“Tali Atu i Upu Tonu”

I LE Lauga i luga o le Mauga, na faasino atu ai e Iesu i ‘le Tulafono ma le au Perofeta.’ O le vaega lona tolu o Tusitusiga Eperu sa taʻua o Tusitusiga, na aofia ai tusi o solo, e pei o le Salamo ma le Faataoto. (Mataio 7:12; Luka 24:44) Ua iai foi i nei tusi le atamai o le Atua.

Mo se faaaʻoaʻoga, na lapataia e faataoto faamasino i Isaraelu anamua: “O le ua fai atu i lē amio leaga, O oe le amiotonu; e fetuuina o ia e le nuu; e faafanoina o ia e tagata. A o e ua aoai atu ia te ia, latou te fiafia; e oo ia i latou le faamanuia e lelei ai. E taufeasogi tagata uma ma le ua tali atu i upu tonu.”—Faataoto 24:24-26.

Afai e lolo atu se faamasino i omiga o le faia o faatogafalea po o faiga lē alofa, ma faailoa atu ai le tagata amio leaga e avea o sē e amiotonu, o le a manatu la isi ia te ia ua lē agavaa mo lona tulaga. Ioe, e oo lava i “tagata” o Nuu Ese o ē na faalogo ai i sea faamasinoga lē tonu, e lē tusa ma le tulafono, o le a tali mai ma le manatu faatauvaa! I le isi itu, afai e aʻoaʻia ma le lototele e se faamasino se tagata leaga ma tali atu i upu tonu e tusa ai o le faamasinoga ua faia, o le a ia maua le faaaloalo ma le alofa o tagata. O le a uunaia tagata lautele ina ia ofoalofa atu ia te ia “le faamanuia e lelei ai.” E pei ona taʻua atili ai e le faataoto: “E taufeasogi tagata uma ma le ua tali atu i upu tonu.”

O sea feasogi sa faaalia ai le faaaloalo i le va o tagata—i le va o le faufautua ma i latou o loo matauina ana aʻoaʻiga tonu. Atonu e oo lava i lē o aʻoaʻia o le a tali fiafia mai o ia lava ma faaalia lona faalogona alofa mo le faamasino. Fai mai le Faataoto 28:23: “O le ua aoai i le tagata, e mulimuli ane e alofagia o ia e sili i le ua tautala faaoleole.” O le mea lea, o i latou o loo auauna o ni toeaina i le faapotopotoga i aso nei e tatau ona alofia le faatagaina o faigauo po o faiā faaleaiga e faapioina ai la latou faamasinoga. E ala i le tuuina atu ma le tonu o le fautuaga manaomia, o le a maua ai e toeaina le faaaloalo a le faapotopotoga.