E Faapefea Ona E Maua Aogā Atoatoa Mai i le Tusi Paia?

Pe na iai se taimi sa e faatalatū ai e amata se galuega telē ona e te manatu e faigatā? Atonu na e vaevaeina i ni vaega ma fai auauaʻi, ina ia faafaigofie ai. E faapena foʻi le faitauina o le Tusi Paia. E te ono fesili ifo, ʻE faapefea ona ou amata se faitauga Tusi Paia?’ I lenei lesona, o le a tatou iloiloina ai ni auala faigofie e mafai ona e faia, ina ia e fiafia ai i le faitauina ma le suʻesuʻeina o le Tusi Paia.

1. Aiseā e tatau ai ona tatou faitau e lē aunoa le Tusi Paia?

O le tagata e faitau e lē aunoa i le Tusi Paia po o “le tulafono a Ieova,” e lē gata o le a fiafia ae o le a taulau manuia foʻi mea uma e na te faia. (Faitau le Salamo 1:​1-3.) Ina ia amata ona faitau le Tusi Paia, taumafai e faitau mo ni nai minute i aso taʻitasi. O le tele e te faamasani ai i le Afioga a le Atua, o le tele foʻi lenā o lou fiafia i lau faitauga Tusi Paia.

2. O le ā e fesoasoani iā te oe ina ia maua aogā mai le faitauina o le Tusi Paia?

Ina ia maua le tele o aogā mai le faitauina o le Tusi Paia, e manaʻomia ona faitau ma mālōlō, ae mafaufau i mea na tatou faitauina. E tatau ona tatou faitau ma “manatunatu loloto” i ai. (Iosua 1:8, fpl) A o e faitau, ia fesili ifo iā te oe: ʻO le ā se mea ua faailoa mai e lenei mau iā te aʻu e faatatau iā Ieova le Atua? E faapefea ona faatatau lenei manatu i loʻu olaga? E faapefea ona ou faaaogāina nei mau e fesoasoani ai i isi?’

3. E faapefea ona e faatulaga se taimi e faitau ai le Tusi Paia?

Pe e faigatā ona e faaavanoa se taimi e faitau ai le Tusi Paia? O le toʻatele o i tatou e faigatā ona faia faapea. Ia taumafai e “faaaogā tatau le taimi.” (Efeso 5:​16) E mafai ona e faia lenei mea e ala i le faatulaga o se taimi patino e faitau ai le Tusi Paia i aso taʻitasi. O nisi e latou te faitau le Tusi Paia i le taeao. O nisi e filifili se isi taimi o le aso, e pei o taimi o mālōlōga o galuega po o aʻoga. E filifili foʻi nisi e faitau i le pō a o leʻi moe. O le ā se taimi lelei mo oe?

SAʻILIʻILI ATILI

4. Ia e fiafia i lau faitauga Tusi Paia

Atonu e lē faigofie ona amata se faitauga Tusi Paia. Peitaʻi, e mafai ona tatou “naunau” e faia faapea, e pei o le naunau o se tasi e tofo i se meaʻai e leʻi ʻai muamua lava i ai. Faitau le 1 Peteru 2:​2, ona talanoa lea i le fesili lenei:

• Pe e te manatu o le faitauina o le Tusi Paia i aso taʻitasi, o le a avea ai o se mea e te fiafia e fai ma e naunau i ai?

Faaali le VITIŌ e faatatau i le auala na amata ai ona fiafia nisi e faitau le Tusi Paia, ona talanoa lea i fesili nei:

VITIŌ: Atiaʻe e Talavou le Fiafia i le Afioga a le Atua (5:​33)

• I le vitiō, o ā luʻi na manumalo mai ai talavou?

• O ā mea na fesoasoani iā i latou e tausisi ai pea i lo latou sini o le faitauina o le Tusi Paia i aso taʻitasi?

• Na faapefea ona latou atiaʻe le fiafia i a latou faitauga Tusi Paia?

Fesoasoani mo le amataina o lau faitauga Tusi Paia:

• Ia filifili se faaliliuga saʻo aʻiaʻi ma faigofie le gagana. Ia faaaogā le Faaliliuga a le Lalolagi Fou pe afai ua maua i lau gagana.

• Ia amata i le faitauina o mau e sili ona e fiafia i ai. Mo nisi auala, tagaʻi i le siata “Laʻu Faitauga Tusi Paia i Aso Taʻitasi.”

• Ia faailoga vaega ua uma ona e faitauina. Faaaogā le siata “Faamaumauga o Laʻu Faitauga Tusi Paia” o loo i lenei tusi.

• Ia faaaogā le polokalame o le JW Library^®. E mafai ona e faitau ai ma faalogologo i le faitauga Tusi Paia ua uma ona puʻeina, i so o se nofoaga.

• Ia faaaogā le faaopoopoga o loo i le Faaliliuga a le Lalolagi Fou. E aofia ai faafanua, siata, ma uiga o upu, ina ia e fiafia atili ai i lau faitauga Tusi Paia.

5. Ia sauniuni lelei mo lau suʻesuʻega faale-Tusi Paia

Faitau le Salamo 119:​34, ona talanoa lea i le fesili lenei:

• Aiseā e tāua ai le tatalo a o leʻi faitauina le Tusi Paia, pe a o sauniuni mo lau suʻesuʻega faale-Tusi Paia?

E faapefea ona e maua le tele o aogā mai i lau suʻesuʻega? A o e sauniuni mo se lesona o lenei tusi, ia faataʻitaʻi le auala lenei:

1. A. Faitau palakalafa amata o le lesona.

2. E. Suʻe mau ma faitau, ma taumafai e iloa le fesootaʻiga i le palakalafa.

3. I. Faailoga upu po o faaupuga autū lea e tali ai fesili, ina ia fesoasoani iā te oe e iloilo ai le lesona faatasi ma lou faiaʻoga.

E te silafia?

Na faaaogāina e Molimau a Ieova le tele o faaliliuga o le Tusi Paia. Peitaʻi, ua tatou talisapaia le faaliliuga O le Tusi Paia​—O le Faaliliuga a le Lalolagi Fou ona e saʻo aʻiaʻi, faigofie, ma o loo faaaogā ai le suafa o le Atua.​—Tagaʻi i le Mataupu i le jw.org “Pe e Ese se Tusi Paia a Molimau a Ieova?”

AOTELEGA

Ina ia maua le tele o aogā mai le Tusi Paia, ia faatulaga se taimi e faitau ai, tatalo ina ia malamalama i mea o loo e faitauina, ma sauniuni lelei mo lau suʻesuʻega faale-Tusi Paia.

Fesili Autalu

• O le ā e fesoasoani iā te oe ina ia e maua ai le tele o aogā mai le Tusi Paia?

• O le ā se taimi e mafai ona e faatulaga e faitau ma suʻesuʻe ai le Tusi Paia?

• Aiseā e aogā ai le sauniuni lelei a o leʻi faia lau suʻesuʻega faale-Tusi Paia?

MANATU FAAOPOOPO

Iloilo nisi manatu e fesoasoani iā te oe ina ia maua ai aogā mai lau faitauga Tusi Paia.

“Faitauga Tusi Paia​—Auala e Maua ai Aogā” (Le Olomatamata Nu. 1 2017)

Iloilo auala e tolu e faitau ai le Tusi Paia.

“E Faapefea Ona Fesoasoani le Tusi Paia iā te Aʻu?​—Vaega 1: Suʻesuʻe Lau Tusi Paia” (Mataupu i le jw.org)

Iloilo le auala e maua ai le fiafia i le faitauga Tusi Paia.

“E Faapefea Ona Fesoasoani le Tusi Paia iā te Aʻu?​—Vaega 2: Ia Maua le Fiafia i le Faitauina o le Tusi Paia” (Mataupu i le jw.org)

Ia aʻoaʻo ni fautuaga aogā mai iā i latou ua tele tausaga o faitauina le Tusi Paia.

Suʻesuʻega a le Tagata Lava Ia (2:​06)

4. Ia fesootaʻi pea ma lau Uō sili

E fesoasoani le tatalo ma le suʻesuʻe o le Tusi Paia ina ia avea ai oe ma uō a Ieova. E faapefea ona e vavalalata atu iā te ia pe a faia faapea?

Faitau le Salamo 62:8, ona talanoa lea i le fesili lenei:

• Ina ia faamalosia le lua faauōga ma Ieova, e faapefea ona faaleleia atili le auala e te tatalo ai?

Faitau le Salamo 1:2 ma le faamatalaga pito i lalo, ona talanoa lea i le fesili lenei:

• Ina ia faamalosia le lua faauōga ma Ieova, e faapefea ona faaleleia atili lau faitauga Tusi Paia?

E faapefea ona e maua atoatoa aogā mai i au lava suʻesuʻega? Ina ia iloa nisi o auala e faia ai faapea, faaali le VITIŌ, ona talanoa lea i fesili o loo mulimuli mai.

VITIŌ: Ia Faaleleia Au Lava Suʻesuʻega (5:22)

• O ā ni fautuaga mai le vitiō e te manaʻo e faatatau?

• O ā ni mataupu e te manaʻo e suʻesuʻe?