Afio atu Iesu i Ierusalema o se tupu, a o tiʻetiʻe i se asini

Pe e Faamaonia i Valoaga e Faatatau i le Mesia, o Iesu o le Mesia?

Tali a le Tusi Paia

Ioe. A o iai Iesu i le lalolagi, na ia faataunuuina le tele o valoaga e faatatau i le “Mesia le Taʻitaʻi,” o lē o le a fai ma “Faaola o le lalolagi.” (Tanielu 9:25; 1 Ioane 4:14) Ina ua mavae foʻi lona maliu, na faaauau pea ona ia faataunuuina valoaga e faatatau i le Mesia.—Salamo 110:1; Galuega 2:34-36.

O le ā le uiga o le “Mesia?”

O le upu Eperu Ma·shiʹach (Mesia) ma le upu Eleni Khri·stos (Keriso) e uiga atu i “Lē ua Faauuina.” O lona uiga, e faasino atu “Iesu Keriso” iā “Iesu o Lē ua Faauuina” po o “Iesu le Mesia.”

I taimi o le Tusi Paia, e masani ona faauuina se tasi e ala i le liligiina o le suāuu i lona ulu, pe a filifilia mo se tulaga pule. (Levitiko 8:12; 1 Samuelu 16:13) Na filifilia e le Atua Iesu e avea ma Mesia, o se tulaga pule maualuga. (Galuega 2:36) Peitaʻi, e leʻi faauuina Iesu e ala i le liligiina ai o se suāuu, ae na faauuina e le Atua e ala i le agaga paia.—Mataio 3:16.

Pe e mafai ona faataunuuina e ni tagata se toʻatele valoaga e faatatau i le Mesia?

E leai. E pei lava ona faamaonia e se tulagālima se tagata se toʻatasi, e na o le toʻatasi foʻi le Mesia po o le Keriso e mafai ona faataunuuina valoaga a le Tusi Paia. Peitaʻi, ua lapataʻi mai le Tusi Paia e faatatau i ‘⁠Keriso pepelo ma perofeta pepelo, latou te faia faailoga tetele ma mea ofoofogia ina ia faasesē ai, e oo lava i ē ua filifilia pe afai e mafai.’—Mataio 24:24.

Po o le a aliaʻe mai le Mesia i le lumanaʻi?

E leai. Na valoia mai i le Tusi Paia o le a tupuga mai le Mesia iā Tavita, le tupu o Isaraelu. (Salamo 89:3, 4) Peitaʻi, ua lē o toe iai faamaumauga o gafa o Iutaia lea e aofia ai ma Tavita. Atonu na faatamaʻia ina ua faatoʻilaloina e Roma Ierusalema i le 70 T.A.a Talu mai lenā taimi, na lē mafai ona faamaonia e se tasi pe e tupuga mai o ia i le aiga tautupu o Tavita. E ui na iai pea na faamaumauga i taimi o Iesu, ae e leai ma se tasi o ona fili na mafai ona faamaonia e leʻi tupuga mai o ia i le gafa o Tavita.—Mataio 22:41-46.

E fia valoaga o loo i le Tusi Paia e faatatau i le Mesia?

E lē mafai ona tatou faitauina se numera patino o valoaga e faatatau i le Mesia. Mo se faataʻitaʻiga, e eseese auala e faitau ai e tagata le aofaʻiga o valoaga e oo lava i valoaga faatatau atu i le Mesia. O loo taʻua i le Isaia 53:2-7 le tele o vala faavaloaga e iloa ai le Mesia. E ono manatu nisi i lenei mau o se valoaga se tasi, ae e manatu foʻi nisi o ni valoaga eseese.

Nisi o valoaga e faatatau i le Mesia na faataunuuina e Iesu

Valoaga	Mau	Faataunuuga
Fanau a Aperaamo	Kenese 22:17, 18	Mataio 1:1
Tupuga mai iā Isaako le atalii o Aperaamo	Kenese 17:19	Mataio 1:2
Fanau mai le ituaiga o Iuta i Isaraelu	Kenese 49:10	Mataio 1:1, 3
Tupuga mai le gafa tautupu o Tavita	Isaia 9:7	Mataio 1:1
Fanau mai i se taupou	Isaia 7:14	Mataio 1:18, 22, 23
Fanau i Peteleema	Mika 5:2	Mataio 2:1, 5, 6
E taʻua o ia o Emanuelub	Isaia 7:14	Mataio 1:21-23
E lē taualoa	Isaia 53:2	Luka 2:7
E fasiotia pepe pe a mavae lona fanau mai	Ieremia 31:15	Mataio 2:16-18
E valaauina o ia mai Aikupito	Hosea 11:1	Mataio 2:13-15
E taʻua o ia o le Nasaretac	Isaia 11:1	Mataio 2:23
Na muamua atu iā te ia se avefeʻau	Malaki 3:1	Mataio 11:7-10
Faauuina o se Mesia i le 29 T.A.d	Tanielu 9:25	Mataio 3:13-17
Faamautinoa mai e le Atua, o ia o Lona Alo	Salamo 2:7	Galuega 13:33, 34
Maelega mo le fale o le Atua	Salamo 69:9	Ioane 2:13-17
Faalauiloa atu le tala lelei	Isaia 61:1	Luka 4:16-21
Aumaia se malamalama tele e ala i le talaʻiga i Kalilaia	Isaia 9:1, 2	Mataio 4:13-16
Faia vavega e pei o Mose	Teuteronome 18:15	Galuega 2:22
I le pei o Mose, na ia faailoa mai manatu o le Atua	Teuteronome 18:18, 19	Ioane 12:49
Faamālōlōina le tele o maʻi	Isaia 53:4	Mataio 8:16, 17
E leʻi faauaʻi atu tagata iā te ia	Isaia 42:2	Mataio 12:17, 19
Faaalia le alofa mutimutivale iā i latou na mafatia	Isaia 42:3	Mataio 12:9-20; Mareko 6:34
Faaātagia mai le faamasinotonu o le Atua	Isaia 42:1, 4	Mataio 12:17-20
O se Faufautua Lelei	Isaia 9:6, 7	Ioane 6:68
Faalauiloa atu le suafa o Ieova	Salamo 22:22	Ioane 17:6
Aʻoaʻo atu e ala i talafaatusa	Salamo 78:2	Mataio 13:34, 35
O se Taʻitaʻi	Tanielu 9:25	Mataio 23:10
E lē talitonu le toʻatele o tagata iā te ia	Isaia 53:1	Ioane 12:37, 38
Maa tulimanu sili	Isaia 8:14, 15	Mataio 21:42-44
Teena e tagata	Salamo 118:22, 23	Galuega 4:10, 11
E inosia fua o ia	Salamo 69:4	Ioane 15:24, 25
Afio atu i Ierusalema o se tupu a o tiʻetiʻe i se asini	Sakaria 9:9	Mataio 21:4-9
Viiviia e tamaiti	Salamo 8:2	Mataio 21:15, 16
Afio mai i le suafa o Ieova	Salamo 118:26	Ioane 12:12, 13
Faalataina e se uō vavalalata	Salamo 41:9	Ioane 13:18
Faalataina i tupe siliva e 30e	Sakaria 11:12, 13	Mataio 26:14-16; 27:3-10
Na tuua o ia e ana uō	Sakaria 13:7	Mataio 26:31, 56
Na tuuaʻia sesē o ia e molimau pepelo	Salamo 35:11	Mataio 26:59-61
E leʻi tali atu o ia i tuuaʻiga	Isaia 53:7	Mataio 27:12-14
Na latou tuufeanu iā te ia	Isaia 50:6	Mataio 26:67; 27:27, 30
Na latou tā i lona ao	Mika 5:1	Mareko 15:19
Na sasaina o ia	Isaia 50:6	Ioane 19:1
E leʻi tali atu i ē na sasaina o ia	Isaia 50:6	Ioane 18:22, 23
Na aufaatasi taʻitaʻi o malo e tetee atu iā te ia	Salamo 2:2	Luka 23:10-12
Na tutuʻi ona lima ma ona vae i se laau e faapuapuagatia ai	Salamo 22:16	Mataio 27:35; Ioane 20:25
Na latou faia se vili i lona ofu	Salamo 22:18	Ioane 19:23, 24
Faitauina faatasi ma tagata solitulafono	Isaia 53:12	Mataio 27:38
Inosia ma faileagaina	Salamo 22:7, 8	Mataio 27:39-43
Puapuagatia mo tagata agasala	Isaia 53:5, 6	1 Peteru 2:23-25
Na pei ua tuulafoaʻiina e le Atua	Salamo 22:1	Mareko 15:34
Na faainuina i le vineta ma le uaina ua fefiloi ma laau oona	Salamo 69:21	Mataio 27:34
Na ia lagona le fia inu a o leʻi maliu	Salamo 22:15	Ioane 19:28, 29
Tuuina atu lona agaga i le Atua	Salamo 31:5	Luka 23:46
Na ia foaʻi atu lona ola	Isaia 53:12	Mareko 15:37
Saunia le togiola e aveesea ai le agasala	Isaia 53:12	Mataio 20:28
E leʻi gauia ona ivi	Salamo 34:20	Ioane 19:31-33, 36
Tutuʻi i le tao	Sakaria 12:10	Ioane 19:33-35, 37
Tanu faatasi ma tagata mauʻoa	Isaia 53:9	Mataio 27:57-60
Toetū mai le oti	Salamo 16:10	Galuega 2:29-31
Na suitulaga se tasi i lē na faalataina o ia	Salamo 109:8	Galuega 1:15-20
Nofo i le itu taumatau o le Atua	Salamo 110:1	Galuega 2:34-36

a Ua taʻua i le Cyclopedia a McClintock ma Strong: “E mautinoa na faaleagaina faamaumauga o ituaiga ma aiga Iutaia, ina ua faaumatia Ierusalema [i le 70 T.A.], ae lē o se tausaga i luma atu.”

b O le igoa Eperu Emanuelu lea e uiga atu “Ua iā i Tatou le Atua,” ua faamatalaina ai le matafaioi a Iesu o se Mesia. O lona afio mai i le lalolagi ma ana galuega, ua faamaonia ai o loo faatasi le Atua ma Ona tagata.—Luka 2:27-32; 7:12-16.

c O le upu “Nasareta” e sau mai le upu Eperu neʹtser, o lona uiga o le “tātupu.”

d Mo nisi faamatalaga i le faasologa o taimi o mea na tutupu o loo i le Tusi Paia, e iloa ai na taunuu mai le Mesia i le tausaga 29 T.A., tagaʻi i le mataupu “Na Valoia e Tanielu le Oo Mai o le Mesia.”

e O lenei valoaga o loo i le tusi o Sakaria, ae ua faapea mai le tusitala o le Tusi Paia o Mataio, o “upu a le perofeta o Ieremia.” (Mataio 27:9) E foliga mai e iai le taimi na avea ai le tusi o Ieremia ma tusi muamua o le vaega o “Valoaga” i Tusitusiga Paia. (Luka 24:44) Ina ua taʻua la e Mataio “Ieremia,” atonu na ia faasino atu i lenā vaega atoa o tusi, e aofia ai ma le tusi o Sakaria.