʻi ia i tatou i nofoaga e i ai vai e tafe lemu e malōlō ai’?
6 “Na te taʻitaʻi ia te au i tafatafa o vai e tafe lemu.” I Isaraelu, sa tatau ona taʻitaʻi atu e le leoleo mamoe lana lafu i se vaipuna po o se vaitafe e feinu ai. A e sa masani lava ona faigata ona maua ni vai i le tau e paaa ai mea. I aso nei, ‘ua taʻitaʻiina i tatou e Ieova i nofoaga e tele ai vai ma malolo ai’ e ala i le saunia o le tele anoanoai o vai o le upu moni. (Faatusatusa le Esekielu 34:13, 14.) Ma ua aumaia e le perofeta o Isaia lenei valaaulia e faagaee ai: “E! outou uma o e fia inu, o mai ia i le vai.” (Isaia 55:1) I le aveina i totonu o nei vai faaleagaga, o le a maua ai e mamoe le puipuiga mai le faamasinoga pei o le afi o le a oo mai i luga o i latou o “e ua le iloa le Atua, ma ua le anaana i le tala lelei.”—2 Tesalonia 1:8; Faaaliga 7:16, 17.
7. O afea e fesoasoani moni ai le faafouina faaleagaga mai ia Ieova, ma i lalo o ā tulaga e faamaonia ai le matuā aogā o le taulotoina o mau o le Tusi Paia?
7 “Na te faafouina loʻu solu.” (Salamo 23:3, NW) Pe a tatou vaivai, oo i faalavelave, loto vaivai, pe fesagai ma teteega matuiā, e faafouina i tatou e Ieova e ala i lana Afioga. O lea, o se mea lelei mo Kerisiano i aso nei ona fai ma masani le faitauina o vaega o le Tusi Paia i aso uma. E te faia lenei mea? Ua iloa e nisi le aogā o le taulotoina o nisi o mau, e pei o le Esoto 34:6, 7 po o le Faataoto 3:5, 6. Ai se ā e aogā ai lenei mea? Ia, afai e tupu se mala ia te oe a e leai sau Tusi Paia o i ai, a e o mafaufauga e faamafanafana ai mai le Tusi Paia e mafai ona vave faamalosia ai oe. O le toatele o uso na tuuina atu i fale puipui po o nofoaga e puipuia ai ona o lo latou tutumau mo mataupu silisili amiotonu, na matuā faafouina ma faamalosia e ala i le manatuaina o mau mai le Tusi Paia. Ioe, e mafai e le Afioga a le Atua ona “faafiafia ai le loto” ma “malamalama ai mata.”—Salamo 19:7-10.
8. Pe o se mea faigofie ea ona mulimuli i “ala o le amiotonu,” a e i le faia faapea e taʻitaʻiina atu ai i le ā?
8 “Na te taʻitaʻi ia te au i ala o le amiotonu.” E matuā faigata lava ona mulimuli atu i ala o le amiotonu, a e e oo atu ai i le ola. E pei ona fetalai Iesu: “E vaapiapi le faitotoa, e lauitiiti foi le ala e tau atu i le ola.” (Mataio 7:14) Na faamamafa atu e le aposetolo o Paulo se manatu faapena i lona taʻu atu i soo i Lusa, Ikonio, ma Anetioka: “o puapuaga e tele e tatau ona tatou sao atu ai i le Malo o le Atua.” Ma sa mautinoa ona iloa e Paulo le mea sa ia tautala atu ai. I sina taimi puupuu a o leʻi tupu lena mea, na fetogia ai o ia i maa i Lusa ma tuu ai ua tali oti!—Galuega 14:19-22.
9. (a) Ua faapefea e le Atua ʻona taʻitaʻiina i tatou i ala o le amiotonu’? (e) I le ā le auala e mafai ona fesoasoani tele ai le Salamo 19:14? (i) O ā mau o le Tusi Paia e mafai ona fesoasoani ia i tatou e alofia lua e pauū ai o feusuaiga lē mamā?
9 E ʻtaʻitaʻiina i tatou e Ieova i ala o le amiotonu’ e ala i le taʻitaʻiina ma faatonuina i tatou i lana Afioga ma lana faalapotopotoga. A e o le toatele lava o tagata e mulimuli atu i le ala vatele “e tau atu i le malaia.” (Mataio 7:13) O le taatele o feusuaiga lē mamā faaleituaiga ma le vave ona salalau atu o le mala o le AIDS ua faailogaina ai le manaomia e Kerisiano ona alofia aumea leaga. (1 Korinito 15:33) E tatau foi ona tatou faaeteete ina ia puipuia o tatou mafaufau mai le mafaufau solo i auala lē mamā. (Salamo 19:14) I lena itu, seʻi tatou faatatauina pea le fautuaga manaia ua aumaia i le Afioga a le Atua faatatau i feusuaiga ma le auala e aloese mai ai i mailei e pauū ai i amioga lē mamā.—1 Korinito 7:2-5; Efeso 5:5; 1 Tesalonia 4:3-8.
10. (a) O le ā le tiute tauave ua i Molimau a Ieova e faatatau i le suafa tauatua? (e) Ai se ā e faitioina ai i tatou e tagata o le lalolagi? (i) I lalo o ā tulaga o le a fesoasoani ai Ieova ia i tatou?
10 “Ona o lona suafa.” Ua i ai i Molimau a Ieova le avega tauave mamafa o le faapaiaina o le suafa o Ieova ma ia lē faalumaina. (Mataio 6:9; Esoto 6:3; Esekielu 38:23) E vave tele lava ona tusitusi lima mai tagata o le lalolagi e faitioina tagata o Ieova. Afai e faia lenei mea ona o lo tatou tulaga mo na mataupu silisili faale-Tusi Paia e pei o le solitu, po o le paia o le toto, ua mamā la o tatou loto fuatiaifo. A e afai e tupu lenei mea ona o mea sese tatou te fai ua tatou lē āva la ia Ieova. (Isaia 2:4; Galuega 15:28, 29; 1 Peteru 4:15, 16) O lea, seʻi o tatou inoino i le mea ua leaga. (Salamo 97:10) Afai e oo ni sauaga ia i tatou, o le a fesoasoani mai pea Ieova ia i tatou ma puipuia i tatou ona o lona suafa.
E Puipuia e Ieova Ana Mamoe
11. O le ā le uiga o le “vanu o le ata o le oti,” ma o le ā ua faamanatu mai e lenei mea ia i tatou e uiga ia Iesu?
11 “E ui lava ina ou savali i le vanu o le ata o le oti, ou te le fefe lava i se mea leaga.” (Salamo 23:4) Ua faitauina faapenei le faaliliuga a Isaac Leeser: “Ioe, e ui lava ina ou savali i le vanu o le ata o le oti, o le a ou le fefe lava i se mea leaga.” E manatua ai i lenei mea asaga maulalalo, po o vanu, e faalalava mai mauga o Iutaia i le itu i sisifo o le Sami Mate. O se vanu, po o se tofe maulalo i le mea e nonofo ai manu i le ataata o le vanu e mailei ai ni latou meaʻai, o se nofoaga matautia mo mamoe. Sa fealuai ai Tavita i le tele o nei vanu matautia i lona olaga, e fesagai pea lava ma le oti. A e talu ai ona sa taʻitaʻiina o ia e le Atua, sa ia te ia le mautinoa ma sa leai se mea e fefe ai. E tatau foi ona ia i tatou lenei lava mautinoa ia Ieova. O lenei faasinoga i “ata o le oti” ua mafai ai foi ona faamanatu mai ai ia i tatou le valoaga a Isaia: “O e sa nonofo i le nuu o le ata o le oti, ua pupula mai ia te i latou le malamalama.” Na faasino e Mataio i le valoaga lenei ma faatatauina atu ai ia Iesu Keriso, i le faapea mai: “O le nuu sa nofo i le pouliuli, ua latou iloa le malamalama tele; o i latou foi sa nonofo i le nuu ma le ata o le oti ua alu ae le malamalama ia te i latou.” E faapefea? E ala i le tauiviga tele o le talaʻiga na taʻitaʻiina e Iesu.—Isaia 9:2; Mataio 4:13-16.
12. (a) Ua faapefea ona faafetaui atu auauna a Ieova i sauaga i le tele o atunuu, ma o le ā le iuga? (e) Na faapefea ona faalaeiau Peteru i uluai Kerisiano na faasauaina?
12 Sa leʻi fefe Tavita ‘i se mea leaga.’ E faapena foi ona moni lea lava mea i auauna a Ieova i aso nei, e ui lava e lē o lauiloa i latou i lenei lalolagi leaga o loo pulea e Satani. (1 Ioane 5:19) E toatele lava tagata e matuā inoino ia i latou, ma e matuā sauaina lava i latou i nisi o atunuu. Peitai, o loo faaauau ai pea ona latou talaʻia le tala lelei o le Malo i nei atunuu, e ui lava e lē o saoloto e pei ona masani ai ona latou faia. Ua latou iloa lava o loo ia i latou Ieova ma o le a na puipuia i latou. (Salamo 27:1) O loo faia ni agaʻigaʻi i luma i se tulaga lelei i le tele o atunuu ia e tatau ai ona faia faalilolilo le galuega o le Malo. I nei atunuu, ua faaleoina atu ai e Molimau a Ieova upu o le salamo: “O loo ia te au Ieova; ou te te le fefe; se a se mea e faia e tagata ia te au?” (Salamo 118:6) O nei Molimau o loo i se tulaga e tali tutusa ma lena o uluai Kerisiano o ē na tusi atu i ai le aposetolo o Peteru i nei upu faalaeiau: “Afai e tigaina outou ona o le amiotonu, amuia outou. A e peitai, o le mea o latou fefefe ai, aua tou te fefefe ai, aua foi neʻi atuatuvale outou.”—1 Peteru 3:14, NW.
13. (a) O le ā le suiga fiafia o loo i ai i le Salamo 23:4, ma ai se ā? (e) E mafai faapefea e Kerisiano ona manumalo mai lo latou mataʻu?
13 “Auā o oe ta te faatasi ma aʻu.” Faamolemole seʻi matau le vala sili ona tāua i lenei fasi fuaitau. Ua suia e le faisalamo faagaeeina mai le tagata lona tolu i le tagata lona lua. Na i lo o le tautala atu agaʻi ia Ieova o “ia,” a e ua faaaogā nei e Tavita le sui nauna o “oe.” Ai se ā? Auā e sili ona vavalalata. O mea matautia e tutupu e aumaia ai i tatou ia latalata atu i lo tatou Tamā, o Ieova. Ona tatou olioli ai lea i se faiā e sili ona vavalalata ma ia. E mafai ona tatou valaau atu ia te ia mo le puipuiga e ala i le tatalo ma le faatoga, ma i lea o le a foia ai lo tatou fefe.—Faatusatusa le Sefanaia 3:12.
14. (a) O ā mea faigaluega sa i leoleo mamoe i aso o Tavita, ma na faapefea ona latou faaaogāina? (e) O faapefea ona puipuia e leoleo mamoe Kerisiano le lafu i aso nei?
14 “O lau laau ma lou tootoo e faamafanafanaina ai aʻu.” O le upu Eperu she’vet, ua faaliliuina i le upu “laau” e mafai ona faauiga i ai le laau a se leoleo mamoe. E mafai ona faaaogā uma le laau ma le tootoo mo le puipuiga ma e fai ma sui pe faaalia ai foi le pule. E mautinoa lava o nei mea faigaluega o le a aogā tele e sasaina ai na manu saua e pei o luko ma gata. E mafai foi ona faaaogā le laau a le leoleo mamoe e uunaʻia ai mamoe ina ia ui i le auala saʻo pe sa oo foi ina faafoi mai ai se mamoe o loo taa latalata i se mea atonu o le a paū ai ma manuʻa ai. Ua saunia e Ieova i aso nei leoleo mamoe faamaoni, o toeaina ia i faapotopotoga o e latou te puipuia le lafu mai na manu matautia faaleagaga e pei o aposetate. Pe atonu o le a mafai ai foi e toeaina ona fautuaina i latou o ē ua lē toe auai i sauniga pe ua liliu ese mai amioga faa-Kerisiano.
O se Faigaai Susua i Totonu o Fili
15. (a) O le ā le suiga uigā o le faataʻitaʻiga i le Salamo 23:5? (e) O ā mea moni ua faaalia ai o loo maoona faaleagaga tagata o Ieova; pe a faaeseese atu ia te ai?
15 “E te laulau mai mea i le laoai ma aʻu i luma o e ita mai ia te au.” (Salamo 23:5) I inei ua i ai se suiga uigā o le faataʻitaʻiga, e mai se leoleo mamoe i se tagata talimalo. I le avea o se talimalo agalelei, ua saunia ai e Ieova le anoanoai o meaʻai faaleagaga e ala i le vasega o le “auauna” faauuina. (Mataio 24:45) E ui lava ina o loo tatou ola i se lalolagi e ita mai, a e o loo tatou maoona lelei lava. Ua faasalalauina Le Olomatamata i le sili atu i le selau gagana ina ia mafai ai ona fafagaina faaleagaga tagata i na nofoaga eseese e pei o Aferika i Saute, Kerinilani, le Atu Motu o Solomona, ma Initia. E lē gata i lea, ua i ai foi i le 55,000 faapotopotoga i le lalolagi aoao ni failauga mo le lautele ua aʻoaʻoina lelei ma ni faiaʻoga ma ni nofoaga matagofie e faia ai sauniga, e aofia ai ma le faitau selau o Maota fou o le Malo. E sili atu i le 3,000,000 suesuega faale-Tusi Paia ua faia i aiga e fesoasoani atu ai i tagata pei ni mamoe. I se faaeseesega, o i latou o i Papelonia le Aai Tele, le emepaea o lotu sese i le lalolagi, o loo fia aai.—Isaia 65:13.
16. (a) I le faaeseese atu i le fafine agasala, o le ā se mea na lē taulau ona faia e se tasi Faresaio mo Iesu? (e) O le ā le ituaiga o suāuu o loo saunia e Ieova mo ana auauna faamaoni i aso nei?
16 “Ua e faauuina loʻu ulu i le suāuu.” I Isaraelu anamua o se tagata talimalo tausaafia na te saunia le suāuu e uu ai ulu o ana malo. O se manatu e faafiafia ai foi, ona o se mea e tasi na tupu, sa avea ai Iesu ma malo a se tasi Faresaio o lē na te leʻi uuina le ao o Iesu i se uu pe saunia foi ni vai e mulumulu ai ona aao. I le taimi lena, na mulumulu ai e se fafine agasala aao o Iesu i ona loimata ma na uuina ai i se suāuu manogi faapitoa. (Luka 7:36-38, 44-46) Peitai o Ieova o se talimalo matuā tausaafia! Ua ia saunia “le uu o le olioli” faaleagaga. (Isaia 61:1-3) Ioe, e mautinoa lava o loo olioli tagata o Ieova i aso nei.
17. (a) O le ā ua faaatagia e le ʻipu ua matuā tumu lelei’? (e) Ua faapefea ona saunia e Ieova se ʻipu ua matuā tumu lelei’ mo ana auauna i aso nei?
17 “Ua taumasuasua laʻu ipu.” O le isi faaliliuga ua faapea: “Ua matuā faatumuina laʻu ipu.” (Moffatt) Ua faaalia ai i lenei mea le tumu faaleagaga. E ui lava ina e lē o le uiga o le soona inu, a e ua fautuaina e nei upu se ipu o uaina lelei. O lenei ava malosi ua i ai vailaau e mafai ona togafitia ai se maʻi, e pei ona faaalia i le fautuaga a Paulo ia Timoteo: “Aua e te toe inu le vai auli, a ia e inu sina uaina itiiti, ona o lou manava ma lou maʻi e tupu soo.” (1 Timoteo 5:23) I se uiga faaleagaga, e faafiafiaina foi e le uaina o tatou loto. (Salamo 104:15) Ua saunia ma le agalelei e lo tatou Tamā alofa o Ieova se faigaai faaleagaga o mea lelei mo ana auauna faamaoni, e aofia ai ma se ʻipu ua matuā faatumuina’ o le olioli.
18. (a) O ai o olioli i le lelei ma le alofa ma le agalelei o Ieova, ma ua faapefea ona faaalia lenei mea i le Salamo 103:17, 18? (e) O le ā le faamoemoe mamalu o loo taatia mai mo i latou e faamaoni ia Ieova?
18 “E moni e mulimuli mai ia te au le agalelei ma le alofa i aso uma o loʻu ola.” (Salamo 23:6) O le agalelei o se vaega lea o fua o le agaga paia o Ieova. (Kalatia 5:22, 23) Ua olioli i latou o savavali i ala o le Atua i lona lelei ma lona alofa agalelei. (Salamo 103:17, 18) Faatasi ai ma le faatuatua malosi ia Ieova, ua mafai ai e ona tagata ona feagai ma so o se tofotofoga latou te fesagaʻi. Ua avea pea i latou ma autū o ana faamanuiaga ma lana tausiga alofa. Ma o le faamaoni seʻi oo i le iuga, o lona uiga o le ola e faavavau i le lalolagi fou. Maeu se faamoemoe ofoofogia!
19. (a) O le ā le uiga o le “nofo foi i le fale o Ieova”? (e) O le ā ua faatuina e le faalapotopotoga a Ieova ina ia siitia ai le tapuaiga moni i aso nei, ma ai se ā ua manatu ai le faitau afe o tagata tuuina atu faapea o se faaeaga le auauna ai i inā? (i) O ai isi o loo maumauai e auauna i le Atua e faavavau?
19 “Ou te nofo foi i le fale o Ieova i aso e tele lava.” I aso o Tavita, sa avea ai le fale fetafai ma malumalu o le Atua, ona sa leʻi fauina le malumalu i lena taimi. Talu ai ona sa i ai i le mafaufau o le faisalamo se uiga mamalu talimalo, ‘o le nofo i le fale o Ieova’ sa uiga i le i ai o se faiā lelei ma le Atua i le avea o Sana malo. (Salamo 15:1-5) I aso nei ua mafai ona iloa lena fale o le malumalu faaleagaga o Ieova, o lana faatulagaga mo le tapuaiga mamā. Sa faaeaina le Tupu o Solomona na te fausiaina le uluai malumalu faaletino, lea sa teuteuina ma le matagofie i le auro ma na fausia ina ia viia ai Ieova. Maeu se faaeaga sili sa i ai i le auauna ai i inā! E ui lava ua lē o toe i ai nei lena malumalu, a e ua i ai se faalapotopotoga paia a le Atua e vivii ia te ia ma siitia le tapuaiga mamā. I le avea o se tasi o auala e faia ai lenei mea, ua faatutuina ai e le faalapotopotoga a Ieova Aiga Peteli i le faitau luasefulu o atunuu. O le uiga o le upu “Peteli” o le “Fale o le Atua,” ma e faitau afe o tagata tuuina atu o loo galulue i nei nofoaga faatiokarate. O nisi o nei tane ma fafine o le auala lenei sa auauna ai mo “aso e tele lava,” sa faaaluina ai le tele o ō latou olaga i le auaunaga i Peteli. O le isi faitau miliona o isi o ē e lē o ni sui o aiga Peteli, ua faapena foi ona maumauai e auauna ia Ieova e faavavau.
20. (a) Ai se ā ua avea ai le Salamo 23 ma vaega mataʻina o le Tusi Paia, ma o le ā ua ia fesoasoani ia i tatou e atiina aʻe? (e) O ā faaeaga o loo faatalitali mai mo auauna faamaoni a Ieova?
20 Ua pei le Salamo 23 o se maa tāua e tele ni ona tafa e feemoemoai i le malamalama. Ua na faamaualugaina le suafa mamalu o lo tatou Tamā alofa, o Ieova, ma ua ia faaalia mai foi le auala ua ia taʻitaʻiina ai, puipuia, ma saunia mea mo ana mamoe. I le avea o se iuga, ua fiafia ona tagata, maoona faaleagaga, ma ua vave faateleina lo latou faitau aofai, e oo lava i atunuu e matuitui ai teteega e oo mai. Ua fesoasaoni foi le Salamo 23 ia i tatou e atiina aʻe se noataga mafana vavalalata ma Lē na Foafoaina i tatou. Ma pe a tatou vaavaai atu i le lagi vavaloloa, e pei ona sa masani ai ona faia e Tavita a o leoleo lana lafu, ua tatou faafetai ai ona o le manatu mai ia i tatou o Lē na Foafoaina lenei vateatea matautia i le avea o se Leoleo Mamoe alofa. Ma le alofa lava ua ia ofoina mai ai ia i tatou le ola e faavavau i le lalolagi fou pe a tumau pea lo tatou faamaoni ia te ia. Maeu la se ofoofogia o le a i ai i le feiloai atu i na auauna faamaoni toe faatutuina a le Atua e pei o Tavita! Ma maeu se faaeaga o ē auauna ia Ieova, le Leoloe Mamoe Silisili e faavavau!
O le a Faapefea ona E Tali?
◻ Ua faapefea ona faamaonia Ieova o lo tatou Leoleo Mamoe alofa?
◻ O le ā le auala o loo taʻitaʻiina ai i tatou e le Atua ‘i ala o le amiotonu’?
◻ E faapefea ona puipuia e Ieova ana mamoe?
◻ I le ā le itu ua laulauina ai e le Atua se laoai mo i tatou i totonu o ō tatou fili?