“O Ieova, o le Atua Alofa Mutimutivale ma le Alofa Fua”

“O Ieova, o Ieova, o le Atua alofa mutimutivale ma le alofa fua, e telegese lona toasa, a e tele le alofa ma le faamaoni.”—ESOTO 34:6.

1. (a) O le ā le faamafanafanaga ua saunia e le Tusi Paia mo i latou o ē ua vaai atu i ē pele ua ō ese mai le tapuaiga mamā? (e) O le ā le silafaga a Ieova i ē ua liliu ese?

“SA TAʻU mai e loʻu afafine ia te au ua lē toe fia avea o ia o se tasi o le faapotopotoga Kerisiano,” o le faamatalaga lena a se tasi tamā Kerisiano. “Na alu aso, o vaiaso, na oo lava i masina, sa ou lagona le matuā tiga o loʻu tino. Na sili atu ona tiga na i lo le oti.” Ioe, o se mafatiaga tele le vaai atu i sē pele ua alu ese mai le ala o le tapuaiga mamā. Po ua tupu ea ia te oe lena mea? Afai ua tupu, o le a faamafanafanaina oe i le iloa o loo tiga faatasi Ieova ma oe. (Esoto 3:7; Isaia 63:9) Ae o le ā lana silafaga i na tagata ua liliu ese? Ua faaalia e le Tusi Paia faapea e valaaulia ma le alofa mutimutivale i latou e Ieova ina ia o latou toe foi mai i lona finagalo malie. Sa ia augani atu i tagata Iutaia fouvale i aso o Malaki: “Foi mai ia ia te au, ona ou foi atu lea ia te outou.”—Malaki 3:7.

2. Ua faaalia faapefea e le Tusi Paia faapea o le alofa mutimutivale o se vaega e patino i uiga totino o Ieova?

² Sa faamatilatila atu le alofa mutimutivale o le Atua ia Mose i luga o le Mauga o Sinai. O iina, na faaali atu ai e Ieova ia lava “o le Atua alofa mutimutivale ma le alofa fua, e telegese lona toasa, a e tele le alofa ma le faamaoni.” (Esoto 34:6) O lenei folafolaga ua faamamafa ai faapea, o le alofa mutimutivale o se vaega e patino i uiga totino o Ieova. O lona “finagalo . . . ia oo uma lava i le salamo,” o le tusi mai lea a le aposetolo Kerisiano o Peteru. (2 Peteru 3:9) O le mea moni, e lē faapea e leai ni tapulaa o le alofa mutimutivale o le Atua. “E le faasaoina lava e ia o e agasala,” o le mea lea na taʻu atu ia Mose. (Esoto 34:7; 2 Peteru 2:9) E ui i lea, “o le Atua, o le alofa lava ia,” ma o le alofa mutimutivale o se tāfa telē lea o lena uiga. (1 Ioane 4:8; Iakopo 3:17) O le a “le faamoemoe pea [Ieova] i lona toasa,” ma e “fiafia o ia i le alofa.”—Mika 7:18, 19.

3. Na faapefea ona eseese le silafaga a Iesu i le alofa mutimutivale, ma manatu o le au tusiupu ma le au Faresaio?

³ O Iesu o le faaataga atoatoa lea o lona Tamā faalelagi. (Ioane 5:19) O faiga alofa mutimutivale sa ia feutagai ai ma tagata fai mea sese e lē faapea ua lē amanaia ai a latou agasala na fai, peitai o se faailoaga o uiga agaalofa lava ia sa ia faaalia atu i ē na mamaʻi faaletino. (Faatusatusa i le Mareko 1:40, 41.) Ioe, sa faaalia e Iesu le alofa mutimutivale i “mea silisili” o le Tulafono a le Atua. (Mataio 23:23) I se faaeseesega, seʻi manatu i le au tusiupu ma le au Faresaio, o o latou manatu faaletulafono i le faamasinotonu sa masani ona lē aofia ai le alofa mutimutivale. Ina ua latou vaaia Iesu o feutagai ma tagata agasala, sa latou faitio faapea: “Ua talia e lenei tagata o e agasala, ua aai faatasi foi o ia ma i latou.” (Luka 15:1, 2) Sa tali atu Iesu i ē na molia o ia e ala i ni talafaatusa se tolu, o tala taitasi uma e faamamafa mai ai le alofa mutimutivale o le Atua.

4. O ā talafaatusa e lua na faamatala e Iesu, ma o le ā le manatu autū o tala taitasi?

⁴ Muamua, na taʻua e Iesu se tagata o lē na ia tuua ana mamoe e 99 ae alu atu e saili i le mamoe e tasi na leiloa. O le ā lona manatu autū? “E faapea foi ona tele o le olioli i le lagi i le tagata agasala e toatasi e salamo, a e itiiti i e amiotonu e toaivagafulu ma le toaiva e le tusa i ai le salamo.” Na sosoo ai ma le taʻua e Iesu o se fafine o lē na saili mo se tupe na leiloa ma olioli ai ina ua toe maua. O le ā lana faatatauga? “Ua faapea le olioli i luma o agelu a le Atua, ona o le tagata agasala e toatasi ua salamo.” Ona faamatala lea e Iesu lana talafaatusa lona tolu e ala i se faataoto.a Ua manatu le toatele o tagata i lena tala faapea o se tala puupuu lea ua silisili lona manaia i so o se isi lava tala na faamatalaina. O se iloiloga o lenei faataoto o le a fesoasoani ia i tatou e talisapaia ai ma faataitai i le alofa mutimutivale o le Atua.—Luka 15:3-10.

Ua Tuua e le Atalii Fouvale le Aiga

5, 6. Na faapefea ona faaalia e le uii i le talafaatusa lona tolu a Iesu le matuā leai o se agaga talisapaia?

⁵ “O le tasi tagata e toalua ona atalii. Ua fai atu le uii i lona tamā, Sena e, ia e au mai ia te au loʻu tofi o le oa; ona vaelua lea e ia o ana mea ia te i laua. Ua mavae nai aso, ona faapotopoto ai lea e le uii mea uma, ua alu malaga i le nuu mamao, ua faataapeape ai ana mea i lea nuu, ua soona ulavale [“ua ola ai i se olaga soonafai,” NW ].”—Luka 15:11-13.b

⁶ Sa faaalia e le uii iinei le matuā leai o se agaga talisapaia. Muamua, na ia tāpā lona tofi, ona ia faataapeape lea “ua ola ai i se olaga soonafai.” O le faaupuga “olaga soonafai” e faaliliuina mai le upu Eleni e uiga i se “olaga lē pulea.” Ua faapea mai se tasi tagata atamai o le upu, “e faaalia ai le matuā lafoai atoatoa o le tulaga lelei tau amio.” Ua avea o se mafuaaga fetaui le masani ona taʻua le uii i le faataoto a Iesu o le atalii faamaumauoa, o se upu e faamatalaina ai se tagata e matuā soonafai ma faataugā mea.

7. O ai i aso nei ua pei o le atalii faamaumauoa, ma aisea ua sailia ai e le toatele o na tagata le fia tutoatasi i “se nuu mamao”?

⁷ Po o iai ea ni tagata i aso nei ua pei o le atalii faamaumauoa? Ioe. E faanoanoa ai ona e iai se vaega itiiti ua latou tuua le “aiga” saogalemu o lo tatou Tamā faalelagi, o Ieova. (1 Timoteo 3:15) O nisi o i latou nei ua manatu faapea ua faasāsā naʻuā le siomaga o le auaiga o le Atua, ua foliga ua sili atu ona avea le vaavaaia mai e Ieova ma faalavelave na i lo le avea o se puipuiga. (Faatusatusa i le Salamo 32:8.) Seʻi manatu i se tamaitai Kerisiano o lē na tausia aʻe i mataupu silisili o le Tusi Paia ae mulimuli ane na aafia i le faaaogaseseina o le ʻava malosi ma fualaau faasaina. I le toe tepa atu i tua i lena vaitaimi leaga o lona olaga, ua ia faapea mai: “Sa ou manao e faamaonia atu e mafai lava ona ou faia se olaga e sili atu ona lelei mo aʻu lava. Sa ou manao e faia le mea na ou manao e fai, ma ou te lei manao e taʻu mai e se tasi se isi mea e ese ai.” I le pei o le atalii faamaumauoa, sa faapena ona sailia e lenei tamaitai talavou le fia tutoatasi. O le tulaga faanoanoa, talu ai le lē faale-Tusi Paia o ana faiga, sa tatau ai ona tuuesea o ia mai le faapotopotoga Kerisiano.—1 Korinito 5:11-13.

8. (a) O le ā le fesoasoani e mafai ona ofoina atu ia i latou o loo faanaunau e fia ola i se olaga e feteenai ma tapulaa a le Atua? (e) Aisea e tatau ai i se tasi ona manatunatu loloto i lana filifiliga i le mataupu tau tapuaiga?

⁸ E matuā nutimomoia le loto pe a faaalia e se tagata talitonu se faanaunauga e fia ola i se olaga e feteenai ma tapulaa a le Atua. (Filipi 3:18) Pe a tupu lenei mea, e taumafai toeaina ma isi ua iai agavaa faaleagaga e toe faasaʻoina lē ua sese. (Kalatia 6:1) E ui i lea, e leai se tasi e uunaia faamalosi e talia le amo o le avea ma soo faa-Kerisiano. (Mataio 11:28-30; 16:24) Pe afai ua latou ausia le matua faaletulafono, e oo lava i talavou e tatau ona latou faia se filifiliga totino i le mataupu tau tapuaiga. I le taunuuga mulimuli, o i tatou uma taitoatasi o ni tagata e iai le filifiliga saʻoloto, o ē o le a tuuina atu se tali i le Atua mo le tagata lava ia. (Roma 14:12) O le mea moni, o le a tatou ‘seleseleina foi le mea tatou te lūlūina’—o le lesona lena e lei leva ae aʻoaʻoina e le atalii faamaumauoa i le faataoto a Iesu.—Kalatia 6:7, 8.

Ua Matuā Mafatia i se Nuu Mamao

9, 10. (a) O le ā le suiga o tulaga na oo i ai le atalii faamaumauoa, ma na faapefea ona ia tali atu i ai? (e) Ia faataitai mai pe faapefea i nisi i aso nei o ē ua lafoaia le tapuaiga moni ona oo i ai le tulaga pagatia e talitutusa ma le mala na oo i le atalii faamaumauoa.

⁹ “Ua uma atu ana mea, ona oge tele ai lea o lea nuu; ona faatoa mativa ai lea o ia. Ua alu ia ua nofo i le tasi tagata o lea nuu, ua ia auina foi o ia i ona fanua e fafaga ai puaa. Ua tupu lona manao i atigi mea e ʻaina e puaa ia maʻona ai o ia; e leai lava se tasi ua avane sina mea ia te ia.”—Luka 15:14-16.

¹⁰ E ui sa leai se mea o totoe ia te ia, ae sa lei mafaufauina lava e le atalii faamaumauoa le toe foi atu i le aiga. Na i lo lea, sa ia fetaui ma se tagata o le nuu o lē na maua ai sana galuega o le fafagaina o puaa. Talu ai i le Tulafono Faa-Mose sa faavasega ai puaa o ni manu e lē mamā, e foliga mai la o lena galuega sa lē taliaina e se tagata Iutaia. (Levitiko 11:7, 8) E tusa lava foi pe sa tau fagufagu atu le loto fuatiaifo o le atalii faamaumauoa, sa ia lē amanaia lava. Auā foi, sa lē mafai ona ia faatalitalia lona pule, le tagata o le nuu, e popole ane i faalogona o se tagata ese mativa. O le tulaga pagatia o le atalii faamaumauoa e talitutusa lava ma le mea o loo tupu i le toatele o tagata i aso nei o ē lafoaia le ala moni o le tapuaiga mamā. E masani lava, e oo ina aafia i latou na i ni gaoioiga atonu sa latou manatu muamua i ai e matagā. Mo se faaaoaoga, ina ua 17 tausaga o se tama talavou, na ia tetee ai i le olaga faa-Kerisiano na tausiaina ai o ia. Ua ia taʻutino mai: “O amioga lē mamā ma le faaaogaseseina o fualaau faasaina na faaleaogaina ai tausaga uma o aʻoaʻoga faale-Tusi Paia.” E lei umi ae iu atu lenei tama talavou i le falepuipui ona o le gaoi e faaaogā ai laau malosi ma le fasioti tagata. E ui na mulimuli ane toe faafoisia lona tulaga faaleagaga, ae pagā le matuia o le faasalaga mo “le fiafia i le agasala e vave mavae”!—Faatusatusa i le Eperu 11:24-26.

11. Na faapefea ona faateteleina le faafitauli o le atalii faamaumauoa, ma ua faapefea ona iloa e nisi i aso nei le ‘taufaasese lē aogā’ o faatosinaga a le lalolagi?

¹¹ Na faateteleina le faafitauli o le atalii faamaumauoa ona o le mea moni faapea “e leai lava se tasi ua avane sina mea ia te ia.” A o fea ua iai ana uo fou na maua? O lea ua matuā mativa o ia, ua pei o ia ‘o se mea e inosia’ ia i latou. (Faataoto 14:20) I se tulaga tutusa, e toatele tagata i aso nei o ē na liliu ese mai le faatuatua ua latou iloa o faatosinaga ma manatu o lenei lalolagi e iu atu i le ‘taufaasese e lē aogā.’ (Kolose 2:8) “Sa ou mafatia i le tele o tiga ma le loto nutimomoia e aunoa ma se taitaiga a Ieova,” o le faamatalaga lena a se tasi tamaitai talavou o lē na alu ese mai le faalapotopotoga a le Atua mo se vaitaimi. “Sa ou taumafai e faafetaui atu i le lalolagi, ae talu ai sa lē tutusa moni aʻu ma isi, o lea na latou teena ai aʻu. Sa ou lagona na pei aʻu o se tamaitiiti ua taasē o loo manaomia se tamā e taitaia. O iina tonu na ou toe iloa ai loʻu manaomia o Ieova. Sa ou lē toe manao lava e fia ola tutoatasi ese mai ia te ia.” O le mea foi lena na iu ina iloa e le atalii faamaumauoa i le talafaatusa a Iesu.

Ua Toe Atamai le Atalii Faamaumauoa

12, 13. O ā vala ua fesoasoani i nisi i aso nei ina ia toe atamamai ai? (Tagai i le pusa.)

¹² “Ona atamai ai lea o ia, ua faapea ane, E lē toatele ea o auauna a loʻu tamā ua faulai a latou areto ua totoe; a o au, ou te matelaina. O le a aʻu tulai ma alu i loʻu tamā, ou te fai atu ia te ia, Loʻu tamā e, ua ou agasala i Lē o i le lagi, atoa ma ou luma; ua ou le toe aoga ona taʻua o lou atalii; ia e avea aʻu ia pei o se tasi o au auauna. Ona tulai lea o ia, ua alu i lona tamā.”—Luka 15:17-20.

¹³ “Ona atamai ai lea” o le atalii faamaumauoa. Mo se vaitaimi, sa matuā aafia ai o ia i le sailia o faafiafiaga, e peiseai o loo ola i se lalolagi o moomooga faivavale. Ae o lea la ua oo ina matuā malamalama i lona tulaga moni faaleagaga. Ioe, e ui lava i ni sese sa iai o ia, ae sa iai lava le faamoemoe mo lenei tama talavou. Sa iai ni mea lelei na mafai ona iai ia te ia. (Faataoto 24:16; faatusatusa i le 2 Nofoaiga a Tupu 19:2, 3.) Ae faapefea i latou ua tuua le lafu mamoe a le Atua i aso nei? Pe talafeagai ea ona faapea atu ua matuā leai lava se faamoemoe e latou te toe foi mai, ma i so o se tulaga lava, ua faamaonia mai ai i o latou ala fouvale lo latou agasala i le agaga paia o le Atua? (Mataio 12:31, 32) E leai. O le toatele o i latou e oo i ai mafatiaga ona o o latou ala sese, ma e oo ane le taimi e toe atamamai ai le toatele o i latou. Ua faapea mai se tasi tuafafine, pe a toe mafaufau i le taimi na ia tuua ai le faalapotopotoga a Ieova: “E oo lava i se aso se tasi, sa lē tāitai ona galo ai ia te au Ieova. Sa ou tatalo pea atonu i se aso, o le a iai se auala o le a ia toe talia mai ai aʻu i le upu moni.”—Salamo 119:176.

14. O le ā le faaiuga na faia e le atalii faamaumauoa, ma na faapefea ona ia faaalia le lotomaulalo i lona faia faapea?

¹⁴ Ae o le ā e mafai e i latou ua taasē ona fai i o latou tulaga? I le faataoto a Iesu, na filifili ai le atalii faamaumauoa e toe foi atu i lona aiga ma aioi i lona tamā mo se faamagaloga. “Ia e avea aʻu ia pei o se tasi o au auauna,” o upu ia sa mafaufau le atalii faamaumauoa e fai. O le auauna o se tagata e faafaigaluega mo se aso, ma e mafai ona faamālōlō pe a uma lena aso. Sa sili atu ona faatauvaa lena tulaga na i lo le pologa, o lē sa pei lava o se tagata o le aiga. Sa lei mafaufau la le atalii faamaumauoa e talosaga atu ina ia toe faafoisia mai lona tulaga sa iai muamua o se atalii. Sa lotomalie o ia e talia le tulaga sili ona maulalo ina ia faamaonia atu ai le toe faafouina o le faamaoni o lona loto i lona tamā a o faagasolo aso taitasi. Peitai, sa matuā faateʻia le atalii faamaumauoa i le mea na tupu.

Se Faafeiloaiga e Faamafanafana Loto

15-17. (a) Na faapeī uiga faaalia o le tamā ina ua vaai atu i lona atalii? (e) O le ā e faauiga i ai le ofu tatapuvae, le mama, ma seevae ia na saunia e le tamā mo lona atalii? (i) O le ā e faaalia mai e le sauniunia e le tamā o se ʻaiga?

¹⁵ “Ua iloa mamao atu foi o ia e lona tamā, ona mutimuti vale lea o lona alofa, ua momoʻe atu o ia, ua fusi ia te ia, ma sogi atu ia te ia. A ua fai mai le atalii ia te ia, Loʻu tamā e, ua ou agasala i Lē o i le lagi, atoa ma ou luma, ua ou le toe aoga ona taʻua o lou atalii. [“Ia avea aʻu ma se tasi o au auauna,” NW] A ua fai atu le tamā i ana auauna, Au mai ia loa le ofu tatapuvae e aupito lelei, ma faaofu ia te ia; ma ia tuu se mama i lona lima, ma faasee i ona vae; au mai ia foi le tamai povi peti, ma fasi; tatou te aai ma olioli; auā o loʻu atalii lenei, na oti, ua toe ola mai; na le iloa foi o ia, a ua maua. Ona latou olioli ai lea.”—Luka 15:20-24.

¹⁶ E so o se matua alofa lava e faanaunau ina ia toe malosi faaleagaga sana tama. O lea, e mafai ona tatou vaai faalemafaufau i le nofonofo o le tamā o le atalii faamaumauoa i aso taitasi ma faataupupula atu i le auala i luma o lona fale, ma talotalo ma le naunautai ina ia toe foi mai si ona atalii. Ae o lea la ua ia vaai atu nei ua agaʻi mai lona atalii i le ala! E lē masalomia atonu ua suia foliga o le taulealea. Peitai, na mataulia lelei o ia e lona tamā ‘a o mamao ese o ia’ e lei tāitai oo mai. E lē o taulai le vaai a lona tamā i lavalava masaesae ma le loto mafatia; ua ia vaai atu i lona atalii, ma ua momoʻe atu e fetaiai ma ia!

¹⁷ Ina ua oo atu le tamā i lona atalii, na ia fusi mai lona atalii ma sogi atu ia te ia. Ona ia poloaia lea o ana auauna ina ia faaofu lona atalii i se ofu tatapuvae, faamaulu se mama i lona lima, ma faasee i ona vae. O lenei ofu tatapuvae sa lē na o se ofu masani, ae o le ofu “aupito lelei”—atonu o le ofu sili ona taugata lea o ituaiga o ofu e foai atu i se malo faaaloalogia. Talu ai e lē masani ona vaaia le iai o ni mama ma ni seevae o auauna, o lona uiga o lea sa faamanino mai e le tamā faapea, o lea ua toe faafeiloaia lona atalii o se tagata moni o le aiga. Ae na iai ma isi mea na faia foi e le tamā. Sa ia faatonu e fai se ʻaiga tele e faamanatu ai le toe foi mai o lona atalii. E manino lava, sa lei faamagalo e lenei tamā lona atalii e aunoa ma le loto atoa pe faapea foi e tatau lava ona ia faamagalo ona o lea ua toe foi mai lona atalii; ae sa manao o ia e faaoo atu lana faamagaloga. Sa ia maua ai le olioli.

18, 19. (a) O le ā ua aʻoaʻo mai ia te oe e le faataoto i le atalii faamaumauoa, e uiga ia Ieova? (e) E pei ona faaalia i ana feutagaiga ma Iuta ma Ierusalema, ua faapefea ona “faatalitali” mai pea Ieova i le toe foi atu o sē ua agasala?

¹⁸ O lea la, o le ā ua aʻoaʻo mai ia i tatou e le faataoto i le atalii faamaumauoa, e uiga i le Atua o lē ua faaeaina i tatou e tapuai atu i ai? Muamua, o Ieova e “alofa mutimutivale ma le alofa fua, e telegese lona toasa, a e tele le alofa ma le faamaoni.” (Esoto 34:6) O le mea moni, o le alofa mutimutivale o se uiga matilatila o le Atua. O lona uiga masani lena e faaalia ia i latou o iai se manaomia. Ona aʻoaʻo mai lea e le faataoto a Iesu ia i tatou faapea o Ieova e “nofosauni e faamagalo.” (Salamo 86:5, NW) E matuā uaʻi mai o ia, e matauina so o se suiga o le loto o tagata agasala o le a faapea ona saunia ai se faavae mo ia e faasalafa mai ai lona alofa mutimutivale.—2 Nofoaiga a Tupu 12:12; 16:9.

¹⁹ Mo se faaaoaoga, seʻi manatu i feutagaiga a le Atua ma Isaraelu. Na faagaeeina e Ieova le perofeta o Isaia na te faamatalaina Iuta ma Ierusalema faapea ‘o loo maʻi mai lava i le ulu e oo atu i alofivae.’ Peitai, na ia fetalai foi: “E faatalitali Ieova ina ia alofa fua mai ia te outou; o le mea lea e tulai ai o ia e alofa ia te outou.” (Isaia 1:5, 6; 30:18; 55:7; Esekielu 33:11) I le pei o le tamā i le faataoto a Iesu, e faapena foi ona pei o loo ‘silasila mai Ieova i le ala.’ E faatalitali ma le naunautai o ia mo le toe foi atu o so o se tasi o lē sa alu ese mai lona aiga. Pe e lē o le mea ea lenei tatou te faatalitalia mai se tamā alofa?—Salamo 103:13.

20, 21. (a) O le ā le auala ua tosina atu ai le toatele o tagata i aso nei i le alofa mutimutivale o le Atua? (e) O le ā o le a talanoaina i le mataupu o sosoo mai?

²⁰ I tausaga taitasi, ua tataʻi mai ai e le alofa mutimutivale o Ieova le toatele ina ia toe atamamai ma toe foi mai i le tapuaiga moni. Maeu se olioli e aumaia e lenei mea i ē pele ia i latou! Seʻi fai ma faaaoaoga le tamā Kerisiano lea na taʻua i le amataga o le mataupu. O le tulaga e faafiafiaina ai ona sa toe faafoisia le malosi faaleagaga o lona afafine ma ua auauna nei o se faifeau faataimi atoa. Fai mai lenei tamā: “Ua ou maua nei le fiafia o loo mafai ona fiafia ai se tagata i lenei faiga tuai o mea. Ua liua nei oʻu loimata o le faanoanoa i loimata o le olioli.” E mautinoa, e faapea foi le olioli o Ieova!—Faataoto 27:11.

²¹ Ae e iai ma nisi faatatauga o le faataoto i le atalii faamaumauoa. Sa faaauau le tala a Iesu ina ia mafai ona ia faia se faaeseesega i le va o le alofa mutimutivale o Ieova ma uiga lē alofa, faamasinosino sa taatele i le au tusiupu ma le au Faresaio. O le auala na ia faia ai faapea—ma le uiga o lenei mea mo i tatou—o le a talanoaina i le mataupu o loo sosoo mai.

[Faaopoopoga i lalo]

I le Autaluga

◻ Na faapefea ona eseese le silafaga a Iesu i le alofa mutimutivale ma manatu o le au Faresaio?

◻ O ai i aso nei ua pei o le atalii faamaumauoa, ma e faapefea?

◻ O ā tulaga na māfua ai ona toe atamai le atalii faamaumauoa?

◻ Na faapefea ona faaalia e le tamā lona alofa mutimutivale i lona atalii ua salamō?

[Pusa i le itulau 11]

UA TOE ATAMAMAI I LATOU

O le ā ua mafai ona fesoasoani ai i nisi o ē na faateʻa ese muamua mai le faapotopotoga Kerisiano ina ia toe atamamai? O faamatalaga o loo mulimuli mai ua aumaia ai se malamalamaga i lena mataupu.

“I loʻu loto lava ia, sa ou iloa lelei le mea o loo iai le upu moni. O tausaga e tele ia sa ou suesueina ai le Tusi Paia ma auai atu i sauniga faa-Kerisiano sa tele se aafiaga ia te au. E mafai faapefea ona ou fulitua pea ma le loto i ai ia Ieova? E lē o ia na lafoaia aʻu; o aʻu na ou lafoaia o ia. Na iu lava ina ou ioeina loʻu sese ma loʻu faauamaaa sa iai, ma e saʻo lava le Afioga a Ieova i nei taimi uma—‘e te selesele le mea e te lūlū.’”—C.W.

“Sa amata ona tautala si aʻu pepe teine, ma na tuia loʻu loto talu ai sa ou manao e aʻoaʻoina o ia i mea e pei o ai Ieova ma pe faapefea ona tatalo atu ia te ia. Sa lē mafai ona ou moe, ma i le leva o se tasi po, na ou alu ai i laʻu taavale ma tū i se paka ma ou tagi ai lava. Sa ou tagi ma o le taimi muamua foi lena mai le tele o le taimi ua alu, na faatoʻā ou toe tatalo ai ia Ieova. Na pau lava le mea na ou iloa ua ou toe manaomia Ieova i loʻu olaga, ma sa ou faamoemoe na te faamagaloina mai aʻu.”—G.H.

“Pe a tulai mai le mataupu tau i lotu, ou te fai atu lava i tagata faapea, pe ana fai ou te filifili mo se lotu o loo aʻoaʻo ai le upu moni, ou te filifilia le avea o aʻu o se tasi o Molimau a Ieova. Ona ou fai atu lea i ai, sa avea muamua aʻu o se Molimau, peitai sa lē mafai ona ou tausisia le ituaiga o olaga e ao ona ola ai, o lea na ou toe faamaamulu ai. I le iloaina o lenei mea, e masani ai lava ona leaga oʻu faalogona ma ou lē fiafia. Na iu lava ina ou ioeina, ‘ua matuā leaga faia lava aʻu. E manaomia ona ou faia ni suiga tetele.’”—C.N.

“I le tolusefulu lima tausaga ua mavae, na faateʻaina uma ai maʻua ma laʻu tane. Ae, i le 1991, sa faateʻia i maʻua ma le fiafia ina ua asiasia i maʻua e ni toeaina se toalua ma la taʻu mai faapea e iai le avanoa e mafai ai ona ma toe foi atu ia Ieova. I le ono masina mulimuli ane, sa matuā ma olioli ina ua toe faaeaina i maʻua. Ua 79 nei tausaga o laʻu tane, ae ua 63 oʻu tausaga.”—C.A.