Le Alofa Mutimutivale o Ieova ua Laveaiina ai i Tatou Mai le Loto Mafatia

“Le Atua e, ia e alofa mai ia te au, e tusa ma lou lava alofa; e tusa ma le tele o lou alofa mutimutivale, ia e sōloiesea oʻu solitulafono.”—SALAMO 51:1.

1, 2. E mafai faapefea i se tasi o auauna a Ieova ona aafia i se agasala matuiā?

O TULAFONO a Ieova, e lē mafai ona solia e aunoa ma le faasalaina. Ma maeu le manino o lena mea, pe a tatou faia se agasala matuiā i le Atua! E ui lava sa tatou auauna faamaoni ia Ieova mo le tele o tausaga, ae a solia lana tulafono e mafai ona faapogaia ai lo tatou matuā popolevale po o le oo ai ina matuā loto mafatia. Atonu e oo ai ia i tatou se lagona faapea ua tuulafoaia i tatou e Ieova ma ua lē toe aogā ai la tatou auauna atu ia te ia. Atonu ua pei a tatou agasala o se ao mafiafia ua punitia ai le malamalama o le finagalo malie o le Atua.

² O le tulaga lena na oo i ai le Tupu o Tavita o Isaraelu anamua. Na faapefea ona tupu o lenei tulaga?

O Laasaga Sese e Mafai ona Taʻitaʻia atu i le Agasala Matuiā

3, 4. O le ā na tupu i le Tupu o Tavita i le vaitaimi o le tamaoaiga?

³ Sa alofa Tavita i le Atua, ae o lona faia o ni laasaga sese na taʻitaʻiina atu ai o ia i le faia o ni agasala matuiā. (Faatusatusa i le Kalatia 6:1.) E mafai ona tupu lenei mea i so o se tagata lē lelei atoatoa, ae maise lava pe afai e ia te ia le pule i luga o isi. I le avea o se tupu tamaoaiga, sa olioli ai Tavita i le taʻutaʻua ma le pule. O ai e lavātia ona tū atu e luʻia lana pule? Sa ia te ia tagata atamamai ma e nonofo sauni pea ma loto malilie i latou e auauna ia te ia, ma sa latou naunau e faia mea na ia fai atu ai ia i latou e faia. Peitai, sa sese Tavita ona o le faateleina o ana avā ma i le faitauina o tagata o le nuu.—Teuteronome 17:14-20; 1 Nofoaiga a Tupu 21:1.

⁴ I lena vaitaimi o le tamaoaiga i mea faitino, na faia ai e Tavita ni agasala matuiā i le Atua ma tagata. Ioe, o le faia o le tasi agasala sa taʻitaʻiina atu ai i le faia o le isi agasala e pei o ni filo o se ʻie ua lalaga faatasi, na fuafuaina e Satani! A o tau uso Isaraelu ma sa Amonī, ae sa matamata mai i lona fogafalealuga Tavita i le avā aulelei a Uria, o Patesepa, o loo taele. A o iai Uria i le taua, na aumaia ai e le tupu le fafine o Patesepa i lona maota ma faia ai le mulilua ma ia. Seʻi manatu i le faateʻia o Tavita ina ua ia iloa mulimuli ane ua tō le fafine! Ona aami lea e Tavita ia Uria, ma le faamoemoe ina ia momoe Uria ma Patesepa i le po ma manatu ai Uria o ia lava le tamā o le tamaitiiti. E ui lava sa faaonā o ia e Tavita, ae sa teena e Uria ina ia momoe faatasi ma Patesepa. Ua mafatia nei le loto o Tavita, ona ia aauina atu ai lea o faatonuga faalilolilo i le taʻitaʻiʻau o Ioapo ina ia tuu Uria i le muaau o le taua e mautinoa ai o i inā o le a fasiotia ai o ia. Na fasiotia Uria i le taua, sa faia e lana avā le tū masani e faaalia ai lona faanoanoa, ma sa faaipoipo atu Tavita ia te ia a o leʻi oo ina iloa e tagata ua tō o ia.—2 Samuelu 11:1-27.

5. O le ā na tupu ina ua uma ona agasala Tavita ma Patesepa, ma o le ā le iʻuga na oo ia te ia ona o lana agasala?

⁵ Na faaalia e le Atua le agasala a Tavita e ala i le perofeta o Natano ina ua ia fetalai atu: “O le a aʻu faatupu le leaga ia te oe ai lou lava aiga.” Ma le tusa ai, na oti lava le tama na fanau mai ia Patesepa. (2 Samuelu 12:1-23) O le atalii ulumatua a Tavita o Amanono, na ia toso i lona ʻafa tuafafine o Tamara, ma na fasiotia o ia e le tuagane o Tamara. (2 Samuelu 13:1-33) Sa taumafai Apisaloma le atalii o le tupu e fāoa le nofoalii, ma faamaasiasi i lona tamā ina ua ia alu atu ma fai feusuaiga faaleituaiga ma palake a Tavita. (2 Samuelu 15:1–16:22) Na iʻu le taua a le nuu ina ua oti Apisaloma, ma sa sili ai ona tagituʻi Tavita. (2 Samuelu 18:1-33) Ae peitai, na faamaulalo Tavita ona o ana agasala, ma na ia iloa ai le manaomia ona ia faalatalata atu i lona Atua alofa mutimutivale. Afai tatou te faia se mea sese, seʻi o tatou faaalia le salamō ma le loto maulalo ma ia matuā faalatalata atu ia Ieova.—Faatusatusa i le Iakopo 4:8.

6. Aiseā na nofosala ai le Tupu o Tavita?

⁶ Sa lagona e Tavita lona nofosala ae maise lava ona o ia o le tupu o Isaraelu sa ia silafia lelei lava le Tulafono a Ieova. (Teuteronome 17:18-20) Sa leʻi pei o ia o se farao o Aikupito po o se tupu o Papelonia, faapea sa leai se poto faapena ia te ia, ma atonu sa masani ona ia faia mea sa lē fiafia i ai le Atua. (Faatusatusa i le Efeso 2:12; 4:18.) Ona o se tagata o le nuu na tuutoina atu ia Ieova, sa iloa lelei ai e Tavita faapea o le mulilua ma le fasioti tagata o ni agasala matuiā. (Esoto 20:13, 14) Ua iloa lelei foi e Kerisiano le tulafono a le Atua. Ae peitai, i le pei o Tavita, ua solia ai e nisi o i latou le tulafono, ona o le agasala tuufaasolo, vaivaiga faaletagata, faapea ma tofotofoga lē mateteea. Afai e tupu lena mea i se tasi o i tatou, e lē tatau la ona tatou tumau ai i se tulaga faapouliuligia e pei o lena e punitia ai la tatou vaaiga faaleagaga ma lilofia ai i tatou i le matuā loto mafatia.

O le Taʻutino o Agasala e Aumaia ai le Mapusaga

7, 8. (a) O le ā na tupu ia Tavita ina ua taumafai e natia ana agasala? (e) Aiseā e ao ai ona taʻutino atu e se tasi lana agasala ma ia lē toe faia?

⁷ Afai e nofosala ona o le solia mamafa o le tulafono a le Atua, atonu ua faigata ai ia i tatou ona taʻutino a tatou agasala, e oo lava i le taʻu atu ia Ieova. O le ā e mafai ona tupu i na tulaga? I le Salamo 32, na ioe ai Tavita: “[Ina] ua ou faalologo [na i lo o le taʻutino o agasala] ona palagia ai lea o oʻu ivi i loʻu faataio i le aso atoa; auā sa mamafa lou aao [o le aao o Ieova] i luga ia te au i le ao atoa foi ma le po; ua liua lava loʻu malosi i le vevela o le tausaga vevela.” (Fuaiupu 3, 4) I le taumafai e nanā lana agasala ma faatoʻafilemuina ai se loto fuatiaifo ua agasala, na matuā mafatia ai le loto lē mautonu o Tavita. O le loto mafatia na faaitiitia ai lona malosi, o lea na pei ai o ia o se laau ua taia e se matagi vale, ma ua mate na i lo o le faasūsūina ma ola ai. O le mea moni, atonu sa ia tofo i ni āuga na faamaʻia ai lona mafaufau ma lona tino. I lea, sa mou ese ai lona olioli. Afai e maua so o se tasi o i tatou i se tulaga faapena, o le ā e ao ona tatou faia?

⁸ O le faaali po o le taʻutino atu i le Atua o a tatou agasala, e mafai ona maua ai le faamagaloga ma le mapusaga. “Ona ou faailoa atu ai lea ia te oe o laʻu agasala, na ou le ufitia foi laʻu amioletonu,” na pese ai Tavita. “Sa ou faapea, Ou te faaali atu ia Ieova oʻu solitulafono; ona e aveesea ai lea o le leaga o laʻu agasala.” (Salamo 32:5) Po o mafatia lou loto ona o se agasala o natia? Pe e lē sili ea ona lelei lou faaali atu ma lafoaia ina ia maua le faamagaloga a le Atua? Aiseā e lē valaau ai i toeaina o le faapotopotoga ma saili se faamalōlōga faaleagaga? (Faataoto 28:13; Iakopo 5:13-20) O le a faaalia lava lou agaga salamō, ma i le faagasologa o taimi o le a mafai ai ona toe faafoisia lou olioli faa-Kerisiano. “Amuia [“e fiafia,” NW] le tagata ua faamagaloina lona solitulafono, ma ua ufitia lana agasala,” na fai mai ai Tavita. “Amuia [“e fiafia,” NW] le tagata e le taʻusalaina e Ieova, e leai foi se ʻoleʻolega i lona loto.”—Salamo 32:1, 2.

9. O anafea na fatu ai le Salamo 51, ma aiseā?

⁹ Sa nofo aitalafu Tavita ma Patesepa ia Ieova le Atua mo la laua mea sese na fai. E ui lava sa ono fasiotia ai i laua ona o a la agasala, ae sa ia i laua le alofa mutimutivale o le Atua. Sa faapitoa lava lona alofa mutimutivale ia Tavita ona o le feagaiga o le Malo. (2 Samuelu 7:11-16) O le faaalia e Tavita o le salamō ona o ana agasala ma Patesepa, o loo vaaia i le Salamo 51. O lenei salamo faapaʻi malū sa fatuina e le tupu ua salamō ina ua uma ona faamatalaloto ia te ia le perofeta o Natano i le matuā telē o lona solia o le tulafono a le Atua. Sa manaomia e Natano le lototele e faailoa atu ai ia Tavita ana agasala, e faapena foi i toeaina Kerisiano tofia ona lototetele ina ia mafai ai ona faia faapena i aso nei. Na i lo o le faafitia o le moliaga ma faatonuina ina ia faaoo le sala ia Natano, sa taʻutino atu e le tupu lana agasala ma lona loto maulalo. (2 Samuelu 12:1-14) Ua faaalia i le Salamo e 51 lana tala na fai atu i le Atua i le tatalo e tusa ai ma ana gaoioiga lē faamaoni, ma o se mea aogā foi le mafaufau loloto i ai faatasi ma le tatalo, ae maise lava pe a tatou faia ni sese ma moomoo mo le alofa mutimutivale o Ieova.

O loo Tatou Nofo Aitalafu i le Atua

10. E mafai faapefea ona toe maua e Tavita le malosi faaleagaga?

¹⁰ E leʻi saili Tavita ina ia faagalo lana agasala ae na ia aioi atu: “Le Atua e, ia e alofa mai ia te au, e tusa ma lou lava alofa; e tusa ma le tele o lou alofa mutimutivale, ia e sōloiesea oʻu solitulafono.” (Salamo 51:1) Ona ua solitulafono, na sopo tapulaa ai Tavita i tuaoi o le Tulafono a le Atua. Peitai, sa iai le faamoemoe mo lona toe malosi faaleagaga, pe afai e faaalia e le Atua ia te ia le alofa e tusa ai ma Lona alofa mutimutivale, po o le alofa faamaoni. Ona o le anoanoai o faaaliga o le alofa mutimutivale o le Atua i aso ua mavae, na avatua ai i le tupu ua salamō se faavae e faatuatua ai faapea, o le a sōloiesea e Lē na Faia o ia ana solitulafono.

11. O le ā le uiga o le faia o taulaga i le Aso o taulaga mo le Togisala, ma o le ā o manaomia mo le faaolataga i aso nei?

¹¹ E ala i le ata faavaloaga o taulaga i le Aso o le Togisala, na muai faaalia ai e Ieova faapea, e iai sana auala e faamamā ai i latou ua salamō mai a latou agasala. Ua tatou iloa nei ua mafai foi ona faasalafa mai ia i tatou lana faamagaloga ma lona alofa mutimutivale, e faavae i lo tatou faatuatua i le taulaga togiola a Iesu Keriso. Afai sa na o lenei faafaatusa ma le ata o le taulaga togiola sa i le mafaufau o Tavita, o lē sa mafai ona faatuatua i le alofa tunoa ma le alofa mutimutivale o Ieova, maeu la le tele e ao ai i auauna a le Atua i aso nei ona faaalia le faatuatua i le togiola na saunia mo lo latou faaolataga!—Roma 5:8; Eperu 10:1.

12. O le ā le uiga o le agasala, ma o le ā le lagona o Tavita e uiga i lana mea sese na fai?

¹² I le aioi atu i le Atua, na faaopoopo mai ai Tavita: “Ia e matuā fufulu mai ia te au i laʻu amio leaga, ma ia e faamamā mai ia te au i laʻu agasala. Auā ua ou iloa e aʻu loʻu solitulafono; e le aunoa foi ona i ai i oʻu luma o laʻu agasala.” (Salamo 51:2, 3) O le agasala, o le lē taulau lea ona ausia le faailoga e tusa ai ma tapulaa a Ieova. E mautinoa o le mea lena na faia e Tavita. Peitai, sa lē pei o ia o se fasioti tagata po o se tagata mulilua o lē sa lē manatu mamafa e uiga i lana agasala, i le na o le loto mafatia ona o lona faasalaga po o le ono maua i se faamaʻi. I le avea o sē alofa ia Ieova, sa inoino ai Tavita i le leaga. (Salamo 97:10) Sa tigā o ia ona o lana agasala ma manao ai e matuā faamamāina o ia e le Atua. Sa iloa lelei e Tavita ana solitulafono, ma sa matuā faanoanoa lava o ia ina ua ia faatagaina ona faanaunauga agasala e pulea o ia. Sa i ona luma pea lana agasala, auā o le loto fuatiaifo ua taʻusalaina o se tagata mataʻu i le Atua, e lē mafai lava ona toʻafilemu seʻi vagana ua salamō, ua taʻutino atu, ma maua foi le faamagaloga mai ia Ieova.

13. Aiseā na mafai ai ona fai atu Tavita faapea, ua agasala o ia i le na o le Atua lava?

¹³ I le faaalia o lona nofo aitalafu ia Ieova, na faapea atu ai Tavita: “Ua ou agasala atu ia te oe, na o oe lava; ua ou faia foi lenei mea leaga i ou luma; e tonu ai oe i lau fetalaiga, e sao foi oe pe a e faamasino.” (Salamo 51:4) Na solia e Tavita tulafono a le Atua, na faalēmamaluina ai le tulaga tautupu, ma “faatupu mai le ʻinoʻino [“e mautinoa ua lē faaaloalo,” NW] o e ita ia Ieova i lenei mea,” ua faalumaina ai o Ia. (2 Samuelu 12:14; Esoto 20:13, 14, 17) O gaoioiga agasala a Tavita sa faalumaina ai foi le nuu o Isaraelu ma tagata o lona aiga, e pei ona faapogaia e se tagata papatiso fai mea sese i aso nei le faanoanoa po o le loto mafatia i le faapotopotoga Kerisiano ma ē pele. E ui lava sa iloa e le tupu ua salamō faapea ua ia agasala i uso a tagata e pei o Uria, ae sa ia silafia se avega tauave e sili atu ona maualuga e faia ia Ieova. (Faatusatusa i le Kenese 39:7-9.) Sa faailoa mai e Tavita e faapea, e amiotonu le faamasinoga a Ieova. (Roma 3:4) O Kerisiano foi o ē ua agasala e manaomia foi ona iai lena manatu.

Mafuaaga o Vaivaiga

14. O ā ni mafuaaga o vaivaiga na taʻua e Tavita?

¹⁴ E ui lava sa leʻi taumafai Tavita ina ia taʻuamiotonuina o ia lava, ae na ia faapea atu: “Faauta, na fanaua aʻu ma le amio leaga [“agasala,” NW] na ou i ai foi i le manava [“na afuafua aʻu,” NW] o loʻu tinā ma le agasala.” (Salamo 51:5) Na fanaua Tavita ma le agasala, ma sa tiga lona tinā ina ua fanauina mai o ia ona o le agasala tuufaasolo. (Kenese 3:16; Roma 5:12) E lē o le uiga o ana upu faapea, o se faiā saʻo faalefaaipoipoga, le afuafuaina o se pepe, ma le fanau mai, o se agasala, ona sa saunia e le Atua le faaipoipoga ma le fanautama; sa leʻi faasino atu foi e Tavita i se agasala patino a lona tinā. Ae sa afuafuaina o ia ma le agasala auā o ona mātua sa agasala e pei o tagata lē lelei atoatoa uma lava.—Iopu 14:4.

15. E ui lava atonu e mafaufau le Atua i mafuaaga o vaivaiga, o le ā e ao ona tatou lē faia?

¹⁵ Afai ua tatou agasala, e mafai ona tatou taʻua i le tatalo i le Atua so o se mafuaaga o vaivaiga atonu na saosaolaumea i lo tatou faia o le agasala. Ae aua lava neʻi o tatou faaaogā sese le alofa tunoa o le Atua e fai ma faamolemolega mo le faia o amioga lē taupulea pe faaaogā le tulaga agasala tuufaasolo e fai ma pupuni tatou te lalafi ai mai tuuaʻiga o agasala o loo tatou faia. (Iuta 3, 4) Sa talia e Tavita le iʻuga ona o lona faatagaina o mafaufauga lē mamā ma le lolo atu ai i faaosoosoga. Seʻi o tatou tatalo ina ia aua neʻi tuuina atu i tatou i tofotofoga, ma i lea, seʻi o tatou gaoioi e ōgatasi ma lena tatalo.—Mataio 6:13.

Ole atu mo le Faamamāina

16. O le ā le uiga e fiafia i ai le Atua, ma e ao faapefea ona aafia ai a tatou amio i lena mea?

¹⁶ O tagata, atonu e foliga mai o ni tagata lelei e tuutoina i le Atua, peitai e ati lana silafaga, ma silafia ai o latou manatunatuga uma i totonu. Na faapea mai Tavita: “Faauta, ua e finagalo i le faamaoni o le loto; ma e faailoa mai ia te aʻu le poto i le mea lilo.” (Salamo 51:6) Sa agasala Tavita i le pepelo ma le faaʻoleʻole i le fuafuaina o le oti o Uria i se auala faatogafiti ma le taumafai e natia le maʻitō o Patesepa. Ae peitai, sa ia iloa e fiafia le Atua i le faamaoni ma le paia. E ao i lenei mea ona aafia ai a tatou amio i se auala lelei, auā o le a taʻusalaina i tatou e Ieova pe afai tatou te faaʻoleʻole. (Faataoto 3:32) Sa iloa lelei foi e Tavita faapea afai e ‘faailoa mai e le Atua ia te ia le atamai e atoatoa ona mamā,’ ona o se tupu ua salamō, o le a mafai ai ona ia faafetaui atu o ia lava e tusa ma tapulaa mai le Atua i aso o totoe o lona ola.

17. O le ā le uiga o le tatalo ina ia faamamāina i le isopo?

¹⁷ Ona sa iloa e le faisalamo lona manaomia o le fesoasoani mai le Atua ina ia manumalo i faanaunauga agasala, sa ia aioi atili atu ai: “Ia e faamamā ia te au i le isopo, ona mamā ai lea o aʻu; ia e fufulu mai ia te au, ona sinasina ai lea o aʻu e sili i lo le kiona.” (Salamo 51:7) Faatasi ai ma isi mea, o le laau o le isopo (atonu po o le marjoram, po o le Origanum maru) sa faaaogā i le sauniga e faamamā ai tagata o ē na pisia i le lepela. (Levitiko 14:2-7) O lea sa alagatatau ai ona tatalo Tavita ina ia faamamāina mai le agasala i le isopo. O le manatu i le faamamāina e fesootai foi ma le talosaga atu ia Ieova ina ia fufulu o ia ina ia matuā mamā atoatoa, ia faasinasinaina e pei o le kiona e leʻi palapalā i lefulefu po o isi otaota. (Isaia 1:18) Afai ua pagatia se tasi o i tatou i le taimi nei i le tiga o le loto fuatiaifo ona o le faia o se mea sese, seʻi o tatou faatuatua faapea, afai tatou te sailia ma le salamō le faamagaloga a le Atua, e mafai ona ia faamamāina ma fufulu mamā i tatou e faavae i le taulaga togiola a Iesu.

Ole atu mo le Toe Faafoisiaina

18. O le ā le tulaga o Tavita a o leʻi salamō o ia ma faaali lana agasala, ma e mafai faapefea ona fesoasoani le iloa o lena mea i aso nei?

¹⁸ So o se Kerisiano e mafatia ona o se loto fuatiaifo ua taʻusalaina, e mafai ona ia malamalama i upu a Tavita: “Ia ou faalogo mai ia te oe [Ieova] i le olioli ma le fiafia; ina ia fiafia ivi ua e faamomomoina.” (Salamo 51:8) A o leʻi salamō Tavita ma taʻutino atu ana agasala, o le faalavelavea o lona loto fuatiaifo ua tiga, sa oo ai ia te ia ni faalogona leaga. Na te leʻi maua foi le fiafia i pese o viiga ma le olioli na fofogaina e tagata pepese lelei ma tagata tomai i le fai musika. Sa matuā tiga Tavita ona o le lē faamaonia o ia e le Atua, o lea na pei ai o ia o se tagata ua tiga ona ua nutimomomoina ona ivi. Sa ia naunau mo le faamagaloga, ina ia toe malosi faaleagaga, ma ia toe faafoisia i le olioli na ia muai tofo i ai. O se tagata fai mea sese i aso nei ua salamō, na te manaomia foi le faamagaloga mai ia Ieova ina ia toe maua ai le olioli na ia tofo i ai muamua ae na te leʻi faia se mea na lamatia ai le la faiā ma le Atua. O le toe faafoisia o le “olioli mai le Agaga Paia” i se tagata ua salamō ua faaalia ai faapea ua faamagaloina o ia e Ieova ma alofa ia te ia. (1 Tesalonia 1:6) Maeu se faamafanafanaga ua aumaia e lena mea!

19. O le ā le lagona o le a oo ia Tavita pe afai e sōloiesea e le Atua ana agasala uma?

¹⁹ Sa tatalo atili Tavita e faapea: “Ia ʻalo ou fofoga i aʻu agasala, ma ia e sōloi ese aʻu amio leaga uma.” (Salamo 51:9) E lē mafai ona faatalitalia Ieova e fiafia i le agasala ma faamaonia. I lea, sa ia talosaga atu ia te ia ina ia ʻalo ona fofoga mai agasala a Tavita. Sa talosaga atu foi le tupu faapea, ia sōloiesea e le Atua ana amio leaga uma, ma ia ufitia ana amioletonu uma. Pe afai o le a faia e Ieova lena mea! O le a faagaeetia ai le agaga o Tavita, e aveesea le avega mamafa o se loto fuatiaifo ua lē toʻafilemu, ma faailoa atu i le tupu ua salamō faapea ua faamagaloina o ia e lona Atua alofa.

Ae Faapefea pe Afai ua E Agasala?

20. O le ā ua fautuaina mo so o se Kerisiano o lē na agasala matuiā?

²⁰ Ua faaalia i le Salamo 51 faapea so o se auauna tuuina atu a Ieova ua faia se agasala matuiā a ua salamō, e mafai ona latou talosaga atu ma le mautinoa ia te ia ina ia faaalia lona alofa ia te i latou ma ia faamamā ia i latou i a latou agasala. Afai o oe o se Kerisiano ua agasala i lena auala, aiseā e lē saili ai le faamagaloga a lo tatou Tamā faalelagi i le tatalo atu i ai ma le loto maulalo? Ia faailoa atu lou manaoga mo le fesoasoani a le Atua ina ia mafai ai ona e tū atu i ona luma ma le faamaonia, ma ia talosaga atu ina ia toe faafoisia e ia lou uluai olioli. O Kerisiano ua salamō e mafai ona ō atu ma le mautinoa i a Ieova i le tatalo ma talosaga atu i ai faapena, auā “na te matuā faamagaloina.” (Isaia 55:7; Salamo 103:10-14) Ioe, e ao ona valaau atu i toeaina o le faapotopotoga ina ia mafai ona latou tuuina atu se fesoasoani manaomia faaleagaga.—Iakopo 5:13-15.

21. O le ā o le a tatou suesueina e sosoo ai?

²¹ O le alofa mutimutivale o Ieova ua laveaiina ai ona tagata mai le loto mafatia. Ae seʻi o tatou iloiloina isi faatoga mai le loto a Tavita ua salamō i le Salamo 51. O le a faaalia i la tatou suesuega faapea e lē inoino Ieova i le loto ua nutimomoia.

E Faapefea ona E Tali?

◻ O le ā le āuga e mafai ona aafia ai se auauna a Ieova ua agasala matuiā?

◻ Na faapefea ona aafia Tavita ina ua ia taumafai e natia lana agasala?

◻ Aiseā na fai mai ai Tavita faapea ua agasala o ia e na o i le Atua lava?

◻ E ui lava atonu e mafaufau le Atua i mafuaaga o vaivaiga pe a tatou agasala ae o le ā e lē tatau ona tatou faia?

◻ O le ā e ao i se Kerisiano ona fai pe afai ua ia faia se agasala matuiā?