Le Faavae Mautu i Aso Nei o le Faamoemoe o le a Faaleleia Tulaga

O SE tusitala o talafaasolopito ma o sē tasi foi e iai sona poto faapitoa i mataupu faaletagata e suafa ia H. G. Wells, na soifua mai i le 1866, sa ia faapogaia se aafiaga malosi i mafaufauga o tagata o le 20 senituri. E ala i ana tusitusiga, sa ia faaalia ai lona talitonuga e faapea o le taimi o le meleniuma o le a taunuu faatasi ma le alualu i luma o le faasaienisi. O le pogai lea, na taʻua ai e le Collier’s Encyclopedia le “anoanoai o faamoemoega o le a faaleleia tulaga” sa ia Wells a o ia galue malosi e faaauiluma ona manatu. Ae o loo matauina foi e faapea o lona faamoemoe o le a faaleleia tulaga na faaleagaina ina ua gāpā le Taua Muamua a le Lalolagi.

Ina ua oo ina iloa e Wells e faapea o le “faasaienisi e mafai ona galue mo le lelei po o le leaga foi, na aveesea ai loa lona talitonuga sa iai, ma amata loa ona ia mafaufau o le a lē toe faaleleia tulaga,” e pei ona taʻua ai e le Chambers’s Biographical Dictionary. Aisea na tupu ai lenei mea?

O le faatuatua sa ia Wells atoa ma lona faamoemoe o le a faaleleia tulaga sa faavae aʻe i na o mea lava na mafai e tagata ona faataulauina. Ina ua ia iloa e lē mafai e le tagata ona faataunuuina le mea sa ia manatu i ai, sa aunoa loa ma se isi mea na mafai ona ia toe liliu i ai. O le lē mautonu na vave lava ona mafaufau ai o le a lē toe faaleleia tulaga.

E toatele tagata i aso nei ua oo i ai mea faapena ona o le mafuaaga lava e tasi. E faaosofia i latou i faamoemoega o le a faaleleia tulaga a o laiti ae a matutua loa ua taaina i mafaufauga o le a lē toe faaleleia tulaga. Ua iai foi tagata talavou ua fiu i le olaga e masani ai ae liliu atu i le matuā faaaogaseseina o fualaau faasaina, faiga tuufau faaleituaiga, ma isi lava olaga e faaleagaina ai. O le ā ea le tali? Iloilo faataitaiga o loo mulimuli mai i le vaitaimi o le Tusi Paia ma vaai po o le ā le faavae o loo iai mo se faamoemoe o le a faaleleia tulaga—i le taimi ua teʻa, le taimi nei, ma le lumanai.

Sa Tauia le Faamoemoe o Aperaamo o le a Faaleleia Tulaga

I le tausaga e 1943 T.L.M., na alu ese ai Aperaamo mai Harana, ma sopoia le Vaitafe o le Eufirate, ma alu atu i le nuu o Kanana. Ua faamatalaina Aperaamo o “le tamā o e faatuatua uma lava,” ma maeu se faataitaiga lelei na ia faia!—Roma 4:11.

Sa malaga faatasi Aperaamo ma Lota, o le atalii o le uso o Aperaamo ua maliu, atoa ma le aiga o Lota. Mulimuli ane, ina ua oo le oge i le nuu, ona agaʻi atu loa lea o aiga e lua i Aikupito, ma ina ua oo i se taimi talafeagai sa toe foi mai faatasi. O le taimi lea ua matuā tamaoaiga lava Lota ma Aperaamo, ua iai a la lafu manu e tele. Ina ua femisai a la tagata leoleo manu, sa taulamua Aperaamo i lona faapea atu: “Aua lava neʻi femisaʻi i taua, po o a taua leoleo manu; auā o le uso i taua. E le o i ou luma ea le laueleele uma? Seʻi e teʻa ese ma aʻu. Afai e te alu i le itu tauagavale, ona ou alu ai lea i le itu taumatau; a ē alu i le itu taumatau, ona ou alu ai lea i le itu tauagavale.”—Kenese 13:8, 9.

A fua atu o Aperaamo e matua, sa ia ono faatulagaina mea mo lona lelei, ma ona e ao ona faaaloalo Lota i le uso o lona tamā, e ao foi ona lolo atu i le mea e filifili i ai Aperaamo. Nai lo lena, “Ua vaavaai Lota, ona ilo atu ai lea e ia i le fanua laugatasi uma ua i ai Ioritana, ua lafulemu uma lava, e oo i Soara, e pei o le faatoaga a Ieova, e pei o le laueleele o Aikupito, a o lei faaumatia e Ieova o Sotoma ma Komoro. Ona filifilia lea e Lota mona o le fanua laugatasi uma ua i ai Ioritana.” I lena filifiliga, sa ia Lota mafuaaga uma e faamoemoe ai o le a faaleleia tulaga. Ae faapefea Aperaamo?—Kenese 13:10, 11.

Pe sa vale ea le faatatau a Aperaamo, ma tuu ai le lelei o lona aiga i se tulaga lamatia? E leai. O le faamoemoe sa ia Aperaamo o le a faaleleia tulaga, atoa ma le agaga foai sa matuā tele sona taui. Na fetalai atu Ieova ia Aperaamo: “Seʻi e vaavaai ia, ma ilo atu i le mea e te i ai na, i le itu i matu, ma le itu i toga, ma sasae, ma sisifo; auā o le laueleele uma ua e ilo atu nei, ou te foaiina atu mo oe ma lau fanau e faavavau.”—Kenese 13:14, 15.

Sa mautu le faavae mo le faamoemoe o Aperaamo o le a faaleleia tulaga. Sa faavae i luga o le folafolaga a le Atua e faapea o le a ia faia se nuu tele e auala mai ia Aperaamo ina ia ‘manuia aiga uma lava o le lalolagi ia [Aperaamo].’ (Kenese 12:2-4) Ua ia i tatou foi mafuaaga e faamoemoe ai o le a faaleleia tulaga, i le iloa o loo “galue le Atua i mea uma lava mo le lelei faatasi ma i latou o e ua alolofa atu ia te ia.”—Roma 8:28.

Tagata Sipai e Toalua sa Faamoemoe o le a Faaleleia Tulaga

E sili atu i le 400 tausaga mulimuli ane, ua toe lava ina ulu atu le nuu o Isaraelu i Kanana, “le nuu e tafe ai le suāsusu ma le meli.” (Esoto 3:8; Teuteronome 6:3) Sa faatonu atu Mose i taʻitaʻi e 12 ‘ina ia latou asiasi le nuu ma latou au mai ai se tala ia i tatou i se ala tatou te o ae ai, ma aai foi latou te o mai ai.’ (Teuteronome 1:22; Numera 13:2) Na aufaatasi sipai e 12 i lo latou faamatalaina o le tamaoaiga o le nuu, peitai o le toasefulu o i latou na aumaia le lipoti lē mautinoa lea na faapogaia ai le fefe i loto o tagata.—Numera 13:31-33.

Ae i le isi itu, na avatu e Iosua ma Kalepo i tagata, se feau mautinoa ma fai mea uma la te mafaia e aveesea ai lo latou fefefe. O o la uiga ma le lipoti sa atagia mai ai lo la matuā talitonuina o loo ia Ieova le tomai e faataunuu ai lana afioga e toe faafoi mai i latou i le Nuu o le Folafolaga—peitai sa lei taulau taumafaiga. Nai lo lena, “ua fai ane le faapotopotoga uma e fetogi ia te i laua i maa.”—Numera 13:30; 14:6-10.

Sa uunaia e Mose tagata e faalagolago ia Ieova, ae na latou mumusu e faalogo. Ona sa latou tautū i o latou mafaufau o le a lē toe faaleleia tulaga, na iu ina taase le nuu i le vao i tausaga e 40. E faatatau i sipai e 12, e na o Iosua ma Kalepo na maua taui o le faamoemoe o le a faaleleia tulaga. O le ā le faafitauli autū sa iai? Lē lava le faatuatua, ona sa faalagolago ifo i lo latou lava poto.—Numera 14:26-30; Eperu 3:7-12.

O le Faatalatū o Iona

Sa soifua Iona i le iva senituri T.L.M. Ua faailoa mai e le Tusi Paia sa avea o ia ma perofeta faamaoni a Ieova i le malo o ituaiga e sefulu o Isaraelu, mo se vaitaimi a o faagasolo le nofoaiga a Ierepoamo II. Peitai na musu e talia le tofiga e alu i Nineva e avatu le lapataiga i tagata. Fai mai le tusitala o talafaasolopito o Josephus a ‘ua manatu Iona e sola i se isi mea’ ua alu ifo foi o ia i Iopa. O iina na maua ai lana vaa ma malaga ai i Tasesa, atonu o lea ua taʻua i ona po nei o Sepania. (Iona 1:1-3) O loo faamatala mai e le Iona 4:2 le pogai na oo ai ia Iona lena vaaiga o le a lē toe faaleleia tulaga i lona tofiga.

Mulimuli ane na ioe Iona o le a faataunuu lona tofiga, ae na ia matuā ita lava ina ua salamō tagata Nineva. O lea na aʻoaʻo atu ai e Ieova ia te ia se lesona manaia lava o le alofa faapalepale e ala lea i lona faamagoina o le laau o le kikaiona lea sa faamalumalu ai Iona. (Iona 4:1-8) O faalogona faanoanoa la o Iona ina ua pē le laau sa sili ona lelei pe ana taulai atu i le 120,000 tagata Nineva o ē ‘latou te lei iloa le mea saʻo ma le mea sese.’—Iona 4:11.

O le ā tatou te aʻoaʻoina mai le mea na tupu ia Iona? O le auaunaga paia e leai se avanoa mo se mafaufau o le a lē toe faaleleia tulaga. Pe a tatou amanaia le taitaiga a Ieova ma mulimuli ai ma le faatuatua atoa, o le a tatou olioli i le taulau manuia.—Faataoto 3:5, 6.

Le Faamoemoe o le a Faaleleia Tulaga e Ui i Faafitauli

Na faapea mai le tupu o Tavita: “Aua e te faameo ona o e amio leaga; aua foi e te losilosi ona o e fai mea leaga.” (Salamo 37:1) E mautinoa le atamai o lena fautuaga, auā o loo siomia i tatou i aso nei i faiga lē tonu ma faiga piopio.—Failauga 8:11.

E tusa foi pe tatou te lē faameo i ē amioletonu, ae e faigofie lava ona iai lagona lē fiafia pe a tatou vaai atu i tagata lē sala ua mafatia ona o tagata amioleaga ia po o lo tatou feagai foi ma faaiuga lē saʻo. O ituaiga mea tutupu nei e faapogaia ai lo tatou ati ae o le loto vaivai po o le mafaufau o le a lē toe faaleleia tulaga. O le ā tatou te fai, pe a faapena o tatou faalogona? Muamua, e ao ona tatou teu i manatu e faapea e sese le manatu o ē amioleaga e faapea e lē tāitai ona a latou tauia amioleaga. Ua faamautinoa mai ia i tatou i le Salamo 37 fuaiupu e 2 e faapea: “Auā e le pine ona seleeseina i latou [tagata amio leaga] e pei o le mutia; e mamae i latou e pei o le vao muʻa lauolaola.”

E faaopoopo atu i lena, e mafai pea ona tatou faaauau ona fai le mea lelei, tumau i le faamoemoe o le a faaleleia tulaga, ma faatalitali ia Ieova. “Ia e ʻalo ese i mea leaga, ma e faia mea lelei; e te mau ai e faavavau,” ua faaauau mai ai le faisalamo. “Auā e fiafia Ieova i le faamasinoga, na te le tuua foi ona tagata amio Atua.”—Salamo 37:27, 28.

E Manumalo le Faamoemoe Moni o le a Faaleleia Tulaga!

O le a faapeī la, le tulaga o le a iai lo tatou lumanai? Ua taʻu mai ia i tatou e le tusi o Faaaliga e faatatau i “mea e tusa ona vave oo mai.” O se tasi o ia mea, o lē o tietie i se solofanua mūmū, lea o loo faaāta mai ai taua, ua faapea mai, “na te aveesea le filemu i le lalolagi.”—Faaaliga 1:1; 6:4.

O le manatu taatele—ma le faamoemoe o le a faaleleia tulaga—sa ia Peretania i le taimi o le Taua Muamua a le Lalolagi e faapea o le toe taua iloga lea a le lalolagi. I le 1916, sa saʻo le vaaiga a le tagata faitofā mai Peretania e suafa ia David Lloyd George. Na ia faapea mai: “O le taua lenei [Taua Muamua a le Lalolagi], e pei o le isi taua o le a sosoo ai, o le taua e faauma ai taua.” (O upu faasisipa o a matou.) Sa saʻo lana faamatalaga. I le Taua Lona Lua a le Lalolagi sa na ona faaauilumaina ai isi faiga sauā e faaumatia ai le toatele. I le sili atu i le 50 tausaga mulimuli ane ai, e lei aliali mai lava se iuga i taua.

I le tusi lava lea o Faaaliga, tatou te faitau ai i isi tagata tietie solofanua—o loo faaāta mai ai oge, faamaʻi, ma le oti. (Faaaliga 6:5-8) O isi ia vaega o le faailoga o le vaitaimi.—Mataio 24:3-8.

Pe e faapogaia ea e nei mea se faamoemoega o le a o le a lē toe faaleleia tulaga? E matuā leai lava, auā o loo faamatala mai foi i le faaaliga “le solofanua sinasina, ua i ai le aufana i lē o tietie ai; ua avatu foi ia te ia le palealii; ona alu atu lea o ia, o loo manumalo, o le a manumalo pea ia.” (Faaaliga 6:2) O loo tatou iloa atu iinei Iesu o ia o se Tupu faalelagi a o ia aveesea amioleaga uma, ma tietie atu e faatumauina le filemu i le lalo-lagi uma.a

I le avea o sē ua uma ona tofia e fai ma Tupu i le lumanai, na aʻoaʻoina ai e Iesu ona soo a o iai i le lalolagi e tatalo mo lena Malo. E lē taumatea ua uma foi ona e aʻoaʻo e fai le “Lo matou Tamā e,” po o le Tatalo a le Alii. I lenei tatalo o loo tatou tatalo ai mo le Malo o le Atua ia oo mai, mo lona finagalo ina ia faataunuuina iinei i le lalolagi e pei ona faia i le lagi.—Mataio 6:9-13.

Nai lo le taumafai e fonofono le faiga o mea o loo iai nei, o le a gaoioi Ieova e ala i lana Tupu Faa-Mesia, o Iesu Keriso, e matuā aveesea atoatoa. O le mea o le a sui aʻi, ua fetalai mai Ieova: “Ou te faia le lagi fou ma le lalolagi fou; e le toe manatua mea na muamua, e le alu ae foi i le loto.” I lalo o le pulega a le Malo faalelagi, o le a filemu le lalolagi, ma avea ma aiga fiafia mo le fanau a tagata, lea o le a avea ai galuega ma le olaga o se olioli faifai pea. Ua fetalai mai Ieova: “Ia outou olioli ma fiafia e faavavau i le mea ou te faia; . . . e uma lava i e ua filifilia e aʻu o mea na faia e o latou lima.” (Isaia 65:17-22) Afai e faavae lou faamoemoe mo le lumanai i lena folafolaga lē masese, o le a ia te oe mafuaaga uma e faamoemoe ai o le a faaleleia tulaga—nei ma le faavavau!

[Faaopoopoga i lalo]

[Ata i le itulau 4]

H. G. Wells

[Ē Ana le Ata]

Corbis-Bettmann