Le Suesuega Faaleaiga e Maua ai le Olioli

“O le poto foi e tutumu ai afeafe i oloa uma lava e tāua ma le matagofie,” o le faamatalaga lea a le Tusi Paia. (Faataoto 24:4) O nei oloa tāua ua lē na o ni oloa o mea faitino ae aofia ai le alofa moni, le mataʻu faaleatua, ma le faatuatua malosi. O na uiga e fausia moni aʻe ai lava se soifuaga faaleaiga ua faatamaoaigaina. (Faataoto 15:16, 17; 1 Peteru 1:7) Peitai, ina ia maua na mea, e manaomia ona tatou aumaia i totonu o o tatou auaiga le poto e uiga i le Atua.

UA IAI i le ulu o le aiga le tiute tauave o le totōina o lenei poto i mafaufau o tagata o le aiga. (Teuteronome 6:6, 7; Efeso 5:25, 26; 6:4) O se tasi o auala e sili ona lelei e faia ai lenei mea e ala lea i se suesuega a le aiga e faia e lē aunoa. Maeu se faafiafiaina ai o ē o loo auai pe afai e faia le suesuega i se auala e lē gata e aʻoaʻoina ai ae maua ai foi le olioli! Seʻi o tatou talanoaina la, nisi o mea e sili ona manaomia mo le faia o se suesuega uigā a le aiga.a

E sili ona uigā le suesuega a le aiga pe a faia e lē aunoa. Pe afai e faatoʻā fai pe a maua se avanoa pe fai pe a teʻi lava ua filifili e fai, e foliga mai la e lē o faifai pea. O lea e tatau ai ona outou ‘faaavanoa mai le taimi’ mo le suesuega. (Efeso 5:15-17) O se luʻi le filifilia o se taimi faifai pea e avanoa mo tagata uma. Ua tautino mai e le ulu o se tasi aiga: “Sa faigata tele ia i matou ona faia i se tulaga faifai pea la matou suesuega faaleaiga. E tele ni taimi eseese na matou taumafai i ai seia oo lava ina matou mauaina se taimi a o lei leva tele le afiafi, lea sa talafeagai mo i matou uma. O lenei la ua faia e lē aunoa la matou suesuega faaleaiga.”

Afai loa o le a tou maua se taimi talafeagai, ia faaeteete ina ia lē faatagaina isi mea e faalavelavea ma taofia ai le suesuega. E manatuaina e Maria,b ua 33 ona tausaga e faapea: “Pe a ō mai ni mālō a o fai la matou suesuega, e valaaulia i latou e Tamā e faatali seʻi maeʻa le suesuega. Ma pe afai e telefoni mai se isi, e na ona ia fai atu lava i le tagata o le a toe vili atu i se taimi mulimuli ane.”

Peitai, e lē o le uiga o lenei mea faapea e lē mafai ona faia ni fetuutuunaiga. E ono tutupu aʻe ni faalavelave faafuasei po o nisi mea e lē maalofia, ma atonu e talafeagai ai ona lē faaauauina pe tolopo le suesuega i nisi o taimi. (Failauga 9:11) Peitai ia faaeteete ina ia lē faatagaina so o se tasi o nei mea e faalavelaveina ai la outou faasologa masani.—Filipi 3:16.

O le ā le umi e tatau ona faia ai se suesuega? O Ropati, o se tamā ua taulau manuia i le tausia aʻe o sona afafine ma se atalii, ua ia faapea mai: “E masani lava ona tasi le itula le umi o a matou suesuega. A o laiti tamaiti, sa ma taumafai ina ia iai pea lo la fiafia i le itula atoa o le suesuega e ala i le manatunatu i ni mataupu eseese, e pei o le talanoaina o ni nai palakalafa i se mataupu mo suesuega o loo i Le Olomatamata, ni fuaiupu e fili mai le Tusi Paia, ma ni vaega mai isi lomiga.” E manatuaina e Maria faapea: “A o matou laiti lava ma isi oʻu uso e matutua atu ia te au, sa tusa ma le 20 minute le umi o a matou suesuega e fai faalua pe faatolu i le vaiaso. Ina ua matou matutua aʻe, sa atoa le itula pe ā le uumi o a matou suesuega faaleaiga i vaiaso taitasi.”

O ā Mea e Tatau Ona Tatou Suesueina?

O le faatoʻā mafaufauina o lenei fesili i le taimi e potopoto uma ai tagata mo se suesuega, e iu ai i le lē fiafia ma le maimau o le taimi tāua mo se suesuega. Afai o le tulaga lena, o le a leai ai se mea patino e tulimatai atu i ai le fanau ma e lē umi lava ae uma lo latou fiafia. O lea ia lava se taimi e muai filifilia ai se tasi o lomiga a le Sosaiete e talanoaina.

Ua saunia mai e “le auauna faamaoni ma le mafaufau” le anoanoai o lomiga ina ia filifili mai ai. (Mataio 24:45-47) Atonu e mafai ona outou faaaogā se tusi e lei suesueina muamua e le aiga. Ma e maeu le manaia pe a talanoaina ni vaega ua filifilia mai le tusi o le Insight on the Scriptures pe afai ua faaliliuina nei tusi i la outou gagana! Mo se faaaoaoga, e mafai ona outou autaluina le mataupu i le Talisuaga Afiafi a le Alii a o faagasolo vaiaso ia e lumanai ai le Faamanatuga. E tele aiga ua olioli i le sauniuni o le Suesuega o Le Olomatamata mo le vaiaso. Ae ua iai foi i mataupu faaopoopo i Le Olomatamata ni mataupu sili ona lelei mo le suesuega. O le ulu o le aiga, o lē na te silafia lelei manaoga faaleagaga o le aiga, ua talafeagai lelei ai mo ia le filifilia po o ā lomiga e tatau ona suesueina.

E manatua e Maria faapea: “E masani lava ona matou suesueina se lomiga na lava le taimi na filifilia ai muamua. Ae pe afai e lāgā se fesili po o se mea na tupu i le aʻoga, ona matou see lea e talanoaina ni faamatalaga e talafeagai ma na mataupu.” O ni mataupu faapitoa o loo avea ma popolega, e pei o faafitauli e fesagai ma talavou i le aʻoga, o tuugatala, o gaoioiga faaopoopo i le aʻoga, ma isi mea faapena, o isi taimi e aliai mai ai. Pe a tupu lenei mea, ona fili lea o ni mataupu po o ni lomiga o loo talanoaina ai lena faafitauli ua tulai mai. Pe afai e te iloa ni faamatalaga i se lomiga fou o Le Olomatamata ma le Ala Mai! o loo tou mananao e talanoaina faatasi ma le aiga i le taimi lava lena, aua le faatalatu e faia lena fuafuaga. O le mea moni, e te manao e muai faailoa atu i tagata o le aiga le suiga a o lava le taimi. Ae ia mautinoa ona toe foi i le mataupu sa faatulaga muamua pe a maeʻa ona talanoaina le manaoga lea na tulai mai.

Ia Tausia Pea se Siomaga Toafimalie

E mafai ona aʻoaʻoina se mea pe afai o loo iai i ni tulaga e sili ona filemu. (Iakopo 3:18) O lea, ia ati ae se siomaga solo mālie, ae ia faaaloalogia. Ua faapea mai se tasi ulu o se aiga i le Iunaite Setete: “Pe matou te suesue i le potu mālōlō pe i fafo i le faapaologa, ae matou te taumafai lava e nonofo vavalalata le tasi i le isi nai lo le nofo lava o le tagata i lana pito i totonu o se potu telē. O lenei faiga e atiina ae ai se lagona mafana ia i matou.” E manatuaina e Maria ma lona matuā fiafia e faapea: “Sa faataga matou ma oʻu uso e filifili po o gafea o le fale matou te mananao e fai ai le matou suesuega i lea vaiaso ma lea vaiaso. E matou te lagona ai lava le fiafia i lena faiga.” Ia teu i le mafaufau o le lelei o se molī, lelei ni mea o loo faaaogā e saofafai ai, ma ni siomaga faafiafia loto ma e lē faalavelave, e maua ai le toʻafimalie. O le iai o sina ʻaiga māmā mo le aiga pe a maeʻa le suesuega e fesoasoani foi ina ia maua ai se afiafi fiafia.

O nisi aiga ua latou filifili e faaaofia mai ma nisi aiga i le latou suesuega i nisi taimi, e faaopoopo atili ai le fiafia ae maise le felanulanuai ai o le tele o manatu faaalia. Pe a valaaulia tagata e fou atu i le upu moni ina ia auai i lenei fuafuaga, e mafai ona latou maua ai ni aogā mai le matauina o se ulu o le aiga ua iai le poto masani, a o ia taitaia le suesuega a le aiga.

Ia Faia e Pei o Loo Tutupu Moni Tala o le Tusi Paia

Ia faaolaola taimi o suesuega mo le fanau, ona latou naunautai ai foi lea e tulimataia na taimi. E mafai ona e faia lenei mea e ala i le faalaeiau i fanau laiti e tusi ni ata o mea na tutupu o loo taʻu mai e le Tusi Paia. Pe afai e talafeagai, ia faataitai mai e le fanau ni mea na tutupu ma ni tala o loo taʻua e le Tusi Paia. Mo le fanau o loo fai sina laiti tele, e lē manaomia ona tausisi lava i le faiga faafesili ma tali. O le faitau atu pe faamatala atu i ai tala e faatatau i ni tagata o loo taʻua i le Tusi Paia o se auala manaia lea e totō ai i o latou loto mataupu silisili a le Atua. E manatua e Ropati, lea na taʻua muamua: “O nisi taimi matou te faitau feauauai ai i ni vaega o le Tusi Paia, ma faaleo mai ‘leo’ o tagata o loo iai i le tala.” E mafai ona tuu atu i le fanau e filifili mai e le tamaitiiti lava ia le tagata o le tala latou te mananao e faataitai lona leo i le faitau tusi.

O le faaaogaina o faafanua ma siata o le a aogā foi i fanau ua matutua ina ia latou vaai faalemafaufau i oganuu ma foliga eseese o le laueleele na tutupu ai mea ia o loo talanoaina. E manino lava, pe a iai sina faaataga i le mafaufau o na mea, e mafai ai ona ola ma felanulanuai le suesuega a le aiga. Ma o le a faatupuina aʻe ai foi e le fanau se faanaunau atu mo Afioga a le Atua.—1 Peteru 2:2, 3.

Ia Fesoasoani i Tagata Taitoatasi e Faia se Sao

Ina ia olioli le fanau i le suesuega, e tatau foi ona latou lagona o loo faaaafia ai i latou. Peitai ane, e ono avea o se luʻi le taumafai ina ia uunaia tamaiti e eseese uma o latou matutua, ina ia faia se sao. Peitai ua faapea mai le mataupu silisili o le Tusi Paia: “O lē pule, ia faia ma le filigā.” (Roma 12:8) E aogā le filigā, auā o le uiga filigā e mafai ona taaina ai isi.

E faaaofia e Ronald lona afafine e lima tausaga, o Dina, i lona tuu atu i ai na te faitauina mai tamai ulutala o le mataupu o loo suesue, ma tuu atu e fai mai ni ona manatu i ata. A o latalata mai le Faamanatuga o le maliu o Keriso i le tausaga na teʻa nei, sa ia tatai atu manatu i ata tāua na o loo i le tusi o Le Tagata Silisili o Ē Uma na Soifua Mai.c Fai mai a ia: “Na fesoasoani lena ia te ia e malamalama ai i le uiga tāua o le mea na tupu.”

Ae mo lona afafine ua sefulu tausaga, sa faia se isi laasaga faaopoopo e Ronald. Fai mai Ronald: “Ua oo Misha i le tulaga ua mafai ona ia malamalama e lē gata i ata, ae o manatu foi o loo faauiga mai ai. Ma ina ua talanoaina la le tusi Faaaliga—Ua Latalata Lona Tumutumuga Matagofie!,d sa matou uai atu ai e talanoa uiga o ata, ma sa aogā lenei mea ia te ia.”

A o agaʻi atu le matutua o le fanau i le taʻi sefulu ma ona tupu tausaga, ia valaaulia i latou e fai mai ni faatatauga aogā o le mataupu o loo talanoaina. Pe a iai ni fesili e mapuna aʻe a o fai le suesuega, ia tofia i ai ni vaega latou te sailiili i ai. Na faia e Ropati lena mea ina ua fesili atu lona atalii e 12 tausaga, o Paulo, e faatatau i se kalapu fou ua faavaeina i le aʻoga o loo faia ai le taaloga e taʻua o le Dungeons and Dragons (e aofia ai faiga faaleituaiga ma oo atu i faiga sauā). Sa suʻe e Paulo ma isi i le aiga ni faamatalaga e faaaogā ai le Watchtower Publications Index, ona latou toe autaluina lea i la latou suesuega faaleaiga. Fai mai Ropati: “O le iuga, na vave lava ona malamalama Paulo e sese le taaloga lea mo Kerisiano.”

E iai isi taimi e tofia ai e Ropati ni sailiiliga atili e faia. E manatua e lana avā, o Nancy e faapea: “Ina ua matou faia ni sailiiliga atili e faatatau i aposetolo o Iesu, sa tofu lava i matou ma le aposetolo e tuu mai i ai i vaiaso taitasi. Maeu le faafiafiaina i le vaai atu i le fanau o loo faitau mai ma le naunautai a latou lipoti i le taimi o le suesuega a le aiga!” O le faia o a latou lava sailiiliga ma fetufaai faamatalaga na latou maua mai i suesuega ma le aiga e fesoasoani i le fanau e ‘tutupu aʻe ai mo Ieova.’—1 Samuelu 2:20, 21.

O le fesiligia o fesili—o fesili e faaali mai ai manatu ma fesili e faatupu ai ni manatu—o se auala lelei foi lea e faaaafia ai le fanau. Sa fesiligia e le Faiaʻoga Sili, o Iesu, ni fesili e faaali mai ai manatu, e pei o le, “Pe ni a fa oe?” (Mataio 17:25) E toe manatua e Maria: “Pe a iai se fesili a so o se tasi o i matou, e lē tāitai ona tali saʻo mai loa e o matou mātua. E masani lava ona la toe faia mai ni fesili e faatupu ai manatu, e fesoasoani ai ia i matou ina ia mafaufau atili i le mataupu.”

Ia Fesootai—Aua le Faaita i Ai!

E faateleina le olioli o le suesuega faaleaiga pe afai e mafai e tagata uma o loo auai ona talanoa mai i o latou manatu ma o latou lagona e aunoa ma le fefe ina neʻi faalumaina. Peitai, “e faatoʻā maua ni fesootaiga lelei i se suesuega a le aiga pe a tatala foi laina o fesootaiga i isi taimi,” o le faamatalaga lea a se tasi tamā. “E lē mafai ona e faatagā faafoliga mai o loo lelei fesootaiga i le na o le taimi o le suesuega.” E tāua lava, le alofia o faamatalaga lē magafagafa na e faatiga ai, e pei o nei, ‘Na pau lava lena? Fa ita lava o se mea e tāua’; ‘E valea tele lena tala’; ‘Ae o le ā se mea e faatalitalia ia te oe? O lena e te laitiiti e te lē iloa se tala aogā e fai.’ (Faataoto 12:18) Ia iai lagona alofa mafana ma ia mutimutivale lou alofa i lau fanau. (Salamo 103:13; Malaki 3:17) Ia e fiafia ia i latou, ma lagolagoina i latou a o latou taumafai e faatatauina mea o loo latou aʻoaʻoina.

E tatau ona avea le siomaga o le suesuega a le aiga o se siomaga e faigofie ai i le mafaufau o le tamaitiiti ona talia aʻoaʻoga. Ua faamatala mai e se tasi matua e toafā lana fanau, ma o loo taulau manuia e faapea: “Pe a amata ona e faasaʻoina le fanau, atonu o le a tetee mai i latou ia te oe.” I se siomaga faapena, atonu o le a lē goto lelei ifo ai i loto faamatalaga. O lea, ia alofia le faaaogā o taimi o suesuega e fai ma taimi e aoaia mamafa pe avatu ai faasalaga. Pe afai e manaomia na mea, ia avatu i se taimi mulimuli ane ma ia faia patino i le tagata lava ia.

E Matuā Aogā Taumafaiga

O le atiina ae o se aiga e tamaoaiga faaleagaga e alu ai le taimi ma taumafaiga. Ae ua faalauiloa mai e le faisalamo: “Faauta, o le fanau, o le tofi lea mai ia Ieova; o e ua fanau mai, o le taui lea mai ia te ia.” (Salamo 127:3) Ma ua tuuina atu i mātua le tiute tauave o le “tausi atu i [le fanau] i aoaiga ma apoapoaiga a le Alii.” (Efeso 6:4) O lea, ia faatupuina tomai ina ia faia ai se suesuega faaleaiga e uigā ma maua ai le olioli. Ia faia le mea sili tou te mafai ina ia saunia “le suāsusu faaleagaga e le suia,” atonu o le a mafai ai e lau fanau ona “tutupu ai i le faaolataga.”—1 Peteru 2:2; Ioane 17:3.

[Faaopoopoga i lalo]