Ia Matuā Fiafia i le Afioga a le Atua

AMUIA le tagata e “naunau [matuā fiafia] o ia i le tulafono a Ieova.” O se tagata faapena e na te faitauina le Afioga a le Atua “i le ao atoa ma le po.” (Sala. 1:1, 2) Po ua oo iā te oe lenā ituaiga o fiafia? E faapefea ona e faateleina le olioli lea e aumai e le Afioga a le Atua iā te oe?

Ia Faalogo a o Fetalai Mai Ieova

Aua le tau lava ina faitau o upu. Faaata i lou mafaufau le mea na tupu o loo e faitauina. Manatunatu i leo o i latou o loo taʻua mai. A o e faitauina uluaʻi mataupu o le Tusi Paia, ia e faalogo atu a o auauaʻi ona faaalia mai e Ieova lava ia mea ua faia i le lalolagi ina ia talafeagai mo le ola ai o le tagata. Faalogo a o ia fetalai atu i lona Alo, le Matai Tufuga, e faapea ua oo i le taimi e ao ona faia ai uluaʻi tagata. Faaata i lou mafaufau le vaaiga lenei: Ua fouvale Atamu ma Eva, ua tuu atu e le Atua le faasalaga iā i laʻua ma mulimuli ane, ua ia tuliesea i laʻua mai le Parataiso. (Kenese, mata. 1-3) Taumafai ia e lagonaina se faalogona o le maofa ma le faagaeetia ina ua e faitau atu e faapea, o se leo mai le lagi ua faailoaina mai Iesu Keriso o ia o le Alo o le Atua, o lē ua alofagia, o lē na auina mai e le Atua e foaʻi atu lona soifua mo le fanau a tagata. (Mata. 3:16, 17) Taumafai e tomanatu i le tali atu a le aposetolo o Ioane ina ua ia faalogo atu o faalauiloa mai e Ieova: “Faauta, ou te faia ia fou mea uma lava.” (Faaa. 21:5) E mautinoa lava le avea o se mea e matuā fiafia ai pe a faitauina le Afioga a le Atua i le auala lenei!

Ia faaauau ona e faitauina le faamaumauga faagaeeina, ona oo ai lea ina e iloa Ieova o sē e malualii, ma e ofo ma mataʻu ai. O le a e lagonaina ai le matuā tosina atu iā te Ia, o lē e alofa mai iā i tatou, e feutagaʻi mai ma le alofa iā i tatou, e fesoasoani iā i tatou pe a tatou faaauau ona taumafai ma le lotomaulalo e faia lona finagalo, ma faaalia mai iā i tatou le auala e taulau manuia ai mea uma tatou te faia.—Iosua 1:8; Sala. 8:1; Isa. 41:10.

O le tele lava o taimi e te faaalu i le faitauina o le Tusi Paia, o le tele foʻi lenā o le a iai lou lotomalie a o faateleina lou iloa o le finagalo o le Atua mo oe. Peitaʻi e sili atu lou matuā fiafia o le a iai na i lo lenā. Pe a oo ina e mauaina e ala i lau faitau le ituaiga fesoasoani e te manaʻomia ina ia taulimaina ai ma le atamai faafitauli, o le a iā te oe faalogona e pei ona sa iai i le faisalamo o lē na faapea mai: “O mea e ofo ai au tulafono [ʻfaamanatu mai’] o le mea lea e anaana i ai loʻu loto.” (Sala. 119:129) E mafai foʻi ona e maua le fiafia a o e mātauina mai le Tusi Paia, mataupu silisili ia o le a fesoasoani e faatulagaina ou manatunatuga ma ou faanaunauga i ala faaleatua.—Isa. 55:8, 9.

Ua saunia e le Tusi Paia taʻiala tau amio lea e puipuia ai i tatou mai mea e faaleagaina ai ma faailoa mai iā i tatou le ala saʻo. A o tatou faitauina le Tusi Paia, tatou te mātauina ai e faapea o Ieova o le Tamā e na te silafia po o ā faafitauli e iʻu i ai pe a tatou lolo atu i tuʻinanauga o le tino lē lelei atoatoa. E lē finagalo Ieova tatou te mafatia i iʻuga mataʻutia na o le a lē maʻalofia le oo mai, ona o lo tatou lē amanaʻiaina o ana tapulaa maualuluga tau amio. E manatu mamafa mai iā i tatou ma e finagalo o ia ina ia tatou mauaina le ituaiga o olaga e sili ona lelei. O lo tatou faitauina o lana Afioga o le a fesoasoani ai iā i tatou ina ia matuā talisapaia atoatoa e faapea, maʻeu se faamanuiaga o le avea o ia ma o tatou Atua ma Tamā faalelagi.

Ia Faitau le Tusi Paia i Aso Taʻitasi

Na faapea mai le faisalamo e faatatau i le tagata o lē na te faitauina le Afioga a le Atua i aso taʻitasi: “E manuia foi mea uma na te faia.” (Sala. 1:3) Ioe, e ui lava i o tatou tulaga lē lelei atoatoa, e ui lava i lo tatou ola ai i le faiga amioleaga o mea a Satani, ma e ui lava i taumafaiga a le Tiapolo e faaleagaina i tatou, ae o le faitauina e lē aunoa ma le faatatauina o mea o fai mai ai le Afioga a le Atua, o le a mafai ai ona tatou taulau i mea uma e aafia ai la tatou faiā ma Ieova.

Talu ai o loo omia i tatou mai lenei faiga tuai o mea, o lo tatou aveina la i fale o manatu o Lē na Foafoaina Mea e tusa lava pe i ni taimi pupuu tāua i aso taʻitasi, e mafai ona aumaia ai le malosi iā i tatou. O nisi o ē na faafalepuipuiina ona o lo latou faatuatua sa na o ni fuaiupu taʻitasitasi o le Tusi Paia na mafai ona latou mauaina sa sii mai i ni mataupu i nusipepa. Sa latou ʻoti ese nei mau, tauloto, ma manatunatu loloto i ai. Sa faamanuia e Ieova a latou taumafaiga auā sa latou faia le mea sa mafai ona fai e tusa ai ma o latou tulaga, i le aveina i fale o le poto mai le Afioga a le Atua. (Mata. 5:3) Peitaʻi, o le toʻatele o i tatou e telē le saʻolotoga o loo iai. E lē tatau la ona tatou manatu faapea o le faitauina faavavevave o se fuaiupu o le Tusi Paia e faatasi i le aso, o le a faavavega ai ona tatou maua ni aogā. Peitaʻi, o le a tatou maua faamanuiaga pe a tatou fetuutuunaʻi i mea o loo ave i ai la tatou faamuamua, ina ia faitauina se vaega o le Tusi Paia i aso taʻitasi, ia manatunatu i ai, ma faatatauina i o tatou olaga.

O le mea moni lava ia, e mafai ona faalavelaveina a tatou fuafuaga e sili ona lelei. A tupu mai lenā mea, e tatou te ave le faamuamua i mea e sili ona tāua. Mo se faaaʻoaʻoga, o le a lē o sa tatou masani le fai ma le loto iai o le lē inuina o se vai mo se aso se tasi pe lua foʻi. Po o le ā lava la se mea e tulaʻi mai i o tatou olaga i aso taʻitasi, e ao ona tatou faaaluina se taimi e faafouina ai i tatou i vai o le upu moni.—Galu. 17:11.

Ia Faitau Atoa le Afioga a le Atua

Po ua e faitauina ea le Tusi Paia atoa? O nisi e faigatā iā i latou le manatu o le mafai lea ona faitau mai i le Kenese e oo i le Faaaliga. O le mea lea, o le toʻatele o ē na mananaʻo e faitau le Tusi Paia atoa, sa amata e ala i le faitauina muamua o Tusitusiga Kerisiano Eleni. Aiseā? Atonu ona sa latou iloa e sili atu ona faigofie lo latou faatatauina o na tusi o le Tusi Paia iā i latou o ni tagata taʻitoʻatasi, o loo taumafai e savavali i tulagāaao o Keriso. Ia pe atonu foʻi ona o Tusitusiga Kerisiano Eleni e foliga mai e lē tele naʻuā se mea e faitau—e na o le sili laʻitiiti aʻe lava i le tasi vaefā o le Tusi Paia. Peitaʻi ina ua uma ona latou faitauina na tusi e 27, ona latou liliu atu loa lea i tusi e 39 o Tusitusiga Eperu ma amata ona faitau ma fiafia i ai. E oo ane i le taimi ua māeʻa ai le faitauina o Tusitusiga Eperu, ua uma ona latou faatulagaina se faiga o le faitauina e lē aunoa o le Tusi Paia, ona latou faaauau ai lava lea o le faitauina faalua o Tusitusiga Kerisiano Eleni, ma ua lē mafai ona toe taofia. Talosia ia faapena foʻi ona avea le faitauina o le Afioga a le Atua ma au masaniga i le olaga atoa.

Pe o iai se isi o lou aiga po o lau faapotopotoga e lē mafai ona faitau? Aiseā e te lē ofo atu ai e faitau atu e lē aunoa le Tusi Paia i lenā tagata? O le a aogā iā te oe, ma o le a aogā foʻi iā te ia a o ia manatunatu loloto i mea o loo ia faalogo iai ma faatatauina i lona soifuaga.—Faaa. 1:3.

A o faagasolo taimi, e te ono manaʻo ai e fai ni gaoioiga faapitoa e fesootaʻi atu i lou faitauina o le Tusi Paia. O nisi o nei gaoioiga o le a faateleina ai lou talisapaia o le fesootaʻiga i le va o vaega eseese o le Tusi Paia. Afai e iai ni manatu faaopoopo i le ogatotonu o itulau o lau Tusi Paia, e ono tataʻi oe e nei manatu faaopoopo i mea na tutupu i le talafaasolopito ma mea e fesootaʻi atu i ai. E ono fesoasoani iā te oe ina ia e mātauina mea na tutupu na ala ai ona tusia le tele o salamo atoa ai ma tusi sa tusia e aposetolo o Iesu Keriso. Ua saunia mai e le Insight on the Scriptures le anoanoaʻi o faamatalaga i talaaga o tagata, o nofoaga, atoa ma uiga o loo taʻua i le Tusi Paia. O siata o loo tataʻi atu ai manatu i le faataunuuga o valoaga o le Tusi Paia, o loo faaalia ai po o ai tupu ma perofeta e tutusa vaitaimi na ola ai, ma iloa ai aso e foliga mai sa tutupu ai le tele o mea o loo taʻua i le Tusi Paia.

A o e mafaufau loloto i mea o loo e aʻoaʻoina, o le a e malamalama ai i māfuaaga na tutupu ai nisi o tulaga i tagata o le Atua. O le a e silafia ai foʻi le māfuaaga na feutagaʻi ai Ieova ma ona tagata e pei ona sa ia faia. O le a e silafia ai le auala e fuatia ai e Ieova gaoioiga a malo, o tagata, ma tagata taʻitoʻatasi. O le a avatu e lenei mea iā te oe se malamalamaga tele e faatatau i ona manatu.

O le a faasolo ina sili ona e fiafia i le talafaasolopito o le Tusi Paia pe a e faaataina i lou mafaufau le vaipanoa na tutupu ai na mea. O faafanua o nuu o le Tusi Paia ua faaalia ai le oganuu ma le mamao i le va o nofoaga. Mo se faaaʻoaʻoga, atonu o gafea tonu lava na laasia ai e le fanauga a Isaraelu le Sami Ulaula? O le ā le telē o le Nuu o le Folafolaga? O le ā le mamao na savali ai Iesu a o faataunuuina lana faiva i le lalolagi? O ā ni vaaiga na vaai i ai Paulo i ana malaga faamisionare? O faafanua atoa ma faamatalaga o foliga o nofoaga e maua ai faamatalaga, o le a mafai ai ona olaola lau faitau. O fea e te maua i ai faafanua o nuu o loo taʻua i le Tusi Paia? O loo maua nisi i le New World Translation of the Holy Scriptures. O loo aofia ai faafanua e tusa ma le 70 i tusi o le Insight, ma o loo iai le faasino mataupu o faafanua i le faaiʻuga o le tusi muamua. Faaaogā le Watch Tower Publications Index ina ia maua ai isi faafanua. Afai e lē o maua tusi e pei ona taʻua, ia faaaogā faafanua o loo lomia i Le Olomatamata e fesoasoani iā te oe i lau faitau Tusi Paia.

I Tusitusiga Eperu, sa faaneeneeina ai e le tupu o Tavita Ieova, i le faapea mai: “Le Atua e, ua matuā sili ou manatunatu . . . , ua sili lava ona tele o lo latou faitau aofai.” (Sala. 139:17) I Tusitusiga Kerisiano Eleni, na vivii ai le aposetolo o Paulo iā Ieova ona ua Ia “faapupula mai . . . i o matou loto, ina ia malamalama e iloa ai le mamalu o le Atua i fofoga o Iesu Keriso”! (2 Kori. 4:6) E faitau senituri na va ai le taimi na soifua ai Tavita mai le taimi o Paulo; peitaʻi, sa la matuā fiafia uma i le Afioga a le Atua. E mafai foʻi ona e faia faapea pe a e faaalu le taimi e faitau ai mea uma ua tuu mai e Ieova e ala mai i itulau o lana Afioga faagaeeina.