MATAUPU AUTU | AUALA E PULEA AI AU MASANIGA
2 Filifili Lelei Lou Siʻomaga
Na e filifili e ʻai meaʻai paleni, ae ua taufaaosooso tele mai le aisakulimi iā te oe.
Na e filifili e lē toe ulaula, ae ua tuu mai e sau uō e iloa o loo e taumafai e taofi lau ulaula, se sikareti iā te oe.
Na e fuafua e faamalositino nei, ae e oo lava i le suʻeina o ou seevae toleni ua pei o se galuega mamafa iā te oe.
Pe e te mātauina le mea e tutusa ai nei tulaga? Ua iloa mai i mea e tutupu, e aafia lo tatou taulau e atiaʻe masaniga lelei ma taofia masaniga leaga, i le siʻomaga po o tulaga e tatou te i ai ma tagata e tatou te faifaimea faatasi.
MATAUPU SILISILI O LE TUSI PAIA: “O lē ua iai le utaga mamao e na te iloa atu le mala ma lafi ai, a o lē ua leai se poto masani e alu atu pea o ia ma malaia ai i āuga leaga.”—Faataoto 22:3.
Ua fautuaina i tatou i le Tusi Paia ia mafaufau muamua. O le faia faapea e tatou te ʻalofia ai tulaga e lē ausia ai o tatou sini, ae tuu i tatou i tulaga e maua ai iʻuga aogā. (2 Timoteo 2:22) Pe a faafaigofie, e atamai ona filifili lelei lo tatou siʻomaga.
Ia faafaigatā ona fai le mea sesē, ae faafaigofie ona fai le mea saʻo
MEA E MAFAI ONA E FAIA
Ia faafaigatā ona fai le mea sesē. O se faataʻitaʻiga, pe afai o e taumafai e ʻalofia meaʻai e leai se malosi e maua ai, ia taumafai e aua neʻi tuuina i lou umukuka ni meaʻai e lē lelei mo oe. O le faia faapea, pe a faaosoosoina oe, o le a tele au galuega e fai pe a e lolo i ai, ae o le a leai sau galuega e faia pe a e lē lolo i ai.
Ia faafaigofie ona fai le mea saʻo. O se faataʻitaʻiga, pe afai e te fuafua o lau mea muamua e fai i le taeao o le faamalositino, ia tuu ou ofu toleni i autafa o lou moega i le pō a o leʻi moe. O le faigofie ona amata, o le faigofie foʻi lenā ona faatino.
Ia filifili lelei au uō. E masani ona tatou pei o tagata e tatou te faifaimea faatasi. (1 Korinito 15:33) O lea, ia faaitiitia le faifaimea faatasi ma tagata e uunaʻia masaniga o loo e taumafai e taofia, ae faauō iā i latou e uunaʻia masaniga lelei.